تـــــــعـــــالــوا.... نــتـــذكــر مـــاضي الــكويــت .. ^_^ ..!!؟

[الـنـايـفـه]

السلام عليكم ورحمة الله وبركاته ...


شلونكم شخباااركم ... ؟ عسااكم بخييير ..


بما اني صار لي فتره ما نزلت موضوع

فحبيت انقل لكم هالموضوع البسيط .. و هو عباره عن كلمات و امثال كويتيه قديمه ...

و ان شاء الله يعجبكم ...

وسامحوني على القصوور ....


كـلـمـات كويتية قديمة



· أّيـّيـس = فقد الأمل

· إبـطـيـني = الشخص الذي يحب الأكل بكثرة وفي أي وقت

· أثول = تطلق على الشخص الذي لا يجيد تدبير عمله

· إزكُومبي = الشخص غير الجدي والمتلاعب

· إشلايتي = الشخص غير الجدي والمتلاعب

· إلهيس الأربد = تقال للفتى الخامل البليد

· إمتبتب = الشخص السمين

· إمدحدح = الشخص السمين القصير

· إمربرب = الطفل الصغير حسن التغذية

· إمشلوَط = تطلق على الأكل الحار ، وتطلق على الرجل عصبي المزاج

· إمهتمل = تطلق على من لا يعتني بملبسه ومظهره

· الأوتي = أداة لكي الملابس

· بَـحَاصَـه = الأرض الصلبة قليلة التراب

· بلاغة شف = فضول ، محاولة التدخل في شئون الغير ومعرفة ما يدور بينهم

· بو هبه = يقدم على الشيء لفترة بسيطة ثم يمتنع

· بـوتـمـبه = الشخص السمين

· بيض الصعّو = الشيء النادر ، الذي تسمع عنه ولا تراه

· ثقيل طينه = دمه ثقيل لا ترتاح لوجوده

· جمبازي = الشخص غير الجدي والمتلاعب

· الجندل (الشندل) = خشب يستخدم لسقف الغرفة

· الحالة كسيفه = الحالة سيئة

· خـّري مـّري = الدخول والخروج من غير استئذان أو نظام

· خـذ وخـل = تقال للشخص الذي ليست لديه مصداقية أو لمن يتحدث بأمور غير صحيحه

· خنت حيلي = تطلق على من يكسر الخاطر ، وتستخدمها النساء فقط

· راشدي = الضرب بالكف على الخـد أو الوجه

· ربادي = الكسول الذي لا يعمل

· سمردحه = تطلق على المكان الكبير والواسع

· سِـنيار = مرافقة بعض بالمراكب ، وعادة تستخدم بالسفر أو الطريق الطويل بحري كان أو بري

· سوجري = الصروال الذي يصل طوله إلى مافوق الركبة بقليل

· شريَص = أمسك بالشيء بقوة (شرياصه)

· شبَص = أمسك بقوة (شبَاصه)

· الششمه = النظارة

· شكردي = سريع في القيام بالعمل

· شلاويط = ريحة اللحم المشوي

· شـماطيط = الملابس المقطعة

· الصبخة = الأرض التي تبخر عنها ماء البحر وبقي عليها الملح

· طاكته البوهه = مندهش ومنبهر

· طِـحـيـحَـه = متوفر وبكثرة ( مثلا السمك بالسوق اليوم طحيحه )

· طريره = حاده – سنينه

· طمطم عليه = أخفى ودفن وستر على عمله أو قوله

· طنبحله = الشخص السمين

· طنطل = تطلق على الشخص الطويل

· عاقد النونه = الشخص الذي يقرب حاجبيه إلى بعض تعبيرا عن الزعـل

· عـيّـار = الشخص المراوغ

· غـزير = بحر عميق

· غطاوي = فوازير

· غـمَـنـدَه = السـر ويقال (بينهم غمنده)

· فاصخ = يقول ويعمل أشياء من غير استحياء

· الـفـي = ظل الجدار أو السقف أو الشجرة ، يقال فلان جالس في الفي

· كشخه = اللبس الجميل أو الفاخر أو الجديد

· كفشه = ملعقه

· كودنه = تطلق على الشخص الغبي

· كيري ميري = اللف والدوران ، يقال فلان ما عنده كيري ميري . يعني فلان جد لا يحب اللف والدوران

· لا توطوط = لا تأتي مطلقا

· لاهـوب = الهواء الجاف والحار ، يقال اليوم الهوا لاهـوب يصلخ الوجه

· لغلاغه = تطلق على مياه البحر عندما تكون أمواجه خفيفة

· لغـوه = كلام كثير ليس منه فائدة

· لـُـوتي = الشخص غير الجدي والمتلاعب

· متعـومِـس = مضطرب ومرتبك

· مِـتـلَـيّـيــش = متعب جدا ومرهق

· مَـجـعَـرَه = شباب ليسوا على خلق يعبثون ويثيرون الفوضى

· مشفوح = ينقض على الشيء كأنه مو شايف خير

· مصـَمك = قابض على الشيء بشدة

· ملقوف = من يتدخل فيما لا يعنيه

· منكر حسنه = ناكر أو ناكرة الجميل

· مـيـوَه = الفاكهة

· نجره = خلاف بين شخصين

· نجـري = الشخص الذي يجادل في كل شيء

· الهدوم = الملابس

· يرطن = التحدث بلغة أجنبية

· يزوغـل = يغش في اللعب

أمـثـال كويتية قديمة



· أبو طبيع ما يجوز من طبعه

· إذا بغيت صاحبك دوم حاسبه كل يوم

· إذا حبتك عيني ما ضامك الدهر

· إذا حجت البقر على قرونها

· إذا حضر الماء بطل التيمم

· إذا صار رفيجك حلو لا تاكله كله

· إذا طاح الجمل كثرت سكاكينه

· إذا طبع دوس على تريجه

· إذا فات الفوت ما ينفع الصوت

· إسأل مجرب ولا تسأل طبيب

· إش حادك يا المسمار ؟ قال المطرقه

· إصرف ما في الجيب يأتيك ما في الغيب

· أضبط من ساعة الملا

· اقبض من دبش

· أقضب مجنونك لا يجيك أجن منه

· إكل ما تشتهي وإلبس ما يعجب الناس

· إما طلعه ولا طبعه

· إن طاعك الزمن وإلا طيعه

· إنطر يا حمار لما يجيك الربيع

· إنفخ يا شريم قال ماكو برطم

· الباب اللي يجيك منه الريح سده وإستريح

· بات مظلوم ولا تبات ظالم

· بغاها طرب صارت نشب

· بغى يكحلها عماها

· بغيناه عون صار فرعون

· تجيك التهايم وإنت نايم

· ثوب أطول منك يعتك

· جارك ثم دارك

· حاميها حراميها

· حشر مع الناس عيد

· حط راسك بين رجليك وإشهد على والديك

· حط فلوسك بالشمس وإقعد بالذلال (إجلس بالظل)

· خبز خبزتيه يا الرفله إكليه

· خربان من البيضه

· دابة الله بأرض الله

· الذيب ما يهرول عبث

· راعي النصيفة سالم

· رزق القطاوه على الخاملات

· زرع الميانين (المجانين) يطلعه رب العالمين

· شبعونا طراقات وشبعناهم شتايم

· شمامها لمامها

· طارت الطيور بأرزاقها

· طقاق روحه ما يصيح

· الطقعه بسوق الصفافير ضايعه

· الطول طول نخله والعقل عقل صخله

· عتيج الصوف ولا جديد البريسم

· عقب ما طقعت صكَت فخوذها

· عمره ما تبخر ، تبخر وإحترق

· عومه مأكوله ومذمومه

· غصيت فيك يا ماي ، شدفعك في

· فال الله ولا فالك

· الفرخ يجوجي في البيضه

· قال عندك تاكل ؟ قال لأ . قال عندك تغرم ؟ قال إي .

· قراقيع صيف

· قطو وطقيته بمصير

· كثر الدق يفك اللحام

· كلٍ بقلبه شيقاليله (شقاء له)

· كوم حجار ولا هالجار

· لي بغيب الخبر يشيع عطه (أعطه) أم بزيع

· لو جريت جري الوحوش غير رزقك ما تحوش

· لي طار طيرك قول سبيل

· لي فات الفوت ما ينفع الصوت

· اللي في الجدر يطلعه الملاس

· اللي ما يرضى بجزَه ، يرضى بجزَه وخروف

· اللي ما يستحي منك لا تستحي منه

· اللي ما يطول العنقود يقول حامض

· اللي ما يطيع يضيع

· اللي ما يعرف الصقر يشويه

· اللي ماله أول ماله تالي

· اللي مو على دينك ما يعينك

· اللي هذا أوله ينعاف تاليه

· اللي يجي من الله حياه الله

· ما تعينك إلا يمينك

· ما لك إلا خشمك لو كان عوي (أعوج)

· مال عمك لا يهمك

· مخروش طاح بكروش

· مد رجولك على قد لحافك

· مداح نفسه يبي له رفسه

· مكسورة و تبرَد

· من طمع طبع

· نصيبك يصيبك

· هذا سيفوه وهذي خلاجينه (ملابسه)

· الوجه من الوجه أبيض

· يا شين شيء ما شابه هله (أهله)

· يا من شرا له من حلاله علَه

· يفوتك من الجذاب صج وايد

· يمدح السوق من ربح فيه

· يوَد (أمسك) الحبَه وفلَت (أفلت) الدبَه

[صديق الملك]

النايفة


وربي موضوع حلو :)

فعلاً أستمتعت في قراءة الكلمات والأمثال

يازين أيام أوّل وأهلها


ألف شكر أختي المحترمة النايفة ع الموضوع التووووحفه


تقبلي تحيتي

أخيك ِ

[الهاجري عبدالله]

النايفه

مشكوره حيل وخاصه هالمثلين حيل مريت فيهم

· إذا بغيت صاحبك دوم حاسبه كل يوم

· إذا حبتك عيني ما ضامك الدهر

مشكوره على الطرح الحلو ويبارك فيك

[جلوي بن سبعان]

الـــنـــايــفـــه

مبدعه وربي مبدعه على هي الامثال

تقبلي مروري وحترامي

[الـنـايـفـه]

صديق الملك ... يسعدني تواجدك في مواضيعي دائما

الهاجري عبدالله... اشكرك على المرور الطيب ...

جلوي بن سبعان ..سعيده بتواجدك و مشاركتك في الموضوع ..

[ع ــيون الـ ع ـجمان]

· ما تعينك إلا يمينك
تـــســـلمين حبيتبي على الموضووع
وربي ابداااع

[الـنـايـفـه]

يسلمووو عيون العجمان على المرور

[Trust me]

كلامات غريبه

الظاهر أني ماني كويتي أصلي ماني من بطنها :)

يعطيج العافية يالنايفة

[مــقــدام]

السلام عليكم ورحمة الله وبركاته

اختي الفاضله / النــــايـــفه

مشكوره كل الشكر على المفردات والامثال الاكثر من رائعه..


وتسلم يمينش اللي خطتها


وتقبل فائق احترامي

[Trust me]

كلامات غريبه

:eek::eek:

سلملم على البدلية:)

[الـنـايـفـه]

لووووووووول ترست مي :) يسلموو على المرور
ماعليه طوفت البدليه :p

مقدام ... اشكرك على المشاركة الطيبه .. :)