المساعد الشخصي الرقمي

مشاهدة النسخة كاملة : سألت وياليتني ما سألت ..!!!

مناحي الصميل
18-09-2005, 06:24 PM
مرحبا
كيف حالكم يالربع انشالله مرتاحين
بأقولكم سالفه حصلت معي وبغيت رايكم في الشخص هذا
قبل فتره تعرفت على واحد سعودي من اهل الرياض بالصدفه في لندن وسولفت معاه وقعدت معاه شوي بس شوفوا اللي صار
انا كنت قاعد في جلسه تحت بالفندق ( اللوبي حق الفندق ) وجاني رجال اتوقع عمره 28 او 29 المهم جلس معي وسوالف انا وياه وطلبت له شاي الرجال حبيب سوالفه ما تنمل بس لما سألته وش انت ؟؟ (( انا كنت اتوقع بيقول اي شيء غير انه عجمي ))
قال انا عجمي !! ( بس الرجال كلامه كلام جداوي وانتوا تعرفون كلامهم شلون كيف ,, مررره حلوو ,, الخ... ))
قلت عجمي مو مشكله (( طبعا قلتها في قلبي )) :)
سألته : من اي العجمان ؟؟
رد على : ...........!!
قلت ونعم
قلت طيب وش عايلتكم ؟؟
قال : .....!
قلت ونعم !
قلت طيب تروح الوادي ؟؟
قال : وشو ذا ؟؟
(( انا هنا بغيت اصكه بالطفايه اللي بالطاوله )) :mad::mad:
قلت الوادي (( وادي العجمان )) ؟؟
قال: اي اي هذا اسمع عنوو بس ماقد جيتو !
سألني : من اللي يسكنو هذا ؟
قلت : بني عمك
قال : وشو ؟ بني عمي كلهم عندنا بالقصيم والمناطق اللي حوله
قلت بني عمك العجمان الباقين
قال : اهاا
قلت طيب من تعرف عندكم بالرياض من العجمان ؟؟ انا اقصد وش الفخوذ اللي تعرفها موجودين بالرياض؟
قال اعرف ((عجامين )) >>> بدليه منه هو ترى مو مني انا :)
قال اعرف عجامين بس والله ما سألتهم من ايش !!
قلت طيب وش الفخوذ اللي تسمع عنها ؟
قال لا تسألني !! بعدين قال : الا الا الا اعرف آل فلان وآل فلان وآل فلان
(( الرجال قعد يذكر اسامي عوايل )) :)
قلت يابن الحلال هذولا عوايل انا ابي الفخوذ مثل الشامر والضاعن والهادي والسفران والناجعه ...الخ
قال اي هذولا بس اسمع عنهم بس ما اعرف احد منهم

تكفا يالربع مايرفع الضغط هذا ؟؟؟:confused::confused::confused:
بن عجمـــــــــــــى
18-09-2005, 07:19 PM
سألته وش انت ؟؟ (( انا كنت اتوقع بيقول اي شيء غير انه عجمي ))
قال انا عجمي !! ( بس الرجال كلامه كلام جداوي وانتوا تعرفون كلامهم شلون كيف ,, مررره حلوو ,, الخ... ))
قلت طيب تروح الوادي ؟؟
قال : وشو ذا ؟؟
(( انا هنا بغيت اصكه بالطفايه اللي بالطاوله ))
قلت الوادي (( وادي العجمان )) ؟؟
قال: اي اي هذا اسمع عنوو بس ماقد جيتو !
سألني : من اللي يسكنو هذا ؟
قلت : بني عمك


لا هنت وسلامتك على كل حال
كل الشكر لك:):):)
قرقاص
18-09-2005, 11:11 PM
الأخ الفاضل سفراني


تحية طيبة


يمكن يكون الشخص هذا لا ينتمي للقبيلة من الأساس .!!

عموماً أنا سمعت فتوى لأحد المشايخ وعلى ما أعتقد أنه الشيخ (المطلق) يقول أن التسمي على قبيلة أو عائله بغير الأسم الصحيح لا يجوز ومحرم .!!!


معنى كلامي أن ما كل من قال أنا عجمي أنه عجمي أو من قال أنا عتيبي أنه عتيبي .!! هذا والله أعلم



تقبل تحية أخيك




قرقاص
بنت حمران النواظر
19-09-2005, 12:16 AM
يا الله شكثر اللي ما يعرفون شي من قبايلهم
بس يعرفون أنهم مطران أو عجمان أو هواجر والباقي
يقول ما حصلي الشرف
take it easy
الباشا
19-09-2005, 12:17 AM
بسيطه يالسفراني

جداوي وعجمي ولا يعرف

وذكر القصيم

الله المستعان

من ولد وعاش بالقصيم ولم يجد احد يخبره

طبيعي انه ما راح يعرف الوادي او ..

وعلى فكره هم كثر ...
بحوور
19-09-2005, 12:21 AM
ســفــراني


ما شاء الله على اعصابــكـ

مدري شلون ما صارحته باللي

بخاطـــــركـ ..

زي وحده شفتها اسالها عن اصلها

تقول انا عجميه من الهواجر ..!

( عرفت ان الدعوى خرباااااانه ) :)




أختـــــكـ
مناحي الصميل
19-09-2005, 02:26 AM
بن العجمي
اشكرك على مرورك الكررررريم
ولاهنت
مناحي الصميل
19-09-2005, 02:28 AM
قرقاص
صح كلامك ويمكن يكون مو عجمي بس حب يتلزق والله اعلم :)
وشاكر لك مرورك الكريم
مناحي الصميل
19-09-2005, 02:29 AM
بنت حمران النواظر
اشكرش على مرورش الكررريم
بس انا اول مره اقابل هالنوعيه :)
مناحي الصميل
19-09-2005, 02:30 AM
الباشا شكرا اخي الكريم على مرورك للموضوع :)
يوم ذكر القصيم دريت ان الدعوى خربانه :)
مناحي الصميل
19-09-2005, 02:32 AM
بحوور شكرا للمرور الكريم :)
عجميه من الهواجر ؟؟ هذي زين ما اذبحها لو اشوفها :)
وشكرا لكم جميعا للمرور الكرريم
مستشارك
19-09-2005, 03:22 AM
الله لايهينك على ذاالسالفة
النايفه
19-09-2005, 04:04 AM
اي والله ليتك شربته الشاي وماسالته عن شي هههههههه
بس زين منه الي عارف انه عجمي :)

يسلمووو سفراني عالموضوع..


تحيتي,,,
مناحي الصميل
19-09-2005, 06:33 PM
مستشارك .. ولا انت طال عمرك وشكرا لمرورك
مناحي الصميل
19-09-2005, 06:35 PM
هلا وغلا النايفه
اي والله زين انه يعرف انه عجمي :)
وشكرا لمرورش الكريم
حظه منسدح
19-09-2005, 08:15 PM
هلا اخي السفرااني

ماشاء الله عليك وعلى صبرك

وفيه ناس كذا بصراحه كثير

مره وانا في الدوام

قابلت واحد اسمر بزود ((بالعربي اسود ))

قابلته في كورس
وجاء المدرب عندنا وقال الكل يعرفنا بنفسه

وشوي يوم قال اسمه فلان العجمي

بصراحه الفضول اللي جاك يالسفراني جااني ...يوم طلعنا بريك نشرب القهوه

وشوي جانا خوي العجمي هذا اللي يقول انه عجمي ..وقال لي صاحبه: ياخي ماتشوف ابن عمك هذا
ترااه مجنني..قلت عسى ماشر شنو فيه ؟؟؟!!!!
قال: ياخي بعض الاحيان يدخل علي المكتب ويكلمني بلهجه مااعرفها

وطبعا الرجال موجود معنا

قلت كيف يعني؟

رد علي هذا اللي يقول انه عجمي : ياخي اتكلم تكرووووني

هنا انا وصلت حـــــــــــــــــــــــــــــــــــــــدي

طلع الاخ تكرووووووووني ولا ويعترف بعد

خلها على الله بس

يعطيك العافيه يالسفرااني

سلملم
مناحي الصميل
19-09-2005, 09:03 PM
حظه منسدح
والله ياخوك كثروا ذا النوعيات الله يخفسهم :)
ولاهنت على المرور وذكر الموقف :) مع الاخ التكروني العجمي :)
بنت العجمان
20-09-2005, 10:23 AM
السلام عليكم .... سفراني بصراحه شي صدق يرفع الضغط ويحزن انه عجمي ولا يدري هو من شنو؟ بس الظاهر انه مو عجمي وانت عارف ان العجمي اسم الواحد يفتخر فيه فهو حب يرز نفسه
ربعي ياهلي
20-09-2005, 12:17 PM
أخي السفراني ماعرفنا مره جداوي ومره تقول يذكر الرياض ومره القصيم... ربما يكون نشأته بالغربية ولكن لا اعتقد انه من نجد وخاصة تقول لهجته جداوية وهذا اثبات كافي لأنه مافيه احد نشأ بنجد ويتكلم حجازي .. والسبب الثاني لأنه لو مثلا نجد وخاصة بالقصيم والتي يقصد بها الرس وهي أحد ديار العجمان من عام 970 هـ يعني مو من امس وقبل امس والكل يعرف هناك ابناء عمومتهم وليس من المعقول ان يكون منها لأنه لو هو منها بتأكيد بيعرف كل شيء ... لكن ربما سمع انه فيه عجمان بالرس وقال القصيم يقصد الرس

وأحب استفسر عن كلمة قلتها أنت واريد ان اعرف مقصدك منها إذا سمحت قلت ( من عرفت انه من القصيم عرفت الدعوة خربانه ) . نريد ان نفهم ؟
7
7
7
7

على العموم سبب مداخلتي .. احب ان أزيد على ماذكره اخي الحبيب والمحترم قرقاص وعلى ماجاء برده

واقول ان هذا الفعل يعتبر من الكبائر

يقول شيخ الإسلام ابن تيمية رحمه الله في مجموع الفتاوى ...حيث قال حين سئل عن امرأة غيرت اسمها واسم أبيها ( وهذا من الكبائر ، فقد ثبت في الصحيح عن النبي صلى الله عليه وسلم أنه قال : من ادعى إلى غير أبيه .

وقال ابن القيم انها من الكبائر ..ويقصد ( .يدعي أنه ابن فلان وليس بابنه ، وفي الصحيحين من ادعى إلى غير أبيه ) وهذا في ( اعلام الموقعين79 3)

وهناك أدله كثيرة تؤكد ان مثل هذا الفعل يعتبر كبيرة من الكبائر .
كويتي
20-09-2005, 12:39 PM
كـل من ضيـع اصــله قال انا تميمي :)

لاهنت سفراني وحمد الله على السلامه
واهم شي ما هفيته بطفايه :)

كويتي
الــغــالــيــة
20-09-2005, 02:09 PM
لا هنت يالسفراني ...
يعطيك العافيه طال عمرك :)

صارت معي مره .. اسألتني وحده انتي شنو قبيلتج؟
قلت لها انا من بني خالد طال عمرج !
قالت لي .. اول مره اسمع فيها؟!!
قلت لها ... افتحي تاريخ الكويت وانتي تسمعين فيها!
قالت لي .. انتوا شكو في تاريخ الكويت ..
بني خالد اللي كانوا بالكويت هم الخالد (قصدها عايلة الخالد) .....
والمصيبه انها قالت .. لا تقعدون تتلزوق بالحمايل والعوايل الكبيرة :eek:

بالله عليكم هذي شنو أرد عليها ؟!!!


خلوها على الله :)
مناحي الصميل
20-09-2005, 06:38 PM
بنت العجمان اي والله شيء يرفع الضغط :(
وشاكر للمرور الكريم ,,,
مناحي الصميل
20-09-2005, 06:39 PM
كويتي هلا وغلا ,,
اي والله زين مسكت نفسي :)
ولاهنت على التعليق والمرور
مناحي الصميل
20-09-2005, 06:41 PM
الخالديه
اي والله خليها على الله
المشكله فيه ناس ماتعرف بأمور القبايل ( تجهل فيها ) وتلقينه مسوي روحه نابغه فيها :)
ولو انا مكانش كان ضربتها بأقرب شيء عندي :d:d
مناحي الصميل
20-09-2005, 06:45 PM
ربعي ياهلي

مقصدي من الدعوى خربانه ,,,
ان الدعوى طلعت صدق خربانه خراب كبير بعد
ولاهنت على المرور ( اللي مدري وشهو قايل ) ;)
ربعي ياهلي
20-09-2005, 10:42 PM
سفراني ؟؟

ايش هالرد لك ... ممكن توضح ؟ نبي نفهم عربي ؟
شـيـخـة الـبـدو
20-09-2005, 11:04 PM
السلام عليكم ورحمة الله وبركاته

الاخ سفراني

يعطيك العافيه
ولا هنت فديتك
بس اسمح لي على اللي بقوله
اللي مثل الجوكر اللي واجهته كثير
بس ترى مو كل القبايل تعرف الشجره كامله
والسبب ترى خلط الانساب والقبايل

اعترف
والشاهد الله

قبل لا اتزوج واعاشر الناس كل اللي كنت اعرفه اني عجميه من كذا وكذا
هذا كل اللي كنت اعرفه
والسبب مثل ماقلت لك بعدنا عن بداوتنا اللي نفتخر فيها
بس ماحسينا في حاجتنا لمعرفتنا الكبيره الا يوم كبرنا وقمنا نختلط مع الناس
اللي خلتنا لازم نعرف انه اسمنا واصلنا مايكفي
ولازم نعرف كل شارده ووراده عن اصلنا

وبهالشي لازم ندرس بزرانا عن جذورنا
علشان نشبعهم من اصلنا وهم للحين مخوخهم نظيفه

اسفه على التطويل لكن حبيت احط وجهة نظري

والسموحه من الجميع
مناحي الصميل
21-09-2005, 03:24 AM
ربعي ياهلي ,, الله يصلحك قل امين
وانا اتكلم مكسيكي ؟؟
وش تبيني اوضح ؟؟ وانت خليت فيها توضيح ؟؟
خلاص السالفه راحت وخلصت (( راحت عليك )) ;)
تشااااو
مناحي الصميل
21-09-2005, 03:25 AM
كلامش صح اختي شيخة البدو
بس اللي واجهته كبير مو صغير والمفروض يكون يعرف اكثر مني انا :)
وشكرا للمرور الكريم
الــعــــجــــمـــي
21-09-2005, 04:59 AM
اقول يالسفراني واللة انك طحت في واحدن مايدري وين الدنيا فيه بس عجمي وجداوي واللة غريبة بس خوش سالفة عجامين
مأقول الا عسى اللة يرحم الحال
اخوك العجمي
عجميه واعتز
21-09-2005, 02:02 PM
يعطيك العافيه اخوي
(وحتى انا معي بنات في الصف عجمان ولما اسألهم عن فخوذهم وعن الوادي او لهم هجر يقولون احنا قصمان او شي كذا بصراحه ماعرفتلهم <<والله ما يندرا هم عجمان والا


وتقبل تحياتي
اختك
ربعي ياهلي
21-09-2005, 06:39 PM
سفراني ...ليتني عارف من قبل

لكن الحين مانبي منك توضيح .. رح كمل صور السيارات حبيبي :)
مناحي الصميل
21-09-2005, 06:47 PM
العجمي
اي والله طحت بواحد مايدري وين الله حاشره :)
وشرفني مرورك ,,
مناحي الصميل
21-09-2005, 06:48 PM
عجميه واعتز
شكرا للمرور الكريم :)
مناحي الصميل
21-09-2005, 06:55 PM
ربعي ياهلي
يعني شنو تبينا نضحك ؟؟ لا صدق شنو يعني تبينا نضحك والا شنو ؟؟
تبي تضحك رح منتدى الترفيه ومايقصرون معاك الربع بتقزر عليك
وشنو يعني ناقد على صور السيارات اللي احطها ؟ يعني ناقد عشان ماحطيت صور سيارات بياعين الخضره ؟ ابشر ابشر بحطها ولاتزعل
((بحطها عشان تستانس شوي ))
بس ودي افهم شيء واحد ؟؟ حنا الحين نتكلم بموضوع وانت داش عرض بموضوع ثاني ليش ؟
عندك مشكله في ربط الافكار والا شيء ؟
الله يصلحك ياصبي الله يصلحك ,, قولوا امييييين
ربعي ياهلي
21-09-2005, 07:01 PM
ضحكنا وشبعنا ضحك ياصغير ... الله يصلحك بس ..
مناحي الصميل
21-09-2005, 07:25 PM
تسلم يالكبير ,,, :d