القصائد الالفيــه للشعراء

[الاصيل اليامي]

_1_


ألفيت : الشاعر إبن مهذل الصقور اليامي



ألف لفا والتف في قلبي احزان= ياععزتي للقلب يوم احتملها
والباء بديت أشكي ظروفي على شأن = يسمع بها الغالي مع من نقلها
والتاء تواصيفه تواصيف غزلان=تارد غدير الماء وترعى دهلها
والثاء ثمان وسبع من غير نقصان=سنين عمره وأعتقد ماوصلها
والجيم جابتني مقادير الازمان= في سجن حبه والمخارج قفلها
والحاء حديثه ماسمعته من إنسان=يفضي عليه من الشفايف عسلها
والخاء خذيت من الغض عهد وإيمان= وقدمت له مني عهود بدلها
والدال دار الوقت والحظ مازان = وأنا ظروفي بينت بي خللها
والذال ذللني لكم عالي الشان= يامعذبين الروح وأنتم أملها
والراء رجيت العطف منك والإحسان= يأهل الحبيب ليت منتم بهلها
والزاء زرعت الطيب فيكم ولابان=وقلوبكم متمسكه في زعلها
والسين سويتوا حراسه وبيبان= دون الغزال اللي أشكي زللها
والشين شانت حالتي والزمن خان= أشكي زلل هلها ولا أشكي زللها
والصاد صار النومعندي تونوان=وأشوف دنيا ماصلح لي قبلها
والضاد ضاعت حيلتي سر وإعلان= مع الغزال اللي منعها خجلها
والطاء طريقي كل حزة ومحيان= صوب البيوت اللي حبيبي نزلها
والظاء ضميت وعادني اليوم ضميان= وغصون قلبي يابسة من محلها
والعين عادوني الجماعة والأخوان= وهموم قلبي حملوني ثقلها
والغين غابت شمسنا بعدما كان= وقت اللقاء لقلوب الأحباب ملها
والفاء فلا أبغى غير خلي نجران=حبه ملك نفسي وعطفه شملها
والقاف قلت أبغاه من قلب ولسان= أبو جعود فوق متنه نفلها
والكاف كلا له حبايب وخلان= يتبع طريق أهوايته ما جهلها
واللام لاموني وأنا فيك ولهان= والنفس عيت تستمع من عذلها
والميم من دون أريش العين عدوان= ناس بنشر القول ربي شغلها
والنون نرجي خالق الإنس والجان= يقضي لعبده حاجة قد سألها
والهاء هواية خاطري زين الأوجان=اللي سهومه في ضميري جعلها
والواو ويل اللي يقولون بهتان= في يوم تجزاء كل نفس بعملها
والياء يقوله واحد بات سهران= ذاق العزاير والحياة إعتزلها

[الاصيل اليامي]

_2_

الفيت : الشاعرمحسن الهزاني


الف وليف الروح قبل امس زرناه= غرو ٍ يسلي عن جميع المعاني

والبا بقلبي شيد القصر مبناه = وادعي مباني غيرهم مرمهاني

والتا تراني كلما اوحيت طرياه =افز لو حلو الكرى قد غشاني

والثا ثلوم القلب ماحد ٍ بـ يرفاه=الا ان خلي من عذابه سقاني

والجيم جيته ماتردّى لمن جاه =.يقول : حي اللي عنالي وجاني

والحا حليّه يم نجران مرباه =ريم ٍ على نبت الدعث والمجاني

والخاء خليلي ماتجارح سطاياه = بضامري علـّــق سطير العراني

والدال دوك القلب من حرّ مسطاه = جرح ٍ فلو جبت الدوا ماشفاني

والذال ذهب الحواجر بيمناه = اصابعه تزهي الخواتم ثماني

والرا روايح ريحة المسك وياه = ريحة زباد ٍ فاح اوزعفراني

والزا زبر جمعه ولااحرز ملاقاه= مال اجنبيّ يقول راعي المجاني

والسين سمّ الحال والعقل بصباه= باربع محاحيل ٍ تجرّ السواني

والشين شبّهته طليع ٍ بحرياه = مايشرب الا درّ عرب ٍ سماني

والصاد صاب القلب بالدرج مااخطاه = قلت :آآه واعزآه دمي كساني

والضا ظبيان المها كلها فداه = ويلاه من ربي بحبه بلاني

والطا طويت الياس منّـه ورجواه = لو كان ساعفني فـ باكر جفاني

والظاء ضنيت حالي ولافاه = قلت الوداع وقال هذا مكاني

والعين عامين وانا ادور لاماه =اجيه حذر ٍ الى غاب القمر والهداني

والغين غاب وفسّد الترف بعداه= اجيه حذر ٍ بالغبا والبياني

والفاء فكّر ويش رايه وطرياه = هو حبّ قـلب ٍ لومودّة لساني

والقاف قـلت اقـلط واخذ ماتمناه = ماشاف غطروف ٍ صخيف الثماني

والكاف كيفي طاب والحمدلله =الى حصل قصدي ترى العمر فاني

واللام لايمني عسى الويل يفجاه= ماشاف الذي ربي بحبه بلاني

والميم ماوالله لقينا حلاياه= لافي البدو يذكر ولافي المباني

والنون نوره من سرى الليل جدّاه = مثل الفنر والا القمر يوم باني

والواو يوم ٍ على السطح وياه =اشرب من مبيسم رهيف الثماني

والهاء هيـّـضني بها زين شقــّـاه= كنه لطرّاه الهوى معشراني

والياء يسقــّـيني معسّـل شفاياه = ولو جفيته عايفه ماجفاني

[الاصيل اليامي]

_3_

ألفيت : الشاعر محمد بن راشد بن عمار رحمه الله، قالها عام 1340هـ


الف اولف من كلام نظيفى=ودموع عينى فوق خدى ذريفى
من لامني فى حب ذاك الوليفى=دقاق رمش العين سيد الخوندات

خوندات ياللى مابعد عاشرنه=قلة تراهن بالهوى يذبحنه
قلبى وقلبك يالمولع خذنه=عزيل من مثلى تعرض للافات

الباء بليت بحب خلى على ماش=ولا حصلى منه مايبرد الجاش
غديت انا واياه طاسه ومنقاش=بالوصف كنه يالمعزى سلامات

سلامات للي هم يذكرونه=يبغى المعزه منه وهى المهونه
يقول طيب مار غارت عيونه=سبب ولدكم واحد صابه و مات

التاء تبعت الزين والزين مقفي=أمشي وحتفى شايله فوق كتفى
لا شفت مجدول وكتف وردفي=ما أقوى التفت لو طوحولى بالاصوات

أصوات قالوا يا هبيل وسايح=طرد المقفي يالشقاوى فضايح
قلت ماطعت اشوارهم والنصايح=مثل المطر فوق السحال المكفات

الثاء ثمان حب رمان طايف=أو قحويان فى رياض عطايف
متنفل بالزين سيد العفايف=عمهوجة فيها من الحور شارات

شارات فيها من ظبي الحمادي=هى لذة الدنيا وغاية مرادي
من يوم قفى صويحبي من بلادي=عليه جاوبت الحمامه بالاصوات

الجيم جانى من عشيري كلامي=ولا لقينا من يرد السلامي
علية زرع القلب هايف وظامي=مالي جدى كود البكاء والتنهات

ابكي على ما فاتني من زمانى=يوم الحبيب زارني فى مكانى
وراى ما خذت القضا يوم جانى=توى دريت البيض فيهم غرات

الحاء حليه بالوطن مالقيته=عدلت قلبي عنه ولا قويته
لوه يذكر يم أمريكا نصيته=أنصاه لو بيني وبينة مسافات

مسافات فى وسط البحور الظلامي=فى وسط مندوس حداه الولامي
والى حصل لى بلوغ المرامي=أصبر ولوهو فى بحور الظلامات

الخاء خليلى صار منى قريبي=جعلى نصيب له وهو من نصيبي
ودي أواجه نور عيبنى حبيبي=مار الوحيد اللي فيه نوهات

مافيه نوهات ولو من غثاء البال=دب امشي طول النهار عمال بطال
ولا استراح البال عن ذيك الاحوال=دنياك هذى ياأريش العين نشبات

والدال دامي ماقضبت الذوايب=لوقيل لك طيب فلا نيب طايب
دنوا استاد القبر ودنوا النصايب=دنوا دوات الحبر نكتب سجلات

سجلات أريد أكتب لخلي وصيه=عمري غدى ياوجد أهلى عليه
قولوا لصافى اللون يعطف عليه=يكود يرجع ويتحسف بما فات

الذال ذالى عنه مدة ليالى=لو قيل لك طيب فانا ابخص بحالى
والله مايطري على شف بالى=الا انت ياراعي الثمان الرهيفات

ارهيفات فيها للمشقا طرابه=مجمول مدلول ولابة طنابه
ياليت من يدخل معة فى ثيابه=واسج أنا واياه بالعمر سجات

الراء ردوف صويحبي ثقلنه=مثومنن ما احلى بياضه وفنه
ونهود للثوب الحمر شلعنه=والساق فيها مثل عرق الارطات

ارطات غرمول ذرته الذواري=والله يالولاى من الناس اداري
لضوي عليها مثل ذيب العذاري=جايع وعياله بالمغابه مجيعات

الزاء زمانى شفت منه الهوايل=لعاد حظي بالغنادير مأيل
وراي ما اترك كل قاصر وطايل=مار العقل ياذيب هيهات هيهات

هيهات لو ان العقل فية لبه=ماكان يتبع واحد ما يحبه
لصار هرجه لك خريط يدبه=وش لك بشوفه بالعيون المشقات

السين سلمت الدراهم وعيا=واللي نبي من صاحبي ما تهيا
يقول والله لو تحب الثريا=خذنى على السنه تشوف الطرابات

طرابات ينسنك جميع الدروبي=يكود فى باقى حياتك تتوبي
اجعل مقرك بين جلدى وثوبي=حتى تشوف البيض فيهن جنات

الشين شاب الراس ياعذب الانياب=واللي برجوى توبته ذاك قد تاب
لي حاجةٍ يا زين بـس افتح الـبـاب=يرحمني اللي عالـم بالخـفـيــات

يرحمني اللي فيك يازين مفتون=من حبك أسهر والخلايق ينامون
الهيتنى عن مذهب اللى يصلون=معاد أميز ولو قران التحيات

الصاد صيدى يوم الايم غريمى=شفق على الحبه ولمس البريمى
مهوب صيدى قلة بالحريمى=مار كل له من البيض مشهات

مشهات فيك ياظبي الفريدى=حب العرب ينفص وحبك iiيزيدى
لشفتك ذاك هو يوم عيدى=تصبح بساتين الضماير مريفات

الضاد ضد حال بينى وبينه=يقول هذا صانع لاتبينه
عسى الولى يبلاه فى صبي عينه=عساه يسهر من الليل ساعات

ساعات يسهر مايدل الجداره=ولا يعرف الليل هو من نهاره
عساه يوم البعث يحشر حماره=محمل من حمل الاسراف سيات

الطاء طويت الياس والسد باحى=معاد لى شف فظبى البياحى
لعلها هفت خفوق الجناحى=اللى اسبوقه فوق رجله مطوات

امطوات طار فى يوم هبه=راعيه لو رز اللوا ماينبه
شاف الحبارى رابضات بحبه=يبغى العشاء من فخذ وتندات

الظاء ظحانى يالمشقى بالاثنين=لازم تخلى عشرته يامسيكين
والى ابتغى بالمرابط حصانين=يجى لهن هز ولز وصقلات

صقلات يصقل كل ماجا طعامه=يجرى لهن عن المعيشه بحامه
افهم كلامى يالهبيل العدامه=الى جمعت الحصن فالحصن خطرات

العين عن من ينقل الهرج حذراك=تراك كنك شايل داك برداك
والى سمع له هرجة من حكاياك=يحطها مثل القصور المبنات

يبن عليهاكبر راس الغرابه=ويكدر المشروب عقب الطرابه
وهو يشابه بومة فى خرابه=لا ناقل هرجه ولا كفو هرجات

الغين غاب العقل باول شبابي=وأدميت من تلعات الاركاب نابي
واليوم شاب الراس والكيف طابي=مانى عن الفايت كثير الحسوفات

احسوفات لاتفرح على اللي يجى فيك=ايضا ولا تندم على اللي عدى منك
مدراك لو هو واجب صدته عنك=ناهيك والى العرش رب السموات

الفاء فؤادك لاتوليه حساد=واحذر يجى لك مع هل الفى مقعاد
اضحك وكنك عن جميع العرب صاد=ثم اعتبر بالذيب يضوى بغارات

يضوى بغارات وهم ما دروا به=واللي يوقف بالمحارى حكوبه
كم واحد وقف ولا قضى نوبه=يكسر الى شاف الطعم كنه حدات

القاف قل للى يريد النواميس=واللى شقا بالهوا يرخى الكيس
والى جمعت النفس والفلس وابليس=يطيح ناس يدعون الديانات

طاحوا وصاروا للخلايق علاجه=يلقاهم راع الهوى قضى حاجه
والى نثرت الحب جتك الدجاجه=حارت وباضت لو تبى عشر بيضات

الكاف كن السد فى كل الاحوال=واحذر لسانك لايقولون ذا قال
حتى تجي عند العرب خوش رجال=لا صرت بالمجلس نواظرك صقلات

صقلات لاتجلس مع اللى يشاكيك=هو علتك ودواك هلى يش********
ياذيب كان الله على الرشد هاديك=أكتم كلامك بالضلوع المحنات

اللام ليت العمر ينكس لحله=قيمة ثلاثين السنه هى محله
الرجل قبل الشيب ياحلو دله=وان لاح فيه الشيب مافية لذات

مافية لذات ولا يقباونه=لو حط له رده وكحل فى عيونه
أهل الهوى عقب الغلا ينكرونه=لره مصافيهم فى فايت فات

الميم ماغيري من الناس جرب=وما غيري أحد فى حياته تطرب
لاويت صافى اللون فوق المضرب=كن العدو عينى عيونه مداوات

امداوات جعله ما يجى لى عباره=واللي يصد عنك وش لك بكاره
الحذر ما ياطا بوسط الحباره=لازم يجى فيها عفاريت حيات

النون نام الحظ ولا فيه حيله=عيا يبارينى وانا أزريت أشيله
من يوم خلانى عريض الجديله=دليت أكسر فى حشا الصدر عبرات

عبرات اكسرها بداخل اضلوعى=عليك ياخلى حسين الطبوعى
دين القطع ما قط جفت دموعى=دايم عيونىفى مهاواك سهرات

الواو ويل أهل الهوى من هواهم=وان كان هلى سم حالى وطاهم
كم ليلة يصبح جفيف عشاهم=الا لقيمات مع الحلق مرات

مرات لين أقضي من الترف شفى=ووسده عضدى وزندى وكتفى
وأكشف على اللى وارم ومتخفى=حتى يجى للاكل والشرب لذات

والهاء هواي السابعه يالفطينــي = والثامنة ياللي تعرف الرطينــي
مخفية ما ودي لضدي يبينـــــي = والتاسعة تحصاه باعداد الاميــات
اميات مات القلب من كثر همـي = واشكي عليك الحال يا ولد عمـي
انته عضيدي وانت لحمي ودمـي = ترضاه يجفاني ولانيب مجفــــات

الواو ويل اهل الهوى من هواهـم = ان كان هل اللي سم حالي وطاهـم
كم ليلة ٍيصبح غبيبٍ عشاهـم =الالقيمات ٍ مع الحلق مـــــــــرات
مرات لين اقضي من الترف شفـي = واوسده عضدي وزندي وكفــي
واكشف عن اللي غابي ٍ وامتخفـي = ثم ٍ يجي للزاد والشرب لـــذات

اليا يحبه صلف ومراقده كلــف = لو هو يتمم مطلبي كان اقول الــف
حيثه صديق من قديم على عــرف = والا فغيره لو يبي عشر بيـــزات
بيزات ما افلها لغيره بلاشي = من جنس رأس الظبي ما ابي عراشي
الا لمن ما يه على ماه مــاشي = هذاك من يمه فلوسي رخيـّـات

[الاصيل اليامي]

_4_

هذه القصيده المشهوره للشاعر فهد ابوسرداح المزيني

فريده من نوعها بها من الامثال والحكم






ياسامعين الصوت صلوا على النبي=عداد ما تذرا الهبايب نفودها
يقول ابو سرداح يوم يتمثل=ابيات يبينها لفهيم يقودها
ترى الالف توليف العلوم الطيبه=ومحاكي يفطن لها قبل كودها
من خوف لا هوين الأموريتعسر=تكرب لوالبها وعسرٍردودها
والبا لياما باوب الدرب باوبه=باوب لدربك لاتعرض سنودها
ترى الموافق والمرافق معزه=والحبل ليا صف الحطب ضب عودهـا
والتا تحذر لا تمتن بخير=اليا صرت من عربه معروفٍ بجودها
ترى المال مثل الظل لو طال يقصر=المال كثره ما نفع مع فهودها
والثا تثاثا عن خطاة القاله=الا اللي تحف الوجه عجل ردودها
ترى البياض نور الوجه في كل مجلس=من خوف لا أسود تغشى خدودها
والجيم لا توجم كنك محـزن=وسع الصدرك قبل لاجي الحودها
ترى دنياك ما تعلم بغيبها=واسرع من بيت انقشع عن عمودها
والحا ليا جاك الضيف حي بـه=وهل به على ما حضر من وجودهـا
قل يا مرحبا يا ضيفنا يوم جيتنا= عداد ما ركبوا على عوص قودهـا
والخا خف من الولي ثم راقبـه=طمن صلاتك ثـم ركـد سجـودها
من خوف لا ترمى بحامي جهنم=نـار تلظـى والحــجر هـو وقـودهـا
والدال تدلل بالوجيه الفالحـة=ترثه حرار من مواكر جـدودهـا
ومن لا يتدلل بالوجيه الفالحة=عجوزعميا مالقـت مـن يقودها
والذال لا تذل من وسط ربعـك=ترى ما عن ملاقيها تصافح خدودهـا
ترى ما جاني الراعي الذل مادح=ولا جوني ربع مادحين شرودها
والراء ليا ولفت راي طيـب= يهون بقالاتك لون ايش كودها
من خايل القاله وعرف مطبهـا=جنب عن درب الوعر مع اسهودها
والزا لا توزوز بين ربع رفاقه=وتملى كبود لين تكثر لهودها
مثل الذي يلحق على النار بالحطب =نار تلظى لين حميت حدودها
والسين توسع عن خطاة المجلس=ترى خطو المجالس ذرة من نفودها
ترى خطو المجالس شوفهن يمله الولد=الياصار من عربة مخيل بجودها
والشين ليا فاتك الشي فوته=لا تبعث الأمياه تكثر ورودها
ما فاتك فوته لاتبين بساقته=صيدتقافاوجافله به عنودها
والصاد من صد عن لازم ربعه= مثل المره تحلب اللبن من ديودها
والا ترى الثلث منهن يسوي الثلث منا= خرفان لولا الحيها حل قودها
والضاد ليا ضدوك ربع رفاقه= شبر من البيدا ينزح لهودها
ابعد بنارك لا تقابل النارهم=مالك بنقص الحكايا وزودها
والطا تطمن للولي ثم راقبه=وحاذور نفسك لا يعديك زودها
ترى دنياك ما سوت جناح بعوضه= عافت طمايع نفسها من زهودها
والظا حذرا لا تظاهي بحظك=يوردك نيران تلظى حدودها
ترى العمل قدام راعيه قاعد= في ساعة تشهد على الأمة جلودها
والعين اليا شافت العين قابل=بخير ولا بمرهف من حدودها
ترى القبال يخزي العين لياحضر= وتهون الأنفس عقب غلقة حدودها
والغين ترى المغنيات الخيل والمال النخــل= دلي تصافق ونثرها وسط عودها
ماهجت عن الصياح لو صاح وانتخى=عقار مال من ترايث جدودها
والفا لا تفافي ليا صار لازم= خيار المعاني قضيها في وجودها
اليا بدالك لازم لا تواني=من خوف حساد تفطن حسودها
والقاف قف النفس اذا جا أجلها=ترى دنياك كل يوم تنقض جعودها
وافطن ترى دنياك تطحن وتلهي=وكل عين مولجة لها لعوطها
والكاف كف الرجل عمن لا يودك=لو عندهم لك حاجة لا ترودها
تراك لو راودتهم يبغضونك= بغض من شاة الذيب يقودها
واللام لا تلوم على اللي لك مصافي= معاونك في هون الليالي و كودها
ترى اللي انت تنوس تراه ينوسه= والله خلف فيما غدى من نقودها
والميم من تيمم وعانق العرب=باقي المعاني مانبي له زودها
اليا عانق الأمة ودب دبيبها=الرزق ياتي من منشي رعودها
والنون بالدنيا الشوف والضنا=وبالأخرةجنات ترجى برودها
والرزق عند الوالي المتعلي=يعطي عطاياما تحسب حدودها
والواو كثر اللجلجة تملي الولد= الياصارمايفهم ملاوي نقودها
يضيع هرجه مايميز جوابه=شن تنثر معلق مع ورودها
والهاء رد النفس لا تتبع الهوى=وافطن ترى دنياك نقصها كثر زودها
وش خانت الأيام يوم يتفطن= قام يتسابق دمع عيني خدودها

[الاصيل اليامي]

_5_

آلف اولـف مـن كـلامي واغـني = واذكر مـن الآبيات شعـر فــتـني
من ضيقة بالصـدر هي تمتحني = تضفي عـلي بهـم في كـل حـزات
وألبا بديـت بـذكـر رب العـبادي = خالق جميع الـكون والعـبد شاقي
ومـفرج الكربات بعـد انعـقـادي = يالله تـزيـل الهـم لا جـا بـضـيقات
التا تـوالت في حياتي مـصايـب = مصايب من عـقـب فـرقا الحبايب
آن قلت آنا طيب فلا ني بطايـب = فقـدت طعـم الزاد في كـل الأوقات
والثاء ثمان اسنين عدت عـليه = من عـقبهـم صارت حياتي شقـيه
واتلى علومي فيه عيد الضحيه &= يـومـه يعـايـدني ويــبدي تـحـيات
والجيم جاني منه عـلم اكــيـدي = لا هـوب مرضـيني ولا مستـفيدي
الحـب نعــمة والمحـبة تـزيـدي = قـدره على غيره ولا به مساوات
والحا حياتي ما بـها شي يـذكـر = والـكـل من حولي مـزاجـه تـعـكر
ما عـاد امـيـز بـيـن مـلح وسكر = اللون واحـد والـطعـم فـيه نكهات
والخا خفيت بكل ما في ضميري = يا جعلها عـقب الجفاء تستخيري
وتصير شمعه في حياتي تـنيري = تضفي علي بنورمن بين شمعات
والدال دمع العــيـن مـني يـهـلي = لا سائــل عـــني ولا فـاطـنـن لـي
يا خوفتي من هالجـفاء والتـغلي = يطـول وقــته ما حـسبنا حـسابات
والذال ذاب القلب من ما جرا له = بـسـباب زيـن مـا يـعــوض بـدالـه
الــنـاس واجــد بـس كـل بـحاله = كـل يـقــضـي حاجـته بـين حاجات
والرا ربيع العـمر يمضي عـلينا = لا هــو رضـى مـنا ولا هــو بديـنا
يا مـا زرعـنا فـيه زرع وجـنينا = واظـن زرع العـام لا احيا ولا مات
والـزا زمان فات كـثرت بلاويـه = حار الـطـبـيـب ولا عـرفنا نـداويـه
هــذاالكـتاب مـحـير في معانـيه = مـا يـنـفـهـم مـن بين كـتب كثيرات
والسين ساعات السعادة قـلـيله = للي يعـاني الـبعــد وا عـــزتي لــه
وش فايـدة خـل تـناسـى خلـيله = ما للسعادة طـعـم من عقب ما فات
والشين شمس شارقه ثم غابت= ورأسي غـزاة الشيب والعين شابت
يا جعلها لامن دعيت استجابت = تفـكـني كـثـر الـدعـاء والمـناجات
والصاد صوبني بسهم القطاعه = لا واسـطـة تـنـفـع ولا به شـفاعه
ياليت من يجلس معه لولساعه = اشـرح له ظروفي واقـدم بريرات
والضاد ضو تحـرق القلب حرة = غاب الهناءوعـنها تغــيـب المسرة
لـو ما يجينا خير جـتنا مضرة = يا كـودها يا كـبرها مـن مـضــرات
والطا طـريـق طال مـاله نهاية = درب مشـيته صعب مـن دون غاية
سلكت درب سهل يـومه معاية = والـيوم ابـسلك لي طروق صعيبات
والظا ظـلام حالـك فـي حيـاتي = لــولا الأمـــل بالله يــقـبـل دعاتـي
هي منـيـتي يالله حـقـق مـناتي = يا مستجـيب للدعـاء بـين دعـوات
والعين عهـدن قاطعه مانسيته = آن كــان شـاريـني بـغـالي شـريته
وأن كان بايعـني فأنا مابـكيـته = أبـيـع مـن بــاع وتـغـلـى بالأوقــات
والغين غـنيت بقـصايد حزينه = الـــفـيـه فــيـهـا الــمـعـانـي رزيـنـه
ألـفـية المـشتـاق يـبدي حنينه = يالايـمـي جـعـلك تـذوق المـصيـبات
الفا فرش بالقلب وسطه تربع = وعـودته اطـباعـي الـى مـن تـطـبع
لا جافـل مـنـي ولا هـو تـروع = بس التـجـاهـل يجـعله فـي مـتاهات
القاف قلت الشعريومه جفاني = مـهــوب شـعـر للــطرب وللاغــاني
إحساس شاعر بـين بالمعاني = كـتـبت شـعـر يــنـقــري بالـــمجلات
الكاف كاني عـنه داله وسالي = مهــوب حـقــران ولا هــو تــعــالـي
ليته عقب ماقلت يرفق بحالي = ويعــود مـثـل أول وينسى الذي فات
واللام ليـته يسمع اللي كتـبـته = ويـذوق طـعـم المـر يـومي شربــته
والدمع مـن فرقاه لجله ذرفته = ذرفــت دمع سـايـل فــوق وجـنــات
الميم مدري كنه الـيوم نـدمان = حـس بطعـم لفراق ضـيقه وحرمان
يقول آنا والله آسـف وغلـطـان = مـن يـغــفـر الـزلــه يـسامح بـزلات
النون نذرا علي انسى خطاياه = ولــو كـثـرة افـعـاله وكـثــرة سواياه
واللي بـدا بـأمــر لابـد يـنـهاه = يـفـضـل عـلى غـيرة بأمـور كثيرات
والها هوانا صافي دون تعكير= الله ربي مسـخـــره خــيــر تـسخـيــر
اضن آنا وضحت كل التفاسير = مـا بـاقـي آلا ذكر اسـمه بـالابــيات
والواو وعـد الحر دين يقضى = لامن وعـد يوفي ومن اخلف تلـضـى
من همل اعماله ولجله تفضى = ماهـو كـثـيـر آن زاد بالكـيل وزنـات
واليا يارب جامـع بـين قلبـيـن = لا يـدخـل الــشـيـطان بـيـن المحـبـين
وصلاه ربي عد زرع البساتين = عـلى الـنـبي الـمختار بكل الصلـوات

[الاصيل اليامي]

_6_

ألفية : الشاعر عبدالله بن دهيمش بن عبار




الألف أولف ما طرالي مـن القـاف= أمثال من فيض القريحـة طرايـف
والباء بديت القاف للشعـر صـراف =وشفيت من عذب القوافـي غرايـف
والتاء تجاوزت الرذايل وألأعجـاف=أخشى تقول الناس مخطـي وهايـف
والثاء ثارالجاش في عذي الأوصاف=فيض الخواطرمن هواجيس طايـف
والجيم جبت البوك وأمليت الأصناف=وعرفـت وزن ثقالهـا والخفـايـف
والحاء حكرت النظم والفكر عّـراف=متفقده مـا قلـت منطـوق زايـف
والخاء خواض البحرغمق الأضفاف=واللي يـدور القيـش لازم أيسايـف
والدال دنيت القلـم بيـن الأطـراف=وسجلت به منطوق لفـظ الشفايـف
والذال ذرب القول في عدل وأنصاف=أطيب وأخير من الهروج العذايـف
والراء رسم معنون الخـط بغـلاف=من واقع العنوان تقـرأ الصحايـف
والـزاي زلاتـك تحطـك بميهـاف=لو التمدري مـا نفـع كـل خايـف
والسيـن سـدك لا تبيحـه لبـلاف=ولا ترافق الا قرم وافـي الكلايـف
والشين شاور بالعرب عال الأهـداف=النادر اللـي بطيـب الفعـل نايـف
والصاد صولات الفوارس بالأسيـاف=راحت مع عصور الركاب الهجايف
والضاد ضيفك سر باله إلى ضـاف=لو كان ما تعرفه من أي الطوايـف
والطاء طبع الجود من سلم الأشراف=والبخـل يبعـد بالقلـوب الولايـف
والظاء ظني خاب في بعض الأحلاف=لا خير في عرف الرخوم الهدايـف
والعين عد براس عالـي ومشـراف=وأرقب على روس الجبال النوايـف
والغين غيبت صاحبك ظلم وأجحاف=أحذر تكـون لغرتـه تقـل حايـف
والفاء فارق كل من يعمـل أسـراف=فرقا ردي الشان ما هـي حسايـف
والقاف قرب اللاش والعفن ينعـاف=واليوم خلق الله مثل ما أنت شايـف
والكاف كل الناس تنجـع للأريـاف=حزت يكون الروض مثل القطايـف
واللام لو دون العلا جمر وأرضـاف=شم للفخر لـو حـال دونـه قذايـف
والميم ما تاجد على الجـال ميقـاف=بالـك بميهـاف المهافـي تهايـف
والنون نمشي والسرى يتعب الهـاف=عشنا حيـات الباديـة والوضايـف
والهاء همت وشلت حملي بالأكتـاف=وجربت من لوعات بقعـا كسايـف
والواو وجدي حط بالقلـب خفخـاف=وأومابي أومـاي الهـوا بالسفايـف
والياء يا من لا منـي رح لـلأذلاف=فارق عسى يغشـاك جـن العفايـف

[هند]

لاهنت أخوي الأصيل اليامي


يعطيك العافية على مابذلت من جهد



لك تقديري
السؤدد

[الاصيل اليامي]

ومن يقول مايهان

يا الســـــــــــــــــــــــــــــؤدد

والله يعافيـــــــــــك على المرررررررروووررررررر

[sohab]

السلام عليكم


الاصيل اليامى


يعطيك العافيه والله لايهينك على ها المجهود الطيب


شكرا وتحيه

[الاصيل اليامي]

وعليكم السلا م ورحمة الله وبركاته

sohab

ويعطيك العافيه على المتابعة

هذا ولك جزيل الشكر

[مهرة العجمان]

اخوي ..........الاصيل اليامي

الف الف شكر على هذه الجهود الطيبه

ونتطلع منك المزيد من هذه الروائع

اختك(مهرة العجمان)
عضوه جديده

[الاصيل اليامي]

هلا والله

مهرة العجمان

الله لايهينك على المررررروووورررر