العذر ركبه يازمان البخاشيش

[محمد بن صويان]

يللي تبي رايي ترى الراي مشروط =أخذ الصحيح .. بدون ضوضا وتشويش
ماكل شيٍ يطرق السمع مضبوط= بعض الكلام اللي سمعنا خرافيش
الصدق ..لامن صار بالكذب مخلوط=يثير ضجة .. في زمان البخاشيش
والعلم بقلوب الرياجيل ..مخطوط= والكتب قد مرت بتفتيش .. تفتيش
وتبعثرت مابين ..ضايق ومبسوط=وطغى بجو الليل .. حوم الخفافيش
والمبصر أثنا غيبة النور مضغوط=والاغبيا.. ترى العوارف دراويش
والساقط ..بيٌد من يحاليه ملقوط=وانا لعبت الشعر يالاعب الشيش
مدوٌنه .. والبيت بالبيت مربوط= ومشاعري مثل المزون المراهيش
غيث الهجا .. مابين ساده ومنقوط= نحتٍ على صم الحجر دون تغشيش
أسيٌسه ,, وبنيه نوطٍ على نوط=ماهو بتجميعٍ ولاهو بتلطيش
لو الجزا ،، لمٌلطش الشعر بالسوط=أسوط من يبلاه .. وان زِعل حتيش
العذر ركبه .. من مطفف ومحبوط=غيرة رجالٍ تتعب الخيل والجيش
تاقف عن العادات حوطٍ ورا .. حوط=سترٍ لمن عينه هدبها عكاريش
يردون والموت الحمر خط مخطوط= قطاعة الخط الحمر ساعة الطيش
وقانون حاضرنا .. مضيٌق وممطوط=واكثر عداة مبعدين المغابيش
لو مايجي عزٍ من الله مسفوط= ماجاك من روسٍ بليا عراميش
اليعربي في مامضى سابق الشوط=لاطاع مكباشٍ .. ولا طاع شاويش
وأتلا الزمن ومخالطة كل مغلوط= وطاوعة راع الثمان المباهيش
خلا الكبار يضدها كل جحلوط= والحر الاشقر شك فية ابرق الريش
كم شيخ عربانٍ على الراس مخبوط= في ضف من يجعل على اللوح ورنيش
أبليس يبغاله .. من الجيل ساعوط= والا نوكل زاهيات الدناديش
يللي تبي رايي ترى الراي مشروط= جاك الصحيح بدون ضوضا وتشويش