ما حصل بمجلس ابن رشيد ومعركة عروى بين ابن رشيد وعتيبة

[العماني]

حضر مخلد القثامي صدفة عند ابن رشيد فسأله ابن رشيد قائلا: من الرجل ومن اي القبائل؟ فرد عليه مخلد بقوله:


حنا عتيبة كم حريبا لطمناه=دقلاتنا مثل الخيال الرزيني
وحنا اهل نجد وبسيوفنا ملكناه=وغابت شموس اهله الاوليني
شرقنا يم الحسا واقصى قراياه=وغربنا يم الحجاز مردفيني
تبرهجي في حمضته واشربي ماه=تبرهجي يامقرعات الحنيني
والفصل في اربع سنين مسماه=لين اودعت سمو القبايل طنيني
منها يوما على الظال واقصاه=منها الجبال العلط عيت تبيني
ويوماً على الجال العويند فعلناه=على الدويش مشيب المرضعيني
وجنوبنا وادي الدواسر قريناه=وشمالنا صوب المدينة يميني

لم يكد ينتهي مخلد من القصيدة حتى وصله ابن رشيد بالسيف يريد قتله
،فتدارك مخلد القثامي الموقف وقال:


والله لولا شيخاً وطتنا زكاياه=ماناخذ القصرة من الحاربيني
ابن رشيد اللي له الخيل مهداة=ابن رشيد مروع الغافليني
يجر سيراته وذروات تبراه=من كثرهم يا راحم الراحميني

فقال ابن رشيد: سلمت ولكن اذهب الى قومك واخبرهم اني نويتهم بالحرب, وسلم له رسالة تهديد وطلب منه تسليمها لشيخ عتيبة في ذلك الوقت ابن هندي

فتوجه القثامي لأبن هندي على عروى وسلمه رسالة ابن رشيد, فقال :زين سويت يا مخلد ،ورد ابن هندي برسالة تهديد اخرى يوضح فيها ابن هندي انه مستعد لحرب ابن رشيد ويستطيع هزيمته وان أحوج الامر ان تقام الحرب في حائل قاعدة ابن رشيد, بقوله:

يامحمد بن عبيد كانك ببرزان=شراً تلاقيه الوجيه الشريره
ومن زان حنا على الزين خلان=ومن شان نسقيه الجروح الضريرة

وبعد أن تهدد محمد بن هندي محمد بن رشيد بأن يحاصره ببرزان ما كان من ابن رشيد الا ان جمع أتباعه من البادية والحاضره ومن أهل القصيم،وهاجم محمد بن هندي ومعه هذال ابن فهيد شيخ الشيابين(عتيبه) فأغار عليهم صباحاً وهم بعروى،ولما أوشك أتباع ابن هندي على الهزيمة جاءهم مدد من الروقة (عتيبه) وقيل ان مدد الروقة كان في يوم الرحى وكادت الحرب تتعادل بين الفريقين إلا أن الغلبة كانت لابن رشيد في النهاية بعد عناء شديد وصارت هزيمة خفيفة على عتيبه.

وفي أثناء المعركة حصل لابن هندي وقعة ضارية عند ابله المعروفة الشرفا مع المنقية ماشية ابن رشيد .
وجاء السطامي الشمري وكان قد شرب فنجال ابن هندي ،فضربه ابن هندي بالسيف فبقي نصفه على ظهر الفرس فكان منظراً بشعاً أرهب مهاجميه.

واسترد ابن هندي معظم ماشيته،وغنم ابن هندي خيولاً (قلايع) وبعد المعركة ناداه ابن رشيد وأعطاه الأمان وطلب أن يؤدي الخيل ويرد ابن رشيد الابل فقال ابن هندي:
أما عتيبة فقد تفرقوا بما غنموه وأما أنا فليس عندي غير أربعة عشر جواداً سأرسلها لك.فخذ كل ما عليه العضاد ((العضاد وسم الحمدة جماعة ابن هندي))وان أردت غير ذلك ارسلت لك قيمته.

وكان مع ابن رشيد ليل وفوران المتلقم من العجمان ،فقال حمود بن رشيد يوصي ليل المتلقم بحمل خطاب الى الشيخ راكان بن حثلين:

يا ليل سلم لي ليا جيت راكان=سلم على زيزوم يامٍ وأميره
اليوم صاروا بالعرب تقل جيران=ومن اين ما وجّه تقفّوا نشيره
واذكر لهم بالكون طيحة غزالان=ثلاث مراتٍ بوجه المغيره(1)
يوم حضرنا فيه ليل وفوران=يومٍ على عروى تقطع غثيره
ان كان ابن هندي نوانا ببرزان=حنا على عروى قطعنا مسيره
جينا على وضح النقا عقب الآذان=ذبحت ******** الجمل بالمريره
جينا على ذروات عجلات الأقران=مستجنبين كل قبّا ظهيره
حصان الصّميد اللي يسمّى صنيتان=صيتٍ بلا جريٍ ووصوفه شهيره
ان جاك بالعرضه اليا تقل ديقان=يفزع بسيفه سلةٍ من جفيره
من كان باللقوات روغات الأذهان=ما ينقهر غاد الجدا من منيره
والسابق اللي عندكم يا بوسلطان=لها بوجهك شامةٍ مستديره(2)

(1)غزالان:الأمير محمد بن سعود وكان حاضر الكون.وذُبح تحته ثلاث من الخيل لإقدامه وفرط شجاعته.
(2)يشير الى ان جواد ابن هندي(ابوسلطان)انما كان مسروقاًوقد رد عليه الشيخ راكان بن حثلين:

يا راكبٍ من عندنا فوق شقران=خرزها بالخرج فوق النجيره
أوصل سلامي لأخو نوره ببزان=وعقب السلام تخبّره بالسريره
من باب برزان ليا باب نجران=ماهو انا يالضيغمي انت أميره
علمٍ لفانا فيه ليلٍ وفوران=استر قلبي يوم جانا بشيره
جا من حمودٍ شوق ميّاح الأردان=هو شوق من تزها الشقايق نظيره
عضيد أخوه بصادق الفعل ولسان=ودبّوس راس اللي دوابه مسيره
فرز الوغى لا جاء ثقيلات الأكوان=لا سل مصقول السّني من جفيره
خبّرتني يا حمود عن طير حوران=يومٍ على عروى تكسّر عويره
هلت مخاييله بردجٍ وسبهان=ما ينتميّز وردها من صديره
تذكر محمد جامعٍ نجع عتبان=ذخيرةٍ ياويّ والله ذخيره
الأمر قدره الولي عالي الشان=والا عتيبة ما عليهم قصيره
كرمان وان ركبوا الخيل فرسان=اليا اختلط عج الرمك بالمغيره
سبيتنا سبٍ على غير برهان=ما تستوي هذا لزبن العشيره
وحنا بديرتنا ولا حن بجيران=في شاية اللي ما يوازي جويره
حامين ديرتنا بخيلٍ وفرسان=يوم ان كلٍ له حدودٍ وديره
من زان حنا له الزين خلان=وضرٍ اليا حرّك تزايد سعيره
ما قل دل وزبدة الهرج نيشان=والهرج ييزي صامله عن كثيره


وقد عارض ضيف الله بن حميد ويقال فراج التويجري قصيدة ابن رشيد :


يا حمود كنّك قاعدٍ وسط بزران=لا بان لك فعلٍ ولا لك عشيره
اليا بغيت الشيخ يوقفك سبهان=تاقف لما ان العلم يرجع لأميره
لولا حسن نوّخ بذربين الأيمان=راحت عليكم يا بوماجد كسيره
أولاد علي مطوعة كل فسقان=عاداتهم بالكون كف المغيره
حنا خذينا الخيل قلعٍ بالأرسان=اصايلٍ في نجد حتى الجزيره
والسابق اللي قلت عند ابن سلطان=مع تسعة آلافٍ علينا مغيره
يا حمود لا نسرق ولا حن ببوقان=البوق في حكمك عسى الله يديره
ابن سعود اللي يسمى غزالان=حلّى بتال الخيل مثل السعيره
الذم ما يهفي للأجواد ميزان=والمدح ما يرفع يدينٍ قصيره

ولبرغش بن طواله أبيات أوضح فيها حقيقة المعركة وعي يوم الرّحى:


نوٍ نشا من روس عالي جباله=هلّه على ابن حميد هو والشيابين
عقب اوجهوا جا فزعةٍ من شماله=اولاد روقِ مرجحين الموازين
راجوا علينا روجةٍ باحتماله=والهوش بان وتالي الهوش جا شين
شبّت حرايقها وصارت شعاله=وقودها حم الرمك والغلامين
من ضرب اهل عمهوج راحت دباله=مير اقمحن يا لابسات السباهين
لكن قشعه في جماجم رجاله=قنيب ذيبٍ في علو الضلاعين
وابن محيّا ضايقونا عياله=عجلين بالردات نسل الشياطين

[ضيف الديوان]

الله يعطيك العافيه اخوي العماني على القصه الطيبه

حقيقه لا اخفي اعجابي الشديد بهذا البطل المعروف محمد بن هندي

فكلما قرات عنه ازددت به اعجابا

[أبوعمير]

لاهنت اخوي العماني على المشاركة

والمعروف أن محمد العبدالله الرشيد لم يهزم في معركة قط

وابن هندي معروف بشجاعته وكرمه ولكن لم يحالفه الحظ

أبوعمير

[نـاصـر]

لاهنت يالعماني علي ذا السالفه الطيبه ونعم والله في ابن رشيد وبن هندي

[العماني]

ضيف الديوان

أبو عمير

بن هادي


مشكورين على الردود الطيبة والله لا يهينكم

تقبلوا تحياتي،،

[ولد ال صالح]

لاهنت لاهنت على الموضوع والسالفه وقصايدها

الله يعطيك العافيه

كنت اجهلها السالفه ذي بس

هذا والله العالم العلم الوكاد

تقبل

سلاااااامي

[جالس بن مبارك]

لا هنت يا العمانى
سالفة طيبه من وجه طيب

[العماني]

ولد آل صالح

لورنس


مشكورين على الردود الطيبة ولا هنتوا.

تقبلوا تحياتي،،

[أبو الوليد]

لا هنت يا بومبارك على السالفه والقصايد الطيبه

تقبل تحيات

اخوك ابو الوليد

[العماني]

حياك الله أخوي ابوالوليد واسعدني ردك الطيب

تقبل تحياتي،،

[مبروك]

السلام عليكم .........

القصائد مبعثره وغير محلها قصيدة راكان حذفت منها ابيات ونسبت لغير لماذا؟؟


يقول راكان...... الاحسان ياابن عبيد يجزي بالاحسان .. والشر يجزا له وجيه شريره

لماذ هذا البيت ليس موجود ؟؟

والبيت الذي نسبه للتويجري الذي يقول ... الذم مايهفي للاجواد ميزان .. والمدح مايرفع ايدين قصيره ..

هذا البيت لراكان ومشهور.. !

القص واللزق من الكتب الغير معتبره غير صحيح

والسلام عليكم

[العماني]

الأخ مبروك

كلامك صحيح حيث خلط الرواة بين قصيدة راكان وقصيدة ضيف الله بن حميد أو التويجري ،وهذا دايماً ما يحدث في كثير من القصايد كمساجلات الشيخ تركي ابن حميد والشيخ محمد بن هادي بن قرملة ،وقصيدة ابن شافي يومه يزهم ابن هادي ورد الشيخ راكان عليهم.

بس الغرض الاساسي ورأس الموضوع هو معركة عروى وأسبابها .وبخصوص القصايد فأنا جبتها من كتاب (من آدابنا الشعبية في الجزيره العربية)الجزء الثالث للشيخ منديل الفهيد.واذا كنت تعرف القصايد كما تقول بدون تبعثر فأت بها لتعم الفائدة.


تقبل تحياتي،،

[سعود الناصر]

يعطيك العافيه يا العمانى

[عادل الشمري]

لا هـنت يالعماني على القصـة والقصـايد المدعمة لها...

لا شك إنها استهلكت منك مجهود كبير...الله لايحرمنا من فوايدك ،،،

[ابوحمد الشامري]

لاهنت يا ابو مبارك على هذه المشاركه الجزله ونعم في ابن رشيد وفي ابن حميد.

لا هنت يا السنافي أخوك أبو وحمد الشامري

[العماني]

سعود الناصر

الله يعافيك يالطيب ولاهنت على المرور

[العماني]

كاتب الرسالة الأصلية عادل الشمري
لا هـنت يالعماني على القصـة والقصـايد المدعمة لها...

لا شك إنها استهلكت منك مجهود كبير...الله لايحرمنا من فوايدك ،،،

ومن قال أخوي عادل ولا هنت يالسنافي على الرد الطيب الذي اسعدني.

تقبل تحياتي،،

[العماني]

كاتب الرسالة الأصلية ابوحمد الشامري

لاهنت يا ابو مبارك على هذه المشاركه الجزله ونعم في ابن رشيد وفي ابن حميد.

لا هنت يا السنافي أخوك أبو وحمد الشامري

والنعم بحالك يا بوحمد والله لا يهينك على المرور

تقبل تحياتي،،

[محمد السبيعي]

ونعم والله فيهم ثنينهم بن رشيد وبن هندي

شيوخ و وافين

لاهنت يالقرم على سرد هذه القصه

اخوك السبيعي

[العماني]

والنعم بحالك يالسبيعي والله لايهينك على الرد الطيب.

تقبل تحياتي،،

[قراش الضاعني]

مشكور ولاهنت

[العماني]

الله يعافيك ولا انت يالضاعني

تقبل تحياتي،،

[تركي بن ماضي]

منت سهل وبس هذا اللي عندي


تسلم على الموضوع الجميل الأكثر من رائع .

[العماني]

ومن قال يسلم يا ابوماضي

ولاهنت على المرور يالطيب.

تقبل تحياتي،،

[محمد العتيبي]

==========================================
بسم الله الرحمن الرحيم

أشكرك أخوي العماني على سرد هذه المعركة وبيض الله وجهك

لكنك أخوي قد جمعت المعارك الثالث المشهوره بمعركة واحد

والمعارك الثلاث هم عروى . الانصر . الرحا

======================================

كون عروى والمعروف بصباح عروى

كان أبن هندي يستضيف عبدالله بن فيصل ال سعود وأخوه محمد عنده وجاءه مرسول أبن رشيد يطلب من ابن هندي زكاة عتيبه فتشاور
عقاب بن شبنان مع محمد بن هندي وهم أبناء عم وكان عقاب هو الشيخ
وتشاوروا في الامر فرفض أبن هندي أعطاءه الزكاه وقال أن الله أحياني ( لخليها تلزز جنوبها على قصر برزان)
فسمعهم المرسول فكتب أبن هندي مكتوب لابن رشيد واعطاه المرسول وعندما وصل المرسول لابن رشيد
عطاه الكتاب وقاله ماله لزوم تقرأ الكتاب يالامير سمعت ابن هندي يقول كذا وكذا
فغضب أبن رشيد وغزا ابن هندي على عروى وكان معه حسن بن مهنا أمير بريده وكان المقطه والشيابين والعضيان من عتيبه هم فقط الحاضرين
والتحمت الجموع وتقاتل الفرسان
وطلع واحد من فرسان شمر ويقول ياهل الخيل وين أبن هندي وكان قد شرب فنجاله فأعترضه فارس من عتيبه
وقاله ( يسدك عن العود اولده) وضربه بالرمح وقتله
أصيب أبن هندي في رجله وذبحت فرسه وسقط وثنا دونه فارس من المقطه يقاله ( قراش بن جعيري المقاطي )
واركبه هذال بن فهيد معه رديف وقام هذال بن فهيد يصقع ابن هندي بكوعه ويقول ( أعتز أعتز للفرسان والله
ان ماعتزيت أنا مانشوف النصر ) فقام ابن هندي يعتزي للفرسان لين أنهزموا شمر فلحقوهم العتبان وقاموا
يقتلون منهم فقال حسن ابن مهنا لابن رشيد نوخ والله ان مانوخت واحتميت موخرة جيشك انهم ما يخلون منا واحد
فنوخ ابن رشيد شمال عروى 4 كيلو في شعيب كله عوشق وتبطحو فيه وكلما جاهم فارس رموة وتقهقرت عتابه ( هذا الموقع سمي بحرجه العوشق) الى الان .

يقول ضيف الله العفار
لاولا حسن نوخ بذربين الايمان ** راحت عليكم يابو ماجد كسيرة
اولاد علي مطوعه كل فسقان** عاداتهم بالكون كف المغيرة

اي ان اولاد علي كفوا عتيبه عندما نوخوا لها

عبدالله ابن فيصل ال سعود حضر المعركة وقتل تحته ثلاث خيول من فرط الشجاعه والاقدام

يقول حمود بن عبيد الرشيد

وأذكر له بالكون طيحت غزالان = ثلاث مرات بوجه المغيره

وبعد ان نوخ حسن ابن مهنا كانت الهزيمه على عتيبه ولكنها خفيفه
ملاحظه كون عروى حدث سنة 1300هـ

تقول اخوي ان الحصان اللي قال عنه ابن رشيد هو حصان ابن هندي .
مالك لو يالقرم الحصان لراكان والقصيده كلها موجهه لراكان من حمود بن عبيد الرشيد يلومه لعدم
حضوره
والدليل على هذا قول الشيخ راكان
سبيتنا سب على غير برهان = مايستوي هذا لزبن العشيره
وقول العفار
والسابق اللي قلت عن ابو سلطان = مع تسع الف علينا مغيره

يقول حمود العبيد الرشيد



ياليل سلــم لي الــى جيت راكـان = سلــم علــى زيــزوم يام واميــره
اليوم صـاروا بالعـرب تقـل جيـران = ومـن ايـن ماوجـه تقفـوا نشـيــره
واذكر لهـم بالكـون طيحـة غـزالان = ثـلاث مــرات بـوجـه المغـيـــره
يـوم حضرنـا فيـه ليـل وفــوران = يـوم علـى عـروى تقطـع غثيـــره
ان كان ابـن هنـدي نوانـا ببـرزان = حنا علـى عـروى قصرنـا مسيــــره
جينا على وضـح النقـى عقـب الاذان = وذبحـت قـواد الجـمـل بالمـريـــره
جينا علـى ذروات عجـلات الاقــران = مستجنبـيـن كــل قـبـا ظهـيـــره
حصان الصميد اللي يسمـى صنيتــان = صيت بـلا جـري وصفوفـه شهيـــره
ان جاك بالعرضـه الـى تقـل ديقــان = يفـزع بسيـف سلـة مـن جفـيـــره
من كان باللقـوات روغـات الاذهــان = ماينقهـر غـاد الجـدا مـن منـيـــره
والسابق اللي عندكـم ياابوسلطـان = لهـا بوجـهـك شـامـه مستـديـره
وهذا رد الشيخ راكان


ياراكب من عندنـا فـوق شقـران = خرزهـا بالخـرج فـوق النجيـره
أوعل سلامي لاخو نـوره ببـرزان = وعقب السـلام تخبـره بالسريـره
من باب عمان اليـا بـاب نجـران = ماهو انا يا الضيغمي انـت اميـره
علـم لفانـا فيـه ليـل وفــوران = استـر قلبـي يـوم جانـا بشيـره
جا من حمود شـوق ميـاح الاردان = هو شوق من تزها الشقايق نظيـره
عضيد اخوه بصادق الفعل ولسـان = ودبوس راس اللي دوى به مسيـره
فرز الوغا لاجا ثقيـلات الاكـوان = لاسل مصقول السني مـن جفيـره
خبرتني ياحمود عن طير حـوران = يوم علـى عـروا تكسـر عويـره
هلـت مخاييلـه بـدرج وسبهـان = ما ينتميـز وردهـا مـن صديـره
تذكز محمـد جامـع نجـع عتبـان = ذخـيـره يــاوي والله ذخـيـره
الامر قدره الولـي عالـي الشـان = والا عتيبـه ماعليـهـم قصـيـره
كرمان وان ركبوا على الخيل فرسان = اليا اختلط عـج الرمـك بالمغيـره
سبيتنا سـب علـى غيـر برهـان = ماتستـوي هـذا لزبـن العشيـره
وحنا بديرتنـا ولا حـن بجيـران = في شايه اللـي مايـوازي جويـره
حاميـن ديرتنـا بخيلـى وفرسـان = يـوم ان كـل لـه حـدود وديـره
من زان حنا له على الزيـن خـلان = وضر اليـا حـرك تزايـد سعيـره
ماقـل دل وزبـده الهـرج نيشـان = والهرج يكفي صامله عـن كثيـره

وهذا رد ضيف الله العفار


ياحمود كانك قاعد وسط بـرزان = لابان لك فعل ولا لـك مشيـره
اليا بغيت الشيخ يوقفك سبهـان = تاقف لما ان العلم يرجع لأميـره
لو لا حسن نوخ بذربين الايمان = راحت عليكم يابو ماجد كسيـره
اولاد على مطوعة كـل فسقـان = عاداتهم بالكون كـف المغيـره
حنا خذينا الخيل قلع بالارسـان = اصايل في نجد حتـى الجزيـره
والخيل اللي قلت عند ابن سلطان = مع تسعـة الاف علينـا مغيـره
ياحمود لانسرق ولاحن ببوقـان = البوق في حكمك عسى الله يديره
وابن سعود اللي يسمى غـزالان = درع بتال الخيل مثـل السعيـره
الذم مايهفـي للاجـواد ميـزان = والمدح مايطول يديـن قصيـره



أما قصيدة برغش ومقتل نمر بن برغش فهي في وقعة الانصر

غزى محمد العبدالله الرشيد على قبيلة برقا من عتيبه بقيادة داهية عتيبه محمد بن هندي شمال جبال النير على الأنصر وصبحهم
ودار بينهم قتالاً عنيفاً تصدولت برقا له الا ان الكثره تغلب الشجاعه كما يقال وبعد ما أشتد القتال بينهم تراجعو برقا بعد أن
فقدو كثير من فرسانهم وكان الشيخ بن هندي قد ارسل للروقه يستفزع بهم وقد ارسل للشيخ صنيتان الضيط وابن محيا وفزعو الروقه
وانضمو الى اخوانهم وهزمو ابن رشيد
هذا ماقاله المصادر
المصدر صحيح الأخبار عن مافي بلاد العرب من الأثار

وهذا مانسمعه من الشيبان
وكان سبب غزو ابن رشيد لبرقا هو ان الشيوخ ابن هندي
والهيضل وصنيتان الضيط كانوا عند ابن رشيد وعندما سروا فقد ابن رشيد حصانه فأسر له حمود العبيد الرشيد ان ابن هندي
اطلق الحصان عند مسراه فأرسل ابن رشيد لابن هندي الفارس فهد السطامي يطلب السيف عمهوج سيف الضيط بدل عن الحصان فرفض
وقال رح لامير قله يخلي سيوفنا اللي يباها فقال السطامي اظاهر انك ماسدك صباح عروى ياابن هندي فقال ابن هندي قال امين
يالسطامي جعل اول عين تقابل عيني لادارت دوايرها عينك فقال السطامي امين وتواجهوا بالمعركة وقتله ابن هندي بقطع راسه
اما نمر بن برغش فقتله مقعد بن دحيم بن هندي

يقول الشيخ برغش الطواله وهو في مجلس ابن رشيد عندما سأله ابن رشيد ( وش تقول في فعلنا )
فقال اقول وتعطيني الامان قال ابن رشيد قل ولك امان الله

مزن(ن) نشا من روس عالي جباله 0 0 0 0 خيل على الانصر وهاك الاراضين
خيل على الانصر حقوق(ن) خياله 0 0 0 0 امطر على ابن حميد هو والشيابين
وعقب اوجهو جت فزعة(ن) من شماله 0 0 0 0 بولاد روق مرجحين الموازين
والخيل جاها من سنعهم جفاله 0 0 0 0 مقادم الهيله صعوط المجانين
مالوا علينا ميلتن بحتماله 0 0 0 0 حنى سناعيس وجانا سلاطين
ومن ضرب اهل العمهوج رحنا قباله 0 0 0 0 مير اقمحن يا لابسات السباهين
ياكن ضربه وسط جماعي رجاله 0 0 0 0 قنيب ذيب في علو الضلاعين
وابن محيا ضايقونا عياله 0 0 0 0 من فوق قبن كنهن الشياهين
بشلفا مضاربها سوات الدحاله 0 0 0 0 منها الجياد والخيل راحت حراذين
رجنا وراجوا فوقنا بالعماله 0 0 0 0 والهوش طال وتالي الفعل جا شين
اولاد روق اهل الفخر والجماله 0 0 0 0 عجلين بالردات مثل الشياطين
كلن ينادي بالقشر من قباله 0 0 0 0 لين اذبحوا شمر وراحوا مطيعين
والحرب عقب اليوم ويش عداله 0 0 0 0 ان كان ماهادوا ترانا مهيدين
عقب ابلجن ياعبيد سمحن قباله 0 0 0 0 عادوا فرسان الهوج جفرين




أما الرحا فلا اريد الخوض فيها صراحه عشان محدن يزعل منا لان احداثها قوه ومثبته

واكتفي ان اقول مقتطفات منها وهو ان الشيخ محمد بن هندي قتل الفارس الطوير فيها وذلك لان الطوير تحدى ابن هندي
في مجلس ابن رشيد وتعهد بأخذ المغاتير والمجاهيم ابل ابن هندي فقتله ابن هندي في المعركة

[العماني]

الأخ محمد العتيبي

ووجهك أبيض ومشكور على التعقيب الجميل ، بس حبيت أوضح:

كون عروى لم تكن في يوم واحد بل استمرت عدة أيام وكل يوم له اسم مثل يوم اصباح عروى ، يوم الرحى الى آخره.لذلك الأيام كلها مكلمة لبعضها لذلك وضعناها في موضوع واحد.
والقصايد التي ذكرتها هي مثل القصائد التي وردت في الموضوع.

أما بخصوص الحصان الذي تقول انه لراكان فهذا غير صحيح ،ابو سلطان هو محمد بن هندي اما راكان فهو أبوفلاح.


والسابق اللي عندكم ياابوسلطـان=لهـا بوجهـك شامـه مستديـره

شامة مستديرة:يقصد وسم الحمدة من عتيبة.

مصادر المعلومات أعلاه:

كتاب آدابنا الشعبية من الجزيرة العربية الجزء الثالث للشيخ منديل بن محمد بن منديل الفهيد الأسعدي العتيبي.

تقول أخ محمد:
((عبدالله ابن فيصل ال سعود حضر المعركة وقتل تحته ثلاث خيول من فرط الشجاعه والاقدام
يقول حمود بن عبيد الرشيد
وأذكر له بالكون طيحت غزالان = ثلاث مرات بوجه المغيره))

أحب أوضح لك أن غزالان هو لقب للأمير محمد بن سعود بن فيصل آل سعود وليس كما قلت عبدالله بن فيصل.

وعندي قصيدة لضيف الله العفار للاسف نسيت ذكرها في الموضوع الأساسي وهي في كون عروى والقصيدة مسندها لخاله محمد بن هندي بن حميد،وقيل ان قائلها هو الضيط:

يالله يا منشي مزونٍ بدني=يا من له الشكوى على كل الأحوال
الله من علم خفيٍ شحني=والعين كن لها عن النوم عذال
جموعهم من صيفهم يجمعني=يتلون رجال الهدى ماضي الأفعال
مشوا علينا والبيارق مشني=والخيل ركبت نوها تقهر المال
نخيت (خالي)يوم هن اقبلني=والدمع من عيني على حجرها سال
وصحنا عليهم صيحة واوجهني=والخيل من ضرب المزاريج تنجال
وعمارنا في عزنا يرخصني=والموت لابده على العمر لو طال
الخيل في الجيش الحمر شرعني=لين انقلب في طماعته كل خيال
حنا نقايصنا هروس وشني=ولا عندنا في باقي القش لو مال
خذنا عوضها كا قبا تعني=وعاداتنا نخلي ظهر كل مشوال

تقبل تحياتي،،

[محمد العتيبي]

يامرحبا اخوي العماني

أخوي العماني عروى معركة وحدثت سنة 1300هـ
والرحا معركة حدثت سنة 1310هـ
والانصر معركة حدثت سنة 1303هـ تقريبا

وصباح عروى يوم واحد من الصبح الى قبل مغيب الشمس

والرحا ايضا يوم واحد

اما الانصر فهي اللي استمرت عدت ايام ولكن ماعرف بالضبط كم مده استغرقت


اما بخصوص الحصان فمن القصايد تستدل على المقصود
لو كان المقصود ابن هندي ليه يقول الشيخ راكان سبيتنا سب على غير برهان
وين البيت اللي يقصده الشيخ راكان بالسب في قصيدة حمود العبيد الرشيد

ولو كان المقصود بالبيت الاخير
والسابق اللي عندكم يابو سلطان = لها في وجهك شامه مستدير
هو ابن هندي

ليه قال ضيف الله العفار رد على حمود

والسابق اللي قلت عند ابن سلطان = مع تسع الف علينا مغيره

اترك لك الامر اخوي انظر اليه وخصوصا القصائد تجد المعركة مشروحه بالتفصيل


اما عن غوالان فهو عبدالله بن فيصل اخوي

لان عبدالله بن فيصل وهو اكبر اخوانه بعد عصيان اخوه سعود له واستحلال الرياض
ذهب الى قحطان اولا ثم الى الشيخ مسلط بن ربيعان وكان سبب في معركة طلال الثانيه وهناك اسباب اخرى ايضا
ثم رحل قبل معركة طلال واتجه الى ابن رشيد ونزل عليه وبعدها بزمن خرج من عند ابن رشيد ونزل ابن هندي وكانوا عبدالله ومحمد لان عبدالرحمن والد الملك عبدالعزيز كان مع سعود
والمعني بالامر كله هو عبدالله مابين ابن رشيد وابن هندي

يقول ابن رشيد

ان كان عبدالله جفانا = وحط ابن هندي وزير
مانبي اللي مايبانا = لو كان شيخ وامير


اخوك محمد العتيبي

[العماني]

حياك الله أخوي محمد

بخصوص كون عروى اللي ذكر عنه هو الرواية المعروف منديل الفهيد الأسعدي العتيبي.في كتاب ((من آدابنا الشعبية في الجزيرة العربية))

ويقول المناخ استمر خوالي خمسة وأربعين يوم وفزعة الروقة كانت يوم الرحى.

وهذا كلام ابن عمك ومن كتاب معروف.وانت ياليت توضح لنا مصدرك.

أما بخصوص مقالك:

((اما بخصوص الحصان فمن القصايد تستدل على المقصود
لو كان المقصود ابن هندي ليه يقول الشيخ راكان سبيتنا سب على غير برهان
وين البيت اللي يقصده الشيخ راكان بالسب في قصيدة حمود العبيد الرشيد))

ابن سلطان هو ابن هندي بلا شك بكلام منديل الفهيد،ولا علاقة لراكان بالموضوع واما بخصوص اجتهادك بقولك ما سبب قول راكان:



سبيتنا سـب علـى غيـر برهـان=ماتستـوي هـذا لزبـن العشـيـره

فهذا عزيزي سببه واضح وضوح الشمس فسبب هذا البيت قول ابن رشيد:


اليوم صاروا بالعرب تقل جيـران=ومن اين ماوجـه تقفـوا نشيـره

فرد عليه راكان بسبب كلمته يومه يقول (جيران):


سبيتنا سـب علـى غيـر برهـان=ماتستـوي هـذا لزبـن العشـيـره
وحنـا بديرتنـا ولا حـن بجيـران=في شايه اللـي مايـوازي جويـره
حاميـن ديرتنـا بخيلـى وفرسـان=يـوم ان كـل لـه حـدود وديـره



أما بخصوص غزالان فأقولك أخوي انك وقعت في خطأ كبير فغزالان معروف عند كل العرب انه محمد بن سعود بن فيصل بن تركي.وليس عبدالله بن فيصل كما ذكرت ،وهو شاعر ومزيون وفسموه غزالان وقد قتله ابن رشيد .

تقبل تحياتي،،

[محمد العتيبي]

أختلاف الراي لايفسد للود قضيه

حياك العمالله اخوي اني

تنويه ورجوع الى الحق : نعم اخوي العماني بعد مراجعتي لكتاب شعراء عتيبه تبين لى ان غزالان هو محمد بن سعود بن فيصل بن تركي ال سعود نعتذر ونقول سعدنا بمناقشتك

وأنا ماشككت بكلامك يالغالي ولكن هو رد ومناقشه أخويه لأعتقادي أنك مخطي
ومافي أحد مايخطي طال عمرك ولاني مشكك في كلامك حتى لو أن مالك مصدر فيه

اما عن المعارك فما راح تغلبني :D
لان عندك مصدر وانا عندي مصدرين

وكذا راح نسويها أنتخابات :D

انت عندك مصدر وهو منديل بن فهيد
وانا عندي مصدرين وهم رواتنا وشيبانا وهم مثل ماتعرف ينقلون من اسلافهم اللي احضروا هالمعارك
والثاني كتاب محمد بن دخيل العصيمي شعراء عتيبه الجزء الثاني ترجمة الامير محمد بن هندي ص636

ملاحظه اذا اطلعت على الكتاب راح تلقى ان الكاتب ذكر ان قصيدة برغش في عروى ولو نظرت في الاسفل
تجد انه كتب هذه القصيدة قيلت في وقعة ( الانصر ) بين عتيبه وابن رشيد


اما بخصوص الحصان اقولك ياخوي نعم ردك مقنع

واذا كان قصد ابن رشيد هو ابن هندي

شنو معنا رد ضيف الله العفار

والسابق اللي قلت عند ابن سلطان = مع تسع الف علينا مغيره

فسرها طال عمرك بالعقل هل ابن هندي يغير على ربعه

تحياتي لك
اخوك محمد العتيبي

[العماني]

حياك الله يالعتيبي

وارجوا ان شاء الله ان الصورة اتضحت لك ،ولاهنت على المعلومات القيمة.

تقبل تحياتي،،