للبنات فقط!!! مهم جدا

[سياتل]

ماسكم الله بالخير
و وش حالكن
السالفه و مافيها اني ماخذ ماده بالصيف اسمها (women study )

ليش اخذها غصب موب على كيفي:(

و الحين مطلوب مني اسوي لقاء معى ثلاث فئات عمريه من النساء

الشروط :
شرط واحد فقط.

الفرق بينهم بالعمر يكون عشر سنين
مثلا 17
27
37
موب لازم الدقه

الاساله :
موب لازم تكون متشابهه بين الثلاث .
من 5 الى عشر اساله

مضمون الاساله:
عن الجمال و اهميته و معاييره و السن و هل يقل اهتمام المراه بامور التجميل لمن تكبر
و هل المراه الكبيره بالسن ممكن تكون جميله...........الخ


ممكن تقولون ليش ما اسال بنات عندي بمريكا .
انا بالذات على ابو من الخليج طلبت مني المدرسه اسال بنات من الخليج؟؟

ياليت تحاولون تجاوبون على الاساله و اللي تقدر تسال احد من الفئات العمريه المذكوره اكون شاكر لها

ملاحظه : موعد تسليم التقرير يوم الاربعاء.

عزووف : بثبت الموضوع ليوم الاربعاء بعد اذنك .( و ترى انطر منك الاجابه على الاساله):)

بنتظار تجاوبكم

[اطياف الماضي]

هلا بك سياتل

حنا نعين ونعاون :D

وانا مستعدة خيوووووووو

تحيتي لك

[سياتل]

تسلمين
و بانتظار الاجوبه و ياليت تقوليلي اذا تقدرين تسالين احد من الفئات العمريه المذكوره بالموضوع ,او وحده اصغر منك بعشر سنين و وحده اكبر منك بعشر سنين.

مثال على نوعية الاساله ( مو لازم التقيد بها )

1- مواصفات المراه الجميله؟
2-هل للتلفزيون تاثير على معاير الجمال ؟
3-بعد الزواج , هل يقل الاهتمام لدى المراه بجمالها؟
4-كم تصرف بالشهر على مستحضرات التجميل؟و نقارن بين الفئات الثلاث...
5-المراء تبحث عن الجمال لزيادة الثقه؟ ام الثقه تزيد من جما المراه؟ ام لك وجهة نظر اخرى؟

الاساله هذي اللي طلع من ذمتي:D

ممكن اظافة اساله اخرى او توجيه نوعيه اخرى خصوصا ان الفارق العمري لازم يكون على الاقا 20 سنه بين الاي بيشملهم الاستفتاء؟؟
و مو معقول نسال الاساله نفسها لبنت 17 او 18 و مراه في الاربعين.

اذا عندكم اساله بخصوص الموضوع او تبون توضيح اكثر لا تترددون

و فعلا احتاج مساعدتكم

فمان الله

[كويتيه]

يعطيك العافيه سياتل...

خلاص ولا يهمك.. انا بحاول اسالك و انشالله بنعطيك الجواب:)..


والله يوفقك انشالله

[سياتل]

تسلمين كويتيه هذا العشم

و ليش ما تبلشين بنفسك بس ضروي العمر اذا ماكو احراج

و بعدين تكلمي و ردي على الاساله اللي انا حاطها

و اذا عندج افكار زياده , ما فيه مانع:)

بانتظارك و باقي الخوات

[كويتيه]

اوكي ولا يهمك سياتل بجاوب عن نفسي انا.. من اللي فهمته.. انك تبي تعرف شنو الجمال بالنسبه لي.. و عناصره ومعاييره.. بقولك عن نفسي.. وانشالله اللي اكتبه بيفيدك:)..

اول شي انا عمري 24.. .. بالنسبه لمعايير الجمال.. او مواصفات الجمال.. همم يعني لو الوحده مو حلوه.. المكياج بيساعدهاا انهاا تكون حلوه.. تسريحه شعرهاا.. حتى اللبس.. و هم بعد الجسم.. يعني وحده جيكره و هم بطه وتبي الناس يقولون انهاا حلوه لالا مو شي.. يعني بالمحافظه على الجسم اعتقد انهاا تكون وحده من عوامل الجمال.. و المحافظه على البشره بعد.. هم شي مهم للجمال..

واماا عن العمر.. اي كل ما اكبر اهتم للمكياج و سوالف التجميل اكثر واكثر .. و انتبه حق برامج اللي تخص المراه بالتلفزيون و طريقه والاساليب الحديثه لعمل المكياج و الموضه و الكسسوارات.. كل شي..

اما عن الصرف. صراحه وايد.. يعني كل شي اشوفه بالسوق وماعندي منه.. و اشوف انه يدييد بشتريه.. يعني صراحه اصرف وايد على المكياج.. .. شنسوي بنات..:o.. مو انا كل البنات و بكل الاعمار الحين يصرفون وايد على المكياج..

همم مادري هذا اللي اقدر اقوله... اماا عن اذا المتزوجه تتغير ولا يقل اهتمامهاا بنفسهاا بعد الزواج.. انا مو متزوجه ماادري بس من اللي اشوفه.. و خصووصا بزمناا الحالي .. و مع تطور كل شي.. لالا صراحه.. المتزوجه تلقاهاا احلى من البنات.:).. بلبسهاا بشعرهاا بجسمهاا بكل شي... تلقاهاا تهتم بنفسهاا اكثر... و تحافظ على جسمهاا اكثر.. هذا اللي اشوفه..

و انشالله لناا عوده حق موضوعك.. باللي نقدر عليه اوكي..و اي استفسارات ثانيه حاظريين:)

[اطياف الماضي]

[1- مواصفات المراه الجميله؟

انا عمري 24 سنة
اول معيار حقيقي للجمال لدى المرأة جمال روحها واخلاقها وبعدين
تأتي اهتماماتها بنفسها من ناحية الشكل يعني المرأة هي اللي تصنع جمالها بنفسها مثلا تهتم بوزنها بحيث انه مايزيد عن الطبيعي وبعد تهتم لاناقتها

من حيث ترتيب شكلها الخارجي واختيار الملابس اللي هي تليق عليها وتحس انها تبرز فيها يعني مو شرط ان كل موضة راح اتبعها عشانها موضة بس يعني لازم تناسبني انا ولازم تكون محتشمة وهذ اهم شئ .. غير كذا انا اهتم بالميك الي يضفي علي جمال مو يشوهني .. يعني طلعات الجامعه مثلا لها ميك اب هادئ والسهرات لها ماكياجها وبعدالقصة لازم تناسب شكل وجهي .. ومع ذلك ما انسى بشاشة الوجه مع الاخرين هي السحر والجمال الاكيد


2-هل للتلفزيون تاثير على معاير الجمال ؟

بصراحة ايه احيان انا االتلفزيون يفيدني في اشياء كثيرة صح اني ما اكون مستنسخة للي فيه بس اخذ اللي يجوز لي .. يعنيالتلفزيون يتقل لي التطورات الجديدة .. ممكن اخذ فيها وممكن لا


3-بعد الزواج , هل يقل الاهتمام لدى المراه بجمالها؟

انا اتوقع عن نفسي اني بالعكس راح اكثر من الاهتمام بنفسي .. عشان زوجي مايطالع بغيري .. يعني راح اهتم بكل جديد يناسبني اغير في شكلي شوي ..
وطبعا راح يكون في حدود المناسب لي ..


4-كم تصرف بالشهر على مستحضرات التجميل؟

المستحضرات انا ما اغيرها كل شهر بش احيان انا القى شئ جديد يعجبني .. يتناسب معي .. واحيان مو شرط تكون الصرف في المستحضرات نفسها .. يمكن تكون في تنظيف او للبس او اشياء ثانية وبصراحة ما اقدر احدده لك لان ممكن
تنقص وممكن تزيد بعد عن المرات اللي قبل .. يعني على حسب ..


5-المراء تبحث عن الجمال لزيادة الثقه؟ ام الثقه تزيد من جما المراه؟ ام لك وجهة نظر اخرى؟

ثقة المرأة في نفسها هي التي تكسبها جمالا وجاذبية .. يعني مو شرط تكون المرأة جميلة بحيث انها ممشوقة القوام وعيونها كبيرة وشعرها طويل وبيضاء لااا.. انا اعتبر المرأة هي تقدر تخلق جماله بنفسها واهم شئ انها تكون واثقة ..



واحب اضيف ان المرأة الخليجية مو شئ جديد اهتمامها بنفسها وبجمالها يعني هالشئ هذا من زمان بس تغيرت الطرق والاساليب


واذا فيه اسألة غيرها انا حاظرة :D

تحيتي لك

[هند]

السلام عليكم ورحمة الله وبركاته

آسفة على التأخر في الرد ،
أنا سئلت كذا وحدة ،
وضفت بعض الأسئلة ، وأتمنى أن أوفق ، فأنت لم توضــح المطلوب بالشكل الكافي :)

****
( الأولى )
العمر : 33

ماهي معايير الجمال ؟
تناسق أعضاء الجسم ( مو طويلة ولاقصيرة ) وتناسق تقاطيع الوجه مع بعضها البعض .

متى يطلق على المرأة وصف جميلة ؟
إذا اتحدت صفتين ( جمال الوجه أوالبدن + جمال الروح ) جمال الروح ينعكس على الخارج من ابتسامتها وعيونها ، ممكن تكون تقاطيعها حلوة ولكن لما تنظر لها لاتشعر بجمالها لأن أخلاقها وروحها تنعكس على وجهها فلاتبدو جميلة )

هل للجمال ســـن محدد ؟
لا ..،

ماهي المرحلة العمرية التى يتمثل فيها الجمال بأبهى صوره ؟
سن الثلاثين ، لأن الجمال هنا يبرز بالنضج الكامل في الجسم والعقل وهذا يتحقق في سن الثلاين ( قمة الجمال )

هل للتلفزيون أثر على تقييمك للجمال ؟
لا ، أبــداً فالجمال هو الجمال ،

هل المرأة الجميلة محظوظة ؟
لا ، بل على العكس أحياناً كثيرة يقال للجميلة ( جمالك مانفعك )

هل الجمال مهم لديك ؟
نعم ، نعم ، نعم

هل تحبين أن تبدي جميلة ؟ ولماذا ؟
طبعــاً ، لأن الله جميل يحب الجمال

كم تصرفي على مستحضرات التجميل شهــرياً ؟
مو شهرياً ممكن كل 3 شهـــور ( كريمات وليس كل مستحضرات التجميل ) ممكن روج ماسكرا ، كحل ، الإهتمام بالبشرة عن طريق اخصائية التجميل ،
150 أو 160 دينار وممكن أقل وممكن أكثر

أيهما أشد اهتماماً بجماله ( المتزوجة أم الآنسة ) ولماذا ؟
الآنســـة ، فالمتزوجة بعد الزواج يقل اهتمامها ، يعنى ممكن يكون الزواج أحد الأسباب اللى تدفعها لطلب الجمال والزينة أم بعده فيقل الإهتمام .

المرأة تبحث عن الجمال لتزداد ثقتها بنفسها ؟ أم أن الثقة بالنفس تكسب المرأة جمالاً ؟
الثقة بالنفس هي من تكسب المرأة جمــالاً ، فترى نفسها أجمل من غيرها ،


السؤدد

[هند]

( الثانية )
العمر :38
ماهي معايير الجمال ؟
طويلة ، عريضة ، تقاطيع وجهها حلوة ، بيضاء ، شعرها أسود ، عيونها وساع
أسنانها بيضاء

متى يطلق على المرأة وصف جميلة ؟
إذا كانت ملامحها حلوة ، جسمها مرتب وحلو ، وجهها وتقاطيعها حلـــوة

هل للجمال ســـن محدد ؟
لا ..،

ماهي المرحلة العمرية التى يتمثل فيها الجمال بأبهى صوره ؟
من سن 32 فما فوق ،

هل للتلفزيون أثر على تقييمك للجمال ؟
نعم ، وايد ..، عن طريق الفضائيات عرفنا أن الجمال يعنى الرشاقة ، تعلمنا أن
هناك طرق عديدة للمكياج تساعد على بروز جمال المرأة ، طرق تصفيف الشعر التي تبرز جمال الوجه ،

هل المرأة الجميلة محظوظة ؟
وايد وايد وايد ، وطبعاً هي قالت ( شوفي حظ نانسي عجرم وهيفاء وهبي وشوفي حظ عتاب ورباب )

هل الجمال مهم لديك ؟
وااااااايدد

هل تحبين أن تبدي جميلة ؟ ولماذا ؟
وايد ودائماً وكل يوم ، إرضاء لنفسي ولأشعــر بالشباب والنفس الحلوة

كم تصرفي على مستحضرات التجميل شهــرياً ؟
تقريبا 160 دينار وممكن يكون أكثر وهذا يشمل كل مايتعلق بالجمال من مستحضرات وإهتمام بالبشرة وبعض الجلسات للمساج وغيره ،

أيهما أشد اهتماماً بجماله ( المتزوجة أم الآنسة ) ولماذا ؟
المتزوجة ، إرضـــاء لزوجها ونفسها ولتبدو في مكان عملها أمام زميلاتها جميلة .

المرأة تبحث عن الجمال لتزداد ثقتها بنفسها ؟ أم أن الثقة بالنفس تكسب المرأة جمالاً ؟
لتزداد ثقتها بنفسها ويزداد أحترام الناس لها ، فأنا مثلاً أقدر المرأة التي تهتم بجمالها ونظافتها وأناقتها



السؤدد

[هند]

( الثالثة )

( العمر : 16 سنة )

ماهي معايير الجمال ؟
بيضـــاء ، رشيقة ، متوسطة الطول ، شعرها طويل ، خشمها حلو

متى يطلق على المرأة وصف جميلة ؟
إذا توافرت فيها الأوصاف اللى ذكرتها

هل للجمال ســـن محدد ؟
لا ..،

ماهي المرحلة العمرية التى يتمثل فيها الجمال بأبهى صوره ؟
من بعد سن 16 يعنى الأجمل سن 20

هل للتلفزيون أثر على تقييمك للجمال ؟
نعم ،

هل المرأة الجميلة محظوظة ؟
مو دائماً ، مرات حلوة وحقودة ومغرورة

هل الجمال مهم لديك ؟
نعم

هل تحبين أن تبدي جميلة ؟ ولماذا ؟
نعم ، لألفت الأنظــــار

كم تصرفي على مستحضرات التجميل شهــرياً ؟
بالنسبة للفلوس اللى عندي ربعهــا

أيهما أشد اهتماماً بجماله ( المتزوجة أم الآنسة ) ولماذا ؟
الآنسة ، لأنها فاضية ماعندها شغل

المرأة تبحث عن الجمال لتزداد ثقتها بنفسها ؟ أم أن الثقة بالنفس تكسب المرأة جمالاً ؟
لتزداد ثقتها بنفسها



السؤدد

[هند]

( الرابعة )

( العمر : 32 سنة )

ماهي معايير الجمال ؟
رشيقة ، بيضاء ، عيونها وساع

متى يطلق على المرأة وصف جميلة ؟
إذا كانت بهذه الأوصاف

هل للجمال ســـن محدد ؟
نعم .،

ماهي المرحلة العمرية التى يتمثل فيها الجمال بأبهى صوره ؟
من سن 25 إلى سن 35

هل للتلفزيون أثر على تقييمك للجمال ؟
لاا ،

هل المرأة الجميلة محظوظة ؟
مو دائماً ،

هل الجمال مهم لديك ؟
يعني ، إيه مهم

هل تحبين أن تبدي جميلة ؟ ولماذا ؟
نعم ، لأن الله جميل يحب الجمال

كم تصرفي على مستحضرات التجميل شهــرياً ؟
ما أصرف ،

أيهما أشد اهتماماً بجماله ( المتزوجة أم الآنسة ) ولماذا ؟
نفس الدرجـــة

المرأة تبحث عن الجمال لتزداد ثقتها بنفسها ؟ أم أن الثقة بالنفس تكسب المرأة جمالاً ؟
الثقة بالنفس تكسب المرأة جمالاً


( آسفة جداًَ إن لم أوفق ، طبعاً ماقلت رأى لأني تعبت :( وأنا أكتب )



أتمنى لك التوفيق
السؤدد

[كويتيه]

ماشالله عليكم بنات.. والله كفيتواا وفيتواا صراحه :).. انا بعد سالت خواتي...

عمر17....

تعتبر الطول والرشاقه.. و زياده عليهاا البشره البيضه اهماا اساس الجمال... و كبر العيون بعد..

و عن مستحضرات التجميل... تحب يكون عندهاا كل شي يدييد و كل شي تشوفه بالتلفزيون او عند صديقاتهاا... ..

تهتم باللي يطلعونه الفضائيات.. و تحب تقلدهم... و تعتقد انهاا تهتم بروحهاا اكثر من المتزوجه وتقول انه المتزوجه ماعندهاا وقت.. و سن الجمال بالنسبه لهاا اهواا سن ال 18 لي ال 25.. :)..



اماا وحده عمرهاا 27 و تزوجه تقول...


جمال المره يمكن في جسمهاا اول شي.. تحب لو تكون مملوئه الجسم.. و بشره صافيه.. اما عن الملامح.. فملامح حاده و انف حلوو يزييد االمراه جمالا اضافه لاخلاقهاا.. فهذا اجمل شي في المره اضافه الى خجلهاا..

ما اتابع التلفزيون وايد.. و يعجبهاا المكياج البسيط.. .. تحب تهتم وايد بشعرهاا.. و طريقه تسريحه... .. تحب تكون دايماا انيقه.. وتلبس لبس مناسب لعمرهاا و كون انهاا متزوجه تراعي زوجهاا باللي يحبه ويرضيه..

اماا عن الشراء.. فماا تراه العين و يعجبهاا تشتريه..:)..


انشالله تكون هالمعاومات فادتك سياتل واي شي ثاني حاضريين:)..

[سياتل]

شكورين و ما قصرتوا يا اطياف و كويتيه و السؤدد

بخصوص التلفزيون ما وضحت سؤالي عدل.

و بوضحه اكثر..

هل للتلفزيون تاثير على نظرة المجتمع للمراه و على معاير الجمال ( يعني من خلاله صرنا نحط مواصفات ااجمال )
ام التلفزيون مجرد مراه للمجتمع و يعكس نظرته عن المراه؟؟

مشكورين و ما قصرتوا

و هذا اخر سؤال:)

[هند]

هل للتلفزيون تاثير على نظرة المجتمع للمراه و على معايير الجمال ( يعني من خلاله صرنا نحط مواصفات الجمال ) ام التلفزيون مجرد مراه للمجتمع و يعكس نظرته عن المراه؟؟

لا بل للتلفزيون تاثير على نظرة المجتمع للمراه و على معايير الجمال
وهي إجابة الجميع


السؤدد

[كويتيه]

اناا مع السؤدد..

الحين صرناا نشوف القنوات الفضايه.. و نشوف عمليات التجميل... و المكياج باشكاله والوانه.. و الموضه.. ونحب نقلد اكيد...

[qataria]

الاخ الفاضل سياتل .........

اسفه على تأخري في الرد بس توني شايفته .....

عمري : 27

ماهي معايير الجمال ؟

بصراحة معايير الجمال تتغير من وقت الى آخر تبعا للرأي السائد يعني اتوقع انه رجع الذوق العام الى ان جمال المرأه يكمن في جسمها وقوامها الممتلئ ... اما جمال الوجه فهو الاعتقاد السائد ولم يتغير على مر العصور ....

وطبعا نحن كمسلمات نرى ان جمال الروح والاخلاق والالتزام بالدين هو الاساس في جمال المرأة ......

متى يطلق على المرأة وصف جميلة ؟ اذا كانت تتمتع بجسم متناسق ووجه جميل وبشرة حلوة وصافية ....

هل للجمال ســـن محدد ؟نعم بالطبع

ماهي المرحلة العمرية التى يتمثل فيها الجمال بأبهى صوره ؟
في راي بين 20 الى 40 سنة ...

هل للتلفزيون أثر على تقييمك للجمال ؟لا رأي ثابت في الجميلات فمثلا لو كنت ارى وحده انها حلوة وجميلة اتوقع انه ماراح يختلف ذوقي لو شفت برنامج تلفزيوني يتكلم عن معاييير مختلفة في الجمال .....


هل المرأة الجميلة محظوظة ؟
لا بالعكس المرأة الفائقة الجمال في مجتمعنا الخليجي غير محظوظة لانه عادة مايكون زواجها قائم على جمالها الزائد وهذي تعتبر بداية خاطئة للرغبة في الزواج منها ......
هذي غير اللي يسوون لها سحر او اعمال علشان يطيحون حظها بس هذي الكلام لاتكتبه في بحثك علشان مانتفشل جدام المدرسة .... يعني بس بينا وبين بعض ....

هل الجمال مهم لديك ؟
طبعا مهم ..... لانه مهم وضروري عند الناس المحيطين بنا .


هل تحبين أن تبدي جميلة ؟ ولماذا ؟طبعا بدون شك ..... لاكون مقبوله عند زوجي وعند الناس ........

كم تصرفي على مستحضرات التجميل شهــرياً ؟بصراحة الحين وصلت الى مرحلة اني اكتفيت بمستحضرات التجميل يعني تقريبا كل الالوان من ارواج وبلاشير وضل واساسات وغيرها موجود .... فاكتفي بشراء الاشياء اللي ممكن تنفذ او تخلص ..
اما الكريمات هذي اللي اصرف عليها مبلغ شهري ثابت تقريبا وهو يعتمد على نوع الماركة اللي راح اشتري منها .... يعني لو كنت بشتري من جفنشي او كلينك او شسيدو طبعا بيكون مبلغ كبير ...

اما اذا من ماركات متوسطة مثل لوريال او البودي شوب او غيرها راح يكون المبلغ اقل ...


أيهما أشد اهتماماً بجماله ( المتزوجة أم الآنسة ) ولماذا ؟بصراحة المتزوجة هي اللي تهتم تكثر لانه عندها واحد لو شاف منها اي تقصير او اهمال ممكن يروح ويتزوج غيرها ...
بصراحة الحين في الاعراس مانعرف البنت من الام من كثر ما الام متشببه ومهتمه في نفسها ........


المرأة تبحث عن الجمال لتزداد ثقتها بنفسها ؟ أم أن الثقة بالنفس تكسب المرأة جمالاً ؟طبعا الحلوة واللي جسمها حلو ومتناسق هي اللي عندها ثقة بشكل اكبر في نفسها ...

اما الجياكر او المتان فهم يتظاهرون بالثقة بالنفس وهم من داخل متحطمين ....

هذي اللي قدرت اكتبه وان شاء الله اكون ساعدتك في بحثك ......