ممكن نتعرف ؟؟ ... ممكن تاخذين الرقم !!

[الـــصـــعــــب]

اوف ياهي موووووووووت اوف ياهي تهبل شف تناظر شف كنها تقول ابي الرقم وشف وشف و و و و و ............. .
هذي حالتهم بالاسواق وعند المدارس والجامعات والمستشفيات والمستوصفات وبكل مكان يوجد به بنات ماهو السبب ماالذي يدفعهم لذلك صدقوني البنات نفسهن هن اللي يدفعن بالشباب لذلك وايضاً لاتستبعدون انهن بعد اللي معلماتهم للترقيم حنا ياالشباب مساكين كلمه تودينا والثانيه تجيبنا صح والا انا غلطان؟
(مع احترامي لاخواتي البنات لكن هذي الحقيقه ايتها الفاتنات)


البعض منهم وليس الجميع ؟؟



تحياتي لكم


مجنونها

[الوطن]

مجنونها
بصراااحه الموضوع حساس
ويجب التعليق عليه من باب الدين
لانى رأيت من طريقه الموضوع انك تتهم اختك وزوجتك وابنتك وامك

اقوووول لك

قال تعالى: ((يَا أَيُّهَا الَّذِينَ آمَنُوا لَا تَتَّبِعُوا خُطُوَاتِ الشَّيْطَانِ وَمَن يَتَّبِعْ خُطُوَاتِ الشَّيْطَانِ فَإِنَّهُ يَأْمُرُ بِالْفَحْشَاء وَالْمُنكَرِ )) [النور 21]

ولا تحكم على البنااات هم السبب ايضا الشباااب لهم الركيزه الاساسيه فى كيفية التقاااط فريستهم فإن مشكلة إنحراف الشباب من أخطر المشكلات التي تواجه المجتمع، والتي ينبغي أن نسخر كل الإمكانات لمواجهتها والقضاء عليها لما لها من نتائج سلبية على المجتمع بل على الأمة بأسرها. وبلا مقدمات فقد أحببنا أن نسهم بهذه الكلمات اليسيرة في بيان أسباب ومظاهر إنحراف الشباب.


أولا: أسباب انحراف الشباب


1 - ضعف الوازع الديني.

2 - ضعف التربية والرعاية من قبل الوالدين.

3 - أصدقاء السوء وشِلل الإجرام والفساد.

4 - تهميش دور الشباب وإحساس الشاب بالغربة وسط أهله.

5 - الترف الزائد.

6 - الفراغ القاتل.

7 - حبّ الشهرة والثراء السريع.

8 - سن الشباب الداعي إلى المراهقة والمغامرة.

9 - وفور الشهوة وطغيان الغريزة مع صعوبة الزواج.

10 - الإستعداد النفسي للانحراف.

11 - ضغوط المجتمع وعدم وجود بيئة صالحة.

12 - طول الأمل ونسيان أن أغلب من يموت من الشباب.

13 - الغفلة عن العقاب في الدنيا والآخرة.

14 - الفتنة بأهل الغرب وحضارتهم.

15 - محبة أهل الفساد من المشهورين.

16 - القنوات الفضائية وما تقدمه من دورس مجانية في الجنس والجريمة بأنواعها.

17 - الغزو الفكري المدمر.

18 - وسائل الإعلام بشتى أنواعها.

19 - البطالة والإستنكاف من الأعمال الدنيا.

20 - تقصير كثير من المعلمين في المدارس.

21 - تقصير بعض الدعاة ورجال الحسبة.

22 - السفر إلى بلاد الخلاعة والمجون.

23 - تشجيع المجتمع لبعض أنواع الانحراف والمنحرفين.

24 - سوء خلق بعض المتدينين وغلظتهم.

25 - قسوة الوالد على أبنائه.

26 - التدليل الزائد من قبل الوالدين، والوالدة بالأخصّ.

27 - إختلاط الرجال بالنساء في الأماكن العامة وبعض دوائر العمل.

28 - سيطرة النظرة المادية البحتة والتخلي عن القيم والأخلاق.

29 - الجهل.


ثانياً: مظاهرانحراف الشباب

1 - التهاون بالشعائر التعبدية وأولها الصلاة.

2 - التميع وعدم الجدية.

3 - إهدار الأوقات وعدم تقدير قيمة الزمن.

4 - الإسراف والتبذير.

5 - الكبر والغرور.

6 - ارتكاب الفواحش كالزنا واللواط.

7 - عقوق الوالدين.

8 - التدخين.

9 - تعاطي المسكرات والمخدرات.

10 - تقليد أهل الفساد من المشهورين.

11 - المعاكسات الهاتفية.

12 - التشبه بأهل الكفر في ملابسهم وكلامهم ومشيتهم وحركاتهم ورقصهم وقصات شعرهم ومجونهم.

13 - حب الراحة وعدم الصبر على العمل الجاد المثمر.

14 - الكبر والغرور والتعالي على الآخرين.

15 - سوء الخلق وعدم إنزال الناس منازلهم .

[ابو ندا]

مشكور يا مجنونها على طرح هذا الموضوع الذي يتيح لنا النقاش فيه


واشكرش يا الهاجرية على الرد اللي لا بعده رد


جاهزه لنقااااش تحياتي لمن شارك في هذا
المووووووضوع

[ابوتركى]

فعلا كلامك اغلبه صحيح لو البنت متربيه تربيه صالحه ومهما تعرض لها

من مضايقات مدامت تصدهم فلن تجد العين التى تدور حولها ولكن الشباب

لايلهثون الا وراء من يعطيهم الدافع الى المعاكسه ومنها تجاوب البنت للشاب

واهم عامل يجذب الشباب هو اللبس الغير محتشم الذى يعتبر طعم للشاب


تحياتى اخوى

[الـــصـــعــــب]

اشكرج اختي الهاجريه على مرورج

وانا فتحت الموضوع ليش هجوما على جميع البنات وانما بعض من البنات اللواتي يتسوقن ولكنهن يغازلن ويتمططن من مكان ألى آخر وهذا شىء واقعي والكل شايفه .. تجي الوحده تلبس هذاك اللبس اللى يبين حتى عظامها !! والرجال مسكين يسعبل :) ووالله انا من الناس اللى يتحرشون فيني وخاصه لا صرت بروحي ويقطون علي كلام مثال (يالثقيل .. يالحبيب .. يالطيب ألخ )

والمشكله ان الدعوه سايبه يعني مافيه وعي اجتماعي من ناحيه الأهل والتربيه والاخلاق متشتته وهذا اللى انا اقصده من بنات الجيل الفين

عموما اشكرج على مشاركتج وكلامج الطيب

والبنت هي اختي وامي وزوجتي وبنتي

لكن حنا نتكلم عن البنات اللى من النوع المشهور عند الاغلبيه

وتقبلي تحياتي


مجنونها

[admin]

موضوع غريب وانا اقتبس من كلامك بعض اشي

حنا ياالشباب مساكين كلمه تودينا والثانيه تجيبنا صح والا انا غلطان؟

انا اقولك غلطان ماهو بكل الشباب اللي بنفس النوعيه اللي اتكلم عليها وياما في شباب صالح ومتربي احسن تربيه ولا ينظر الي هذي الامور فصدقني والله انه اخبل واغبي والمسكين بما تعنيه هذي الكلمه اللي لا شغل ولا مشغله ويتنطط في الاسواق واذا هو ماينظر الي نفسه ترى الناس تشوف واذا وحده فاسده ترى عشر صالحات غيرها


ووالله انا من الناس اللى يتحرشون فيني وخاصه لا صرت بروحي ويقطون علي كلام مثال (يالثقيل .. يالحبيب .. يالطيب ألخ )

بس سؤال وش تصرفك اذا صار معك مثل هذي الامور اللي حصلتلك ؟


تحياتي لك

[الـــصـــعــــب]

تحياتي لهايف السفراني وابو تركي وابو فيصل

وتعقيبهم على الموضوع ورأيهم

اخوي ابو فيصل اشكرك على التعقيب وصدقني انا من ناحيتي والكل يعرفني معرفه تامه انا ماني من النوع اللى اطرد ورا بنات خلق الله (لانه مهب من طبعي )

وتأكد اذا البنات قطوا علي كلام (تصرفي طبيعي من داخل اقول استغفرالله والله يهداهم ويعقلهم ويالله انقذني من الفاتنات ) واكون صاد عنهم المسأله ماهيب مسأله تكبر او تغلي أو مااعطي وجه (انا ودي بهذي وهذي وهذي واللى تعجبني ) لكن احاول ابتعد عن المحرمات وغضب الله علي وانا ادري فيه شباب صالحين مايحبون هالاساليب وهالاشياء السخيفه ويغضون النظر عنها مثل ماسويت ولكن هناك شباب يدورون هالامور واللى انا اتكلم عنه هي الفتنه من اغلب البنات في الاسواق وغيرها وهذا الشىء انا وغيري من الشباب اللى يخافون الله يبتعدون عنه بأي وسيله والله يثبتنا ويثبتنا اخوانا واخواتنا على الصلاح والطاعه والايمان والتقوى والاخلاق الحسنه



وتقبل تحياتي


مجنونها

[عزوف]

مشكور يا مجنونها على اثارة هالموضوع

وبالفعل يا مجنونها اهم واول سبب لتحرش الشباب بالبنات هي البنت !!! اي نعم البنت ليش نغط روسنا بالرمل مثل النعامه !!!! لما البنت تكون اخفيفه وكاشخه بشكل ملفت للنظر لا ورايحه للسوق !!! اخاف عرس مو سوق ؟ شنو تبي ردة فعل بعض الشباب الهايتين اللي جايين يفترون بالسوقه اكيد بتكون ردة فعلهم هذي !!!!!!


لكــــــــــــــــن لاتعمم هذي الشغله على جميع البنات والله هناك بنات تكانه ومحترمين انفسهم وما يسلمون من التحرش !!

وانا والله مجربه طبعا اروح للسوق عباية راس وتسحب وراي ولا مكياج ولاهم يحزنون !! وشكلي جني ام عيال !!!! وما اسلم من التحرش !!!!


الاستنتاج ان الشباب فيهم حقهم وزادوهم بعض البنات شر !!!


مشكور يا مجنونها مره اخرى

وتسلمين يا الهاجريه على هالرد الحلو واختلاف الرأي لا يفسد للود قضيه يالغاليه :)

[كويتيه]

يعطيك العافيه مجنونهااا...

و الهاجريه صراحع كفت ووفت..
بس عندي تعليق صغير.. هو البنت اللي تبي يتحرشون فيهاا الشباب واضحه واللي ماشياا بطريجهاا و ماتبي احد يتحرش فيهااا هم واضحه.. اللبس يدل
و النظرات و البسمات هم ادل على صاحبتهااا واللي يبيه قلبهاا:)..


لج تحياتي يا مجنونهااا..

[الوطن]

تسلمون يا بنااااات
عزوف
و
كويتيه
بالفعل البنت بارك الله فيها اللى تبى درب الرذيله ادله ولا يحتاج احد يعلمها عليه وتجدها تتمايل بخطوتها وتتمايع بكلامها والميك آب كنه حاطته بفندق ساااس ولكن دعواى لهن ان الله يغفر لهم وان يهديهم ولا نقف مكفوفين اليدين يجب علينا ان ننصحهم ونهديهم الى طريق الصحيح حتى لو لحق بك الاذى .
انا بقولكم موقف صار لى بالسوق
كنت بسوق مع اختى مع العلم ان خواتى ما يحبون يروحون معاااى لانى ما احب اسكت عن الخطأ حتى لو كنت مع زوجى ما اسكت اذا شفت خطأ لازم اتكلم المهم السالفه انى كنت مع اختى بالسوق ولقيت بنت امبين عليها حضريه وقاعد واحد يتحرش فيها بس البنت شكلها تبى وما تبى وقلت مسكينه خلنى اساعدها لانه كان وقت الصبح ومافى احد والمكان فاضى المهم وقفت وقلت للبنت تبين شئ هذا مضايقج ماردت على قاعده تضحك ( الله يهديها ) المهم وقاعد يطالعنى الولد عمره تقريبا 18 او 19 قلت له ترضى على خواتك تخيلوا شنو قال لى ((( قال انتى تكلمينى قلت اى منو اكلم اجل المكان اللى حنا فيه فيه صبااات كبار ( دنكات) يعنى عواميد تخيلوا شنو قال لى قال لحظه لا تكلمينى كلمى اخوى قلت اخوك ويجى ويطلع لى انسان مدرى بقره من ورا العمود رجل اسود طول بعرض لابس بلسوووت ازرق انا شفت قلت : دنا زوالج يا الهاجريه وجاتنى طرمه ما قدرت اسوى شئ ما وعيت الا اختى تنادينى ونحشت منه باعجوبه لكن الله ستر وقمت ارتجف واختى ترتجف وحصلت زفه منها وقالت انتى مالك شغل بالناس ))
لكن مازلت انصح وبنصح الى ان ( يحطونى بالقبر :D )

يعنى انا أأكد الطرفين لهم صله بالموضوع ولا نضع العاتق الاكبر على البنت
يعنى الكل فيه خيره

اللهم استر علينا وعلى بناتنا وعلى عيالنا

[بخـــــــــــوت]

ردووووووووود كلها واقعيه وصحيحه ميه ميه

والله انا بصراحه وخااصه اذا تسوقت با الكووووووويت الله لايبلانا غزل على افا من يشيل ..... وحتى والله الي سااتره عمرها ما خلوها الشباب

والبنات اكيد اذا جاات لاطه مكيااج ومتزينه لاتستغرب اذا قط احد عليها كلمه او رقم ؟

بس والله الي يتسوق معا امي ابن امه يجي بناتهاا ...... ماعندها تفااهم تصكه با النعل وانتو بكرامه وحصلت .
بنت رجاااااااااااال جعل ربي يعافيهاااااااا

لكن السعوديه الله يخلي الهيئه الي مسنتره عند كل سوق ولو مافي هيئه يمكن اعبر من الكويت بمليون مره .....وكل دوله فيها حقها من خير او شر


تحيااتي

بخــــــــــــــوت

[الـــصـــعــــب]

شكرا لعزوف وكويتيه وهاجريه على رأيهم بالموضوع وتعليقهم


ياجماعه الخير يابنات وياشباب مجتمعنا حاليا ماعاد فيه غموض كل شىء فيه واضح ياجماعه والله العظيم ومع احترامي لكم يامااااااااااا تحت السواهي دواهي ؟؟


يعني تجييك الوحده لابسه عبايه راس وسيعه ومحتشمه لكن (قلبها ماهوب محتشم ) يعني قدام الناس واهلها تلبس هاللبس واذا صارت بروحها قطت هالعبايه

وانتم يابنات يارزينات عارفين هالشىء واغلبنا عارف هالشىء بس طبعا الله يكفينا الشر يعني مانحطه بذمتنا لمن انشوف وحده محتشمه انقول في قلوبنا عزالله بنت سنعه ووراها رياجيل ومحتشمه ولا شفنا ام نقاب وخدودها طالعه وهالمكآب تارس وجهها تقول صبغ ورايحه عرس مهب سوق والله انا اتضايق مااحب هالنوعيه من البنات واتصدد (ماابالغ ) كل رجل له طبعه عموما لاتاخذون الموضوع هجوم على البنات (البنات خواتي وبناتي وامهاتي وزوجاتي ) وصدقوني المقصد من هذا الوعي الاجتماعي والكل لازم يعقب عليه ويقول رايه بالموضوع وانا من ناحيتي مثل ماقلتلكم حلات البنت محتشمه بعفتها وبشرفها وطهارتها (انا يغثني اللى يقول خل زوجتي على كيفها تلبس ضيق ونقاب اهم شىء الحين انها تزوجت وخلاص ؟؟ ) استغفرالله ياربي مامن عقل الله يهدي الجميع ويهدينا ويثبتنا بطاعته

تحياتي لكم


مجنونها

[الوطن]

شوف اخوى
مجنونها
بصرااااحه انت كلامك صحيح واعرف كثيييير الكثييير تلبس اللبس لإرضاء اهلها
بس اللى هى فيها خير وإيمان وخوف على نفسها وعلى سمعة اهلها لو تقطها بين عشر رجاجيل دبرت عمرها لكن اللى يستر عليهن اللى لا حياء ولا عفه ولا خوف على نفسها ولا على اهلها الكيد شلون بتخاف من ربها ولله انى احترق من داخل قلبى لما اشوف هذه الاشكال فى سوق فى طبيب والله انه شئ تقشعر منه الابداااان .
اتمنى من الله ان يستر عليهم وعلى بناتنا