ممكن قصيدة الشاعر

[b6h]

السلام عليكم ورحمة الله وبركاته

اخواني انا سمعت قصيدة الي يقول مطلعها الولد ان جاد جيده من خواله **وان تردا له خوالن خايبيني
ودي بالقصيده وقالولي ان الي قالها معشي الذيب العجمي فياليت الي يعرفها يخدمني بالقصيده وشاكر لكم

[مـحمـد]

الاخ العضو بطه حياك الله في منتديات العجمان وابشر باللي تبي :)


الشاعر المعروف هو راشد بن حسن بن رحيان العجمي - الله يرحمه ( ابن الذيب )


والقصه هي انه يوم من الايام أشرت له عجوز ومعها حمار قالت وصلني يا الأجودي قدام شوي قال ابشيلك بس الحمار .لا قالت له خلاص روح الله يستر عليك بيجي الذيب ويشيلني انشاْ الله تقصد راشد العجمي .. قال لها يا خاله انا راشد الذيب .. اركبي وابشري بالخير.


وقال هذه القصيده :




قالها إبن الذيب من هاجوس بالـه = كلمةٍ يلعـب بهـا والبـال زينـي
قالها يومـه طرالـه مـا طرالـه = من هواجيسٍ تشيب المرضعينـي
غرّني بعض الرجال بكثـر مالـه = مادرى إن الموت في حبل الوتيني
كيف ينفعني وبعض الناس خالـه = ما يدوم البيت كان الساس طينـي
ماش وين اللي عوايـده الشكالـه = مثل إبن ظافر حمد ليتـه يجينـي
الثنا والجـود دايـم فـي خيالـه = علّمـه ظافـر سلـوم الطيّبينـي
جـوّد العليـا ولزّمهـا عيـالـه = وأدركوا من علمته دنيـا ودينـي
واهني من باع حظّـه وإشترالـه = سار في درب النبي وأخزا اللعيني
موقفـه ماكـل رجّـالٍ ينـالـه = ومن بغا ممشـاه يقعـد مرّتينـي
وكم ذبح من حايلٍ من حر مالـه = وعادته لطمـة خشـوم العايلينـي
حالفٍ ماخذ على الطرقي ريالـه = وبالثلاث محرّم إنها مـا تجينـي
لا لقيت اللي على السكّـه لحالـه = يلتفت ويقول : ويـن المستحينـي
أوقف الموتر حيا وأبغا الجمالـه = يوم ولد اللاش وجهه مـا يلينـي
والطمع في كرّوة الرجلي رذالـه = خصّ به وإن جا مجال الغانمينـي
والردي في حالةٍ ماهيـب حالـه = يا عوينـه مـن كـلام الطيّبينـي
الولد وإن طاب قالوا : من خواله = بالخوال يسـال قبـل الوالدينـي
وأركبه لعيون مـن زيـنٍ دلالـه = ما تحاكوا فـي قفـاه الرامسينـي
ما بغى غيري وأنا مابغـا بدالـه = قاعدٍ لـي بالرجـا مـدّة سنينـي
ما قعدنا فالعمـل نبغـا الرزالـه = ناخـذ العليـا طريـق الفايزينـي
وأشرب الفنجال وأكـب البيالـه = تابـعٍ سلمـي سلـوم الأولينـي

[b6h]

مشكوؤ اخوي العجمي لاكن البيت الي سمعته يقول الولد ان جاد جيده من خواله *** وان تردا له خوالن خايبيني هل هي قصيده ثانيه او انها محرف ذا البيت

[مـحمـد]

عزيزي البيت هذا له عدة وجوه عند الناس يعنى اكثر من معنى وتغيرت بعض الكلمات او الاحرف .

ولكن باعتقادي هذا الصحيح كما ذكرت بالقصيده

[b6h]

يعطيك العافيه واسفين على الازعاج

[b6h]

طيب اوي فيه قصيده يمدح فيها شيخ قحطان ورد عليه بعد شيخ قطحان لو تقولي القصيده اكون شاكر لك

[مـحمـد]

عزيزي ماعندي خبر عنها والله ولكن انشاءلله احد الاعضاء يجاوب على استفسارك عن قريب :)
وحياك الله

[محمد آل نصار]

قصه وابيات جميله وتستحق الحفظ





ابن فادر