قصيـــدة القبيلي (( في مدح العجمـان ))

[الضاوي]

مســـــاكم الله بالخيـــر ...

يالربـع فيـــه قصيدةٍ جزلـــه ... وطيبه

لواحدن يقاله القبيلي .. ((حضري .. له دكان يشترون منه البدو من اول ))

المهم قصيدته ذي يمدح فيها العجمـان ...

ومنها يقــول ,,

عــودهم كلن يجـره من قبالـه && وياخذ الفنجـال قبل الحاضريني
يوم عود القوم يجلس في ظلاله && عارفٍ قدره وقدر الخايبيني

ومنهـا ,,,

إن تريـّض جـارهم فـهـق العـشا له .. && وإن تغيب فهق له جنبٍ سميني

وفي آخرهـا دعا للعجمان الله يرحمه ويسكنه الجنة وقــال :

يالله المعبــود يامنشـي خياله && جعلهــم يوم القطــايـع سالميني

وهذه القصيدة وجهها لرجل من العجمــان يقاله (( بيـّـن ))

حيث قال القبيلي في شطر احد البيــوت ..


_ _ _ _ _ _ _ _ _ _ _ _ && بيـــّــن ٍ بيــّـن وربعــه بينينـي


في الختـام ارجوا ممن لديه معلومات عن هذه القصيده او من يعرفها كاملة الا

يبخــل علينــا فيهــا ..

[شبيب ابن شبنان]

لاهنت

وصح السان القبيلي

[بنت راكــــان]

هلا بك اخي الضاوي

ومساك الله بالنور

وتسلم يمناك ولاهنت على هالمشاركه

ونتمنى ممن لديه القصيده كامله لايبخل بها

تحياتي

[cool]

السلاااام عليكم ورحمة الله وبركاااته

الله يرحمه ويغفر له ان شاء الله .

صح لساااانك الضااااوي وتسلم على القصيده والله يعطيك العااافيه .


كـووول

[الضاوي]

الله لايهينـــكم .. على المــــرور


ولازلت أطالب بالقصيدة كاملة لمن يعرفهـــا ...

فهذه القصيدة من أروع ماقيل في مدح العجمــــان ...

[الشامرى]

الاخ الضاوى ،،،
اليك والى الجميع القصه وقصيدتها اللى طلبتها

قصه وقصيده من سوالف الرجال الطيبين :------------------
فيه شاعر يقال له ابراهيم القبيلى من أهل القصيم سكن فى انطاع بوادى العجمان ،راح يوم من الايام مع خوى له يقال له دخيل بن فهد
للقطيف لهم حاجه ويوم خلصت وصلوا للنعيريه وكان الوقت قيض والسيارات شوى وسمعوا ان به واحد يقال له (بين بن سويد العجمى)
يشتغل سايق فى الشركه قالوا خلنا ننشد منه ولا خذوا الا السياره اللى مقبله عليهم فوقفوها وقالوا لراعيها تعرف بين العجمى قال لهم تعرفونه الى شفتوه قالوا مانعرف الا سمعته الطيبه قال اركبوا ومشى موديهم لاهلهم فقال له القبيلى أنت بين قال السايق نعم انا بين قال القبيلى لصديقه دخيل بن فهد وش يقول راشد بن الذيب فى قصيدته المشهوره قال فهد :_
حالف ماخذ على الرجلى رياله ×××× وبالثلاثه حالف انها ماتجينى
لا لقبت اللى على الرسته الحاله××× يلتفت ويقول وين الطيبينى
اوقف الموتر حيا وابغى الجماله ×××× يوم ولد اللاش وجه مايلينى
الصبى وان طاب طيبه من خواله ××× وبالخوال يسال قبل الوالدينى
لما سمع القبيلى هذه الابيات من خويه قال هذه القصيده وهم فى السياره مع بين :___________
يادخيل ادخل على منشى خياله××من ردى التوفبق عند الطيبينى
يادخيل الله تعالى فى جلاله ××××انزل الرحمه وهى للمستحينى
من عطاه الله وقام بحق ماله ×××× كل عمره بالسعد دنيا ودينى
والردى لاكثر ماله سو حاله ×××× بالعنا والرزق له رب ظمينى
من بغى درب المراجل والشكاله ××من يرده من دروب الطيبينى
المراجل ماترد من اهتواله ×××× مثل (بين) يوم صار الها خدينى
نادر مجناه من منشى خياله ×××× بين بين وربعه بينينى
ربعه العجمان هم ساسه وجاله ×× تردع الهقوه برد الواهمينى
واقص يقدح شراره بشتعاله ×××× ما يكل من القسا ولايلينى
من هرج فيهم يقصر فى مقاله ××× سلمهم عن سلم خلق الله يمينى
عودهم كل يجره من اقباله ×××× ياخذ الفنجال قدم الحاضرينى
يوم عود القوم يقعد فى ظلاله ××× عارف لسلوم ربعه من سنينى
لاتريض جارهم راض العشا له ××× وان حضر ولافهق جنب السمينى
منزل تستاهل البيضا رجاله ×××× للدلال وللرباع مشيدينى
ولازبنهم مجرم حطت حماله ×××× يستريح بظل رايتهم سنينى
كم عقيد خربوا حسبة مصاله×××× طاح طوله والسلوم امنعينى
عودوا عقب الطمايع والصياله ×××× حسر ومكسر ومزملينى
يالله يا المطلوب ياراعى العداله××× جعلهم يوم القطايع سالمينى
بنت يااللى ما مشت درب الفساله ×ماتخايل راعى السبحه بعينى
احفظى عرضك بعدله واعتداله ××× غير (بين) هو وربعه لاتبينى
والصلاه عداد ماتذرى شماله ×××× للنبى المصطفى والمرسلينى

وسلامتكم ،،،،،،،،،،،،،،،،،،،،،،


__________________

[الخويطري]

ياسلأم ياسلأم


تسلم يالضاااوي ولأهنت على القصيده وايضا لأهنت مليووون يالسنافي يالشامري بالفعل مخزون طيب للمعلومات والقصص والقصيد الطيب

لأهنتوااا جميعااا ووجميل ان نرى هاذا المناقشات والاستفاده طبعا للجميع


وتقبلوااا تحيــــاتي


الخويطري

[الضاوي]

لاااااااهنت

لاااااااهنت


يالشــــامري ,,,


عزالله امتعتنــــا بالسألفة والقصيــدة جعلك تسلـــم ..

وصححت بعض المعلومات عن ذا الســالفة ..


لاااااهنت

[برق الحيا]

اخوووووووي الضاوي مساك الله بالخير ولاهنت على هذي المشاركه الجزله والطيبه والله يعطيك العافيه

[فارس شمر]

لااااااااااااااااااهنت يالشـــامري على القصيده والسالفه الطيبه

تقبل تحيـــاتي

[زمانك]

لاهنت يا بن العم على هذي القصيده وبيض الله وجهك

[м8ąĐїṜ]

يعــطيــــك العافيـــــه

[فلاح بن ملبز]

السلام عليكم ورحمة الله وبركاته

الضاووي يعطيك العافية ولاهنت على ذا المشاركة الطيبه

والشامري يعطيك العافية على سرد القصه كامله مع نقل القصيدة

وصح الله لسان شاعرها / ابراهيم القبيلى

وبين بن سويد العجمي يستاهل المدح

وجزاكم الله ألف خير