الشيخ الشاعر / فهد بن ناصر آل منيخر في قصيدة لإبنه بعد حصوله على شهادة الماجستير

[الزائر]

هذه القصيدة قالها الشاعر الشيخ/ فهد بن ناصر بن سرحان بن منيخر

في ابنه محمد بن منصور بن محمد بن منيخر

بمناسبة حصوله على شهادة الماجستير



يعيش من جاب الفخر والشهادة = معرب الجدين مقدام الأولاد

طير على الهده جديد هداده = للطايله والعز والمدح صياد

تعب وكافح لين حصل مراده = عساله التوفيق وأيامه اعياد

يستاهل النعم الحقيقي وزياده = ترفع له الرايه على روس الأشهاد

ولاهي غريبه لعتلى للرياده = يشوقه التاريخ وفعول الأجداد

جده على الشيخه مثبت شداده = يوم الحروب ويوم صيحه ومهجاد

اليعتلى منصور صهوة جواده = قاد السرايا والمخاليق شهاد

ابو فهد مقدامها في السياده = مع سربة ال سفران فرسان وأسياد

واتلى كلامي كفو راع الشهادة = عسى حياته كلها خير واسعاد



وقد جاوبه الشاعر البركان الثائر منصور بن محمد بن منيخر




فهد ولد ناصر له الطيب عاده = والعز والنوماس من طبع الأجواد

والحلم والمعروف شربه وزاده = ولاهوب لوجيه المخاليق عباد

ومن يزرع الحسنات فاز بحصاده = ومن يزرع السيات للشر حصاد

والوصل للأرحام فرض وعباده = تعادل بحسناتها حج وجهاد

و اوصيك يامحمد بدرب الركاده = وانا ادري انك شيخ تفسير واسناد

لاشفت زول القرم وقف وناده = قرم وعلى شوف المشاكيل معتاد

لاجنب الواجب كبير الوساده = ماهمه الا النوم والشرب والزاد

هو ضامنٍ دنياه امان وسعاده = او ضامنٍ عمره ملذات وارقاد

مايطوي الليل الطويل وسواده = الا نجوم الليل والناس هجاد

وسلامتكم

[جطلي بن فهد]

صح لسان ابوعبدالعزيز ,على القصيده الجميله
وبيض الله وجه ابومحمد على الرد الجميل وصح لسانه
والاخ محمد يستاهل
ولاهنت يالزائر على نقلها وبيض الله وجهك

[فلاح بن ملبز]

جعله مبارك ومنها إلى اعلى

وصح السنتهم كلهم الصوت والصدى

ويعطيك العافيه ع هالنقل الرائع

ولاهنت

[نويصر]

الزاير (((بارك الله في امرء عرف قدر نفسه)))
صح الله لسان ابوناصر وصح الله لسان ابومحمد