اسألة الاطفال المحرجه

[فيصل بن حجرف]

السلام عليكم
انا قريت الموضوع هذا في احد المنتديات وحبيت انقله لكم عشان اسمع ارائكم
ولانه موضوع مهم ويستحق النقاش وانشالله اكون وفقت في النقل

يرد من الطفل لوالديه او غيرهما تساؤلات كثيره

اعتقد ان هذا الموضوع من المواضيع الحساسة

والحرجه والشائكه خاصة وان المعنيين من الآباء

والمعلمين يتعاملون مع الاطفال بطريقة تخالف

نموهم ونفسياتهم مما يجعل الاطفال يعيشون

في حيره وتضارب في المعلومات والتوجيهات

من هنا احببت ان اطرح بعض التساؤلات لعلنا

نجد الاجابات والحوارات التى تنفعنا في تربية

اولادنا 0


1- من خلال طبيعة الطفل ومستواه التفكيرى

هل يجب ان يعرف عن جميع تساؤلاته ؟


2- من خلال مجتمعنا المحافظ ،هل نواجه الاسئله

التى لاينبغي للطفل معرفتها بالكذب ام بالاجابات

المضلله ام ماذا ؟


3- هل كثرة الاسئله من الطفل من مؤشرات الذكاء ؟

اخيرا توقع انك تواجه من اطفالك او غيرهم هذه

الاسئله فكيف ترد عليهم 0


آمل من الجميع المشاركه الفاعلة في هذا الموضوع

لنخرج انشاءالله بالفائده

تحياتى لكم

[عزوف]

بصراحه موضوع حلو ومادري ليش محد شارك يمكن لكثرة مواضيع المناقشه بالقسم عموما

المفروض الاباء يردون على جميع استفسارات الابناء بطريقه بسيطه وذكيه بحيث ان ما يشرحون للاطفال بالتفصيل اصلا ماراح يفهمون

الطفل اي رد يقنعه

لكن المفروض ان الاباء ما يحقرون الطفل المتسائل او ينهرونه لانه راح يتمسك بالموضوع ويلح في معرفته

فعلا الطفل كثير التساؤل ذكي لكن الرك على الاباء هم اللي ينمون هالذكاء بالرد المقنع والمبسط لكن حين يتم اسكات الطفل وعدم الرد عليه فهذا يجعل الطفل محبط ويأثر على عمليه توسيع المدارك لديه

هذا ردي وهو بصراحه مو من خلال تجربه لكن من خلال ملاحظتي لعيال عماتي وبنات خلاتي :)

الاحظ اللي دايم اتجعم الطفل يصير ولدها جني ولايفهم ولايستوعب العلم :)
اما اللي تتكلم معاه بهدوء يطلع ولدها عبقري وذكي :)

تحياتي

واتمنى من الجميع المشاركه

مشكور يا بوعبدالله على هالموضوع اللي بالفعل يستحق المشاركه :)

[كويتيه]

يعطيك العافيه العجمان موضوع حلوو صراحه..
برأي.. انه الطفل اللي سأل وايد.. ذكي و ملاحظ.. و الطفل اللي يحمل هالمواصفات.. يكون اغلب الاحيان.. عايش في مجتمع كاله ناس كبار و ااطفال حواليه عددهم قلييل... و هذا اللي يخليه ينتبه وايد.. و خصوصوا حق اللي اكبر منه. و يحاول يقلدهم بالكلام.. و حتى بالحركات.. عشان جذيه تلقاه يسال اساله محرجه.. او اساله ماتتوقع انه طفل يسالهاا..
بس شي خاطئ انك تجذب على الطفل. حتى لو غشمره.. عشان الصغير ياخذ كل شي من الكبير.. و لو جذبت عليه بيكون شي صعب انك تقنعه بالحقيقه بعدين..

من رأيي... اهووه اجابه الاطفال اجوبه مقنعه.. و عدم الجذب عليهم افضل طريقه لتربيتهم.. ..

[cool]

السلاااام عليكم ورحمة الله وبركاااته

تسلم ابو عبد الله على المووضووع الحساااس واللي يخص فئه مهمه وهم الاطفال

صرااحه الطفل بطبعه انه يحب يسئل عن كل شي ويحب يعرف كل شي ويسمع

الكلااام يعني الاطفاال يلقطوون الكلاااام بسرعه .

بس فيه اسئله محرجه يطرحها الطفل وصعب على الواااحد يجاااوبه عليهااا لان

عمر الطفل صغير على المعلومه هذي ولو قلت للطفل كل شي بتكلم قداام الناس

يعني لا سمح الله قلت له عن شي ماهوب زين يقوله عند الناااس الاغرااب والطفل

مايعرف العيب او لا لانه ماوصل مرحله يميز الاشياء هذي .

بس ان كااان فيه تعليم له على مرااحل وشرح له بطرق سهل ولا فيها شي

اعتقد انه زين لتعليمه .

وللاسف فيه ناااس يحقرون الاطفاال ويتكلمون عليهم بكلااام يحطم الطفل وفيه

نااس للااسف بعد تتكلم كلاااام غير لائق قدااام الطفل ولا هو شي زين .


كـووول

[اليامي]

يعطيك العافيه العجمان موضوع حلوو صراحه..

برأي.. انه الطفل اللي سأل وايد.. ذكي و ملاحظ..

ويجب على الاب الاجابه بصدق وعدم الكذب عليه

مهما كان السؤال محرج لكي يبني ولده على تربيه صالحه

يكون فيها صادق لا يعرف الذب في حياته


مشكور يالعجمان

[القرشي]

السلام عليكم مشكورين على الموضوع الطيب عن تجربه مع الأطفال :
الأجابه على التسائلات السابقه :
1-نعم
2-على حسب عمر الطفل
3-نعم
4-بالطريقه التي تنمي عقل الطفل وتكبره وتوصل له النتيجه ألتي تراها صحيحا.

[فيصل بن حجرف]

السلام عليكم

اشكر مروركم كلكم اخواني وخواتي
ولكن عندي تعليق بسيط
بشكل عام الاطفال بمرحله معينه من العمر واللي هي بداية تعلم الكلام يكون كثير التساؤلات لانه تمر عليه كلمات ومسطلحات جديده
وانا من رايي انها ماتعبر عن ذكاء الطفل او غبائه
في اساله تكون شوي كبيره على الطفل او ممكن تكون اجوبتها محرجه للولي الامر
انا من رايي انه لازم نجاوب الطفل بحدود المعقول وبدون فتح عيونه على شغلات مو من المفروض انه يعرفها بعمره هذا
وفي حالة كان السؤال شوي صعب او في مساله محرجه
ممكن نقوله على جواب بشكل عام بدون تفاصيل


ومن المهم في رايي انه نجاوب على اساله الاطفال ولا نحتقرهم ونعطي اسألته اهميه عشان يحس بثقه ويحس انه فيه احد مهتم منه

هذي يعني نقاط بشكل سريع تعبر عن رايي

ولكم كل التحيه على حسن المتابعه والمشاركه

[الجـــــــــادل]

لاهنت على الموضووع

احياانا تكوون الاسئله مفاجاه للام فتتخلص من السؤاال بنهر الطفل وهذاا اتكبر غلط لازم تسايسه وتحااول توصل له المعلوومه بطريقه مبسطه

[فيصل بن حجرف]

صحيح كلامك اختي الجادل
وهذا للأسف اللي صاير عند اغلب اولياء الامور
والهدف من طرح هذا الموضوع هو انه الكل يستفيد عشان اذا مر في هذه المشكله يقدر يتصرف
وبالمناسبه خوش توقيع

تحياتي

[المحامي]

اخوي العجمان

اولا ابي ارد على كلامك في شأن ان الرد على الطفل في الجواب بحدود المعقول ... انا اختلف معاك الرأي وهذا اللي يدفعني الى الاجابة على تساؤلاتك الثلاثه ...

كثير من الناس ما يجاوبون الطفل بالحقيقة وهو امر سلبي يحد من تنمية تفكير الطفل بمراحل نموه ، ويجب على الاب ان يجاوب الطفل على تساؤلاته حتى لو كان السؤال صعب. فعلى سبيل المثال سألني ولدي وهو صغير بالعمر عن القانون الذي درسته فاجبته بالاتي: " اختلف الفقهاء في تعريف القانون ولكن اغلبيتهم اتفقوا على ان القانون هو مجموعه من القواعد المنظمة لحياة الانسان في مجتمع ما ".

طبعا الطفل ما فهم شنو قلت انا ، فسألته فهمت شي قال لا فقمت وشرحت له اكثر تفصيل مع اعطاءه امثله وهي على سبيل المثال قانون المرور في شأن تجاوز الاشارة الحمرا، لذلك يجب ان يكون الحوار مع الطفل كالحوار مع البالغ الراشد ، وابي ابين شي للاسف ان حنا نعيش في مجتمع ما يحترم الطفل احيانا في اسألته وتقديرة ، واذكر سنه من السنين سافرت مع صديق لي الى نجران لكي يلتقي بجماعته في منطقه اسمها ثار ، وشفت الرجال كيف يعاملون الاطفال لقيت شي غريب واعتقد ان السبب هو سلم هذا المجتمع في تربية اطفالهم وربما فراغ الوقت مقارنه مع حياة المدينه ، فعلى سبيل المثال كنا معزومين عند خال رفيقي على غدى وكان المجلس مليان رياجيل وكان احد الموجودين يسولف سالفه طويله ودخل علينا ولد عمره يمكن 8 او 9 سنوات وقال سلام عليكم يا رجال فدهشت من الحدث اللي صار وهو ان الرجال اللي يسولف وقف سالفته وقاموا الرياجيل بانتظار سلام الولد ومن ثم جلس الولد في وسط المجلس وقال والسلامه والمعونه ومن ثم اخذ مكانه في المجلس وقاموا الرياجيل يتحفونه ودامت هذه العملية فتره طويله دون ان يكمل الرجال سالفته وبعد ما خلصوا من التحية كمل الرجال سالفته.

لو ان هذا الحدث صار عندنا كان الولد ما سلم واذا شافوه الرياجيل قالوله بس عاد روح اقعد عند البزران.

لذلك اعتقد ان الحوار مع الطفل يجب ان يكون بكل صراحة حتى لو ما يفهم انت وش تقول وبين فترة وفترة ناقش الطفل بامور صعبة مثل اعضاء مجلس الامة ، هيئة الامم المتحده ، علم الحاسب الالي ، واحيانا الامور الخاطئة مثل الصور الاباحية بان الاسلام نهى عن مطالعتها والسبب في ذلك كذا وكذا ، لان الطفل اذا لم يجد من ينبهه فانه يمكن ان يقوم فيها.


المحامي

[فيصل بن حجرف]

السلام عليكم

يعطيك العافيه اخوي المحامي كلام جميل

وصراحه الكلام اللي قلته عن السالفه اللي صارت بنجران حلوه
ومعروف الشي هذا عندهم
وصراحه شي جميل لانه يحسس الطفل انه له اهميه

ولكن الموضوع بشكل عام كان عن تساؤلات الاطفال
وفيه بعض الاسأله تكون محرجه
فما هي الطريقه المثلا للاجابه على تلك الاساله؟
وكان رايي انه نجاوبهم بالصحيح ولو كان الجواب فيه كلام صعب انك تقوله لطفل حاول تشرحه له بطريقه مفهومه

واشكرك مره ثانيه على المشاركه اخوي المحامي

تحياتي