مشاهدة النسخة كاملة : همــهـــمــات سعد . . !
سعد الصميل
24-03-2011, 04:44 PM
اقتحااام . .
بدون اسنئذان . . جيت علشان اقول اللي بخاطري . .
مواقف . . سوالف . . عبر . . تجارب . . كلها من واقع حياتي . .
وإن لم تكن من الواقع . . . تكون أمنيات . .
استحملوني شوي يا شطار واتمنى اكون ثقيل دم عليكم فوق العاده !
ماعلينا المهم بما اني بزودها حبتين بتكون سوالفي هنا ماهي الا علوم طيبه و سوالف سياسه رياضه اقتصاد ادب وعلوم واجد وبس يعني اللي مشترك بخدمه اخباريه يكنسل ابرك له .
بس ترى عندي ثقه ان اللي بيدور في ركني قصايد وخرابيط بيتعب نفسيا ماشاف شي منها ! :)
بسم الله نبدأ وتوكلنا على الله .
سعد الصميل
24-03-2011, 04:47 PM
قبل شهر 12 كان فيه دوله اسمها ساحل العاج وكان فيها مشكلة بالانتخابات بفوز المرشحين الرئاسيين الاثنين وصار كل واحد يقول للثاني انا الرئيس . . وكانت قضيتهم شاغله العالم . . احد يقول لوران غباغبو هو الرئيس واحد يقول الحسن وتارا هو الرئيس . . المهم كانت هذي البلد شاغله العالم كله وفجأه . . دخل البوعزيزي راعي الألف , اقصد الألف ميل اللي بداها العرب بخطوته طبعا . . دخل على الخط وخلى العالم ينساهم ..
على فكرة . . سمعت في البي بي سي ان الخوال لذلحين يتذابحون
هههههههههه !
:)
سعد الصميل
24-03-2011, 04:49 PM
سبحان الله مصر واليابان دايم ماشيين مسيره وحده بالضبط !
في منتصف القرن العشرين تم الاعلان عن الثورة اليابانيه الصناعيه والثوره المصريه الصناعيه في وقت واحد . .
شفتوا شلون مصر سبقت اليابان بالتطور والحضاره ؟
بعد اكثر من نص قرن . . جاتهم كارثه وحده في نفس العام بالضبط . .
احد بلده ثارت وقتل الناس واعلنت الطوارئ . واحدهم جاه زلزال . .
وشفنا الفرق بين الشعبين . وبحسب ماسمعت في البي بي سي عن احداث وادبيات الشعب في اليابان قارنتها بمصر .
في مصر يسرق المتحف الوطني . . في اليابان على كثرة الفوضى لم تسجل حالة سرقه او نهب واحده في جميع انحاء البلاد . .
في مصر التجار استغلوا الازمه . . في اليابان جميع التجار يبيعون بخسارة واقل من سعر التكلفه للوقوف مع بلدهم . !
في مصر الشرطه ترش ماء ساخن لحرق جلود المتظاهرين . . في اليابان مكائن المشروبات صارت مجانيه وتتحمل الشركات الخسائر وهي مو مجبره !
في مصر المسلمين يتذابحون . . في اليابان مأدبات جماعيه في كل حي علشان ماينكسف اللي ماعنده فلوس او اكل !
في مصر الشعب سيعيد تشكيل نفسه وسيثور على نفسه مرة اخرى بعد 40 عام لعدم وجود تغيير ويسقط النظام ايضا . وفي اليابان بعد يومين من الزلزال بيصنعون لكزس !
الله المستعان !
سعد الصميل
24-03-2011, 04:50 PM
بموجب خبرتي في الحياة اللي تعدت 77 سنه وهو عمري البيلوجي طبعا . .
اكتشفت انه لا يوجد عائله كامله !
اكتشفت ان كل عائله فيها شخص جاي بالغلط !
يا إما واحد خبل . او بنت جايبه سمعتهم ارض ارض . او ولد فاجر . او واحد عليه من الله ظلال . او واحد مجرم . او واحد يفشل . . . الخ !
واذا سلموا من ذلك كله . . فلن يسلم والدهم !
متأكد ان فيه احد متفق معاي , والا ؟ :)
سعد الصميل
24-03-2011, 04:50 PM
قبل امس شفت لي منظر . . اخر مره شفته قبل الغزو .
شفت راعي البيبسي حاط سحارات البيبسي فوق بعض بالشارع بالقايله ويبيعها على الناس .
الجديد في السالفه انه قبل الغزو كان معاه عربانه يمشي ويطق البيبان يسألهم اذا يبون بيبسي او لا . .
اما الحين شفته حاط لوحة فيها رقم موبايله وماشي عن المكان بكبرة .
هههههههههههههههههههههههههه .
سعد الصميل
24-03-2011, 04:51 PM
الا صدق . . طرت علي البحرين وسالفتنا العوجا معها .
شرايكم ؟ ماخذلناها ؟ والله اني استحي من هالموقف بشكل يخليني ما اقدر اواجه البحرينيين !
الحين البحرين تكبدت خساير مليارين دولار إلا ربع في غزو العراق لنا . . وحنا مستخسرين نعلن عن موقفنا بشكل سريع ؟
ودازين بحريه من كثر خوفنا لا يثور علينا كم الف كلب ؟
ياخساره بس !
الله يعوضنا بالخير يارب .
:(
سعد الصميل
24-03-2011, 04:55 PM
يقول واحد من الشباب . .
مرات ودي اخلي شعري طويل وامسك لي طريق ... واشغل عبدالله السالم يغني
سافري خلي حبيبك ينجرح !!
واشرب زقاير واسمع خلها بالقلب تحرق مابقى !
ههههههههههههه
الله يغربله . .
بس صدق وش كنا نحس فيه ؟ :p
بالفعل كان عايش ماضي أليم :(
الله يساعده بالنسيان . .
سعد الصميل
24-03-2011, 04:56 PM
بعد ماشفت شجاعة الليبيين في ثورتهم . . نصيحه ؟
اللي مابعد اعرس لا يفكر ياخذ إلا ليبيه . .
ولا يخاف من خوال عواله , تراني تعمقت في نسيج المجتمع عندهم . .
تراهم معربين :)
اعقلوها وتوكلوا بس !
سعد الصميل
24-03-2011, 04:58 PM
مرات اقعد مع نفسي وبنفسي , واقول :
من 1997 وانا اشبك بالنت , وبشكل يومي بدون انقطاع ابدا ابدا . .
على مدى المليون سنه وش استفدت ؟
بينما انا اعرف ناس تعلموا على النت في سنة 2002 وبعدها , والحين يملكون من المال ارقام فلكية والسبب واحد .
انهم احسنوا استغلال النت , وانا اسأت استخدامه !
يالله العوض في عيالي ان شاء الله .
سعد الصميل
24-03-2011, 05:01 PM
سؤال بريء :
ليش اذا شفنا او سمعنا عن واحد لابس غتره وعقال , ورايح مشي من منطقة لمنطقة ننقد عليه ؟ :)
ونشوفه بنظرة غريبه وانه مسوي فضيحه ؟ :)
بينما لو كان وافد صارت المسأله عاديه ؟
والسؤال الأهم :
ليش دايم نظرتنا متخلفه ؟ ومتى نتعدل ؟ :)
سعد الصميل
24-03-2011, 05:03 PM
سؤال بريء آخر :
ليش دايم اذا كنت مستعجل وتبي تفتح الباب يكون المفتاح اللي تبيه آخر مفتاح ؟
ليش مايطلع مره وحده بالغلط أول مفتاح ؟ :p
سعد الصميل
24-03-2011, 05:04 PM
سويت لكم زحمه ادري من اول يوم , يله باخذ بريك
ونجس النبض عندكم !
:)
بس جد , ليش يكون آخر مفتاح ؟ :p
سعد الصميل
26-03-2011, 12:55 AM
عوده جديده وخثروده جديده . .
امس في دبنهامز المطار . . مريت عليه اخر الليل انا وواحد من الربع يبي يشوف له عطر معين .
المهم , وحنا قاعدين نشم الروائح الطيبه وسرحنا فيها (( عن نفسي اندمجت وغمضت عيوني مع الريح الحلو )) , جانا ريح قذر !!
وخلاني انفص عيوني !
يوم شفت الا واحد لابس حرس وطني وشكله طبعا بدوي مايحتاج , وقاعد ينفخ بزقارته بين الناس اللي تشم الاطياب .
تضايقت من المنظر بجد , شفت خويي وقلت : والله ما الوم الحضر اذا قالو عن ربعنا همج !
بالفعل المنظر كان يفتقد الى الاخلاق والاداب الاسلاميه والعامه .
لكن يالله , عسى الله المستعان بس :)
سعد الصميل
26-03-2011, 01:00 AM
على طاري المطار . .
كل مره اكون سهران ومافيني نوم , اشوف ان المطار المكان المناسب لنقزير هذا الوقت العصيب لين يمر .
العجيب ان في كل مره اروح واشوف الناس قاعدين في ستار بكس وشابكين من اللاب توب , اتحسف اني ماجبت جهازي وشبكت !
وكل مره اقول خلاص يبيلي المره الجايه اجيب جهازي , لأن الجو يساعد ان الواحد يستمتع في النت في ذاك المكان .
ولحد الآن , مازال الامل معقود في اني ابوس راس نفسي واتذكر اخذ الجهاز معاي للمطار :)
* نصيحه ؟ : ترى الجو العام هناك مريح نفسيا , اللي مافيه نوم يقزرها هناك ويشبك
ياخي تحس انك سافرت هههههههه :)
سعد الصميل
26-03-2011, 01:05 AM
كان يامكان فيه شي اسمه القيصريه :(
http://alajman.net/up/uploads/b87a373e28.jpg (http://alajman.net/up/)
http://alajman.net/up/uploads/a40e5b0d30.jpg (http://alajman.net/up/)
ياجماعه , القيصريات بالفحيحيل كل ما امر صوبها تخنقني العبره الممزوجه في ذكريات الماضي والخوف من المستقبل .
اتذكر شلون وحنا بزران نروح لها , وخايف تنهدم ويجي مكانها مجمعات جديده تخلينا ننساها :(
الله على ايام الطفوله يوم كنا نروح للقيصريات علشان فيه محل العاب بالسرداب وكان عنده ساحر , يسوي كل عرض بنص دينار .
* ملاحظه : مايصير الواحد يرجع بزر ؟
سعد الصميل
26-03-2011, 01:49 AM
كلمني واحد من الشباب بخصوص ركني , ومدحه لي في أول الأمر
بعدين قال , لا تفرح الاعضاء يمدحونه علشانك ادارة شبكة !
ههههههههههههههه
قلت لا هذا السستم قديم , الحين انتشرت ثقافه , الشعب يريد ! :)
طار منها حكام دول وشلون منتدى ؟
**ملاحظه : مو شي لو الحين نص اعضاء المنتدى يسوون مظاهرات (( الشعب يريد اسقاط سعد الصميل ))
هههههههههههههههه
خلوني اجهز الدواء قبل الفلعه : فهمتكم , فهمتكم .
سعد الصميل
26-03-2011, 06:42 AM
بعد الغبار اللي صار اليوم , والفشله اللي صارت لنا بعده , الواحد مايدري وش يقول :)
اجل غبار يخلي حركة الطيران توقف , وانتاج النفط يوقف , والموانئ البحريه تتوقف , وحتى الداخليه اعلنت على اخبار الراي انها ماتقدر تغطي البلاغات بوجود العاصفه ! ههههههه
ياخي بنغلاديش كل سنه يضربها اعصار سرعته 240 كيلو بالساعه , والحياه سعيده وترجع تشتغل البلد عندهم , مو رياح سرعتها 80 كيلو ووقفت الكويت على رجل وحده !
ياما حنعيش ونشوووف !
سعد الصميل
26-03-2011, 06:44 AM
على طاري الغبار . .
كنت بالمطار اليوم وحققت حلمي ! :)
بس شكل الغبار كان شي يفشل بجد بجد يفشل , والناس قاعده ونايمة بالممرات .
مطار كيربي شنو نترجى منه ؟
سعد الصميل
26-03-2011, 08:38 PM
تذكرت سالفة الغبار امس
سمعتوا ان الامارات او السعوديه أو قطر أو البحرين سكرت مطاراتها ووقفت تصدير النفط و و و و و .. الخ ؟ :)
عرفتوا الفرق بين الدوله اللي يهزها غبار والدوله اللي تتماسك في اصعب الظروف مثل الازمه العالميه اللي كانت بتنهي دبي عن الوجود ؟
عرفتوا ليش المعارضه بالكويت قلبهم متروسه على قولة الايراني ؟ :)
سعد الصميل
26-03-2011, 08:46 PM
ياخي تغــّير الله يرحم والديك !!
خلاص زهقنا ملينا , كم صارلك سنه وانت هذا شكلك ؟
ياخي أكبر شوي ! كبر عقلك وغير شوي !
خل الناس تحس ان السنين مشت !
مايصير والله هالكلام !
شنو يعني ناس شافوك بالطفوله
والحين صارو اجداد بإمتياز وهذا انت ماتعيرت ؟؟؟؟
ناوي تشوف احفادهم اجداد بعد ؟ والا شنو بالضبط ؟؟
ياااااااااااااخي ارحل دخيل الله !!
صكيت على الرئيس !
http://alajman.net/up/uploads/545daee50d.jpg (http://alajman.net/up/)
سعد الصميل
27-03-2011, 07:47 AM
في مطعم ماكدونالد ابو حليفه امس . .
اخذت وجبتي وجلست . .
بالطاوله اللي جنبي . . 4 شباب كويتيين << طبعا الاصل واضح من عجم ايران . . ماعلينا
وعند الكاشير ثلاثة اشخاص . .
اثنين شباب صغار . . بدو
وواحد أمريكي . .
الحااااصل . .
الشباب البدو بعد ماطلبو بيدفعون الحساب . . صار التالي :
1: والله ماتدفع
2: نذر علي ماتسوق فلس !
1: والله ان تفجر !
2: والله ان تفجر انت , حراام ماتدفع
وبدأ الطرفين بالتشابك بالايدي لكن مو هوشه , يعني كل واحد يدفع الثاني عن الكاشير مايبيه يدفع .
الامريكي وانا والـ 4 شباب كلنا نشوف الموقف والازعاج اللي صار :)
قال الامريكي : ! Let me suggest
وطلع مية فلس وسوا قرعه وفاز واحد بالدفع ! :)
انتهت السالفه لكن فيه اشياء صارت خلف الكواليس ما قلتها :)
الامريكي : كانت نظراته استغراب ودهشه وسعاده , لأنه وصف كرمهم بالشيء الذي لايصدق !
الـ 4 شباب : كانو يكركرون ويضحكون وكانو يشوفون ان هذا منظر همجي متخلف طبعا ويتهامزون :)
انا : مبسووط جدا من الموقف .
نهاية القصه :
مشى الامريكي بعد توديع الشباب وقالهم : صداقتكم رائعه , ابتسم وطلع .
الشباب اخذو الطلب وشافوني ابتسم , جلس وفي هذا الوقت بالضبط انا قايم من الطاوله بمشي , وقال لصاحبه فشلتنا تو الناس الله حسبي على شيطانك .
وكان تعليقي على السالفه : الكرم مافيه فشله , هو سلم عند العرب دون غيرهم .
واقصد في هالكلمه , العجم اللي كانو يشوفون المنظر بقرف , اللي طبعا انقرفوا مني اكثر :)
حذفت ابتسامه للشباب الله يديم محبتهم وكرمهم لبعض . .
سلام عليكم ! :)
سعد الصميل
27-03-2011, 07:53 AM
انا قلت عجم قبل شوي صح ؟ :)
ماتلاحظون في كلامهم شي ؟
ماتلاحظون مثلي ان لسان العجم زفر جدا جدا ؟ وانهم اصحاب براءة الاختراع في الكلمات القذره اللي وصلتنا ؟
ياخو الــ ****
يابن الــ ****
*** أختك
والى مالا نهايه من المصطلحات القذره جدا جدا جدا .
والله مادري وش محبب الرجال فيهم وتقريبهم :(
سعد الصميل
27-03-2011, 08:14 AM
خثروده خاصة للبطينيه فقط !
the early bird
ذا ايرلي بيرد
هذا مطعم مجكنم في الفحيحيل . شوفووه وبعدين بقول لكم قصته . .
http://alajman.net/up/uploads/f2c32faa52.jpg (http://alajman.net/up/)
طبعا المكان صاد ولو تشوف المطعم ماتوقف عليه .
هذا يسلمكم ربي , كان ياماكان فيه مره امريكيه ساكنه بالفحيحيل بعماير الامريكان , وكانت المره هذي مشهوره عند اصدقاءها وجيرانها بأنها تسوي بان كيك مو طبيعي .
شهرتها هذي خلت بعض اصدقاءها يقترح عليها افتتاح مطعم . .
وتم الافتتاح مطعم للفطور فقط ويفتح من 5 فجرا حتى الظهر ويسكر .
المطعم لقى رواج واشتهر عند الامريكان وسرعان ما انتقلت العدوى للكويتيين .
وبعد النجاح فتحت فرع ثاني بالجابريه لكن مو ملحقه على شي .
وصل النجاح عندها انك مرات في بعض الايام ماتقدر تقعد بالمطعم الا بعد مايكون عندك حجز مسبق .
المهم انا سمعت بعد ان شهرة المطعم وصلت خارج الكويت , الى ديرتها الام امريكا !
انا طبعا صدقت الكلام هذا لأني شفت الزحمه والزباين , وشفت بعد في قوقل عمليات بحث على المطعم وكتبت في البحث the early bird kuwait
واتضح لي ان هناك اكثر من 280 ألف شخص بحث عن المطعم في الكويت بس :)
ماعلينا , اللي يحب الفطور الامريكي يجرب ذالمطعم :)
طلبي الدايم عندهم
http://alajman.net/up/uploads/8502354713.jpg (http://alajman.net/up/)
اومليت اسباني , صوصج , هاش براون <<< الهاش براون حكايه من عالم آخر جد جد لازم تجربون :)
والشقردي فيكم بيعزمني بكره << اليوم راحت عليه متريق :)
سعد الصميل
28-03-2011, 12:29 AM
هذه الهمهمه قاعد اكتبها وقافي , على الطاير . .
عندي ليهين = يعني مو ليه وحده :)
الاولى . . ليه اذا كنت في طابور او مسار تختيم الجوازات في المنفذ يكون السايد اللي انت فيه زحمه واللي غيره يمشي ؟؟؟
الثانيه . . ليه اذا قررت تروح للطابور او الحاره اللي قاعده تمشي . . توقف ويصير سايدك القديم هو اللي يمشي ؟ ؟
السالفه فيها قلة حياء مثلا ؟ والا انا حظي حلو دايم ؟ :)
جاي بعد شوي . .
بــ
خثروده جديده . .
سعد الصميل
28-03-2011, 01:02 AM
كلمني واحد من الشباب اليوم وقالي
تابعت ركنك , وبصراحه عجبني جدا جدا . . ولكن !
احس ان المواقف اللي تقولها كذب . .
:(
ضحكت بهستره . . ورديت :
انا شخص معروف عند الاشخاص المقربين اني شديد النسيان , ولكن !
تجاوزت الازمه هذي بفضل التدوين بملاحظات الهاتف , اي شي ابي اتذكره
واي شي ابي اسأل عنه , واي موقع ابي ادخله , واي شي احس اني بنساه !
وقبل لا ابدأ بموضوع الخثاريد سويت ملاحظه للخثاريد عن اي موضوع ابي اتكلم فيه , وبالتحديد بديت بتدوين السوالف اللي بقولها بتاريخ 21/1/2011 :)
وراح اقولكم بالخثروده الجايه وشهي ملاحظة 21/1/2011 . .
End
سعد الصميل
28-03-2011, 01:07 AM
ماتلاحظون اني صكني الثقه والغرور على سالفة كلمني واحد وقالي واحد وفلان معجب بالركن ؟ :)
<< يااااخي توك ماتعديت صفحتين و 260 زياره !!!!
فعلا لازم اراجع طبيب نفسي على ذالسالفه . .
بس تدرون ؟
يحق لي اثق باللي اقدمه . . :)
فــ طالما الثقه موجوده . . الابداع يكون موجود . .
لا إبداع بدون ثقه بالنفس . . !
و . . . ذكروني بسالفة 21/1/2011 علشان ما انساها كالعاده !
سعد الصميل
28-03-2011, 01:20 AM
إلا صدق . .
انا نسيت اكمل عن العجم ! :)
انا يقهروني اكثر الناس يسمون اي واحد يتكلم كلام حضري . . حضري .
ويسمون العجم حضر !!
عن نفسي ما اسمح لنفسي اقول للايراني حضري . .
الحضر هم حاضرة الكويت من الاصيلين . . اهل نجد فقط لا غير . .
فلا إعجمي ولا زبيري ولا حساوي يقال عنهم حضر !
موقف من المواقف صار لواحد من الجماعه . . يداوم بالصحه .
معاه إعجمي بالدوام ويسولف وبعدين قال : إحنا الحضر !
قال له خوينا : قول إحنا العجم لو سحمت انت مو حضري , الحضر غير وانتو غير .
صاحبنا يقول : صدمته وقال انا اقولها مجازا بس والا ادري اننا عجم مايحتاج تقولي , ومن يومها . .
الين اليوم والرجال كارهني :)
مقدي فيه . .
وان شاء الله الموقف هذا نقتدي فيه . . علشان نعيد تحجيمهم الى الحجم الاصلي . . تراهم تمادو :)
سعد الصميل
28-03-2011, 01:23 AM
بما اننا في وقت
الطائفيه فيه مولعه
وعلى أشدها . .
صارلي فتره كل مابي اطلع في مكان عام . . وخاصة المجمعات الداخليه او الدوائر الحكوميه اللي بالديره . .
يكون لبسي كالتالي :
شماغ احمر , ثوب بزمه وكبك :)
علشان بدون تفكير , اكون وهابي في نظرهم .
وهنا تقع المتعه ! :)
سعد الصميل
28-03-2011, 07:45 PM
اليوم نزل الراتب :)
ومن توظفت قبل مليون سنه وانا عندي خطه . .
اقول بصير جيد وبجمع شي من الراتب . .
توظفت على معاش كحيان . . والراتب حاليا اندبل 3 اضعاف . .
لكن المصروف هو نفسه . . كل مازاد قلت بركته ! . . احد يعطيني حل ؟ ابي احس اني وفرت لي لو 100 دينار مره وحده في حياتي ! :)
والله ياجماعه مرات يبقى من الراتب شي وقبل المعاش بأيام بس . . واستانس اقول زين مابغيت ابقي شي . . لكن ليلة الراتب يطير الباقي !!
وش الحل ؟
طبعا هذي مو مشكله شخصيه بس , لأنها لو شخصيه مانزلتها هنا . .
انا متأكد ان الكثييير يشاركوني في هالمأساه والمعاناه . . يعني اجيب اللي في خاطركم بعد
:)
سعد الصميل
28-03-2011, 07:50 PM
خلونا في طاري الفلوس . . . يقولون دايم طاريها زين !
التوفير أساسه الترتيب . . يعني الواحد يرتب مصاريفه .
انا قررت اسوي لي جدول من اليوم لمدة شهر . .
وفي نهاية الشهر بقولكم كم وفرت . . بس ضروري تذكروني تاريخ 27 بالليل :)
سعد الصميل
28-03-2011, 07:57 PM
وبما اننا في طاري الفلوس . . اقروا هالخبر الحلو . .
جاء خبر نقلته وكالة انباء رويترز قبل 3 ايام عن وجود الملياردير بيل جيتس والملياردير وارين بافيت . . وهم اكبر مليارديرية العالم .. عن وجودهم بالهند لتشجيع التجار بالتبرع . . ويذكر ان بيل جيتس تبرع فعليا بنص ثروته والنص الثاني بعد مايموت . . يعني تبرع بكامل الثروه . . ووارن بافيت تبرع بـ 99 % من ثروته . . وكلهم تبرعو فيها لمكافحة الفقر . . .
التعليق : ذولا نصارى شوف وشلون يضحون بفلوسهم من أجل مبدأ فقط !!
واللي عندنا حرامية ومايشبعون و غير مستعدين بالتضحية بمبلغ زهيد علما بأنه فرض وركن من اركان الدين !!
شفتوا الفرق بين الأمم ؟ :)
سعد الصميل
29-03-2011, 02:43 AM
طيب . .
بما أن مافيه احد فيكم ذكرني بالحدث اللي صار في تاريخ 21/1/2011 . .
فــ أنا ممتن لكم , وشكرا لكم على عدم التذكير :)
<< مو ناوي ينسى
اليوم : 21 / 1 / 2011
الوقت : 7 مساء
الموقع : في السماء , جاي من دبي الى الكويت .
الحدث : في عودتي من دبي وحنا في قلب السماء , كان فيه مطر على دبي وغيوم ملبده . .
جاتنا مطبات هوائيه شديده جدا . . وبما إني للأسف جبان في سالفة الطياره . .
بلعت العافيه . . لكن هناك أمر غريب يحصل . .
ولدي حمّود كان وقت المطبات يضحك بهستره من المطبات . . !!
وانا واكثر الركاب منخرشين !
فــ طرى علي من غير شر ان شاء الله , حوادث الطيران اللي ماتو اهلها بكوارث . . شنو موقف الناس وهم يشوفون نفسهم رايحين قيم اوفر . . ويشوفون بزرانهم يضحكون ويحسبونها لعبه ؟ :(
احساس غريب خلاني ما انسى ذالسالفه . . !!
سعد الصميل
29-03-2011, 03:55 AM
تذكرون يوم اقولكم اني استمتع اذا رحت للمطار اخر الليل ؟ . .
الحين انا احقق حلمي لأول مره . .
معاي جهازي وشابك من ستاربكس ( اليهودي الصهيوني اللي لازم نقاطعه ) اللي بالمطار ! :)
سعد الصميل
29-03-2011, 04:41 AM
تذكرونه ؟
:(
http://alajman.net/up/uploads/49da7b977d.jpg (http://alajman.net/up/)
والله توقعت انه انقطع بعد الغزو !
لقيته يباع بس مدري هل هو منتهي من 20 سنه او صالح !
كنت اسميه حلاو طابوق . . مدري وش تسمونه ؟
سعد الصميل
29-03-2011, 04:44 AM
اظن ان ركني بدأ في مرحلة النضج . . والا ؟
اتمنى للجميع متابعه وقراءه ممله . . وبحاول اثقل دمي عليكم اكثر . . بس عطوني وقت :)
ملاحظه : تقدرون تستمتعون بالبحث في مواضيعي . . ترى لي مواضيع واجد انظلمت اعلاميا ! :)
<< يعجبني الثقه
هههههههههههههه
سعد الصميل
29-03-2011, 04:47 AM
الا على طاري مواضيعي . .
تصدقون بشي ؟
والا اقول كيفكم لا تصدقون . . بس بقول !
قعدت اشوف مواضيعي وابحث عنها بالقوقل . . تصدقون اني لقيت كذا موضوع كان من مجهود فكري وشخصي فقط تمت سرقته ونسبه الى سارقه !!
والأمر من هذا اني اشوف موضوعه المسروق . . يلاقي اهتمام اكثر مما لاقى الموضوع الاصلي اللي هنا في منتدى العجمان !
هههههههه
والله حاجه غريبه ياجدع !
سعد الصميل
29-03-2011, 05:30 AM
كم ؟
كم واحد كلمني شخصيا وقالي واصل ترى ركنك حلو ؟
كم واحد كتب في موضوع اعجبني , ان ركني اعجبه ؟
كم واحد من الاصدقاء بالماسنجر قالي ركنك حلو , واصل ؟
كم واحد من الاعضاء قالي برساله ركنك حلو ؟
بالتالي :
كم واحد فيكم سوا تقييم للموضوع يامنافقين* ؟ :)
* أمون عليكم ;)
سعد الصميل
29-03-2011, 05:37 AM
ركني هذا يا اخوان غير مخصص للشعر والخواطر والنثر . .
مخصص للبوح بما يوجد بصدري . .
اسعى من خلاله لرسم الابتسامه على شفاهكم . .
تشوفون فيه النقد اللاذع , الكتابات الساخره , فلة الحجاج .. وكل مايدور في ذهني
وأرى انه يستحق أن يتم نشره ليعجب ذائقتكم . .
* انا لحد الآن بالمطار . . . وطيارة دبي بعد ساعتين
شرايكم احجز ؟
المعاش نازل أمس , الدوام بعد يومين , التذكره بثلاثين دينار , والطياره بعد ساعتين , وبطاقتي توني مجددها ,وكحيلان مقابلني !
باقي شي بعد ؟
والله مهيب شينه
هههههههههههههه
سعد الصميل
29-03-2011, 10:21 AM
دائما . .
يطري علي بداياتي في المنتدى . .
أضحك . . أرجع لأرشيف مواضيعي . . واشوف اني كتبت مواضيع مضحكه مدري شلون كنت مقتنع فيها !
لكن فيه شي يضيق خاطري . . يوم اشوف بالمنتدى اجيال ورى اجيال :)
بمعدل كل سنه او سنتين جيل كامل يختفي !
الحين . . . التفت يمين ويسار . .
اشوف حتى طاقم الإدارة . .
نااااادر ما اشوف احد من ربعنا الاولين اللي اختفوا !
يالله هذي سنة الحياه :)
سعد الصميل
30-03-2011, 02:46 AM
تذكرون يوم الغبار والعاصفه ؟
أنا ما أذكره :)
لأني كنت نايم اليوم كله . . وقمت وسمعت الناس وشفت المسجات والدنيا قايمه !!
تدرون شنو احلى مافي السالفه ؟
ان دريشة الصاله كانت مفتوحه صارلها كم يوم . . وبيوم الغبار بقدرة قادر . . خلاني اسكرها الصبح قبل لا انام !!
هههههههههههه
سعد الصميل
30-03-2011, 02:48 AM
اليوم حققت احد احلامي . . كل سنه بسويه ويروح وقته واتحسف . .
شريت دوم :)
يعني كنار للي مافهم ..
المشكله موسمه كل سنه شهر 3 . . وكل ماجاء موسمه ابيه ابيه وانساه ويروح وانقهر :)
كليت لحد الآن كيلو . . . وبطني يوجعني :(
سعد الصميل
30-03-2011, 05:35 AM
كل ماوديت الوالده الله يطول بعمرها
للوادي , أو للعمره . . لازم ناخذ من النعيريه محطة توقف . .
اكيد تعرفون وش السبب . . !
لازم في كل مره تكون النعيريه في طريقي . . يكون نصيب محلات المواعين اللي فيها له جزء كبير !!
ودي أعرف وش قصة مواعين النعيريه في كل مره ؟؟
انا متأكد انكم تعانون مثلي المعاناة نفسهاا :)
يعني سوق الكويت اللي وش كبره مو قادر يجيب مواعين مثل النعيريه ؟ :p
سعد الصميل
30-03-2011, 05:46 AM
قال لي صديق في احد الايام الخوالي . . من سنواااات
ان حرف الـ m الخاص في ماكدونالد هو علامة للهيمنه الامريكيه على الدوله الموجود فيها حرف الــ m !
ودلل على ذلك بعدة اسباب :
1/ مافيه دولتين فيهم ماكدونالد وبينهم حرب !
2/ الدول اللي مافيها ماكدونالد لها مشاكل مع امريكا واعطاني مثال كوريا الشماليه , ايران , كوبا . . الخ !
3/ الدول اللي ينتشر فيها ماك بشكل كبير تكون علاقتها بامريكا قوية . . والكويت لنا خير دليل !
4/ امريكا تحاول الدخول بأي طريقه للدول اللي مافيها ماكدونالد , وصار في افغان ستان والعراق !
5/ كاريكاتير انتشر عالميا بعد ماسيطرت امريكا على افغان ستان , وهو حاط خريطة العالم وحاط حرف الـ m على افغان ستان وكاتب تم افتتاح الفرع الجديد !
وعدد لي اسباب كثيييير . . . قد لا تبدو واقعيه في نظر الكثيرين . . ولكن بعد التمعن . . فهي تبدو منطقيه جدا !! :)
سعد الصميل
30-03-2011, 10:25 AM
اليوم الصبح . .
تحاليل كنت مسويها قبل 3 شهور . . اليوم استحيت من نفسي وقلت لازم اروح المستوسف *(1)
المهم . .
الموظفه قالت لي ويييييي , شكثر متأخر !
راحت فتحت الملفات اللي اهلها متأخرين ما استلموا نتايجهم . . والمضحك ؟
انه من كثر الكويتيين اللي مثل حالتي , حاطين لكل شهر ملف كامل ومليان بالتحاليل اللي مطنشينها اهلها !
يعني لو مسوي تحليلك بمختبر خاص بتنسى التحاليل مثلا ؟ :)
اللي فهمته أحسب إني الشخص الوحيد اللامبالي بصحته . . واكتشفت ؟
إني في بلد يملؤه اللامبالين :)
واكتشفت بعد , إن الموظفه كل يوم تقول 50 مره وييييي شكثر تأخرت ! :)
تحيا الكويت !
*(1) بما إننا في بلد يسيطر عليه كوهين , لازم نقتدي فيه وفي مفرداته ! :)
سعد الصميل
30-03-2011, 04:51 PM
في اواخر الثمانينيات وبداية التسعينيات . .
طلعت محلات في مجمع سلمان الدبوس بالسرداب . . وكلهم سوريين . . ويصايحون
على نص على نص . . وكان هالشيء اعجاز اقتصادي جديد !!
محلات ابو نص وصلت !
في اواخر التسعينيات . . طلع ابو ربع . . بس ماطول ..
في السنوات الاخيره طلع واحد اسمه طيور الجنه . . . وعلى 100 فلس ! !!
الحين مصخت السالفه . . . طلع واحد يبيع القطعه بـ 50 فلس !!
اعتقد بعد سنتين بيطلع محل يترجاك ويبوس رجلك ويدفع لك دينار بس تدخل محله وتطلع !!
سعد الصميل
30-03-2011, 04:55 PM
على طاري مجمع سلمان الدبوس . . .
تذكرون يوم كانت سمعة المجمع بالحضيض ؟ ؟
واللي اهله يروحون مجمع سلمان الدبوس . . صايعين !!
والبنات اللي يدوجون فيه . . مالهن والي ؟ !!
والله كانت سمعة قذرة هالمجمع . . والسبب ؟ المغازلجيه اللي متراكين على الحاجز القزاز وكلهم يشربون زقاير ويطلون على الدور اللي تحت ! :)
سعد الصميل
30-03-2011, 05:03 PM
خلونا للمره الأخيره . . في مجمع سلمان الدبوس :)
تذكرون الزباين المقيمين فيه ؟
بنات لابسات براقع تكفى لا تطيح . . اللي تم استنساخ نقاب تكفى لا تطيح منها !
وعبايه وسيعه وعلى الراس بس كانت بقدرة قادر وبخفة يد البنت تصير عبايه مخصره شلون مدري !!
بزران يبكون عند ابو نص يبون يشترون المحل كله !
شيبان قاعدين تحت عند الاصنصير اللي كان عنده شلال صناعي ينتظرون اهلهم ويشربون شاهي وعصير من ابو الفدا !!
النوع الافضل بلا منازع . . .
الشباب اللي كانو كاشخين بتلفونات انطلق 1 وانطلق 4 ويفترون فيها , تقول شايلين شناط سفر !
والله الايام ذيك كانت بجد فله :p
سعد الصميل
31-03-2011, 02:37 PM
فيه ناس يتابعون تطور وتغير وزيادة الاسعار . . . ومعهم حق !
لكن الغريب ان فيه شخص اعرفه يتابع زيادة الاسعار بطريقه أخرى .
الشخص هذا مايراقب ارتفاع السعر بس , لكن يشوف المنتج اذا حصل فيه تغيير يؤثر على السعر !!!
اعطيكم مثال من امثلته , خلتني احس انه جعص زيادة حبتين , مو حريص :)
قاعد يشتكي عن الزيادات وقال :
ياخي كيس الخبز مال المطاحن مو بـ 50 فلس ؟
كان 500 جرام
بعدين صار 400 جرام وسعره 50 فلس مانزل !
والحين وصل وزنه 375 جرام وسعره مانزل ليش هالنصب !
قلت : روح ياشيخ الله ينصر دينك , شو بخيل :)
عفوا . . اقصد شو حريص !
سعد الصميل
31-03-2011, 02:55 PM
تعرفون هذا طبعا . .
http://alajman.net/up/uploads/9a75794b50.jpg (http://alajman.net/up/)
هذا الفلاش الخاص فيني . . معاي بكل وقت . . بس لو تسألني شنو المهم فيه ؟ :)
اقولك ولا شي !!
مافيه إلا ملفات مهمه فعلا لكن للدوام بس !!
انا اشوف فيه ناس مايمشون الا بالفلاش مثلي لكن اشوفهم مستفيدين منه دايم ويستخدمونه دايم واحس محللين شيلته معهم صح !
انقهر ودي اعرف وش احط فيه شي مهم غير ملفات الدوام ! :)
سعد الصميل
31-03-2011, 03:04 PM
الحين حاط على الجزيرة . . وقاعد اشوف ثورات الشعوب
تونس , مصر , ليبيا , اليمن , سوريا . . . إلخ
اختلفت الثورات في اشياء كثير ومطالب كثير . .
لكن اتفقوا كلهم بأنها ثورات شباب . . .
او مايسمونه الكبار بـ جيل النيدو ! :)
جيل النيدو طير رؤساء . . . اعاد الحريه المسلوبه منه ومن اللي يعايرونه بجيل النيدو . . !
هناك اعتراف يطلع دايم على الجزيره . . التونسي اللي يقول هرمنا من اجل هذه اللحظه التاريخيه . .
يعني شيبنا لين نشوف هالوقت !
لكن جيل النيدو ؟ سواها قبل ماينتظر انه يهرم مثلك :)
تحيه كبيره لجيل النيدو ..
اثبتم انكم احق ممن يعايركم بالحريه والحياه الكريمه !
ونخلي الجيل اللي قبلكم يعايرونكم بس . . بالنيدو
ويفتخرون بكمية الجبن والخوف اللي عاشوها :)
سعد الصميل
31-03-2011, 03:07 PM
بما أننا في الثورات
انا احسد التوانسه . . أهل ثورة الياسمين
بأنهم راح يفتخرون على مدى سنوات من التاريخ القادم . .
بأنهم كانو مصدر إلهام لثورات العالم . .
اللي ما اكتفوا فيها العرب . . بل وصلت الى اسيا وماراح توقف ابدا . .
شكرا اخواننا التوانسه .
سعد الصميل
31-03-2011, 03:14 PM
بما إن بكرة الأول من أبريل
يعني ان فيه سخافه راح تنشر بكره في جريدة الراي كالعاده :)
تابعوها بكره , وبلغوني وشهي كذبتهم اللي بيحطونها :)
سعد الصميل
31-03-2011, 09:36 PM
يقولون ان معرض العطور باقي له يومين ويخلص . .
قبل فتره كان فيه معرض للاتصالات في ارض المعارض . .
الفرق بين المعرضين . .
ان معرض الاتصالات كان اسمه فقط معرض اتصالات . . كان بالأساس معرض بنات !
بنات اشكال والوان . . لبس اشكال والوان كمان !
ومعرض العطور اكثر اللي يعرضون مطاوعه تبع الفودري والعبدالمحسن والفايز . . الخ :)
بس لا تقولون الفرق بينهم ان المطوع وجهه كله شعر . . وبنات الاتصالات تدور شعر الوجه بالمجهر :)
الاتصالات بينصبون عليك بعقد سنتين ويخلون اللعوب تخليك توقع وانت تضحك . .
والعطور ان شريت والا بتطلع بريح طيب . .
سبحان الله :)
سعد الصميل
31-03-2011, 11:04 PM
في احد الايام . . بس هذي بدون كان يامكان . . لأنها قبل شهر تقريبا او اكثر شوي . .
كنت واخذ لي شوية برد على قولة المصريين . .
رحت المستوصف اخذت علاج طلعت . .
وعلى طول على صيدلية . . وريته العلاج اللي معاي قلت ابي شي طيب مابي الأدول وشغل التسكين مال المستوصفات كالعاده . .
عطاني غرغره , و حبوب حساسيه , ومضاد حيوي . .
بعد ماحاسبت , شفت كيس الحكومه . . وأنبني ضميري صراحه . . اني اخذت دواء وماراح استخدمه .
خليته معاي وبعد تفكير عميق . .
رجعت ثاني يوم للمستوصف وسلمتهم الدواء . . علشان يصرفونه لمريض ثاني . .
الصيدليه مافهمتني اول شي . . لكن بعد مافهمت اني برجع الدواء لأني ماني في حاجته . .
قالت . . الله يجزاك خير . .
طلعت من المستوصف بشعور المنتشي والمنتصر . .
مع ان المسأله كانت بس مشوار صغير . . لتبريئ الذمه واراحة الضمير .
سعد الصميل
01-04-2011, 12:39 PM
بما ان اليوم جمعه . .
فـ طبيعي ان الواحد يتجهز لصلاة الجمعه . . ويترتب ويتنظف ويتعطر ويتزين . . الخ
لكن من غير الطبيعي إني قبل شوي بالمسجد يصلي قدامي واحد . .
لابس بجامة نوم . . وراسه مصلع وعيونه ماليها الغمص . .
اللي مثل هذا ماله الا كلمه وحده . . ياخي إستح !
يعني لو رايح عرس والا عشاء بتروح بالطريقه ذي ؟
والا لمقابل الناس تتزين ولمقابل ربك مش حالك ؟
ياااااخي إستح !
وبما ان اليوم جمعه . . جمعه مباركة للجميع !
سعد الصميل
01-04-2011, 12:42 PM
وبما ان اليوم جمعه برضو . .
عندي سؤال : لحد الآن فيه ناس مايسوون غداء سمك الا يوم الجمعه ؟ :)
الحمدلله اننا تطورنا من هذي الناحيه وصار السمك في اي يوم !
وبما ان اليوم جمعه بعد . .
يعني ان الناس تفنن بالطبخ . . والحلو بالسالفه اني معزوم على غداء :)
بس مو سمك . .
نروح نتغدى ونرجع لكم بهمهمات جديده . . وثقالة دم جديده . .
سعد الصميل
01-04-2011, 12:45 PM
قبل لا اروح اتغدا . .
تدرون بشي , انا بعترف لكم .
تصدقون اني حبيتكم ؟ مع اني ما اعرف من هو المتابع الدائم ومن اللي مادرى عني . . كأشخاص .
لكن كـ متابعين للركن المتهمهم . . أحبكم في الله يا اخوان .
شكرا على المتابعه . .
** الطيبه والكلام الحلو هذا طالع مني لان اليوم جمعه والايمانيات زايدة شوي , يعني لا تفرحون , بكره بكرهكم ! :)
سعد الصميل
01-04-2011, 07:44 PM
ليش الايام تمشي بسرعه ؟
امس كان الجمعه , اليوم برضو الجمعه !
وش القصه بالضبط ؟
المشكله مو بالايام , المشكله بالعمر صار الواحد يكبر بسرعه !!
شنو ادخل المنتدى هذا عمري 22 والحين وصلت الثلاثين !!
ليش بالله ؟؟؟؟
** لحد يصدق . . 2012 ادخل الثلاثين يعني توني :)
سعد الصميل
01-04-2011, 07:53 PM
رد الفعل عن القطيعه . . هو القطيعه !
يعني اعرف شخص كان كل جمعه يرسل لي رسائل دينيه . .
شافني ما اتفاعل معاه نهائيا . . انقطع ! :)
حصل وتذكرته بعد مرور سنه . . وارسلت له في احد ايام الجمعه رساله دينيه . .
رجع وصار يرسل لي كل جمعه . . . وكالعاده . . مل ووقف رسايل لأني مطنش !
حل القطيعه الوصل . . الله يجعلنا من الواصلين بالمسلمين والاقرباء .
سعد الصميل
01-04-2011, 08:11 PM
بما اني طريت العمر . . خلوني ارجع شوي . .
تكون قايم من حلات نومك . . .
الغمص بعيونك . . شعرك مايمر عليه المشط طبعا . . مالك خلق لنفسك . .
رايح للمدرسة وانت تبي فرقاها . .
تدخل الساحه . . . تسمع الاذاعه . .
Xi3Pti5YulU
عبدالباسط عبد الصمد . . يغذي مسامعك بذكر الله . . تنشط معاه شوي . .
تتلذذ باستماع القرآن . .
الله على ذيك الايام . .
ماجاتكم البكيه ؟ :)
سعد الصميل
01-04-2011, 08:24 PM
<<التفاؤل صحة النفس , والقلب المرح يعيش طويلا >> وليم شكسبير
انا دمجت المرح والتفاؤل هنا . .
لأنني أثق بان المرح هو ماينقص الجميع في كل الحالات . . .
تكون كتاباتي لاتخلو من المرح . . مليئه بالتفاؤل بمتابعتكم :)
الى همهمه جديده . . لنا لقاء قريب إن شاء الله .
سعد الصميل
02-04-2011, 02:27 PM
بمتابعتكم الطيبه . . وتشريفكم لهذه الهمهمات . . ولصاحبها . .
تجاوزنا بحمدالله الــ 1000 مشاهده في زمن اعتبره قياسي بالنسبة لي , لأني جديد على القسم , ولعدم وجود شعبيه لي مثل الإخوه المتهمهمين في هذا القسم من اكثر من سنه ونص او اكثر .
إن دل هذا على شي . . فهو يدل على تقديركم وذوقكم الطيب . . شكرا لكم .
1000 شكر لـ 1000 مشاهده . .
:)
سعد الصميل
02-04-2011, 02:31 PM
من ذكريات الماضي . . عطر لحد الآن اتذكر ريحته :)
آخر مره شفته قبل أكثر من 15 سنه . . !
دورته بالامازون . . وماله وجود نهائيا !
http://alajman.net/up/uploads/22b4d246f5.jpg (http://alajman.net/up/)
لازم اجيبه . . :)
سعد الصميل
02-04-2011, 02:34 PM
نقاش صار بيني وبين واحد من الشباب . .
قال لي ان الحكومه استقالت يعني اتوقع فيه حل للمجلس . . واذا انحل المجلس مشكله !!
سألته بكل خوف شنو المشكله ؟
قال مصالح البلد بتوقف شهرين كامله !!
ياسااتر !!
قلت : ياعمي البلد متعطله ومتوقفه أكثر من عقدين من الزمن . . وقفت على شهرين يعني ؟
روّق وان شاء الله الامور بتروق :)
سعد الصميل
02-04-2011, 02:39 PM
إلا بسألكم . . شخباركم مع مقاطعة جريدة الوطن ؟
ياجماعه والله حسيت اني شريف جدا في مسألة المقاطعه . . !
من اول مابدت مقاطعة الناس لجريدة العفن . . وانا ماعمري شريتها او مسكتها . .
علشان ما ابالغ . . احاول اتجنب قراءتها دايم . . لكن امسكها في حاله وحده بس .
في حالة اني ضايق صدري وماعندي اي شي من اساليب الترفيه . . افتحها واتصفح لتقزير الوقت بس :)
شلونكم معاها ياللي طلعتو تحذفون صناديقها بالحاويات ؟
عندي احساس انكم رجعتوا واشتركتوا فيها بعد :)
سعد الصميل
02-04-2011, 02:49 PM
قبل كانت الساعه 10 بالليل الشوارع فاضيه . . الناس نامت إلا السرابيت بس
كانو يوصلون للرقم القياسي . . الساعه 12 بالليل ينامون !
الحين . . البزران ينامون الساعه 1 ومو عاجبهم !
والناس الطبيعيه ينامون الفجر !
أما السرابيت وصلوا مرحله متقدمه . . وصارو هم العاقلين لأن الآيه انعكست !
صارو السرابيت يواصلون يومين علشان يعدلون نومهم ويقعدون الصبح ! :)
الدنيا صارت مقلوبه .
سعد الصميل
02-04-2011, 03:18 PM
اليوم الصبح كنت في آي سيتي . . ( وكيل الماك )
شفت اجهزة الماك . .
بعد الشرح البسيط عنها وطريقة استخدامها واستخدام نظام الماك . .
تبين لي . . شي واحد بس .
ان اجهزتنا الحاليه . . ونظام التشغيل الوندوز . . مكانها اللي تستحقه هو بلا تردد . .
حاوية القمامه . . اعزكم الله :)
اكتشفت ان الفوارق بين النظامين مذهله . .
الله يصبرنا على الويندوز لين نصير اوادم وناخذ الماك :)
* اذا فيه احد بيهدينا مانرد الهدايا .
سعد الصميل
02-04-2011, 04:20 PM
الخبر / وزارة الداخليه تحذر من وقوع عاصفه ترابيه خلال يومين . .
يعني تدرين يا وزارة ان الامر سهل جدا انكم تحذرون ؟ . . ليش ماصارت بالعاصفه اللي جاتنا قبل كم يوم ؟ :)
والا لازم يطيح الفاس بالراس دايم علشان تتعضون ؟
والله العظيم اننا ماشين على البركه صدق . . ماهو كلام دواوين بس :)
سعد الصميل
02-04-2011, 11:24 PM
من كثر ما اتهمهم في هالركن . . صرت مدمن فيه . .
احس اني بوصل لمرحلة خطيره . .
اطفي الليتات . . ويكون فيه ابجورة في طرف الغرفه بإضائه خفيفه .
وبمسك بإيدي سيجار . .
وبلبس نظارات كتابه << هذي نفس نظارات القراءه يعني !!
وبتهمهم واتفلسف . . على ألحان الموسيقى البطيئه . .
بس المشكله ورى الجو هذا كله شنو الفايده ؟
:)
سعد الصميل
02-04-2011, 11:35 PM
تخيلوا البلد من غير بنغاليه !
تصدقون راح تصير كارثه !
راح تقل الجرايم , بالتالي يقل عدد المساجين , ومنها يقل مصروف الدوله على الوجبات للمساجين , وتخسر شركة التغذيه مالت السجن , ويتم تسريح موظفين لمواجهة الأزمه . .
بعدين راح يستتب الأمن . . واذا استتب . . وزارة الداخليه بتكون مسدوده حاجتها وماتبي شرطه اكثر . . يعني راح يوقفون الدورات الخاصه مالت الخليجيين ابناء الكويتيات !
يعني فيه عوايل راح ينقطع رزقها !
بعدين الجليب راح تفضى واهل البيوت مايلقون أحد يأجر ملاحقهم !
والزحمه بالشوارع تخف . . يعني بيكون فيه مواقف زايده . . يعني مافيه احد بيوقف في ممنوع الوقوف !! والداخليه ماتلقى احد بتخالفه . . وبيروح عليها فلوس واجد كانت محسوبه !!
والقواطي بالشارع ماراح تلقى احد يلمها . . بالتالي راح يصير شح في الالمنيوم . . يعني راح يرتفع سعره على المواطن وبدال ماتفصل باب المنيوم بـ 40 يصير بـ 170 . .
و .. و . . و . . . إلخ !!
لا لا لا لا . . ماني قادر اتصور الوضع من غير بنغاليه !!
ياجماعه البنغالي ثروه يجب علينا عدم التفريط فيهاا !!
سعد الصميل
02-04-2011, 11:40 PM
خلونا ناخذ المسأله من زاويه ثانيه . . شرايكم ؟
بالنسبه لي . . البنغاليه جنسية محترمه . .
ناس غلابه . . كانو جايين للبلد على اساس ان رواتبهم المبلغ الفلاني ..
يوصل الكويت . . يقولون له راتبك 25 دينار . . يحمد ربه ويداوم
ينصدم انه قاعد يداوم سنتين كامله وما استلم فيها راتب . . !
البدو قبل 70 سنه . . كانو يذبحون بعض علشان لقمة العيش . . يعني اللي قاعد يسويه البنغالي من سرقه وغيره ارحم :)
سعد الصميل
03-04-2011, 12:09 AM
ياجماعه . . شفت الصورة تأثرت :(
http://alajman.net/up/uploads/65fde23782.jpg (http://alajman.net/up/)
بس تصدقون بشي ؟
رسوم قبل كانت محترمه , يعني مثال السندباد . . كان معاه شايب عمره مليون تقريبا
اللي اسمه علاء الدين . .
كان كل شوي يقول إنها مشيئة الله !
يعني كان فيه شوي فايده :)
مو الحين يقولون فيه رسوم مدري لعبه اسمها إله الحرب :(
سعد الصميل
03-04-2011, 12:18 AM
اليوم مصختها . . زودتها :)
اكثر من 10 همهمات في يوم واحد . . لا زودناها :)
نخليكم ياحلوين . . وان شاء الله لنا لقاء قريب . .
سعد الصميل
03-04-2011, 10:32 AM
المشكله ليست في العمل . .
المشكله انك تكون في إجازه . . وتنصدم انك تداوم في يوم إجازتك الرسميه !
انا اطالب بصرف دبل راتب لي عن اليوم لأني داومت بغير وجه حق ! :)
هذا يبين التخبط الاداري في البلد . . لازم نشوف لنا حل مع سمو الرئيس ياجماعه :)
سعد الصميل
03-04-2011, 10:35 AM
همهمه على الطاير . .
قبل كان منظر الشاب اللي مايمشط شعره مقرف . . وكلن ينظر له نظرة بايخه
وانه شخص مبهذل . .
لكن الحين صارت موضه نفشة الشعر وعدم ترتيبه . .
لحد الآن مافيه مشكله . .
المشكله ان اللي كانو قبل يسوونها . . انا اطالب بإحترام لهم بأثر رجعي . .
وتعويض لأنهم يوم كانو يسوونها كانو منبوذين !!
سعد الصميل
03-04-2011, 10:39 AM
تناقشت امس انا وولد عمي على اسماء الاطفال . .
قلت له اسماء ( صيته - رفعه - الجازي - خزنه . . الخ ) اسماء جميله في نظري . .
قال لا هذي اسماء متخلفه !!
قلت طيب ؟
قال فيه اسماء قديمه بس مازالت حلوه قلت عطني مثال ؟
وقال ياخي عندك منيره - نوره - لولوه - شاهه . .
طلبت السبب ؟
وجاء جوابه طاااامه
قال لأن الحضر لحد الآن يسمونها !!
ياسلااااام !!
علشان الحضر مازالو يسمونها يعني صارت حلوه ؟
ليش دايم نربط الشي الحلو بالحضر والشين فينا ؟
لهدرجه عندنا نقص وعدم ثقه في انفسنا ؟
مع العلم ان تاريخنا سواء بالسلاله او بالاسماء او بالانتماء للجزيره والاصاله . . اكثر منهم بكثير :)
سعد الصميل
03-04-2011, 10:43 AM
طيب فيه ليش ثانيه :
ليش دايم نربط التطور باللغه الانجليزيه ؟ والترف والغنى باللغه الفرنسيه ؟ :)
ياااخي الياباني خدم العلم اكثر من الانجليزي !
يااااخي الألمان متطورين اكثر من الانجليز !
يااااخي العرب هم اساس العلوم كلها طلعت منهم !!
الى متى تفكيرنا محدود ويفشل ؟ :)
سعد الصميل
03-04-2011, 10:52 AM
تذكرت موقف حصل قدامي في سنتر بوينت الفحيحيل قبل مده . .
شفت لي زبونه ومعاها ولدها صغير عند الكاشير . .
المره قاعده تكلم الكاشير وتحاول وتتعصر باللغه الانجليزيه . . والحلو ان الكاشير شاف لغتها مكسره قام يرد عليها بالعربي . .
يعني يعرف يتكلم عربي . . والاخت مازالت مصره على الانجليزي . .
فكان شكل المحادثه مضحك . .
العربيه تتكلم انجليزي والاجنبي يرد عليها بالعربي !
مره مرتين ثلاث . . لين خلص الحوار وهو يدار بالطريقه الغبيه هذي !
بس بعد تفكير عميق تبين لي شي واحد . . ان الاخت ناويه تقوي لغتها على حساب الزباين اللي ينتظرون بالدور وراها !!
:)
سعد الصميل
03-04-2011, 02:00 PM
كل ما شفت باليوتيوب مظاهرات البحرين . .
وكل ماشفت اذناب ايران فيها شلون طريقتهم بالهجوم . .
والله مايطري علي غير الضبعه او الضباع للجمع . . يجتمعن ويصيحن . . ويتناهشن . .
واذا تفرقن ضاعن :)
سعد الصميل
04-04-2011, 12:30 PM
على الجو هذا والغبار والعاصفه الواقعه حاليا . .
ودك انك تلبس شورت ونظارات شمسيه . .
وتروح البحر تتغبر . . على غرار تتشمس . .
وعصير برتقال . . وياسلاااام :)
سعد الصميل
04-04-2011, 12:32 PM
ترى ماطلعت من قعدت من النوم ابد . .
لكن اعرف سوالف الغبار . .
اسمع صوت شينكو يطير ويوقع . . . اسمع قواطي مسوين قرقعة . .
اسمع باب يصفر . .
يعني حركات دايم يسويها العج مايخليها :)
سعد الصميل
04-04-2011, 12:39 PM
فيه اشياء او امراض انقرضت . . مدري الناس صارت نظيفه والا وش اللي صار . .
القمل اخر مره شفته كان سنة 1989
الصيبان اخر مره شفته كان سنة 1989 بس كانت شهر 12 :)
المشق آخر مره حاشني 1991
بس اهم شي شهر 12 :)
سعد الصميل
04-04-2011, 12:43 PM
على طاري الامراض القديمه . .
قد جاني مرض سنة 1992 غريب عجيب :)
احلى مافيه المرض ذاك انه خلاني اخذ لي طبية لمدة اسبوعين . .
المرض اسمه : خاز باز !
ما مر عليكم ادري !
المرض كان مضحك . . كانت عوارضه انه مخلي صدوغي تنتفخ حيل . . يعني كأني نافخها وحابس الهوى فيها .
يعني تخيل اسبوعين وانت نافخ صدوغك كنك تمضمض !
ههههههههههه
والله المرض ذاك تحفه . .
الحمدلله اللي شفانا الله منه . . والله لا يوريكم اياه لا فيكم ولا في صديق :)
سعد الصميل
04-04-2011, 01:52 PM
كنت في جلسه خاصه انا وصديقي الصدوق . . كل واحد يبوح بأسراره للثاني ويشكي له . . ونتبادل الهموم . .
قلت له : انا عندي مشكله يابو فلان , قال اسلم . . قلت ياولد انا اذا دخلت بالسوق احب اشوف المواعين !!
قال طيب ؟
قلت بس يولد والله احس انه عيب , احس اني مريض نفسيا , والمواعين للنسوان مهيب لنا !
قعد يضحك ضحك هستيري . . قال تعرف عمي فلان ؟ قلت نعم وش فيه ؟
قال : ان كان حب المواعين يخلي الرجال مره ترى عمي فلان متبرقع ذلحين !
وبعد التحري اتضح لي التالي :
عمه فلان راعي ابل ومقيم بالصحراء القاحله بين العقارب والديبان ! وشنباته واصله لكتوفه وحواجبه متقارنه . . . واذا بيمدح ولد اخيه قال أيه أيه ولد ولد . . لا لا مستحيل . . :)
اتضح لي بالنهايه . . ان كثيرين اللي مثلي يحب يتمنظر في المواعين كـ استمتاع بأشكالها وصناعتها . . ليس كأستمتاع بتجهيز الاطعمه فيها وطبخها وغسلها ! :)
سعد الصميل
04-04-2011, 02:25 PM
في بريطانيا
. . تعبر الشارع فوق خط المشاه التزاما بالقانون
في امريكا
. . تعبر الشارع فوق خط المشاه خوفا من القانون !
في اليابان
. . تعبر الشارع فوق خط المشاه احتراما لأهل البلد والقانون !
في الكويت
. . لا تعبر الشارع فوق خط المشاه . . لأنك ستكون خوافا وجبانا ومنت برجال اذا طبقت القانون !
سعد الصميل
04-04-2011, 03:44 PM
تصدقون اني اكتشفت انه
لحد الآن فيه ناس يتابعون الزير سالم !
ياجماعه بس خلاص . . سنه سنتين ثلاث .. مو 12 سنه تشوفون مسلسل !!!
اذكر سنة 99 يوم كان يعرض الزير بوقته . .
رايح الشيشه علشان اشوف الحلقه الأخيره . . وانصدمت ان الكويت كلها ذاك اليوم
رايحين للشيشه يشوفون الحلقه الاخيره من الزير !
الله على ايام الزير .
سعد الصميل
04-04-2011, 03:56 PM
وتصدقون اني اكتشفت انكم نصابين ؟
الحين تمدحون الموضوع وتقصون علي وتخلوني اشد حيلي
واجي من اقصاي !!
واخرتها اللي قيموا الموضوع بس 9 اشخاص ؟ لا ومن بينهم انا واثنين من الشباب اعرفهم !
يعني 6 بس ياكذابين ؟ :)
سعد الصميل
05-04-2011, 02:33 AM
اليوم عزمني رجال على سينما . . قالي ابي اجرب السينما الـ vip
وداني للافنيوز . . دخلنا الصاله المذكوره . . واكتشفت :
انها تجربه فاشله باستثناء المقاعد الفخمه . .
الصاله فيها 24 كرسي صحيح . . بس ازعاجها اكثر من الصاله العاديه !
توصيل البيبسي والنفيش لحد الكرسي . . والعامل كل شوي يمر قدامك !
وبما انهم شخصيات مهمه وعايشين الدور ! كل شوي واحد طالع يكلم تلفون !
يااااعمي والله كل شي طبيعي حلو :)
السينما العاديه والله اهدء واريح منها بواااجد !
سعد الصميل
05-04-2011, 02:36 AM
الشيء بالشيء يذكر . . خلونا في طاري الافنيوز . .
بما ان علاقاتنا مع ايران مش ولابد . . وبما ان الكويت ماشيه على البركه . .
دخول السيارات في مواقف الافنيوز من غير تفتيش . . او حتى مرور على اجهزه !
يعني لو دخلت 3 سيارات مفخخه . . وجات بالمصافط اللي تحت المجمع . .
كم قتيل في استهداف واحد ؟ :)
صراحه . . قررت اني ما اروح الا سينما البيت . . وما اروح اماكن مزدحمه !
العمر واحد مافيه ثاني :)
** ادري شغلتها فيكم :)
سعد الصميل
05-04-2011, 02:41 AM
خلونا في المجمعات والاسواق والمطاعم والكافيهات . .
تدرون ان قانون منع التدخين صدر في قطر سنة 2008 ؟
وان وقت صدوره انا كنت هناك . . وشفت الالتزام بالقانون بشكل جنوني . .
لدرجه .. اني يوم كنت مدخن في ذاك الوقت . . جاني راعي الكافيه يطلب مني اطفي الزقاره او انه مضطر انه مايستقبلني ! :)
الكلام مو كذا . . الكلام في التالي . .
تدرون ان قانون حظر التدخين صدر بالكويت سنة 1992 ؟
وتدرون ان الكافيهات بالمجمعات بالكويت قبل لا تدخل يسألك مدخن او لا ؟
لا لا لا يروح بالك بعيد . . مايبي يطردك . . بالعكس يبي يوديك لمكان المدخنين !
شوف الدلع وين وصل ؟ :)
صحيح . . من أمن العقوبه اساء الادب .
سعد الصميل
05-04-2011, 02:54 AM
اكيد انكم تروحون للمجمعات . .
واكيد انكم يجيكم وقت تستخدمون حماماتها ( اعزكم الله )
والحين نوصل للمهم . .
اذا كنت في دورات مياه المجمعات دايم . .
فيه بنغالي ينتظرك وانت تغسل . . ينتظر تخلص علشان يفتح درج ويطلع الكلينكس
اللي هو خاشه منك . . علشان يحرجك ويخليك تعطيه فلوس . .
الكلام لو انه هو شاري الكلينكس كان قلنا حااضر . .
لكن الغريب ان المناديل مصروفه من ادارة المجمع للزباين !
يعني الكلام البنغالي هذا قاعد يتجمل فيك على حسابك !
:)
سعد الصميل
05-04-2011, 03:31 AM
انك تشوف مدرس كيمياء مصري . . تقول ماعليه تخصص نادر وقليل الكويتيين . .
مدرس فيزياء سوري . . تقول نفس الكلام .
مدرس رياضيات مصري . . برضو بتقول قليل الكويتيين خريجين القسم هذا .
لكن انك تشوف مدرس رياضه او تربية بدنيه مصري !!
تقول حسبي الله على اللي مسكر تخصص التربيه البدنية في كلية التربية الاساسيه بعذر الاكتفاء . . وهو جايب مصريين !! :)
يعني وافد ماراح تستفيد منه اي شي . . معاشه 500 دينار . . يصرف عندك 50 دينار والباقي يحوشهم هناك !!
ياجماعه مايصير اكون رئيس وزراء اسبوعين بس ؟ :)
سعد الصميل
05-04-2011, 04:14 AM
100 همهمه . .
وانتم معي . .
وانا معجب بكم وبمتابعتكم . .
احببتكم . . وانا لا اعرفكم إلا بعدد المشاهدات . . لا بأسمائكم . .
اتمنى ان اكون لا اثقل عليكم بها . . ولا اكون ساذجا فيها . .
حاولت بقدر الامكان امتاعكم . . وقول مايدور في ذهني بشكل عفوي وبـ إطار ساخر . .
حاولت ايضا اخراج كلمات تدور في اذهانكم انتم . . ولكن لم تخرجوها . .
اتمنى ان اكون وفقت في ذلك . . وان لم اوفق ارجوا منكم الطلب مني ليتم ايقافها .
كما اعدكم بمواصلة الهمهمات مادامت تجول في خاطري وتلاقي استحسانكم .
لا أملك إلا الشكر . . لله على توفيقه
ولكم على متابعتكم . .
شكرا احبتي .
اخيكم ومحبكم / سعد الصميل
:)
سعد الصميل
05-04-2011, 03:17 PM
^
^
^
شرايكم بالفيلم الهندي اللي سويته ؟
اربكم بكيتوا وتأثرتو بالحكي ؟
متواصلين دائما وابدا إن شاء الله .
بس على فكره . . ماكان فيلم . . كان مايدور بالخاطر والله .
سعد الصميل
05-04-2011, 08:10 PM
ياجماعه فيني طائفيه زايده اليوم . . وش الحل ؟ :)
والله صرت استمتع اذا احد قالي انت طائفي . . !
كنا ماسكين العصى من النص . . مانحب نقربهم ولا نجيهم . .
لكن الامر زاد عن حده . . وبما انهم طائفيين وهم قله . . يحق لنا نكون طائفيه وحنا الأكثريه !
عاد تدرون آخر احصائيه رسميه تقول انهم تعدادهم 7 % من مسلمين العالم ؟
طبعا الاحصائيه مدوجه شوي . . لأنها حسبتهم من ضمن المسلمين للأسف !
< < طائفي اليوم صح ؟ :)
سعد الصميل
05-04-2011, 08:13 PM
احيانا الواحد يكون في باله افكار وااااااااجد . . ومن زحمتها يضيع !
واحيان يعصر مخه على انه ينتج افكار ومايلقى شي !
عن نفسي لحد الان الحمدلله امتلك مخزون . . لكن خايف من النشفان بعدين !
يعني قلنا نجهز الدواء قبل الفلعه . . علشان بعدين اذا فقدتو الهمهمات تقولون الرجال خلص الحكي اللي براسه :)
* في بداية الهمهمات كنت قوي , الحين احس بدت تطخ شعبية الهمهمات . . لازم انقذ نفسي قبل لا اطيح :)
سعد الصميل
06-04-2011, 12:46 AM
بحكم اني دخلت سن الــ 78 في عمري البيلوجي اكتشفت اشياء كثيييير
ومنها . .
ان القناعات تتغير مع تغير العمر !
اشياء تكون غير مقتنع فيها نهائيا . . تشوف نفسك اقتنعت فيها !
واشياء كنت تسويها . . والحين انت مصدوم شلون كنت تسويها !
مشي ياعم . . الحياه كومة ايام ومخلبصه !!!
سعد الصميل
06-04-2011, 12:59 AM
يسولف علي واحد من مطاوعتنا ويقول . . سنة من السنين في رمضان كنا في مكه
ونصلي القيام فوق السطح . . وكان الإمام السديس . . وكان يقرأ في سورة مريم . .
المهم يقول . . ان السديس خربط في الآيات . . فــ جنبي مصري << لاحظ انهم فوق السطح :)
وقام يعدل للسديس وهو من فوق السطح . . وتخيل شكله يصايح علشان يوصل صوته !! <
هههههههههههههه
ياعمي اذا السديس اخطأ ترى وراه 10 فطاحلة حافظين القرآن + الكتب السته عن ظهر غيب !!
مشكله اللي بيعلم الناس كلها اني حافظ !
سعد الصميل
06-04-2011, 04:40 PM
بما اننا في وقت فيه تخمة حفلات عشاء التخرج . .
المنطق يقول ان الطبيب والمهندس ووكيل النيابه والمحقق وضعهم
افضل بكثير سواء ماديا او اجتماعيا او وظيفيا من الضابط . .
فهذا أمر مفروغ منه . . إلا عندنا يالبدو !
والواقع يقول . .
يتخرج ولدنا مهندس والا وكيل نيابه والا طبيب . . وتعب نفسيا وفكريا وتوظف وظيفة لها مستقبل مشرق جدا . . ونسوي له عشاء بالدوانيه !
بينما ولدنا اللي تخرج من الثانويه بنسبة 50 % وراح للميدان وسمع كلام بذيء و طلع لنا فارغ داخليا . . لايملك اي محصلة علميه . . ونسوي له عشاء عام وخيمة ولعب صفوف . . بل وصلت في بعضهم يجيب فرقه ! :)
بس انا متأمل خير في عقليات ربعنا الجيل الحالي . . ان شاء الله يتغير منظورهم للحياه !
سعد الصميل
06-04-2011, 04:44 PM
كلمني واحد من الربع وقالي انت شلون قدرت تصيغ همهماتك وتخليها ممتعه ؟
ردي بسيط . . اختصر قدر الامكان . . بإستطاعتك ايصال معلومه بأقل عدد من الكلمات . . :)
الناس ملت من المواضيع الممله الطويله !
سعد الصميل
06-04-2011, 11:14 PM
سمعت في الراديو مره . . ان التطور العلمي والاكتشافات بدأت تتضاعف في القرن الـ 19
الى ان وصلت في سنة 2010 ضعف التطور العلمي في السنة اللي قبلها بـ 160 مره ! :)
لاحظ معاي يالطيب . . . يعني اللي صار بـ 2009 تطور بـ 160 مره بالسنة اللي وراها !!
رباااااه
وعندنا نفس المناهج . . ومكااانك راوح . . الله يعز النفط يالربع في ذمتي !
سعد الصميل
06-04-2011, 11:16 PM
مثال على التطور العلمي الهايل . . .
في سنة 2004 يعني قبل اقل من 7 سنين بس . . كان عندنا انجاز عظيم اسمه . . .
http://www.nokiamobiles2003.org/images/6600_1.jpg
الباندا . . :)
الحين شنو ميزات الباندا عن الآيفون ؟
لكم التعليق !
سعد الصميل
06-04-2011, 11:22 PM
اليوم مريت الصباحيه بقلط على رجال العصر . .
وانا بالطريق . . شفت لي خوش مجلس درايشه كبار . . احب المجالس اللي كذا . .
ماعلينا . . انا قاعد اشوف المجلس . . الا فيه واحد قاعد يتقهوى بروحه . . والهندي واقف فوق راسه . .
يقهويه !!
يابو الشباب انت فاهم الشيخه غلط . . !!
هذا بشر يرحم امك . . بعدين انت جالس بروحك يالطيب !!
ياكثر الناس اللي يرتكبون حماقات في نفسهم وفي خلق الله !
سعد الصميل
07-04-2011, 04:07 AM
من خلال بعض مشاركاتي في الموضوع . . تبين لي التالي :
من الصعب انك تغير قناعة شخص في مسأله معينه . . وحتى لو انه اقتنع في اللي تقوله . .
راح يكون اقتناع داخلي . . قليل من الناس يعترف بتغيير قناعته !
انا شخصيا ماعمري بحياتي كلها شفت شخص اعترف بتغيير قناعته في نفس النقاش . .
وهذا الواقع و السليم . . القناعه تتغير بس مو من نقاش واحد . .
الشخص يحتاج الى وقت طوووووويل علشان يغير قناعته في اي شي كان . .
فـ اذا تناقشت مع شخص على امر معين . . اصبر عليه وناقشه ثانيه وثالثه ورابعه . .
وعطه وقت بعدها . . وبتشوف اذا كانت الامر اللي مقتنع فيه سليم واسلوبك سليم . . . ان الشخص تغيرت قناعته !
اقنعتكم صح ؟ :)
سعد الصميل
07-04-2011, 04:13 AM
كان في بالي ان اكثر شعوب العالم اكلها غير صحي هم الخليج . .
لكن اتضح لي بعد تفكير عميق . . ان الهنود اعبر من الخليج مليون مره
كل شي عندهم مقلي في دهن وسمن وزبده ودسم وملعنة خير !!
الدهن شي اساسي عندهم في الاكل والزينه وحتى المساج الهندي . . جربته مره كرهت نفسي !
حاطين مقلى فيه دهن حار ويمرخوني فيه . . قعدت ثلاث ايام وانا اذا مشيت حافي على السيراميك ازلق !!!
واكتشفت شي بعد . . روح لأكثر مطعم هندي عنده تنوع . . ماراح تلقى اي اكله هنديه مسلوقه ابدا !!
سعد الصميل
07-04-2011, 05:40 PM
ياكثر ماسمعت من الناس : ترى رسوم الخدمه الـ 15 % اللي يحطونها المطاعم غير قانونيه , وتقدر ترفضها , ويشيلها من الفاتوره غصب عليه . . .
طيب ياحلوين . . ندري انها غير قانونيه . . بس سؤال بريء . . على كثر مانرفضها بالحكي . .
بالواقع كم واحد فينا رفضها صدق وتجادل مع المطعم وسوا سالفه لين الغاها ؟ :)
والا بس نحب نسولف ؟
سعد الصميل
07-04-2011, 10:24 PM
اذا سافرت ورحت وعشت وشفت الدول اللي برا . . وشفتهم بالــ ويك اند كلهم طالعين
والشوارع عندهم زحمه . . وكل مكان فيه ترفيه مليان عن اخره . . والشوارع مسكره ..
فــ هذا شي طبيعي . . لأن الشعوب هذي ايام العمل عندهم شاقه جدا . .
تلقاه يداوم من 9 الى 9 . . او يداوم على جزئين باليوم ويروح عليه اليوم كله عمل . . يرجع ينام . . مايحصل له طلعه الا بالويك اند بس . .
لكن انك تشوف الزحمه في الويك اند بالكويت . . تستغرب !
مع ان اكثر الدوامات عندنا فلة واللي دوامه شديد . . تلقاه يداوم من 7 الى 3 . . !
اللي يشوف الزحمه عندنا بالويك اند يقول مساكين والله دواماتهم صعبه والاجازه تخفف عنهم :)
سعد الصميل
07-04-2011, 10:30 PM
جميل ان الواحد يعمل ويكسب اعجاب الناس على جمال العمل . .
ويمشي على نهج يعجب الناس . .
لكن الأجمل . . انك تصنع نهج جديد يحبه الناس ويحبونك . .
هذا ما اسعى له في همهماتي . . وان شاء الله يقدرنا الله على امتاعكم دائما . .
سعد الصميل
07-04-2011, 10:33 PM
مع اني لي خبره في النت تجاوزت الـ 14 عام بالتمام والكمال دون انقطاع ابدا ابدا . .
لكن قاعد احاول اتذكر يومياتي بالنت اللي كانت بدون قوقل ماني قادر استوعب !
النت كان ولا شي بدون العم / قوقل .
شكرا قوقل . . اثريت العالم وخدمت البشريه فعلا .
سعد الصميل
07-04-2011, 10:36 PM
خلوني افيدكم بعد . . من المواقع اللي خدمت البشريه فعلا بجد ويكيبيديا . .
اعتمد عليه في ثقافتي وزيادتها دائما وابدا . .
مع مراعاة التأكد من مصادر المعلومات المدونه فيه . .
عاد اول مابدا ويكيبيديا زرته وكنت اراهن على فشله . . ماكنت متصور ان اي واحد يقدر يجي ويعدل على المقال ! صديت عنه . .
لكن الحين ؟ صار من المواقع اللي فعلا اعشقها واعتمدها . . وحاطها بالمفضله دائما .
عقبال ماتصير همهماتي عندكم بالمفضله :)
سعد الصميل
08-04-2011, 03:23 AM
مجمع الكوت . .
تجربة ناجحه بكل المقاييس . . ماعدا الحجم !
السؤال ولب الموضوع : بعد النجاح اللي حققه المجمع هذا يعني مافكروا تجارنا الشطار يسوون شي من هذا الطراز ؟ خصوصا بطريقة الكافيهات الرائعه على النافوره لكن بحجم اكبر من الكوت الصغير جدا ؟
عاد تصدقون ؟ اذكر ان مجمع الكوت سيطر على جائزة عالميه تعطى لأفضل تصميم هندسي على الطراز الاسلامي لمدة 3 سنوات .
سعد الصميل
08-04-2011, 03:26 AM
يوم كنا بزران . . طبعا ماكان فيه صالات افراح . . يعني الاعراس بالخيام .
كنا نستمتع اذا صار عرس بالشتاء . . علشان اذا خلص العرس نقعد في خيمة العرس ونطفي الليتات ونقزرها على الضو . .
وبعدين كل واحد يمسك له زاويه في الخيمه ويرقد . . كانت قمة المتعه :)
طيب ماعندكم لا فرش ولا بطانيات والمكان مو نظيف . . وش اللي يحببكم في النومه ؟ :)
كان علينا طقوس غريبه صراحه !
سعد الصميل
08-04-2011, 03:32 AM
ومن المناظر اللي ماتروح من ذاكرتي وانا طفل . .
http://alajman.net/up/uploads/85fdf9af8e.jpg (http://alajman.net/up/)
اللي كان يحمل النسوان مدري وين يوديهن , الصاله مدري بيت العروس . . !!
بس اللي اعرفه انهن كانن مستانسات ويصفقن ويغنن !!
الدنيا كانت حدها فله !
هههههههه
** طبعا الباص هذا اذا انتهت خدمته مايتسكرب . . يروح يصير غرفة عند اهل الغنم والابل في البر . .
كل شي كان يتحلل مافيه شي ينحذف !
سعد الصميل
08-04-2011, 03:48 AM
راسلني واحد من الشباب يقول انت شايب . . الباص الاصفر قديم ذكرتنا بأيامه . .
كنه صاطرني طراق !!
انا صحيح ماني كبير . . لكن يوم فكرت فيها إلا انه بالفعل فيه اعضاء بالمنتدى وااجد من مواليد الغزو وبعد التحرير . .
يعني انا حدي ظلمتهم بالهمهمات . . قاعد اجيب لهم طلاسم مايدرون عنها . .
بس بنفس الوقت اقول احسن . . قاعد اعطيهم ثقافة ومعلومات عن ماضي اخوانهم الكبار !
:)
سعد الصميل
08-04-2011, 03:52 AM
الا على طاري الماضي واخوانهم الكبار . .
ليش دايم كل جيل عنده انه احسن من الجيل اللي بعده ؟
انا يقهروني قبل اذا قالو التدريس مو تدريسكم . . ايام المدرسين الصح راحت . . مدرسينا كانو شديدين ويدخلون المعلومات صح مو مثلكم الحين امحق تدريس . .
طيب تعال يا كبير انا وياك على طاولة مفاوضات ونقول :
انت ويا وجهك شهادتك رابعه ابتدائي والطيب فيكم رابع متوسط . . وحنا الفاشل فينا معاه دبلوم بعد الثانويه !!
اكيد راح يسكت ويقلب السالفه عليك ويصير نقاشكم جدال ! :)
الحقيقه مره دايم في كل الاحوال !
سعد الصميل
08-04-2011, 07:46 PM
الناس درجات . . في كل شي . . حتى في قبولهم عند الناس يبقون درجات !
فيه ناس لو يلبس او يستخدم احدث الامور واخر ماتوصلت له التكنلوجيا . . مايجذب الناس ومادروا عنه !
وناس لو يلبس شي قديم او يستخدم شي عادي . . ثاني يوم يصير موضه بالبلد كله !
ناس الله عطاهم قبول عند خلقه وناس الله ماعطاهم :)
سعد الصميل
08-04-2011, 07:52 PM
والله اني محترم عقولكم . . :)
كم همهمه كنت بكتبها . . بعدين في اللحظات الاخيره وقبل اضافة الرد . . اتردد
وافكر : وش الفايده منها ؟ ماهي همهمه لا مفيده ولا مضحكه بالشكل المطلوب !
اذن : نلغيها لخاطر عيونكم . . وعلشان ماتشوفون مني الا كل شي طيب . . :)
سعد الصميل
09-04-2011, 02:03 AM
فيه السيارات اللي تنظف الشوارع عرفتوها ؟
اللي فيها بروش من تحت وتنفض الغبار . .
يبه بالعربي هذي
http://alajman.net/up/uploads/fc49ffb78e.jpg (http://alajman.net/up/)
ودي اعرف شفايدتها ؟
كل ماشفتها الا وهي تنفض الغبار وتسبب عج . . يعني لا هي اللي شفطت الغبار ولا هي اللي غسلته !
يعني حق المصخره بس ؟ :)
سعد الصميل
09-04-2011, 02:22 AM
اكثر شي استانس عليه من سوالف الناس هالايام . .
التشكيل الحكومي !!
اللي يحلف ان فجر السعيد وزيره . . واللي يقول طلال السعيد وزير !
واللي يحرم ويطلق ان الشيعه بياخذون 5 وزارات . .
وكل واحد يطلع بسيناريو فلم رعب . . يحاول من خلاله يلفت انظار اللي يكلمهم ويشد الانتباه !
لكن الاكيد . . ان الحكومه مثيله لسابقاتها . . لا جديد على الساحه وان تغيرت الاسماء
سعد الصميل
09-04-2011, 02:35 AM
الخبر يقول : غدا اول ايام الحظر الرسمي لإرتداء النقاب في فرنسا .
مشكلة الفرنسيين ماهم مقدرين فوايد النقاب . . خلونا نعطيهم فوائد ثانيه غير الستر . .
يمكن يقتنعون فيها بما انها اسباب غير دينيه !
من فوايد النقاب يافرنجه . .
انه يستر الوجه . . يعني فيه وجيه النقاب يستر بعض المناظر الوحشيه اللي بيكون تحته !
كذلك بعض الوجيه . . يسترها علشان ماتفتن الرجال بجمالها !
بعدين النقاب يخلي البنت تعبر براحتها ياخي !
تقدر تسب وتكلم وتدلع لسانها بدون محد يدري عنها . . ضيفوا عليها ان البنت تقدر تنظف خشمها بدون ماتنحرج ! << يامقرف :)
فوائد النقاب يافرنسيين واجد . . احترموا المنقبات شوي . :)
سعد الصميل
09-04-2011, 03:28 AM
قبل كنت اقول ان معمر القذافي شخص محشش . .
بعدين شفت ولده سيف الاسلام قلت الثاني هو المحشش . .
شفت المفتى الرسمي في تلفزيون ليبيا ونغمة تلفونه نانسي عجرم . . قلت هو المحشش . .
شفت بعدها المذيعه الليبيه وهي تقول ان القائد جاب المطر والثوار جابو الغبار . . قلت لا الظاهر ان البنت هي اللي محششه . .
وشفت . . . الخ
وايقنت . . . ان النظام الليبي بكبره محشش !
سعد الصميل
09-04-2011, 04:22 AM
صنعوا لنا الكاميرات بالتلفونات . . قمنا نصور فضايح خلق الله . .
صنعوا لنا البلوتوث . . استغليناه في نشر الفضايح . .
صنعوا لنا الآيفون . . قزرناها في برامج الشات اللي مامنها اي فايده . .
صنعوا لنا البلاك بيري . . صرنا اكبر مصدرين للاشاعات في العالم . .
هم شعب يصنع . . وحنا شعب يستخدم :)
وليتنا نستخدم مثل الناس . .
ليتنا من حجنا سالمين .. كان الذنوب اللي علينا خفيفات !
سعد الصميل
09-04-2011, 05:25 AM
فيه اشياء ماودك انها تنقرض . .
واشياء غثتنا من كثر ماقعدت !
والمشكله مو راضي يتغير شكله . . ولا راضي انه ينقطع من السوق ! :)
http://alajman.net/up/uploads/f3e66cb8fc.jpg (http://alajman.net/up/)
بس عاد تدرون ؟
سمعت من طبيب يقول لي انه انظف شامبو !
وينصح بإستخدامه !!
بس فوق النصيحه . . ما اظن احد فيكم بيستخدمه . . لأني جربته مره . . حسيت اني غاسل راسي بشاهي عاقد ! :)
سعد الصميل
09-04-2011, 08:52 AM
قبل شوي قاعد اسمع الاذاعه وانا بالسياره . .
مصري داق على برنامج حواري على الـ bbc
يقول : الشعب الليبي ينقصه الالهام , يعني مثل ماكان هناك الهام في ثورات تونس ومصر !
ياعمي دخيل الله اسكت , والله لو جايك 1 % من اللي جاء الليبيين كان فركت لها من ميدان التحرير ورحت عند أمك !
بس الشرهه على ابو علاء , دلعكم زيادة حبتين وخلاكم على راحتكم وصدقتو انكم اهل ثوره :)
سعد الصميل
09-04-2011, 09:00 AM
احلى ناس البنغاليين , يجي من ديرته ويكون مفهمينه ان الكويت بلد كله فلوس . .
يقولون لبعض . . داخل كويت انتا سوي سلام عليكم بس . . شيل فلوس !
طبعا يسولفون في هالموضوع انه من عجايب الدنيا الواقعيه . .
فـ يجي من ديرته عنده ان السلام بفلوس . . .
لدرجة ان واحد فيهم اليوم وهو بالشارع بسياره متعلق وانا بسيارتي . . يطالعني ويرفع ايده يقول سلام عليكم بابا !!
يعني اوقف وانزل اعطيك فلوس والا شنو بالضبط ؟
** لحد يقولي يبي يسلم بس . . مبين من شكله ونظرته المتمسكنه .. بعدين بنغالي يعني لحد يلومني فيه :)
سعد الصميل
10-04-2011, 01:40 AM
انا من الناس اللي يعانون في الصحيان من النوم . .
لكن لي طقوس غريبه امارسها اذا بغيت اقعد ضروري . .
من اهمها . . اني شريت منبه اللي يكون فيه جرس حديدي مزعج جدا !
واتعمد اني احط المنبه في زاوية الغرفه علشان اضطر اني اوقف على رجلي وامشي علشان اسكر المنبه !
لكن اغرب مافي طقوسي . . اني اكتب ورقه دايم اخليها فوق المنبه . . مكتوب عليها . .
تكفى قوم ضروري !!
علشان ما اسكر المنبه وارجع ارقد مره ثانيه !! . . .
ادري تقولون اني طلعت ماني بـ صاحي . :)
سعد الصميل
10-04-2011, 02:15 AM
لسنا المميزون ولكننا الافضل . .
لسنا الافضل ولكننا نسعى للتميز . .
لا ندعي الكمال . . ولكننا نسعى ان نكون كذلك . .
شعارات تجاريه اكل عليها الدهر وشرب . . ولكن الشي الغريب . . ان فيه ناس لحد الان تستخدم الشعارات المنتهيه هذي :)
والاعجب . . ان الله سبحانه رازقهم مع انهم مايفهمون ألف باء التسويق التجاري !
سعد الصميل
10-04-2011, 03:15 AM
مرّه كنت قاعد اتغشمر مع افغاني اعرفه . . وكنت اتطنز على لبسهم واضحك عليه . .
قال تدري عاد ؟ حنا الافغانيه . . نضحك على لبسكم انتو يالكويتيين !
سألت عن السبب . . قال حنا نشبة الثوب مالكم بالكيس . .
فكرت بالمنطق . . لقيت ان معهم حق يضحكون على لبسنا . . لبسنا ماهو عملي على الاطلاق . . وان كان يعجبنا شكله . . يمكن علشان تعودنا عليه !
لكن عند اغلب العالم . . يبقى لبسنا مضحك . .
حقيقه ثانيه : لبس العرب يوم كانو عرب . . قبل لا يصيرون بدو . . كان شبيه في لبس الافغانيه !
مرات افكر اني اتمرد على العادات واخلي لبسي الرسمي افغاني ! بس اخاف يشوفوني البزران يحذفوني بالطابوق ويمصخروني ! :)
سعد الصميل
10-04-2011, 03:37 AM
منذ القرون الوسطى وحنا نسمع انك راح تقدر تغير شركة الاتصالات بدون مايتغير رقمك . .
المشكله ان الكلام هذا يطلع من الوزير نفسه . . يعني مو كلام ديوانيات . .
قال نص 2010 . . بعدين قال آخر 2010 . . بعدين قال شهر 3 في 2011 . .
ناطرين الحين متى يقول بعد . .
المهم . . عجلو علينا نبي نروح لـ فيفا . . نبي نقدر نرسل مسجات لقناة وصال وصفا . . :)
سعد الصميل
10-04-2011, 03:42 AM
على طاري الاتصالات . .
تأسست زين سنة 1982 . . والسعوديه ماكان فيها اتصالات نقاله . .
في بداية التسعينات . . بدأت ثورة الـ gsm يعني التلفونات الصغيره النقاله ام الشريحه . .
والسعوديه مافيها شركة اتصالات متنقله . .
في سنة 99 تقريبا او بعدها . . بدت السعوديه بتشغيل الجوال لأول مره . . وحنا صرنا خبره قربت لـ 20 سنه . .
لكن في 2011 . . السعوديه فيها تطور يفتخر فيه كل مواطن سعودي في مجال الاتصالات . .
ورخص المكالمات شي مو طبيعي . . وخدمات خياليه . . وعروض ولا احلى . .
وحنا مكانك راوح . . ثلاثين سنة من النهب والسرق على حساب المواطن الكويتي . . بدون اي تقدم يذكر !
هنيالكم يالسعوديين بشركاتكم . . الله لا يغير عليكم .
سعد الصميل
10-04-2011, 04:02 AM
يلا ياجماعه . . نستودعكم الله . . نشوفكم على خير . . ماندري نشوفكم مره ثانيه او مانشوفكم . . :(
الاكيد ان الغيبه بتكون طويله . . وطويله جدا . .
بنشتاق لكم . .
راح يكون اخر ساعات اشبك فيها في النت . . وبعدها ماندري وش الخيره فيه . .
فرصه سعيده عرفناكم واستمتعنا معكم . . لكن لكل وقت نهايه . .
^
^
هذي كانت سوالفنا اول ماعرفنا النت سنة 1997 . . كان الاشتراك بـ 35 دينار . . لا و دايل اب بعد . . يشق اذنك صوت الفاكس . .
واخر ساعات بالاشتراك كنا نقول كذا لأن الـ 35 دينار كانت واجد علينا . . مو كل شهر اجدد اشتراكي . . :)
الله على ذيك الايام . . مسرع ماراحت . .
سعد الصميل
10-04-2011, 05:25 AM
انا شخص ما البس ساعة اليد نهائيا . . اخر ساعه لبستها كانت نوع كاسيو
فيها الة حاسبة ومنبه . . !!
طبعا أهم شي انها كانت ضد الماي . . :)
و مكتوب عليها Made in Japan . . يوم كان التقليد تايوان بس . . الحين تايوان صار شغلها جودته عاليه . . وكبر راسها علينا شوي . .
لكن الحين بعد ماشفت ان الكشخه تستدعي لبس الساعه . . قررت اني اضغط على نفسي . . واجرب لبس الساعه !
مشكورين لحد يهديني ساعه . . انا احب البس الساعه على ذوقي انا . . :)
سعد الصميل
11-04-2011, 12:09 AM
فيه ناس اذا تحاورت معاه . . تحس انك قاعد تفيد نفسك وتنمي نفسك وقدراتك الحواريه . . وتطور وترفع ثقافتك . . يعني بالفعل . . تستمتع بالحوار معاه . .
وفيه ناس اذا تحاورت معه تحس انك ظلمت نفسك واخطيت في حق نفسك وضيعت الكثير من وقتك بدون اي فايده تذكر .
الخلاصه . . إعرف من تحاور ومن تطنش . . مو كل واحد يستاهل وقتك :)
سعد الصميل
11-04-2011, 12:14 AM
اليوم حضرت عرس وشفت لي منظر يتكرر في كل عرس احضره . .
يجيك ابو الشباب ماسك له شوكه وملعقه ويتمشى بالبوفيه يوقف عند كل صنف وياكل براحته . . ومخلي الناس وراه زحمه . . :)
ياخي استح على وجهك . . خذلك صحن وعبه وفارق اقضب لك زاويه اكل فيها . . ياخي الاكل وانت واقف مايجوز . . لا في دين ولا في صحه . .
طبعا هذا احد الاسباب اللي يخليني اصرف النظر عن البوفيه واتوجه للصحون في اكثر الاوقات !
سعد الصميل
11-04-2011, 01:37 AM
تعرفون شاطئ الفنطاس اللي عند شاطئ العقيله ؟
هذا الشاطئ كان قذر جدا . . كله زبايل اعزكم الله . . وكان مرتع للمدمنين . . والمصبنه . .
أصلا شكله كان مرعب بالليل .
لكن حاليا . . ياسلام . . والله شكله صار تحفه . . الارض مزروعه . . مواقف للسيارات . . العاب اطفال . . ملاعب طائره وسله . . اجهزه رياضيه متطوره وممتعه لأهل الرياضه . . كراسي فاخره . . إنارة اروع . . ممشى فاخر جدا . .
تبون نصيحتي ؟ جربوا تسوون فيه رياضه . . المكان ممتع جدا ويشجع ..
سعد الصميل
11-04-2011, 01:41 AM
اعترف اني شخص مهمل جدا . . ولو ان الاهمال صفة اصيله من صفات الكويتيين ككل . . لكن انا بزود ..
اهلي كانو معطيني فازةمن باتشي بس فاضيه قبل 4 شهور . . وكانو قايلين لي ودها عند باتشي خله يترسها لك . .
انا نسيت وهم نسوا . . لحد الآن مافيه مشكله . . النسيان عند الكل . .
لكن مو سالفه اني على مدى 4 شهور كل مالفيت بالسياره . . سمعا قرقعة الفازه ورى وكل مره اقول لارجعت البيت بنزلها . .
تبون تغسلون ايدكم ؟ وانا قاعد اكتب لحد الآن الفازه اسيره في السياره . . ان شاء الله اصير خوش ولد وانزلها . . :)
سعد الصميل
11-04-2011, 01:48 AM
قبل شوي كنت في ممشى شاطئ الفنطاس اللي قلت لكم عنه . .
شفت لي منظرين مضطر اني اكتب عنهم . . :)
المشهد الأول :
شفت رجال ومرته وعيالهم . . مرته كبيره مو صغيره ومنقبه . .
السالفه . . ان المره واقفه على الديرفه وتلعب فيها . . ياليتها قاعده وتلعب ! واقفه تخيل شكل المره ونقابها وواقفه على الديرفه ورايحه جايه بالديرفه !
يامره اذا ما احترمتي الناس احترمي العبايه والنقاب دخيل الله ! :)
المشهد الثاني :
لاحظت في الممشى الجديد لوحات واااجد . . حافظ على نظافة المكان . . ممنوع الشواء هنا . .
ليش حنا شعوب نحتاج احد يذكرنا بأننا لازم نحافظ على النظافه او الاداب العامه ؟
وياليتها تنفع . . :)
تصدقون . . انا ابي احلل الممشى الجديد هذا لأني ادري انه بيرجع خايس مثل قبل والبزران بيكسرون الاجهزه ويحرقون العشب . .
سعد الصميل
11-04-2011, 11:08 PM
يقولون الاسرار لازم تحفظ عند الناس الثقه . .
وبما إني واثق فيكم عندي لكم سر خطير . .
اذا كنت شخص تمشي وتوزع اسرارك على خلق الله . . تحمل الفضايح :p
وتعود انك مو كل شي تقوله للناس . . ومو كل الناس تقولهم شي !
سعد الصميل
11-04-2011, 11:16 PM
حيثما دقات الساعه والمطر يرفرف على اجندة الماضي وكنفات المستقبل . . ان روائع قلمك يا اخي الفاضل تزهو بكل التحايا المعطره وان حيثييات المشكله من اصل المبدأ وذلك لدرء مواضع قلمك الساحر . . .
ياني اكره اهل الكتابات هذي بالمنتديات . . يتفلسفون وااااجد على راسي وانا ادري ومتأكد انهم فارغين من الداخل . . بس يحبون يهايطون في المنتديات . .
بس جد احس انهم مساكين معذبين انفسهم في اختيار انواع مواضيعهم وفي اختيار مفرداتهم . .
بكل صدق . . الله يساعدهم :)
سعد الصميل
11-04-2011, 11:21 PM
فيه مرحله من العمر الواحد يكون متشتت فيها . . المرحله هذي تكون في نهاية الطعش وبداية العشرينات . . الواحد وده يكون كل شي . . وده يصير تاجر . . ووده يصير راعي ابل . . وده يصير عنده غنم . . وده يقنص . . وده بالحداق . . وده يصير راعي سفرات . . وده يصير راعي بر . . ووده عنده سيكل ومقزرها بشارع الخليج . .
مرحله ملعون ابو خيرها في التشتيت . . . لكن لحد الآن مافيه اي شي غريب فيها لأنها تمر على جميع الشباب . .
الغريب في السالفه اني لحد الآن اعيش مرحلة الشتات وانا واصل للثلاثين !
ابي اصير كل شي ! << اركد يابابا . . خلاص والله كبرت
سعد الصميل
11-04-2011, 11:53 PM
احلى مافي الكويتيين انهم شعب ابو هبّه فعلا . .
الغتر قبل مرزام . . سواها واحد مربع الكويت صارت كلها نفس النمونه . .
واحد من الشباب شرا دوج شارجر والا وانيت سلفرادو . . الكويت كلها شروا نفسه !
وحده من البنات شرت ايفون وبلاك بيري . . الكويت كلها ماشرت ايفون << انا ماعندي
طلعت حليمه . . بنات الكويت كلهم تغيرت لكنتهم بقدرة قادر !
قبل كم يوم شفت منقبه لابسه شماغ ملفوف على رقبتها فوق العبايه . . اتمنى مو كل بنات الكويت بيصيرون رقلات مثلها بعد
بالعربي . . اطلع لك بشغله عكس الناس . . صدقني راح تصير موضه
سعد الصميل
12-04-2011, 12:00 AM
بالله عليكم . . اللي كتب الاعلان هذا وش يحس فيه بالضبط ؟
http://alajman.net/up/uploads/32caa01612.jpg (http://alajman.net/up/)
صراحه تعطل تفكيري من كثر مافكرت وش يبي من الجمله المكتوبه !
سعد الصميل
12-04-2011, 02:41 AM
ياجماعه ليش في الكويت كل فتره تطلع لنا كلمات جديده ويستخدمونها بقوه ؟
مو صج ! << هذي اخر ماسمعتها . .
وفيه كلمة معرّد . . هذي اعتذر عن شرحنا لأنه صعب تفسيرها . .
سعد الصميل
13-04-2011, 02:04 AM
اليوم الكواي ضيع ثوبي . . ومن اليوم وانا وياه نتطالب . . راح علي الثوب مع اني مالبسته الا مره وحده بس !
طيب مو هذا الموضوع . . الموضوع كم بيعوضني عن الثوب ؟ :)
فيه عرف جاري عندنا وماهو قانون ملزم . . ان الكواي يعطيك 10 اضعاف قيمة الغسيل . . يعني راح اطلع بـ 5 دنانير لو بقبل الــ 5 منه !
والكلام لو الثوب شتوي ؟ < الشتوي دايم يكون اغلى من الصيفي بواجد !!
كنت اسولف مع واحد من الشباب عن هذا الموضوع وقالي صارت معاي نفس السالفه في دبي . . واكتشف ان عندهم قانون تجاري يلزم المصبغه بتعويض الزبون في حال ضياع الثوب او اتلافه بمبلغ لا يقل عن 500 درهم يعني 40 دينار ! شفتو الفرق ؟ :)
والله محتاجين لقوانين كثييييير تنظم لنا الفوضى اللي عايشينها !
سعد الصميل
13-04-2011, 02:17 AM
بما ان النساء قبل كم سنه كانو يطالبون بالمساواه مع الرجل في كل شي . . سياسه وظايف . . الخ
المهم ان الديره سوت اللي في راس النسوان وعطتهم كل شي . . حتى اننا شفناهم شرطيات . .
هذا كله مايهمني . . اللي يهمني ان فيه حقوق مسلوبه للرجال !!
لحد يفهم غلط . . بس فيه كم شغله تستدعي تنفيذ الطلب علشان تكون المساواه متكافئه . .
في محطات البانزين اللي تكون خدمه ذاتيه . . العامل يجي للنسوان يعبي لهم بس ! ومايجي للرجال .. ليش ؟؟
الرجال اذا سوا جريمه ينمسك ويتعذب وينذبح ويتهزأ علشان يعترف .. بس المره مايصير يحطون الكلبشه في ايدها .. ليش ؟؟
مكاين سحب الفلوس مالت البنوك مكتوب عليها الاولويه للنساء .. ليش ؟؟
وعد وخربط . . كل شي النساء مميزات عن الرجال فيه . . !!
كذا ماصار تساوي . . صراحه انا اطالب بمساواة الرجل بالمرأه الحين !! :rolleyes:
سعد الصميل
13-04-2011, 02:28 AM
اليوم في الخط السريع وانا طالع . . فجأه وقف واحد ورجع بسيارته وبغى يدهور الناس ويسبب حوادث شنيعه . . والحمدلله ربنا ستر . .
بس تعالو نشوف السبب . . يقولون بالمثل القديم اذا عرف السبب بطل العجب . .
بعد ماقربت عنده شفت ان ابو الشباب كان شايف وحده كانت خربانه سيارتها على الخط . . وغامر في روحه وارواح خلق الله علشان يصلح سيارة اختنا . .
ياخي عيب عليك في هالوقت مافيه احد بيتوهق . . عندها تلفون وبتخلص نفسها . . لأني بالفعل شفتها تأشر له تقوله لا . . او باللي فهمته يعني مشكور . . تسوى عليه الربكه اللي سواها بالله ؟ :)
السؤال : ياجماعه لحد الآن النوعيات المتخلفه هذي عايشه ؟؟ انه يسوي ربكه بالطريق ويمصخر نفسه علشان ذالسالفه ؟؟
سعد الصميل
13-04-2011, 02:58 AM
من الامور اللي ودي ارضخ ناس واجد عليها . . هي انهم يروحون للمطاوعه اللي يقرون بفلوس . .
وبعضهم حاط موظفين استقبال وكريمات مقري فيها بفلوس . . وكل شي مقري فيه . . لدرجة انهم وصلت معهم براقع مقري فيها !! << تكفى وش يحس فيه ؟؟
واذا تبي قرايه خصوصي تدفع اكثر وتاخذ تذكره .. وين رايح سينما والا وش بالضبط ؟؟
واللي امر وادهى من هذا كله .. تدفع له فلوس . . وبالنهايه يتفل بوجهك !!
** طبعا قبل لا يختلفون معاي بعض الاخوان . . انا احترم المطوع اللي مايقرى بفلوس ابد . . لوجه الله فقط . . او ان الشخص يتبع السنه ويرقي نفسه بدال مايروح للنصابين !
** لي همهمة ثانيه عن المطاوعه من النوع هذا بس خطيره . . بوقت ثاني ان شاء الله تشوفونها .
سعد الصميل
13-04-2011, 03:25 AM
طبعا فيه شغله ثانيه عن النصابين اللي تكلمت عنهم . .
انهم عارفين صيداتهم . . طبعا الكلام هنا عن النسوان المسكينات . . الله يكفيهم شرهم ان شاء الله . .
والمره مسكينه يقولها انتي ملبوسه . . تصدق على طول . . وتاخذ لها نقاب مقري فيه بعد !
لكن بالنسبه لي . . اقول الحمدلله ان اهلي مو من النوع هذا من الزباين . . يأيدون رايي تماما . . وعارفين انهم نصابين . :)
ماتلاحظون اني زودتها على النسوان اليوم ؟
بس نمون ان شاء الله . . منكم الأم والأخت والزوجه .
سعد الصميل
13-04-2011, 04:36 AM
فيه نوعيه من الناس يحب يكون الاول بكل شي . . وهذا شي حلو
لكن فيه نوعيه من الناس يزودها بالسالفه هذي . . ويحب يسوي مثل البزران ويقول
اناااااا الاول . . !
هذا دايم يكون في نظره ان الشخص الاخير هو أم العيال . . !! :)
مافهمتو ؟ اوكي الشرح آتٍِ :
تكون تسوق وهو يمشي قدامك تبي تطوفه بالسياره . . يدوووس مايبي يكون هو اللي وراك . . مع انه كان خوش ولد بس أزمة انا الاول لحد الآن وياه !!
الامثله تكثر . . بس اللي بوصل له ان النوعيات هذي لازم بجد يراجع طبيب نفسي . . لأنه بيشوف نفسه في يوم من الايام مرغما ً . . أم العيال !
سعد الصميل
13-04-2011, 04:41 AM
وفيه ناس وهذي النوعيه نادره بس موجوده . .
يكون صديقك بالطفوله . . وتحبه وتحب سوالفه . . تكبر يكبر معاك !
ويزيد حبك له وقربك منه . . لكن بعد ماتوصلون لسن معين . . خلونا نقول مثلا 18 سنه . .
تشوف نفسك وصلت 20 وهو لحد الآن سوالفه بعمر 18 . .
يصير عمرك 23 . . تلاحظ ان الشخص لحد الآن مقاوم بنفس المرحله التفكيريه للعمر ذاك !
تتزوج ويجيك عيال . . وهو نفس المخ . . علق عنده مستوى التفكير على المرحله ذيك مسكين ! :)
بالاخير تضطر انك تترك الشخص لأنك راح تتفشل من علاقتك معاه لأنك ماتبي احد ينقد عليك . .
لكن . . . .
من تتذكر الماضي وياه . . تقول الله يذكر فلان بالخير ياحلو صداقتنا يوم كنا صغار !
سعد الصميل
14-04-2011, 01:57 AM
ادري انكم تنتظرون الهمهمات . . .
<< اقول لا يكثر بس ثم يقلبون عليك صدق , صدقت نفسك والله انك مهم ؟ :)
ماعلينا . . عطوني شويات وان شاء الله نتهمهم معاكم في ذالليله الغباريه .
سعد الصميل
14-04-2011, 03:40 AM
بسم الله . . رجعنا لكم ووحشتونا والله . . مبطين ماتهمهمنا معكم . .
بالكويت فيه شي حلو جدا يمكن اكثر الناس مايطري عليهم الا بعد ماتركز عليه . .
انك تقوم لو كانت الساعه مليون بالليل كل شي فاتح بوجهك . .
تبي مطعم , كافيه , سوبر ماركت , مصبغه , الكترونيات , حلاق , بنك , اتصالات . . . الخ
في اكثر الديار كل شي يسكر . . واذا كلش كلش فتحوا لك سوبر ماركت 24 ساعه . . وتلقاه واحد بالمنطقه كلها . .
بس بالكويت . . وصلت فينا حتى المستشفيات تفتح بالليل ! :)
اذكر كنت اسولف مع اجنبي برا الكويت عن هذا الموضوع . .
قالي : يا إلهي . . ما اروع الحياه في بلادكم ! :)
قلت : انك صادق !
سعد الصميل
14-04-2011, 03:50 AM
تكلمت عن نوعيات من الاشخاص . . لكن فيه نوعيه من الناس هذا متاكد انكم كلكم مواجهينه . . لأنه منتشر بكثره عندنا ولله الحمد :)
النوعيه هذي . . ببساطه . . ابو العريف !
انا اللي اعرف كل شي . . انتو ماتعرفون شي !
تسأل عن كل شي . . لازم يدخل بالموضوع حتى لو كان مايعرف اي شي عنه . . !
هذي النوعيه يوم كان بزر كان مبقط . . ومخلى على كيفه . . بس اهله حسوا بمعاناته يوم كبر . . حسوا انهم ظلموه بالتربيه :)
متفقين معاي صح ؟
سعد الصميل
14-04-2011, 04:12 AM
بالهمهمه هذي بصير من دعاة الحكمه . . يعني بفيدكم في كلمتين من القلب .
يقدرون وانت ماتقدر . . . مهوب لأنك ردي . . ابدا . . لكن لأنك عاجز عن فعل الشيء !
بإختصار . . . ؟؟
اسوء شعور قد ينتابك .. حينما ترى نفسك عاجزا عن عمل أمر يستطيع الآخرون فعله بسهوله . .
شرايكم .. اصلح اصير مؤلف امثال وحكم صح ؟ :)
سعد الصميل
14-04-2011, 04:18 AM
فيه ناس ودك تعرف ليش عايش . . ولشنو عايش ؟ :)
مهمته في الحياة الكره . . اذا تذكرون اللي بالسنافر كان يقول انا اكره ..
صاحبنا اللي اقصده مثله بالضبط . . يكره بدون سبب . . دايم يشوف في نفسه نقص .
واذا شاف اي شخص تميز بأي شي حتى لو كانت صنعه !! كرهه علشانها !
الشخص اللي كذا . . ياجماعه ادعو له بالشفاء لأنه بالفعل مريض نفسي :)
بكره اخاف يرقد ويقوم يلقى نفسه كره نفسه !!
يصير ؟
سعد الصميل
14-04-2011, 04:25 AM
اوو ياجماعه . . . فيه شخص او نوعيه بتكلم عنها . . .
هالنوعيه عاد حفله . . وفله . . وفلم . . استمتع اذا قعدت معاهم هالنوعيات . . :)
اللي اذا سولف . . والله دق علي فلان << وزير . . وتعشيت عند فلان << رئيس وزراء . . ورحت انا وفلان << وكيل وزاره . .
والاحلى من هذا كله انك تعرف الشخص عدل انه ماعنده ماعند جدتي :)
بس المتعه وين تكون ؟ انك تخليه ياخذ راحته ويدخل جوه . . علشان انت تستانس اكثر !
سعد الصميل
14-04-2011, 04:36 AM
ودكم اغير عنوان موضوعي . . الى ( النوعيات ) ؟ :)
فيه نوعيه جديده عاد هذي ادري اني بشوف اللي بيخالفني الراي فيها . . لأننا مازلنا نعاني من نوعيات من الرجال مستوى عقولهم محدود جدا . .
النوعيه هذي قبل فتره كنت اتناقش مع شخص بكذا موضوع . . . بخصوص الاهل . . انك شنو تمنعهم منه وشنو تسمح لهم فيه . . قلت له من باب اضافة الضحكه الى النقاش . .
شكلك ماتخلي اهلك يشبكون بالنت لحد الآن . .
انصدمت بالرد اللي اهااالني . . . قال ليه شايف اهلي ( . . . . ) !!
شوف وين وصلت فيه . . انه غلط فيني انا بعد !! لأن اهلي يستخدمون النت !!
وجمع البنات اللي يشبكون بالنت كلهم على انهن . . ( . . . . ) والعياذ بالله :)
تلاقطت انا وياه بالكلام ولو اني ما ادري انه على نياته ومسكين وقالها بالغلط . . لكان هناك أمر ثاني . .
وفي نهاية الجدال اللي صار . . قلت له ابشرك ترى عندي لابتوب وعندهم لابتوب ! :)
سعد الصميل
14-04-2011, 05:29 AM
مره من المرات . . في ايام مابين الطفوله والمراهقه .. مرت عليكم المرحله هذي ؟ :)
يعني تكون شايف نفسك ان صوتك تغير وتحس انك كبرت . . وربعك فيه اللي مثلك وفيه اللي لحد الآن صوته صوت بزر ! :)
المهم . .
كنت راجع انا وواحد من خوياي من المدرسه نمشي . . قال لي . . سعد تحداني اضحك نفسي ؟
انا مصدوم . . قلت اتحداك !
قام الصبي قال ههه . . بعدين سكت . . بعدين زودها شوي وقال ههههههه . . بعدين قام يردد
هههه و هههه و هههه . . لين صارت تكبر الهههات وقام يضحك على الههه اللي قبلها !
شوي شوي . . الصبي انفجر من الضحك . . بعدها طاح على الارض من كثر ماضحك ودموعه تصب !
صدم امي اللي جابتني بدون سبب قليل الحياء كل الضحك ذا !!
بس استفدت منه درس من ذاك اليوم الين اليوم ما انساه . . .
انت الشخص الوحيد اللي تملك سعادة او تعاسة نفسك . . يمكنك الضحك في اسوء الاحوال . . حتى لو اضطريت انك تقلد صاحبنا وتضحك شوي شوي لين تضحك على ضحكتك ! يمكن فيه بعض الناس يتحكمون في امورك . . في شخصياتك . . حتى توصل بعض الناس انه يبي يتحكم في حياتك . .
لكن لا توصل انك تخلي احد يتحكم في مشاعرك !
سعد الصميل
14-04-2011, 05:54 AM
اليوم قاعد اشوف قناة الجزيره . . ومثل ماتعرفون قناة الجزيره تطلع مثل الفلاشات عن الشعوب الثائره . . مثل ماتطلع عن الليبيين وبعدين يطلع كلمة الشعب يصنع ثورته . .
المهم قاعد اشوف الثورات في كل مكان . . ماوقفت من اربع شهور . .
بعدها على طول جاء الموجز . . وقال اول خبر . . ان الشعب اليمني يظهر في اكبر تظاهره في تاريخه للمطالبه برحيل صالح . .
لحد الآن الخبر عادي . . لكن صحيح اذا قالو ان الصوره هي اللي تعبر اكثر من الكلام . .
شفت المنظر المهيب لشعب خرج عن بكرة ابيه للشارع يصيح بأعلى صوته . . ونساء واطفال على طول كيلومترات يصيحون . . يستغيثون . . يترجون صالح بالتنحي . .
قسم بالله ماقدرت اتمالك نفسي لأول مره في حياتي . . على شيء مالي مصلوح فيه ابدا . .
الثورات مو في ديرتي . . الشعب مو شعبي . . لكن المنظر كان بجد يخلي الواحد يفكر . .
واللي خلاني اتأثر اكثر . . اني كنت قاعد اكل من نعم الله الزايده عندنا . . والبنك فيه معاشي . . وقاعد في بيتي والمكيف شغال . . مع ان الجو برا غبار ماندري عنه . . فكرت ان النعمه زواله . .
وانهم ماطلعوا وتركوا وظايفهم صارلهم 4 شهور مرابطين الا الحياه الشقيه . .
الله يفك عوق كل مسلم اضطهد في بلاده . . ولا يغير علينا النعمه .
تأثرتو معاي ؟ :)
سعد الصميل
14-04-2011, 03:54 PM
انا شخص تقدرون تقولون عني متعدد المواهب !
في اول الايام حبيت القنص بالشوزن . . وصارت في جدولي اليومي اروح ارمي طيور ولا آكلها . . الله يخفف علينا الذنوب اللي ارتكبناها . . بس في اخر مره رميت منظرة السياره بالخطأ وتبت من الرمي بالشوزن ! :)
بعدها طحت في التصميم على الفوتوشوب , ووصلت لمرحلة كانت شبه احترافيه في ذاك الوقت . . 2005 تقريبا .
مرورا بطيحتي بالتصوير في 2005 بعد وحبيتها ولازلت احبها واتقنت العمل عليها ويمكن الكثير منكم شاف تصويري في قسم العدسه . .
حاليا ادمنت الكتابه او بالاحرى التهمهم . . والحمدلله رب العالمين جملنا الله في عيونكم . .
اكتشفت شي واحد . . اني اذا اصريت على الشي اتقنه . .
لكن خلونا نروح لصلب الموضوع . . فيه فايده ماديه غير المعنويه ؟
الجواب : ابدا ! :)
اتمنى لو اني ما اكون متشتت في كل الاهتمامات . . اتمنى اثبت لي على شي واحد واهتم فيه واخليه في يوم من الايام يصير حرفتي . . علشان ادخل عالم الاحتراف فيها . .
ليش لا ؟ اعرف ناس طاحو بالتصوير في وقتي والحين دخل البزنس في هوايتهم . . ليش ما اسوي نفسهم مثلا ؟ :)
نصيحه لكم . . اذا حبيت شي واتقنته . . كمل عليه واعرف تفاصيله . . وفكر انه بيوم من الايام انه يمكن يكون لك باب رزق !
سعد الصميل
14-04-2011, 04:49 PM
نرجع نتهمهم على النسوان . .
فيه كلمه دايم اسمعها من الوالده . . . ياوالله اللي ماشلتك خدامه . . والله اني شليتك على كبدي . . !!
شدعوه شايله اثقال الله يسامحش . . بزر نتفه !! << محشومه عسى الله لايخلينا منها . . ولا يحرمها من الاجر . . تعبت وربت ومايعوض تعبها لو جبت الدنيا تحت رجلها . .
ماعلينا . . نترك الكلام المثالي والمثاليات ونرجع للواقع . .
الحين في الوقت هذا المره وظيفتها بس تشيل البزر في بطنها فقط لا غير . . بعدها ترعاه وتربيه كانتي والا ميري . . الخ !
ويصير وقتها مع البزر بس اذا تبي تبوسه . . او تلعب وياه . . لا واذا تبي تبوسه تمسح خده ماتبي تبوس مكان الخدامه اللي باسته عليه ! :)
ياسلام . . على الأمومه . .
بس تدرون اللي يرفع ضغطي وشهو . .
البزر .. ! فوق هذا كله يعرف امه !! ويحبها اكثر من الخدامه . . والله ناكر جميل ! :)
سعد الصميل
15-04-2011, 02:28 PM
بسم الله وعلى بركة الله .. ابطينا عليكم اليوم
بما ان اليوم الجمعه . . والناس قبل شوي مصلين . . كنت بالمسجد اليوم وتعمقت بالتفكير بعد ماخلصنا الصلاه . .
اقول في خاطري . . ليش مايكون فيه مسجد نموذجي . . متطور بكل شي . .
يعني مثلا شنو يضر لو توزعت في المسجد شاشات كمبيوتر باللمس ويكون فيها معلومات عن المسجد او اسمه او يكون يعرض احاديث عشوائيه علشان تجذب لها الداخلين للمسجد وتفيدهم . . ووقت الصلاه تطفى اوتوماتيكيا . .
ليش مايكون المكتبه الخاصه بالمسجد كبيره وفيها كراسي فاخره ومريحه واجهزة كمبيوتر وفيه امين للمكتبه . .
ليش مايكون فيه شاشات عرض ( بروجكتر ) علشان تكون الخطب مصحوبه بالصور للشرح او لشد انتباه المصلين ؟ ترى الصوره الحين تكفي عن مليون كلمه !
ليش مايصير في المسجد ديوانيه خارجيه وتكون مراقبه . . ويكون فيها دروس واجتماعات اهل المسجد اليوميه مثل المسلمين في ايام الاسلام الاولى ؟
ليش مايكون فيه ترتيب وخزانات للاحذيه ( اعزكم الله ), واي واحد يحط نعاله في طريق الباب تحذف خارج المسجد , علشان يلتزم الجميع في خزانات الاحذيه ؟
عندي مليون ليش . . بس يبقى عندي امنيه وحده
اتمنى لو كان الاسلام هو دين اليابانيين . . علشان بالفعل بتشوفون شي مايطري على البال ولو كان حتى خيال ! :)
* التطبيق جدا سهل وماهوب صعب , المسأله ماتكلف اكثر من الفين ثلاثه بالكثير !
سعد الصميل
15-04-2011, 02:34 PM
كل ما اشبك على النت ويضيق خلقي من كثر الفراره فيه . . يطري علي شي واحد بس
اني اروح لحبيب الملايين اليوتيوب . . واكتب كلمتين بس
محمد بن فطيس . .
واستمتع في سماع اجمل قصايد قد تسمعها اذني . .
الحين بقول نقطه ادري بتقومون علي فيها . . بس خلوني اسوي مخرج لنفسي . .
كل واحد له راي صح ؟ وكل واحد حر برايه صح ؟
برايي الشخصي المتواضع .. محمد بن فطيس افضل شاعر من بدأ الشعر النبطي حتى اليوم ! :)
سعد الصميل
15-04-2011, 02:47 PM
مشكله تكون موجوده عند الكثيرين . . يكون مايعرف يعبر بطريقه سليمه !
لدرجة ان فيه ناس لو تسمعه يعبر تموت من الضحك . .
اذكر موقف قديم . . بالمراهقه . . واقف بالشارع ابي تاكسي يوقف . . المهم وقف لي واحد شباب مو تاكسي وركبت معاه . .
سولفت معاه وجبنا طاري الحياه بالمدينه والكويت . . وحياة اهل الهجر والقرى بالسعوديه . . خلوني اتحفكم باللي قال . .
قال : الكويت وناسه بس زهقه . . والسعوديه وناسه بس زهقه !
تبسمت ودريت انه خبل . . لكن بالاخير وبعد شرح مطول فهمت قصده .
ان الكويت الحياه والمدينه فيها حلوه لكن الازعاج مايحبه . . وان القرى هاديه وممتعه لكن مافيها مقومات الحياه الكامله مثل المدينه !
فـ ما طلعت معاه الا سالفة وناسه بس زهقه . . !!
مشكلة اللي مايعرف يعبر :)
سعد الصميل
15-04-2011, 03:00 PM
فيه ناس ماعنده ثقه ابدا بكل شي بلدي . . او محلي
ممكن .. براحته . . بس انها توصل معاه حتى بالاكل ؟
هذا واحد كنت انا وياه وقام خذا توست وحط فيها زبدة ومربى . . صدمني ذوقه بس مانزرته . .
كيفه ياكل اللي ياكل . . قالي تبي ؟ قلت الله يديم النعمه . . زبده ومربى !
رده كان تحفه . . بالعكس هذا الامريكان مايتريقون الا كذا . .
طيب ياحلو والامريكان ماياكلون خنزير ؟ ماياكلون بلاوي زرقا ؟ روح قلدهم !
انا فهمت شغلتين . . يا انه مايعرف يبرر سبب اختياره , يا انه مسكين ومن النوع المتأمرك . .
وذولا كثيرين للأسف . . حتى لو تلبس بلبسنا الوطني وسوا عاداتنا . . لكن يبقى حلمه الابدي . .
انه يصير امريكي بكل شي . . فــ الله يعقله علينا ويفكه من امريكا :)
سعد الصميل
15-04-2011, 03:11 PM
فيه ناس يتم تقبلهم من الجميع بكل شي . . وناس صعب احد يتقبله لو وش يسوي . .
الاول لو تكلم الكل ينصت . . الثاني لو تكلم محد يلتفت !
الاول لو فعل الكل يتابع . . الثاني لو فعل الكل مطنش !
الاول لو سوى شي حلو الكل يصفق له . . الثاني لو سوى نفس الشي القليل يشجعونه !
الاول لو لبس شي صار موضه . . الثاني لو يلبس احدث موضه مادروا عنه !
الاول لو يخطي قاموا الناس يهدونه ويطبطبون عليه . . الثاني لو يخطي كل الناس قامت عليه !
الخ الخ الخ الخ الخ الخ ..
بإختصار . . الاول اعطااه الله محبة الناس . . والثاني حرمه الله من هالنعمه !
الله يجعلنا ممن رزقهم الله حبه وحبب خلقه فيه . .
سعد الصميل
17-04-2011, 02:39 AM
احيانا . . تشوف واحد بعمرك لكن تكون مصدوم من مستوى تفكيره . . وتقول . . مسكين . . وعسى الله يعوضه عن هالمستوى في التفكير . . والعقليه التعبانه . .
لكن احيان اخرى . . تشوف واحد اصغر منك بالعمر بواجد . . وتقول . . عسى الله يستر عليه . . وبعقله يهنيه . . ويكفيه من عيون خلق الله . .
الناس انخلقوا كذا . . يجي واحد ملك من المناصب والمال الشي الكثير . . لكن مستوى عقله مايسرك حاله ! وناس يكون بسيط وعاش بيئه بسيطه . . ويمكن يكون ماوصل مراحل متقدمه في التعليم . . لكن يحسدونه الكثير على مستوى عقله ..
ليش اشرح لكم ؟؟ انتو عارفين الموضوع اصلا . . . وهذا حال الدنيا . . ملخبطه بأمور الواحد مايحصيها ! :)
سعد الصميل
17-04-2011, 02:44 AM
ادري اني دائما ازعجكم في اختراعاتي اللي تجي من التجارب اللي شفتها وعشتها . . :)
احد اكتشافاتي الجديده . . ان المجرم , او النذل , او الحقير . . او الشرير بشكل عام . .
شخص ذكي !! تخيل بينك وبين نفسك شرير غبي . . مايصلح !
والاكتشاف الثاني . . ان الشرير دايم يستخدم الناس الأغبياء لتخليص مهماته !
طبعا ما استنتجته . . لأن الناس اصلا من قبل الاكتشاف هذا يسمون المسكين طيب . . والطيب مسكين . . يعني في كل الحالات مايكون غبي شرير . . ! :)
طبعا لكل قاعدة شواذ . . واكيد فيه شرير غبي لكن مستحيل يكون شرير ناجح . . !
اتحفتكم صح ؟
سعد الصميل
17-04-2011, 02:53 AM
سؤال لنوع خاص من الناس . . وهو النوع المتقيد بالتقاليد الى حد بعيد . . وانا منهم للأسف ! :)
جربت مثلا انك تلبس سبورت وتروح تلعب بولينج ؟ أو بلياردو ؟
طبعا التجارب كثير وماتوقف على صالة بولينج . . وطبعا اقصد ان تجربتك تكون في حدود الاداب العامه . . يعني ما تروح صالة من الصالات المشبوهه . . يعني مثلا عندك اللي في المجمعات الكبار مثل 360 !
المقصد من السالفه مو مشتهي العب بولينج . . المقصد جرب تحرر نفسك من بعض القيود . . لو ليوم بالشهر . . الروتين يسبب الملل . . غير وجرب ! :)
سعد الصميل
17-04-2011, 03:02 AM
في سنة 2006 كنت انا وواحد من الربع في الصمان . . وضيعنا المكان اللي نبيه وشفنا هجره بعيد . . جيناها افترينا عسانا نلقى احد ننشده . .
ومالقينا الا بزر عمره 10 سنوات تقريبا . . سألناه وين المكان الفلاني . . قال والله ماادله . . لكن اقلطوا حياكم . . القهوه . . ابوي جاي بعد شوي وبيعلمكم . . شفت خويي وابتسمت . . قلنا له لا هنت . . حنا مستعجلين . . ورحنا . .
قلت لخويي بعدها . . شرايك ؟ لو انك بتروح لواحد من عيال المدن عندنا بالكويت . . وحتى لو كان ولد اصل وفصل . . صدقني نادرا منهم اللي يكون واعي على العاداتصح . . واذا نشدته بيقولك . . هااه ؟؟ . .
. . .بإختصار اللي اقصده ان اطفال القرى هناك فيهم فطنه وسرعة بديهه زيد عليها انهم تربوا على الشي هذا . .
واطفال المدن وخاصة عندنا بالكويت . . تأثروا بشكل كبير . . بـ البشر اللي خالطوها . . مثل الهكره والعجم . . وطبعا ماننسى دور العجم الكبير في انحطاط المجتمع واخلاقياته . . تكلمت عنهم في همهمه قديمه :)
سعد الصميل
17-04-2011, 03:11 AM
قبل يومين كنت مع واحد من عيال عمي طالعين الظهر . . . ومرينا الفحيحيل نبي نتغدا في مطعم . . قال نبي نجرب اللي في البرج الأخضر . . قلت توكل على الله . .
نزلنا وصلنا عند الاصنصير . . نقرأ اسماء المطاعم والحارس موجود . . قلت له الاول كافيه والثاني هندي والثالث مدري وشهو . . تبي نشوفه ؟
تدخل الحارس وقال لا دا خاص للنباتيين . . . قال ولد عمي . . يعني بيربح اللي فاتح حق النباتيين ؟؟ من كثرهم ؟؟
قلت له . . لا تحاتيه . . المعقدين واجد ! :)
الحارس قام يضحك بهستيريا . . وقال واللهي كلام سليم . . اصلا مش حتلاقي كرسي !
صعدنا بالاصنصير . . وقصدنا مطعم المعقدين . . وبالفعل كان المطعم مليان عن اخره !!
بس الحلو بالموضوع شنو ؟ الجرسون اول ماشافنا داخلين . . قال انتا يبي مطعم دور ثاني . . يعني يدري اننا مستحيل نكون من ربعه :)
المغزى من الموضوع . . المعقدين في الدنيا واجد . . وهالنوع بدأ ينتشر بالكويت بعد !
يعني يتركون انعام الله ويبون يعوضون نقص اللحوم في حبوب وعلاجات . . طيب وش اللي حادك يالطيب !!
سعد الصميل
17-04-2011, 03:23 AM
بتكلم عن شغله . . واتحداكم اذا مامريتو فيها . . :)
احيان تفكر في امور او مصالح معينه . . وتكون متأكد انك بتكون صاحب السبق فيها . .
وتقول بينك وبين نفسك انك بتطلع في الشي هذا طلعه . . .
لكن تضطر انك تأجل ذالعمل فتره . . .
لكن . . . تنصدم بعد التأجيل ان فيه شخص ثاني طبق الفكره وخلاها واقع . . !
وانت قعدت في احلامك . . ومت قهر . . صح ؟ :)
سعد الصميل
17-04-2011, 03:29 AM
مع ان الجنسيه مجرد اوراق تثبت انتماء الشخص للبلد . . لكن ماهي اثبات مستوى فكر او نظام الشخص . .
لكن مع هذا . . . هناك تساؤل .. ليش عندنا نظره نتفق عليها بشبه اجماع عن بعض الجنسيات ؟
ليش في نظرنا إن . .
المصري نصاب ؟ الهندي غبي ؟ البنغالي مجرم ؟ الامريكي بطران ؟ البريطاني عملي ؟ الياباني دقيق ؟ الباكستاني جلحوطي ؟ السوري متلاعب ؟ الفلسطيني يسوي كل شي علشان الفلوس ؟ المغاربه حراميه ؟ اللبناني كشيخ ؟
والتركي حلاق ؟ :)
سؤال ينتظر الاجابه !
سعد الصميل
17-04-2011, 11:36 AM
في السنين السابقه . .
كان فيه نسبة مئويه لها تعريف خاص . . يسمونها نسبة الروؤساء العرب !
هل تؤيد بقاء حافظ النعجه<< اسمه الحقيقي قبل لا يغيره ويصير حافظ الاسد على غفله :)
كانت النسبة 99.9
تؤيد صدام ؟ كانت نفس الرقم . .
الشريف فيهم حسني مبارك بالتسعينات . . جاب نسبة 99.7 !!
لكن الحين .. بعد الثورات . .
اتوقع النسبة صارت بنفس الرقم . . .
لكن معكوس بالنتيجه ! :)
سعد الصميل
18-04-2011, 03:01 AM
من انعام الله علينا . . تطور الطب بشكل خيالي . . وكل سنة يتطور دبل !
اعطيكم مثال ؟
يعني تخيل يقولك فلان مات .. تسأله عن سبب الوفاه .. يقولك والله جاه مغص ومات .. تتخيل ؟ :)
ترى قبل تطور الطب فعلا كانت النزله المعويه تقتل بعد ماتصيب الشخص اكثر من 3 ايام !
الحين روح المستوصف تاخذ درب , وعلاج .. ووضعك بالسليم !
الحياه صارت سهله . . بفضل الله .
سعد الصميل
18-04-2011, 04:43 AM
تختلف مفهوميات الاشياء عند الناس اختلاف كبييييير !
يعني شي تشوفه انت كذا , وشخص ثاني يشوفه كذاك .. !
مافهمتو ادري .. طيب اعطيكم مثال صغير ..
من اكتشافاتي المذهله .. اكتشفت إن ..
فيه ناس يشوف ان الخروج في يوم ممطر بدون مظله مخاطره . . . !!
وفيه نوع ثاني من الناس يشوف ان القفز بالمظله من الطياره متعه . . !!
ناس تحسب السخافات من المخاطرات , وناس تحسب المخاطرات ممتعه واحتسابها مخاطره من التفاهات !
والا ؟ :)
سعد الصميل
18-04-2011, 05:15 AM
بما اني تكلمت عن النسبه 99,9 % حقت الرؤساء العرب . .
خلونا نتكلم عن النسبه والرقم هذا . . انتو تشوفونها كافيه وتكون انجاز النسبه هذي ؟ والا لازم 100 % ؟
اللي يشوفها كافيه غلطان . . !!!
لأني بحسب معلومه قديمه جدا في ذاكرتي .. من سنة 2001 تقريبا .. تقول إن مطار شيكاغو في امريكا بروحه في ذيك السنه كان يوميا يكون فيه عدد 1000 حركة اقلاع وهبوط . . وتكلمت المعلومه عن ان هذه النسبه غير كافيه ابدا !
يعني لو 99,9 كافيه . . كان بمعدل كل يوم طايحه طياره في ذاك المطار بروحه ! :)
لا تستهينون بالعــُــشر .. ترى الجبال من الحصى !
سعد الصميل
18-04-2011, 05:46 AM
اعترف بأني مدمن . .
مدمن بالتفرفر بين المحطات الاذاعيه اذا كنت بالسياره . .
مره اذاعة الكويت , مره البي بي سي , مره مارينا , مره سوى . . . الخ
بالنسبه لي , ونعم الادمان ! :)
ياجماعه , انصحكم بالاذاعات . . لأسباب كثيره . . اولها . . انها تزيد محصلتك الثقافيه . . وثانيها انها تخليك مع الحدث داائما !
الى متى والراديو حكر على الشيبان ؟ خلونا نزاحمهم شوي !
سعد الصميل
18-04-2011, 06:26 AM
من التطورات اللي صارت بالدنيا . .
تقعد من النوم , تسدد فاتورة تلفونك , تقرأ الجريده , تتصل , تسدد لك فواتير واقساط بالبنك وغيره , اذا انت راعي اسهم تشتري وتبيع , تقرأ رسايلك . . . . الخ
كل هذا تسويه اول ماتقعد من النوم . . بالنت او بالايفون حق اهل الايفون !
والله الحياه صارت فله . . ! :)
بس تدرون .. مع انها فله . . بس صارت تخلع !
الله يستر من التطورات الجايه بعد . .
سعد الصميل
18-04-2011, 07:15 AM
قبل التطور والتكنلوجيا . . كان فيه امر عند اغلب الناس . .
تفتح بوكه .. وتلقاه حاط داخل البوك الف مليون صوره . .
صورة لـ أبيه , لـ اخيه , لـ واحد من اقوى عيال الجماعه !
وعاد الله اعلم بالنيات . . كلن كان يحط صور اللي يعجبونه . . :p
بعدين جات رحمة من الله . . ونزلت التلفونات المطوره اللي تصور وترسل وتحفظ . .
وخف العناء البوك المغلوب على امره من صور عيال الجماعه . . :rolleyes:
سعد الصميل
18-04-2011, 09:36 PM
همهمات المساء وقبل النوم الاضطراري المبكر . .
في ايام الطفوله . . الكل يتابع الرسوم . . لكن فيه فرق
بين الماضي . . والحين . .
قبل كانت الرسوم تطلع في وقتين فقط لا غير . . الصبح و الظهر او العصر اذا تأخرت . .
بالليل ورسوم ؟ كانت ضرب من الخيال ! :)
لكن قنوات الرسوم اللي طلعت الحين بعضها 24 ساعه . . قامو يقدرون البزران المتمردين !
اعرف واحد يقول اول مافتحت قناة سبيس تون في سنة 98 او 99 . . يقول صاحبنا
تصدق اني وقتها عمري متعدي العشرين . . وصرت اتابع سبيس تون . . سألته عن السبب . .
وكان الجواب منطقي . . . قال . . أعوض النقص اللي عشته بطفولتي مع الرسوم !
:)
سعد الصميل
19-04-2011, 11:57 AM
احساس جميل انك تقعد الصبح وتروح الدوام شبعان نوم . .
والاجمل انك تفتح الهمهمات علشات تتهمهم على خلق الله . .
لكن فيه شي يغث . . انه يجيك شغل يخليك ماتشوف الجهاز الا مره وحده
خلال وقت الدوام كله !
هذا طبعنا , اذا داومنا ماننجز , واذا انجزنا نتشكى !
الى متى وحنا شعب كسول ؟ ويبي كل شي بالسهاله ؟
سعد الصميل
19-04-2011, 12:05 PM
على طاري الدوام . . في الكويت . .
ياجماعه . . ليش حنا متخلفين عن العالم في نظام العمل وانجازه ؟
اتوقع لو يجي ياباني او كوري ويشوف نظام العمل شلون ماشي عندنا , ينتحر !
لحد الآن نستخدم الطريقة الحجريه في العمل , الاوراق والاقلام والحبر والكربون والملفات المكدسه والدباسات والخرامات والصمغ والمقص واللزاق والظروف والسجلات ... الخ
في كل سنة يتكدس عندنا في عملنا بس اكثر من 50 ملف مليان اوراق ما لأمها داعي !
ولو بتاخذ الاقلام والورق اللي استخدم والملفات وعددها والجهد اللي صار عليها , اتوقع انها تتجاوز قيمة الاجهزه الموجوده عندنا اللي مانستخدمها الا في النت وطبع ملفات محدوده !
واصلا لو تجمع الحروف كلها اللي انكتبت بتنصدم بشي جديد . .
اتوقع ان فلاش ميموري مساحته 4 جيجا حجمة مايتجاوز ربع اصبع الخنصر للشخص العادي , كافي لحفظ المحرقه هذي كلها بدون تكديس ! :)
ودي الحق على التطور قبل مايحوشنا التقاعد . . ابي احس اننا تطورنا !
وبس ,
سعد الصميل
20-04-2011, 01:39 AM
ببدأ همهماتي اليوم عن احداث صارت اليوم . . :)
وانا طالع من الدوام الظهر . . ماشي في أمان الله على الخط . . والراديو يصدح . .
قدامي سياره . . انتظرت السياره تفتح لي الطريق . . وانا في وقت الانتظار . .
طلع في وجهي قطع اوراق صغار و وااااجد . . .
تتوقعون حفلة عيد ميلاد ؟
لا ابدا . . هذي وحده كانت راكبه مع السايق . . وكان معاها اوراق مراجعه الظاهر وشقتها قطع صغار . . وحذفتها بالشارع قدام خلق الله !!
يا إلهي ! الى الدرجه هذي حنا وصخين ؟
لا لا صدق ياجماعه . . الموضوع هذا يطول فيه الكلام . . ناس واجد عندنا مايحترمون الشارع ولا النظافه . . فيه ناس عادي عنده يحذف قزازة كولا وهو يمشي بالشارع , يحذف وجبته اللي توه عالفها من المطعم , يحذف كلينكسات , عادي تشوفه حاذف عطر توه مخلص . .
متى نحترم الشارع ؟ متى نصير نظيفين ؟ :)
يابعد راسي انت وياه . . النظافه مو بس بالثوب والا باستخدام اللوشنات !
والا تدري ؟ ؟ ياعمي دعايات التلفزيون اذكرها من قبل الغزو وهي توصي حافظ على نظافة بلدك . . مافادت معاك . . يعني انا بفيد فيك بهمهمة ؟ :)
سعد الصميل
20-04-2011, 01:49 AM
طيب وهذي بعد صارت اليوم . .
العصر انا والاهل في الافنيوز . . . لفتوا نظري اهلي على بزران عددهم 3 . . . ومعاهم أمهم . .
لحد الآن الوضع تمام مافيه شي غريب . .
الغريب ان كل بزر فوق راسه فلبينيه . . يعني اصبح 3 بتشا و 3 خدامه :)
والاغرب انك تشوف ديفيد بيكهام وزوجته فيكتوريا اللي ثروتهم تجاوزت 350 مليون جنيه استرليني على حسب علمي اللي وصلني قبل 6 سنوات . . يعني اكيد اندبل المبلغ ..
واعتقد عندهم نفس العدد من الاطفال . . 3 :)
ماعمري شفتهم طالعين وياهم خدامه وحده !
لا جد مشكلة العرب . . وجيه فقر دايم . . يحسبون المظاهر هي اللي بتبين طبقتهم ورصيدهم . .
اللهم لك الحمد يارب على نعمة العقل . . :)
سعد الصميل
20-04-2011, 02:13 AM
برضوووو اليوم . . استمع في برنامج منوع بالاذاعه برضووو << قايل لكم استفيدو والله ابرك لكم من الخرابيط . . وصيروا مثل الشيبان . .
ماعلينا . . المهم . .
من الاخبار الغريبه اللي قالها المذيع . . ان المدارس في ماليزيا . . حطوا قانون جديد للدرجات . . وصاروا يحسبون درجات قد تتسبب في سقوط الطالب . . وهي درجات وزن الطالب !!
يعني اذا وزنك مو مناسب تنقص درجاتك !! . . . وش السبب ؟؟
استرسل المذيع وقال : ان اخر دراسة تقول ان شخص من بين كل 6 ماليزيين يعاني من السمنه المفرطه او على الاقل زيادة الوزن بشكل كبير !!
ماعلينا . . الحين التعليق الخاص فينا . .
ماليزيا ياجماعه . . كانت بلد من افقر بلدان العالم . . الناس تموت بالجوع هناك ! :)
شوفو وين وصلت ؟ ؟
سبحان الله يارب . .
تدرون شلون .. ؟؟ اللي ماعنده مشكله يطولها معاي شوي يتفضل ويروح للموضوع هذا علشان يعرف انا شلون تعجبت وأعجبت في البلد . . وشريت كتاب خاص بالشخص المذكور بالموضوع . .
http://www.alajman.net/vb/showthread.php?t=19382
ادري هالهمهمه يمكن تكون شوي ثقيله بس والله ممتعه للغايه . . بس اذا دخلتو الرابط وشفتوا الموضوع . . راح تفهمون .
سعد الصميل
20-04-2011, 02:43 AM
بقولكم سر خاص جدا . . والدليل انه خاص جدا . . بيكون السر باللون الاحمر اللي تميزت فيه الهمهمات . . وبالكامل !!!! :)
من بديت الهمهمات لحد الآن . . واجهتني امور خلف الكواليس ماتدرون عنها . . بقولها لكم .
طبعا ولله الحمد الذي لا يحمد احد سواه , الاشادات وصلتني من كل صوب والله سواء في موضوع اوقفني او الرسايل او اشخاص واجهوني برا المنتدى . . يعني الحمدلله شي والله يفرحني اني جالس اسعدكم . . بخفة دم وبدون مسخره . . يعني خفة دم فيها لباقه . .
ماعلينا . .
قد يكون من الاسباب الرئيسيه في استمراري هو اشادتكم ودعمكم اللامحدود . .
ولكن !!!
فيه اشخاص خلف الكواليس . . بقولكم وش صار معاهم . . ولكم الحكم
واحد مرسل لي على الخاص . . كلمة من ثلاث حروف اولها حرف الخاء . .
خـ . . عليك وعلى همهماتك الخايسه !
وثاني مرسل لي . .
ابكيك يعني مسوي فيها خفيف دم ؟ !
وواحد يقولي . . تصدق انك طلعت ملحوس ؟ والله انك اللي ماعندك شغل وعقلك فارغ . . اجل كاتب 13 صفحه بس تسولف على نفسك ؟ الحمدلله على نعمة العقل . .
طبعا انا ما ازعجتني ابد الكلمات هذي . . بالعكس والله . .
زادتني همه في زيادة الهمهمات . .
وتبي الدليل انها ماهمتني ؟ انك انت وياه ياحلوين ماتكلمتو الا بعد مافحصتوا الموضوع واستمتعتوا فيه وفريتو الـ 13 صفحه كامله . . ولا تعبت نفسك وسويت تسجيل جديد علشان تقول رايك . .
شرفتونا ياحلوين . . وكرروا الزياره . . واذا فيه رسايل جديده حياكم الله . . ترى ما عطيت اللي تكلموا باند . . لأنه قال رايه الشخصي وفي مكان رسايل خاصه . . يعني ماتسبب بالاذي للمنتدى . . :)
والا تدري . . عندي ناس واجد يتابعون عسى الله لايحرمني من متابعتهم . .
والدليل انهم بيقيمون الموضوع :p
<< اكسروا فيه
صح ياحلوين ؟ :)
سعد الصميل
21-04-2011, 04:16 AM
لي مع البحر حكايه طويله . .
يمكن بما إني عشت بالفحيحيل , قريب من البحر . . ويمكن بدون سبب !
الوكاد ان سالفتي معه غريبه شوي . .
اذا ضقت اروح له , اذا احترت في أمر اروح هناك احسب حساباتي !
<< لكم عليه شوي . .
ماعلينا . . . الأهم إن اكثر قراراتي الشخصيه اتخذتها هناك !
يقولي واحد من الشباب . . ياخي اتضايق اذا دريت انك عند البحر بروحك . . احس انك بتتخذ قرار وتجيب العيد بنفسك . . انت سالفتك معه سالفه .
بس اليوم الحمدلله الجو فيه غبار او كتمه بالاحرى يعني مافيه قرارات حاسمه !
سعد الصميل
21-04-2011, 04:23 AM
قسم العلماء الذاكره الى ثلاث انواع . . طويلة المدى , متوسطة المدى , قصيرة المدى .
وبعد العلماء حطوا تدريبات خاصه لتنشيط الذاكره بأنواعها ..
واللي يدل ان الناس كلها تعاني من ضعف في نوع واحد على الاقل من انواع الذاكره . .
تلاحظون حتى المجعات التجاريه الكبيره , في مواقف السيارات صاروا يحطون الوان معينه لكل مكان مواقف .
علشان ماتنسى مكان الموقف اللي وقفت فيه . . ومع هذا اكثر الناس لحد الآن يعانون . .
لكن تدرون . . انا ببحث عن كتب خاصة بتمارين للذاكره . . وانصحكم فيها بعد .
عل وعسى الواحد يقدر يضبط شوي بذاكرته قبل مايخرف بسرعه !
انا شخصيا . . اعاني من ضعف الذاكره . .
وللحديث . . بقيه .
سعد الصميل
21-04-2011, 04:28 AM
لي مع النسيان والذاكره قصه اطول من قصة البحر . . !!
كل واحد لازم انه ينسى بس انا الذاكره عندي 32 ميغا . . يعني حدها ماتشيل :)
لي موقف بخليكم تغسلون ايدكم من ذاكرتي . .
مره من المرات كنت بالبيت بروحي . . وانا متعود في اكثر الاحيان اول ما اقعد اخذ لي شور . . وبعدها البس . . واولع لي كسرة عود وابخر شماغي قبل الخروج . .
لحد الآن الوضع تمام . .
في اليوم المذكور . . حطيت الفحمه على الغاز ورحت البس علشان ارجع اتبخر واطلع . .
لبست وطلعت . . رجعت البيت آخر الليل لقيت الفحمه تحولت رماد والغاز مخلص !
ماتبوني ادور لي كتب تنشط عندي الذاكره ؟؟ :)
سعد الصميل
21-04-2011, 04:59 AM
الاسم : محمد عبدالله
العمر : 25
البلد : الخليج
الهوايه : جمع الطوابع والمراسله .
من فوائد الانترنت انه ساهم بشكل كبير بإنقراض النوعية الفارغه من هالناس !
بس تصدقون ؟ ودي اعرف وش شعوره وهو حاط صورته وايده على خده وهوايته جمع الطوابع والمراسله ؟ :)
وهل هو مصدق ان الناس مصدقه ان هذي هواياته مثلا ؟ !!
الحمدلله ان العقول بدت تتطور , الحمدلله وبعدها شكرا ماما امريكا على خدمة الانترنت !
سعد الصميل
21-04-2011, 11:42 AM
سؤال يطري علي دايم :
اي موظف حكومي بالكويت اذا يبي يقدم على اجازه او اي طلب ثاني يكون بالكتاب السيد فلان المحترم بعد التحيه والتقدير . . . الخ
هذا مافيه مشكله . .
المشكلة ليش يكون دايم فيه اسلوب رجاء للمدير ؟
ليش يكون فيه اتمنى قبول , والا ارجو والا اتقدم راجيا . . . ؟؟؟
يعني حق من حقوق الموظف ماياخذه الا بعد مايترجى ؟ :)
ياخي اذا بتسافر لديره معينه وتسوي طلب الفيزا وسماحهم لك بالدخول وانت المحتاج مو هم . . يكون الكتاب تعبئة بيانات وتسجيل الطلب بدون ترجي وانكسار ؟
والا تدرون ؟ ربعنا مايفيد فيهم الا يخلون الناس يترجونهم ! :)
همهمة مفيده صح ؟ :)
سعد الصميل
22-04-2011, 01:09 AM
الحماقه . . يرتكبها الكثيرين ! :)
تتعدد النسبه , ولكن كل شخص لابد انه ارتكب في حياته احد الحماقات . .
لكن قليل من يعترف فيها . .
قال لي واحد من الشباب عن احد حماقاته يوم كان مراهق . .
يستغفر الله وبعدها يسرد حماقته . . وعسى الله يغفر له الحماقه . .
يقول في احد ايام رمضان كان قاعد الساعه 6 الصبح وكان متسحر بالليل . . يعني لحد الان الولد صايم . . يقول جاء في بالي ارتكب حماقه وافطر ولا تسألني عن السبب . . يسترسل صاحبنا ويقول . . مريت البقاله وخذيت لي عصير وفطاير وبطاط . . والايراني يطالعني بطرف عينه وكأنه يقول في ذمتي انك منت ذاخرها للفطور . . وان مدفع الافطار عندك بعد 5 دقايق . .
صاحبنا يكمل . . يقول بعد ماخذيت الاكل توهقت وين ارتكب الحماقه اللي اصريت عليها . . لين شاف له بيت ينبني ودخل فيه وراح للسطح . . واكل وبعدها دخن زقاره . .
لحظه الحماقه ما انتهت . . تدرون شنو نهاية الحماقه عنده ؟
يقول اني بعد ما كليت . . رحت البيت ونمت وقعدت على الفطور !!!
وش استفدت بالله عليك ؟ :)
الحماقات كل شخص عادي يرتكبها . . بس تختلف . . يمكن يكون مضطر . . او يكون مايعرف سبب ارتكابه للحماقه . . او لغباءه . . او حتى لحسبته جات غلط . .
الله يبعدنا عن الحماقات ولا يجعل لها عندنا نصيب !
سعد الصميل
22-04-2011, 01:13 AM
اصناف البشر كثيره . . وعاداتهم اكثر . . وقوانينهم أكثر !
ماتحس ان فيه خلل في الاختلاف الكبير بين قوانين الدول ؟
يعني مثلا في بلد لو تدعم بسيارتك كلب ( اعزكم الله ) أو قطو . . تشوف نفسك خضعت للتحقيق . . وبعدها للمحاكمه !!
وفيه دول تدوس في بطن الآدمي وتلعن والديه . . ومايجيك شي لأنه وافد وانت مواطن :)
حاجه غريبه !
سعد الصميل
22-04-2011, 01:32 AM
الصيدليات الحين غير عن صيدليات . .
قبل اذكر في كل محافظة صيدلية وحده تفتح بعد الساعه 12 بالليل !
الحين الصيدلية اللي ماتفتح 24 ساعه فيها خلل !
قبل الصيدلية مايجيها الواحد إلا اذا معاه وصفه !
الحين الصيدلية صارت سوبر ماركت حالها حال الجمعيه ومركز سلطان !
بس جد الاحظ الصيدليات الحين , اي واحد ماعنده شغل يروح يقضي وقته بين الحبوب والادويه والكريمات ! :)
حتى بضايعها تغيرت . . والله الدنيا تتطور بشكل جنوني !
سعد الصميل
23-04-2011, 01:01 AM
الهمهمه هذي عن التربيه والاخلاق . . .
<< صار واعظ الأخ . .
للاشخاص الكبار يكون الاحترام واجب , مانختلف على كذا
طيب مابالكم اذا كان الشخص الكبير عمك او خالك ؟ اكيد الاحترام بيزود !
طيب واذا كان عمك وكبير يعني لازم تناديه بطريقه فيها احترام وتقدير !
لحد الآن انا وياكم ماشين تمام . . .
بس الغير معقول ان فيه ناس ينادي عمه او خاله . . ابو فلان !! وكأنه يسولف مع واحد من خوياه ! :)
شوفو في الحاله هذي انا ارجع الشي هذا لسببين . . يا إنه الشخص مو محترم . . او انه ماتربى على الشي هذا . . وفي كل الحالتين هو يشيل الجزء الاكبر من الخطأ , لأنه يقدر يغير كلمة ابو فلان . . بــ يبه .
طيب وشرايكم اعرف نوع ثاني اغرب من النوع الاول . . .
فيه ناس يحاول يبتعد كثر مايقدر انه ينادي والده يا يـبه ! يجي يوقف على راس ابيه وبدون مايقوله يبه . . يدخل بالموضوع لدرجة انك ماتدري هو يكلمك والا يكلم ابيه ! :)
وهذي اعطيها اسباب . . يا انه من الجيل الحديث وكان ينادي ابيه بابا بعدين كبر واستحى وبطل الثنتين , او انه يستكبر الكلمه على ابيه مثلا ؟ :)
تدرون شلون ؟ الموضوع طويل مالنا فيه وفي مسائله !! اهم شي مرينا عليه .
سعد الصميل
23-04-2011, 02:38 AM
الطفوله في وقتنا . . كانت برائه
الطفوله الحين . . حنا بالنسبه لهم بريئين !!
بزران الوقت هذا الله يستر منهم . . كل شي يعرفونه . . يعني عادي يجيك بزر يتكلم عن السياسه شوي . . بزر حافظ لعيبة الكورة كلهم . . بزر الحين يعرف يلعب كوره يشبك نت يلعب بلاي ستيشن يلعب اكس بوكس عنده ايبود عنده ايميل يلعب اون لاين . . . وهو قاعد يسولف لك عن معمر القذافي شنو كان تصريحه اليوم !
الطفوله وقتنا ياحظه اللي يعرف قوانين التيل , والعنبر !
العابنا قبل مافيها ذكاء , تعتمد على القدرات الجسمانيه :)
اذا انت ايدك ثابته وتركيزك قوي تصير محترف تيل او . .
اذا انت سريع بتكون محترف عنبر . .
اذا انت ضعيف بتصير فايز دايم في لعبة الغميضه .
وللبنات اذا كانت ثابته تصير فنانه بالحجله !
الحين العابهم كلها شغل عدل وتشغيل مخ !
ياخي لا تروح بعيد , رسومنا قبل كلها ضحك ومسخره . . توم يبي يذبح جيري . . عدنان يبي ينقذ لينا . . جنقر يبي يذبح قندال !
الحين رسومهم المحقق كونان . . << طفل يحقق في قضايا قتل وجرائم !!
بإختصار . . بزران الحين معلوماتهم ومعرفتهم اكثر من الشيبان ! :)
سعد الصميل
23-04-2011, 03:17 AM
الرجال مخابر ماهم مناظر . .
الغنى غنى النفس مهوب غنى المال . .
اهم شي الاخلاق والا غيره ماش . .
الخ الخ الخ . . .
كلمات أكل عليها الدهر وشرب . . صار ما وراها اي فايده :)
بالعربي حنا في وقت . . . عندك فلوس تسوى ماعندك فلوس اكل تبن وفارق وراك ! :)
هذي همهمه اخيره وسريعه قبل النوم .
سعد الصميل
24-04-2011, 04:41 AM
ليه . . لاحظو ان كلمة ليه جات كبيره !!
ليه اذا انت مستعجل . . وماشي بالطريق . . الناس كلها قاعده تمشي على الراحه وتحس انهم متعمدين يغثونك ؟؟ ويمشون براحتهم لمجرد التغليس عليك ؟؟
ليه اذا كنت تنتظر دور في طبيب يكون اللي داخل عند الطبيب طول وخذا وقت زايد عند الدكتور ؟؟ واذا جاء دورك تحس ان الطبيب ماعطاك وقت كافي علشان تشرح مشكلتك له ؟؟؟ !!
ليه اذا وقفت عند اشاره , تشوف ان الاشاره الثانيه تمشي وتطول . . لكن اشارتك اللي واقف فيها مايمديها تفتح على طوول ترجع وتسكر !!!
ليه وليه وليه وليه . . . واجد لو بعد لكم !
لكن ابشركم . . عرفت الجواب . . .
اكتشفت . . ان الوضع هذا يتهيأ لنا . . يعني نحسه بس ماهوب واقع . . لأننا حنا مستعجلين نشوف الناس تمشي على الراحه . . لكن في وضعنا الطبيعي مايكونون كذا !
الدكتور كذلك . . لكن لأننا ننتظر . . والصبر عند بن ادم شوي مهما كان صبور ..
صحيح كلامي والا ؟ :)
سعد الصميل
24-04-2011, 05:02 AM
فيه نوعيه من الناس وواااجد .. وادري مسبقا انكم بتتفقون معي !
النوع هذا غريب عجيب . .
تشوفه محافظ على الصلاة كلها بالمسجد . . والمسواك بمخباه . . وعلى طول تشوفه يستغفر . . ومحافظ على السنن تقريبا بشكل كبير . . ويصوم . .
ماعلينا . . المهم اني وصلت لكم فكرة ان الشخص هذا ملتزم . . .
لكن تشوفه يسوي سوالف تحس ان اللي يسويها مستحيل يكون شخص ملتزم ابدا !!
يعني تشوفه عن طريق الصدفه مثلا سكران . . او تشوفه مرتكب فعل شنيع مايقبله لا عقل ولا دين !!
تدرون . . مانبي نغتابهم . . لكن جا طاريهم بالصدفه . .
بس التحليل للنوعيه هذي .. ممكن يكون انفصاااام بالشخصيه , او بالاحرى علشان نكون دقيقين . . ذولا ناس بلاهم الله وعسى الله يفك عوقهم . .
وبس !
سعد الصميل
24-04-2011, 08:17 AM
الدنيا كلها مصالح . . . وكل البشر مصلحجيين !
وانتو والله العظيم أول مصلحجيين !
:)
اذا اقول الدنيا كلها مصالح فعلا . . فهي مصالح . . حتى الولد ما يصير بار بوالديه إلا يبي مصلحه . . الانسان مايسوي الخير للناس إلا علشانه مصلحجي . . . الرجال مايحب ديرته .. اخوانه .. اهله .. عياله .. الا علشانه مصلحجي . .
من الآخر ؟؟ والله حتى اللي يصلي ويصوم ومحافظ على السنن كامله وملتزم في حياته .. مصلحجي !
الولد اللي يصير بار بوالديه , واللي يسوي خير , اللي يصلي , واللي يحب ديرته واهله وعياله . . يبون مصلحة الاجر . . ورضا الله .. ورضا الوالدين . . وحب متبادل من اهلهم واخوانهم وعيالهم . .
عرفتوا ان الدنيا كلها مصالح يا مصلحجيه ؟ :)
سعد الصميل
24-04-2011, 01:07 PM
تعرفون المصابن ؟ لا يمكن ماتعرفونهم . . خلوني اقول لكم المصابن اللي اقصدهم . .
اللي سياراتهم z والا gt والا جيب وحركات ودنيا زايده وزحف زايد . . المان العرب ومدري وش . .
الحين اعتقد عرفتوهم عدل . . .
المهم ندخل بموضوعنا . . المصابن ذولا بالنسبه لي احسن ناس صراحه !
قلوبهم عادة نظيفه . . مايفكر الا بزينة السياره او التفحيط , وعايش ليومه مايفكر ويخطط بزياده !
عادة بعد مايكون عندهم نقيده ولا يكونون مكوبرين مثل الباقين . . !
الصداقه والخوه عندهم شي مقدس بينهم وبين بعض . . والفزعه تكون من شيمهم !
مايعرفون سوالف انتخابات ويحفرون لبعض وهذا من فخذي وهذا بعيد ولازم اسحب ناس يصوتون لولد عمي والا اخي . . !
حاولت اجمع الميزات اللي فيهم . . لقيتها واجد . .
لكن مايمنع ان عندهم عيوب قااااتله . . وتسيء لسمعتهم . . وتفشل . . لكن . .
مجرد ما اتذكر الحسنات اللي فيهم . . . ارجع واقول عنهم احسن ناس . !
سعد الصميل
25-04-2011, 03:46 PM
همهمه طازجه . . ساااخنه توها صايره !
قبل شوي . . على الجو الحلو يبيلك تفتر بالشوارع بس .!
بس فيه شي خرب المزاج . . الناس مع المطر يصيرون غشيمين بالسواقه . . شفت 4 حوادث في الربع ساعه هذي بس !!
بس لاحظت شي . . حادثين من الاربعه كانو عند كاميرات المرور !
اللي فهمته الحين ان الكاميرات اللي عندنا متخلفه . . وتخلع . . ليه تكون واضحه للناس ؟ علشان يمسكون بريكات مثلا ويتداعمون ؟؟
طيب نمشيها . . بس انها تطق فلاش ليه ؟؟ للتخويف يعني والا شنو ؟؟
صراحه لازم يعيدون التفكير في ذالسالفه . . والا بضطر اني اهاجر برا الكويت !!
<< يدور السبه ؟ :)
سعد الصميل
25-04-2011, 11:33 PM
وش هواياتكم ؟
طيب . . ندري كل واحد في الدنيا له هوايه يحبها ويمارسها بشكل دايم . . وادري بعد ان فيه ناس فارغين . . وعايشين علشان ينتظرون متى يموتون وماعندهم اي هوايه . . ذولا خلونا نسميهم الفارغين . . طيب ؟
حلو . . الحين بقولكم عن ناس عندهم هوايه راح تعجبكم . . هي انتشرت في بلدان امريكا و اوروبا . . واتوقع انها وصلت الكويت . . مثل ما انتو عارفين المتأمركين عندنا كثير !
سمعتوا عن هوايه تربيه الاغنام الصنف ؟ الحمام ؟ الله يعزكم الكلاب او الجعاريه ؟ القطاوه والعتاويه ؟ وااااجد الهوايات
طيب سمعتوا عن هواية تربية النمل ؟
ترى صحيح , فيه ناس هذي هوايتهم . . !!!
يمكن تقولون ملاحيس فيهم بلا رقلات . . كيفكم . . بس انا اشوفهم من منظور ثاني . . انا اشوفهم اشخاص حساسين جدا جدا . . علشان كذا ربوا النمل !! :)
بس حلوه وش هوايتك ؟ والله ياخيك تربية النمل !
جاب طاري الهوايه ان ولدي محمد فصل علي اليوم يقولي ابي نمل ! فــ شكرا يابنيّ انك جبت في بالي همهمه جميله . .
شي جميل . . ان ولدي أول من أدخل هواية تربية النمل للكويت !!!
ههههههههههههههههههه
سعد الصميل
26-04-2011, 03:53 PM
سؤال للجميع :
وش كنت تسوي في يوم 5/5/1990 بالتحديد ؟
محد راح يذكر ادري . .
في برنامج وثائقي قالو هالسؤال لدكتور متخصص بالذاكره والمخ , وقال ان فيه ناس لكن نادرين جدا , يذكرون اليوم اللي تسألونهم عنه لو كان على بعد سنوات , ويذكرون تفاصيل اليوم !!
المذيع انذهل من المعلومه وباغت الدكتور وقال طيب هل تذكر تاريخ 3/8/1992 ؟
قال على طول : حسنا ً اني اذكر انه كان يصادف يوم الاثنين !!! كان يوم جميل وسويت فيه كذا وكذا !!
طبعا انا ماتمالكت نفسي , وبكيت من القهر ههههههه .
تمنيت ان المذيع سألني قدام الدكتور وقالي وش سويت في يوم 24/4/2011 يعني قبل يومين , لأني متأكد ان الدكتور بتجيه سكته قلبيه من النسيان عندي , وانتو خابرين النسيان عندي . . كذا مره تكلمت عنه .
مايصير اتسلف مخ الدكتور ؟
سعد الصميل
27-04-2011, 01:48 AM
فيه ناس . . يعجبه الشي اللي عندك . . او الشي اللي انت تسويه . .
لكن يأبى ويكره انه يعترف لك او يمدح الشي اللي عندك أبداً !!
وهذا طبع عادي اشوفه , لكن من غير المعقول إنك تشوفه بعد فتره من الزمن قام
وسوا التصرف اللي كان يعيبه عليك , او خذا مثل الشي اللي كان عندك , أو عمل مثل عملك ! :)
النوعيه هذي من الناس يكسرون الخاطر , واحس فيهم طبع نسوان أو غيرة نسوان بالأحرى !
طبعا الحمدلله الموقف مو صاير لي وجيت كتبت عنه , لكن احد الاوضاع الخطأ اللي انا شايفها . . واتهمهم عنها !
ماتحسون اني صاير مصلح ديني واخلاقي ذاليومين ؟ :)
سعد الصميل
27-04-2011, 01:55 AM
سؤال للجميع :
وانت طالع من الجمعيه , والهندي بس مشى بعربانة الاغراض وحطها بالسياره , اول مايحط الاغراض . . تعطيه فلوس !
وانت بالمطعم اذا كليت والجرسون جاب لك الطلب بس , تعطيه الباقي من الفلوس !
ياخي البنغالي اللي بالشوارع , بس يمر عليك ويقول سلام عليكم , تعطيه فلوس !!
لكن محد فيكم سأل نفسه , ليش مانكرر الشي هذا مع الخدم اللي عندنا بالبيوت ؟ مع انهم يخدمون اكثر من الشي هذا ؟؟ وهم اللي يستاهلون ؟؟
ممكن فيه ناس يعطون الخدم اكثر من معاشهم صدقة , لكن لو بتقارنونهم مع الجرسون والبنغالي وغيره . . بيطلعون ماخذوا منكم 1 % من اللي خذوه ذولا !
سعد الصميل
27-04-2011, 10:32 AM
همهمه صباحيه . .
وانا رايح الدوام اليوم الصبح . . كان عندي خيارين او طريقين . . واحد خابره زحمه دايم . . .
رحت للخط الثاني . . . والقهر أول ماوصلت للطريق الثاني لقيته هو المزدحم !!
طبعا حصل التأخير وبعد ماوصلنا لمكان الزحمه وشفت سبب الزحمه . . .
اتضح انه شاحنه واقفه على يمين الخط , مو على الخط ابدا ً !!!
بس علشان مثل ما انتو عارفين الفضول ياكل قلوب الناس اللي ماعندها شغل . . .
يخفف ويبي يشوف ليه الشاحنه واقفه !!!
ياخي امش يرحم امك . . عطلت خلق الله وراك !!
ماتلاحظون اللقافه عندنا زادت بالطريق ؟
لا وفيه موضه ثانيه . . تنزل عند الحادث تلقا خلق الله كلها قاعده تصور الحادث !!
وبعدين وياهم يعني ؟ :)
سعد الصميل
28-04-2011, 01:11 AM
اليوم كنت في بيتنا , وسولفت عن ايامنا , اللي كانت في منطقتنا ومدرستنا . . !!!
منطقتنا , مدرستنا , صفي , دوامي . . . . الخ
ليش عندنا صفة التملك مرتفعه ؟ :)
كل شي نتملكه بالغصب !
سعد الصميل
28-04-2011, 01:42 AM
بما اني منهك . . ومبين من الهمهمه السابقه . . :)
مافيه همهمات زيادة اليوم . . فيه صور من الماضي الجميل . . !!
http://alajman.net/up/uploads/3b6695c7c2.jpg (http://alajman.net/up/)
اهم شي اني كنت متوحش . . . بس تذكرون المساند اللي وراي ؟ :)
http://alajman.net/up/uploads/568f5ec79f.jpg (http://alajman.net/up/)
وبرضو كنت احب اسوي دانس دايم :)
http://alajman.net/up/uploads/b1a87b5d56.jpg (http://alajman.net/up/)
بس ماكنت احب احد يغصبني على الشي , مثل ما انغصبت على الصوره وبكيت !!
. .
اعتبروها فاصل فكاهي . . ممزوج بريحة الماضي ! :)
سعد الصميل
29-04-2011, 05:20 AM
همهمه للكبار فقط +18
واعدتكم قبل فتره اني ارجع واتكلم عن بعض اللي يقرون النصابين . . اللي يستغلون الدين ويبينون للناس انهم مطاوعه ويقرون على المرضى . . .
ماعلينا . . ندخل بالسالفه
فيه من ذالشله الخايسه . . ناس مشهورين . . او بالاحرى منهم واحد مشهور جدا . . ومعروف جدا عند الجميع تقريبا . .
كبسوا عليه المباحث قبل كم شهر . . ولحسن حظه ماكان موجود . . وكان موجود المناديب اللي يقرون بداله في حال غيابه . . وكانت الطامه الكبرى !!
والله ياجماعه . . لقوا في تلفوناتهم صور بنات خالعه . . طبعا مو بنات اجنبيات من النت مثلا !! :)
لا بنات غرروا فيهم وهددوهم من بنات خلق الله اللي يقرون عندهم !
والطامه الأكبر . . . لقوا في نفس البيت غرفه متطرفه . . فيها سرير وكبت صغير . . مليان ملابس داخليه نسائيه !
والله ياجماعه ماجبت السالفه من مخي . . هذا واقع وصاير . . !!
وللأسف تدرون وش اللي صار ؟؟
لحد الآن الشخص يقرى وكأن مافيه شي . . تدرون ليه ؟؟ لأن دخل بالسالفه راس كبير وفكه منها ! :)
الواحد وش يحكي وش يقوول بس . . الله يستر عورات المسلمين يارب ويستر عليهم وعلينا . .
هذا همهمه تضيق الخلق صح ؟ :)
سعد الصميل
29-04-2011, 07:11 AM
اليوم الجمعه . . 29 ابريل 2011
فيه حدث بيصير . . مع اني اشوفه عادي . . لكن الناس سوت منه حدث فريد !
الامير ويليام , ولد ولي عهد بريطانيا بيعرس اليوم . .
يقولون بالاخبار انهم يتوقعون عدد 2 مليار مشاهد حول العالم !!
اللي يسميه زواج العصر , واللي يقول زواج اسطوري . . . لكن في النهايه يبقى عرس !!
وادري ان اكثر الناس ينتظرونه بشغف يبون يشوفونه !!
عن نفسي . . . اتمنى ويليام يكسر باللي ينتظرونه صارلهم شهر . .
ويجيب فرقة دسمان وطيرانهم , و 10 خرفان . . ويخلي العرس خفيف ولطيف . . :)
ملاحظه / انا متأكد ان فيه ناس كثيرين . . ماكانو يحطون المنبه يوم الجمعه على الساعه 11 علشان يذكرون الله . . ومتأكد اكثر ان فيه ناس اكثر بعد اليوم حاطين المنبه الساعه 10 ونص علشان يشوفون عرس ويليام وكيت ميدلتون !
توافقوني ؟
سعد الصميل
30-04-2011, 04:01 AM
احيان . . الواحد وده يصير بزر !!
لحد يفهمني غلط . . بشرحها لكم بشويش . .
مرات الواحد وده يطامر , يربط ثوبه ويجري بدون مايوقف , ومرات وده يتطارح مع خوياه !
شوفو . . هي مو الى هالدرجه :)
بس فعلا مرات يجي الواحد احساس انه وده يتحرر ويتمرد على الروتين اللي عايشه . .
اعتقد ان التحرر اللي بيصير خلال دقايق راح يفك ضغوط نفسيه على الشخص !
عاد تصدقون فيه تمارين تفك الضغوط . . انك تدلّي ايدينك وترخي لسانك وعضلات وجهك وتقعد تحركها . . بإختصار اللي يشوفك تسويها بيحب ايده ويقول الحمدلله والشكر ! :)
لكن مع هذا . . تفك ازمات نفسيه !
ودي اجرب بس خايف يكبس علي احد ويمسكها علي . . ماتسوى :)
سعد الصميل
30-04-2011, 04:09 AM
ليش اي واحد اول مايعرف النت يصير مدمن ؟
ويقابل الجهاز 24 ساعه , وكأن الجهاز بيطير منه ؟ :)
كل ما اذكر بداية دخولي للنت وادماني عليه . . اضحك على ذيك الايام . .
اذكر مره من المرات . . دخلت الكافيه وانا كنت نعسان . . شبكت . . . وماحسيت الا الهندي يقومني . . يقول بابا روح نام . . انا بكره مفتوح مافيه سكر !!!
تهقون نقدني ؟
هههههههههههههههههههه
بس جد . . سوالفي في بداية الادمان وااجد . . بجيب لكم منها قريب ان شاء الله . .
تعرفون احد تعلم النت وما أدمن اول ايامه ؟ :)
سعد الصميل
01-05-2011, 03:03 AM
ودي اتهمهم اليوم . . .
بس ودي ارقد . . ورانا دوام . .
ولا تحاتون . . بنعوضكم بكره بهمهمات اضافيه ان شاء الله . .
وودي اطلبكم طلب , اذا فيه شي مو عاجبكم في الهمهمات او اني قايل شي مو زين فيها . . بلغوني . . تراكم انتوا اللي تلهموني بمتابعتكم . . وتخلوني اتهمهم والسوالف ماتخلص :)
خاص / فيه ناس متابعين بصمت ماندري عن رايهم بالهمهمات , عسانا نرضي الجميع :)
الى اللقاء بكره ان شاء الله , وبهمهمات إكسترا . .
تصبحون على خير .
سعد الصميل
01-05-2011, 03:11 PM
مع ان المزاج اليوم متقندر على قولة العراقي . . . لكن وعدناكم بهمهمات اكسترا امس . . ولازم نوفي :)
قبل شوي وانا راجع من الدوام . . قاعد اسمع المرينا fm برنامج الديوانيه الفاشل . . انحديت عليه :)
المهم كان موضوعهم الريجيم . . وقاعدين يتكلمون عليه وشلون ومدري وش . . والمسجات توصلهم مليون رساله . . .
ماعلينا . . اللي فهمته . . ان ثلاث ارباع شعب الكويت قاعدين يسوون ريجيم :)
والمشكله اننا قاعدين نشوف العكس ! الثلاث ارباع الشعب علّيفه . . وعدد الاكياس والوجبات اللي في شارع المطاعم تشهد ! وعدد المطاعم يشهد !
مشكلتنا . . اننا نبني شحوم طول عمرنا . . عشرين ثلاثين سنه . . وبعدين نبي نطيرها في اسبوع !!
يااااخي منطقيا ماتصير الحسبه هذي !!
بعدين ماتلاحظون اننا فسقنا ؟ في الكويت نبتعد عن الاكل مختارين الفعل هذا لعيون الرجيم , وفي دول ثانيه مبتعدين عن الأكل غصب عنهم لأنه بالأساس مو موجود عندهم !!!
نرجع لحبايبنا , ياخي انت مسوي ريجيم , اصبر , تحمل , اخذ وقتك الكافي . . مو في اسبوع بس !
وبعدين مايعجبني . . الا اللي ياكل مفطح ويشرب دايت . . اموووت على الرجيم :)
سعد الصميل
01-05-2011, 03:44 PM
كل ماتقدم الوقت زادت الدنيا تعقيد . . . وصار فيه اشياء ماكنا نحتاجها الى حاجات يوميه !
واشياء كنا نستخدمها كـ إكسسوار او شي ثانوي وصارت الحين مهمه وضروريات !
مثلا . . التلفون النقال . . بدايته كان اكسسوار او حاجه ثانويه . . الحين صار من اساسيات الحياه !
لدرجة ان فيه ناس يحطونه مع قائمة اساسيات الحياه الرئيسيه ( أكل - شرب - نوم - فلوس - لبس - تلفون ) !
طيب برضو النت مثل السالفه . . بدايته عندنا طبعا اتكلم . . بدايته كان مجرد تسليه . . بعدين تحول الى شي ثانوي . . بعدها وفي الوقت هذا . . صار من اساسيات الحياة !!
اشياء كثير عندنا تغيرت الحسبه معاها مع الوقت . . واشياء اكثر استغنينا عنها !
حتى بالنت نفسه . . اذكر اني كنت معذب نفسي كل فيديو يعجبني اخزنه . . وثقل الجهاز . . بس طلع اليوتيوب ! . . تم الحذف لجميع الفيديوات :)
الموضوع شائك . . يبيله همهمات ثانيه . . وحده ماتكفي !
سعد الصميل
02-05-2011, 12:51 AM
ممكن يكون عندك فلوس . . بس تعاني نقص في الصحه !
يكون عندك فلوس وصحه بس تعاني . . . نقص عقل !
يكون عندك فلوس وصحه وعقل . . وتعاني نقص شخصيه !
يكون عندك فلوس وصحه وشخصيه حلوه وعقل . . وتعاني نقص ثقه !
فلوس وصحه وشخصيه وثقه . . بس تعاني نقص حظ !
وممكن كل ماسبق . . بس تعاني نقص دين !!
كل شخص بالدنيا يعاني من نقص في شي معين . . نقص فلوس , نقص صحه , نقص حيله , نقص شخصيه , نقص ثقه , نقص عقل ! . . . الخ
لا تفتكر انك بتملك الدنيا وبتكون كامل . . . الكمال لله وحده !
شرايكم فيني وانا اعطي مواعظ ؟ :)
سعد الصميل
02-05-2011, 12:56 AM
كل شي يتغير معاك وانت تكبر . .
قلت قبل في همهمه قديمه . . اول شي يتغير القناعات . .
يمكن يكون تغير القناعات اهم التغييرات . . لكن فيه تغييرات كثيره . .
نجيب منها شوي والا مالكم خلق ؟ :)
طيب خلاص . . بنجيب . .
كل ماتكبر تتغير قناعتك , اهدافك , تفكيرك , ذوقك , نظامك في الحياة , سلوكك . .
بس احرص على انه ماتتغير اخلاقك الى الأسوء . . ترى صدق النكته المتداوله واقعيه . . يبقى اهم شي الاخلاق !! :)
نرجع للتغيير . . لا تفكر انك ماراح تتغير . . .
ياخي حتى شكلك وعمرك يتغيرون . . !!! لا تفكر انك ماراح تتغير !
سعد الصميل
02-05-2011, 01:09 AM
كل مره اروح فيها السوق تجيني تساؤلات . . . بس تساؤلات خفيفه :)
ليه كل محلات الذهب . . . ايرانيين ؟ وليه كل البقالات اللي في مواقع مهمه . . ايرانيين ؟
وليه كل البقالات اللي مدعوسه بين العماير . . هنود ؟ وليه كل البنشرجيه . . سوريين ؟
وليه كل النجارين . . مصاروه وبنغاليه ؟ وليه كل السباكين مصريين ؟
وليه كل الحمالين افغانيه ؟ وليه كل الكهربجيه هنود ؟
وليه كل محلات الكماليات ابو طقه هنود بهره ؟ وليه كل محلات الشمغ يمنيين ؟
وليه كل فنيين الستالايت هنود ؟ وليه كل الحلاقين اتراك ؟
وليه كل الفراشين بنغاليه ؟ وليه كل محلات المساج فلبن ؟
وليه كل اللي يشتغلون بالسيراميك صينيين ؟
لحد يطلع لي ويقول مو كلهم كذا , ادري فيه نجار هندي وسباك بنغالي وحلاق مصري . . لكن اقصد فيها العرف اللي ساد . .
والــ ليه الكبيره . . . ليه كل اللي ذكرتهم يبون يقصون على المستهلك . . اللي بكل فخر بـ يكون . . كويتي !!
فكرتوا بالسالفه ؟ :)
سعد الصميل
07-05-2011, 02:39 AM
بعد 5 ايام غياب عن الهمهمات . . رجعنا لكم بشوق لكم ولمتابعتكم . .
ادري ان الهمهمات وحشتكم اكثر . . :p
في هذي الايام من السنه . . . اذا كنت بالوادي . . راح تستمتع بالبراد في الليل !!
تشوف لك طعس نظيف . . وتجلس فيه ويهفك الهوى المنعش الخالي من دخان مصانع ميناء عبدالله . . طبعا !!
ياسلاااااام ! :)
لا جد ياجماعه . . الوادي بالليل الجلسه فيه تحس انها نظيفه . .
والهدوء ولا احلى . . تسمع صوت التريلات من بعيد تالي الليل !!
وعلشان تحلو الجلسه . . تسمع صوت صرصور الليل . . عرفتوه والا اشرح لكم وشهو ؟
طبعا صرصور الليل يزعج . . بس الحلو فيه انه يحسسك انك في مكان هادي . . لدرجة ان صوته يسبب لك قلق !!
والله اني مبطي من الجلسه ذي . . شكلي بهاجر للوادي علشان اعيش اللحظات . . والهدوء . . . واستمتع بصوت صرصور الليل !! :)
سعد الصميل
07-05-2011, 02:54 AM
جائزة المخ !!
قبل يومين سمعت بالراديو ان الدنمارك توزع جوائز سنويه للابحاث العلميه . . وقيمة كل جائزه مليون يورو . . :)
ياسلامي على الجوائز بس . .
وقالوا بالخبر ان علوم المخ فاز فيها 3 اشخاص . . فـ شافت الدوله انها تكافئهم كل واحد بنفس الجائزه !!
طبعا جوائزهم للعلم ترى متفرعه . . يعني الطب مو لحاله مليون يورو . . لا لا . .
مثلا علوم المخ لها مليون يورو . . طب الاعصاب مليون يورو . . العين مليون . . القلب مليون . . التكنلوجيا مليون . . النبات مليون . . الخ الخ . .
يعني شوف الدوله عندهم كم مليون تحذف على العلم !!
سألت واحد من الشباب له خلفيه بالامور هذي بالكويت . . وقالي قيمة جائزتنا بالكويت يذكر انها لا تتعدى الـ 25 الف دينار . .
في دولة عادية بالنسبة لأوروبا . . يعطون مليون
وحنا 25 الف دينار . . وتبون علماء بعد ؟ :)
تلومون الناس اذا صارت حراميه ؟ والوزراء والوكلاء والنواب اذا سرقوا؟ :)
سعد الصميل
07-05-2011, 03:14 AM
نعمة النسيان
النسيان . . ذكرته مليون مره هنا . . :)
ومازلت اعاني منه . . لكن نسيت اذكر لكم ان النسيان بالفعل نعمه !!
قبل كم يوم سويت خدمه لرجال . . وبعد ماسويتها ذكرني شخص وقال ياخي هذا مايستاهل !!
قلت ليه ؟ قال هذا فيه وفيه . . ماتذكر يوم موقفه البايخ اللي سواه لك انت في ذاك الوقت !!
طبعا انا كنت ناسي موقفه البايخ ورايح عن بالي . . لكن ذكرني فيه خوينا !!
بعد ذالسالفه . . تأكدت ان النسيان نعمه . . نساني فعل شين لشخص وخلاني اترفع عن الرد عليه بموقف بايخ وخدمته !!
بالفعل النسيان نعمه :)
سعد الصميل
09-05-2011, 03:36 AM
شووووووت !!
في سنة 1999 او 2000 . . ما اذكر بالتحديد . . لكن اللي اذكرة انها كانت في الايام الظلماء :)
ايام البطاليه . . وانتظار الوظيفه !
المهم . . كنت جالس في الدوانيه ومعاي دينار واحد فقط . . . ومعاي واحد من الربع نفس حالتي بكل شي . . . إلا الدينار . . ماكان معاه دينار !!
يعني الفرق بيننا كان دينار . . فقط لا غير !
ماعلينا . . الوقت كان الفجر . . وكنا جواعا وسهارى . . فــ جاء الاقتراح من صاحبنا سريعا . .
هو : سعد . . معك فلوس ؟
انا : ايه بس مامعي الا دينار !
هو : طيب حلو حلو حلو . . .
انا : العلم ؟
هو : يولد نبي نتريق ! ذبحنا الجوع . .
انا : ابشر يله مشينا . .
وحنا بالطريق قام يوسوس فيني الشيطان . . ويقولي . . يولد ترى اترك منك الريوق واخذ لك بطاقة شووت (( بطاقات دخول مباريات بالشكل , لكن بالمضمون بطاقات حظ نصيب . . ظهرت في ذاك الوقت وكانت جوائزها خرافيه . . توصل 100 ألف دينار ))
قلت لخويي . . يولد تبي الحين نتريق مطعم هندي ريوق شحذه بالدينار . . والا تبي نجرب يمكن نتريق في فندق 5 نجوم ونحجز لنا جناح ملكي عقب الريوق . . وننام لنا فيه احلى نومه . . وبعد مانقعد نسافر لأحلى ديرة وننسى البطاليه المعفنه . . ولارجعنا كل واحد دق له موتر يستاهل . . . . الخ الخ الخ . . . وبدت تزيد الاحلام وكأن الجائزه 100 مليون :)
واللي يشوفني وقت الشرح يقول ابو الشباب ضمن !!
صاحبنا مافهم . . شرحت له اننا ممكن نشتري شووت ونربح !!
وما اقتنع . . آخر شي قلت له يولد . . يا اننا نفطر صح والا عننا مانفطر !! هنا اقتنع !!! ياسلام عليه بس :)
رحنا للبقاله وخذينا بطاقة شووت ومسحنا . . وطبعا كالعادة طلع لنا . . حظ اوفر !!!!
هههههههههههههههه
القصه ما انتهت !!!
انتهت الاحلام والدينار راح . . وش الحل ؟
صاحبنا عصب علي . . العن . . . لابو . . . يانذل . . .ماخليتنا نحمد ربنا ونفطر ونرقد وحنا شباعا !! ههههههههههههههههه
الكلام هذا كان الساعه 6 الصبح . . . رجعنا للبيت . . فتحت الثلاجه وفااضيه . . لأن البيت كان كله فاضي مسافرين قدلهم اسبوع . . الثلاجه مافيها الا طماط وبطاط !!
دخلت المطبخ وقعدت احترف . . وضبطت لنا كبسة عيش + بطاط + طماط . . . وكلينا ورقدنا شبعانين على الاقل !! :)
كل ما اذكر ذيك السالفه . . انصرع من الضحك . . واقول . . .
كم كان موقف غبي !!!
سعد الصميل
09-05-2011, 03:49 AM
دايم اشتكي لكم عن الذاكره . . عندي !!
ودايم اشتكي انها ضعيفه . . .
قررت اتوجه لمكتبة جرير بعد نصيحة احد الاعزاء . .
وكان الهدف . .
http://alajman.net/up/uploads/80164f1fbb.jpg (http://alajman.net/up/)
:)
سعد الصميل
11-05-2011, 04:33 PM
ادري ادري اشتقتوا للهمهمات :) << بالله ياشيخ ؟
المهم . . والله وحشتونا . . وجيناكم نهمهم عليكم تالي عصير . . وش حيلتي اردها لا تجيني ؟
محد فهم شي ادري . .
يله ياحبايب . . خلصت الغشمره وبدأ الجد !
نتوكل على الله ونتهمهم . .
بسم الله وعلى بركة الله . .
سعد الصميل
11-05-2011, 04:51 PM
انا الزعيم !!
قبل فتره . . كنت مسير على رجال . . خذيت لي عنده فنجال قبل العصر . . اذن العصر . . رحنا للمسجد نصلي . . وكان المسجد جديد و شغل 5 نجوم بالتأثيث والديكور . . لكن كانت مشكلة عويصه في المسجد . . التكييف مسكر !!
طلعنا من المسجد . . واول موضوع كلمت صاحبنا فيه . . قلت ياولد وش علم التكييف ؟؟ قال مبطي وهو كذا !!
قلت ليه ماقلت لنا الله يسامحك نشوف مسجد بارد الواحد يصلي فيه بدون مايشغله الحر والا غيره !
رد . . . خلها على الله !!
المهم . . بعد ماعودنا للدوانيه والمكيف البارد والماء البارد . . وخذينا فنجال ثاني . . سالته مره ثانيه ! ! << نشبه :)
قال يابو محمد . . عندنا شايب في شارعنا مهوب صاحي . . يحسب ان المسجد له مهوب لله والمسلمين !!
بعد شرح طويل من خوينا فهمت التالي :
ان الشايب الحلو ذا يستبرد بسرعه . . ومايبي التكييف شغال وقت ماهو موجود . . واللي فيه خير يقول شي !!!
اذا الجو عاجبه . . يفتح الدرايش كلها واللي فيه خير يصك دريشه !!
اذا طفى المكيف والناس تبي تفتح الدرايش . . يصكها كلها بحجة ان فيه غبار . . واللي فيه خير يفتحها !!!
لحد يشغل المراوح بدال التكييف . . لأنها توجع راسه . . واللي فيه خير يشغلها !!
الخ . . . الخ . . . الخ . . . !!!
مختصر مافهمته . . ان الشايب ذا ملعون صفحه !! ويبي يكون هو المتحكم الوحيد بالمسجد !!
صدمني الصراحه وضعهم وكسروا خاطري باقي اهل الشارع . . طبعا انا متأكد انهم مو خايفين من الشايب ويقدرون يحطونه هو وعواله بالقاع ويدعسون عليهم :)
لكن احتراما لكبر السن . . بالفعل فيه مشكله كبيره اذا كان واحد كبير سن يسوي افعال بايخه . . ماتقدر تخانق معه !!
لكن بالنسبه لي . . هو أساسا ماحط اعتبار لكبر سنه . . وما احترم نفسه . . فـ بالتالي . . ماراح احترمه وبشغل التكييف . . واللي فيه خير يسكره :)
طيب اصبر اصبر انت وياه . . السالفه ماخلصت !!
بعدها بفتره . . رحت لخوينا وجاء وقت الصلاه . . يله مشينا ؟ قلت آسف مابي اصلي :)
قال افاا . . . قلت نعم امش مسجد ثاني مسجدكم ذا مابي اصلي فيه . .
قام يضحك . . قال لا لا ابشرك المشكله انتهت . . . سألته . . العلم ؟؟ وكيف ؟؟
قال فيه كم واحد اشتكوا عند الاوقاف على طريقة الشايب . . وخلوا تحكم التكييف في غرفة مقفوله ومفتاحها مع فني الصيانه مال الاوقاف ويمر على التكييف كل فتره . . او بالتصليح بس :)
الله يجزى وزارة الاوقاف خير . . فكتنا من ذالشايب العايب :)
سعد الصميل
11-05-2011, 05:00 PM
قبل أمس بالسياره . . . معي احد ابناء العمومه . . . مرينا عند مركز سلطان المنقف . .
وشفنا سيارة البلدية . . تنظف . . . المنظر بالفطره شي جميل . . ناس ينظفون . . حلو حلو !!
لكن اللي مو حلو هو الطريقه اللي يتم فيها التنظيف . . والقذارة اللي شفناها !!
سيارة البلدية واقفه . . والعمال كابين الزباله ( أعزكم الله ) بالقاع !! علشان ينبشونها ويطلعون القواطي والحديد والنحاس والكراتين والورق . . . الخ !!
مسوين فيها اعادة تدوير !! طبعا انا ماني حاسدهم على بيعها . . لكن مو كذا تجمع !!
وسخوا القاع والله علشان يطلعون نصيبهم !!
سمعت مره سوالف دواوين . . يقولون ان فيه تاجر تايلندي يسمونه . . ملك الخرده !!
سمع ان الكويت زبايلها ( أعزكم الله ) تنوخذ بالكامل وتندفن . . انصدم !!
وانصدم اكثر يوم درى ان شركات التنظيف تاخذ فلوس من الحكومه ومبالغ خياليه علشان ذالشي !!!
وانه قال اني مستعد ادفع للدوله فلوس . . وامسك عقد الذهب اللي بالخرده !! :)
يعني بيسوي نفس طريقة البنغاليه بس . . بطريقه منظمه مو قذره مثل ماهم يسوون !!
وثاني شي يفك الدوله من دفع مبالغ طائله على شركات خايسه وحراميه !!
والا ؟ :)
سعد الصميل
11-05-2011, 05:13 PM
الزبال طول عمره زبال !!
على طاري الزبالين . . خلوني ادخل بموضوع مشابه . . علشان نخلص من الريحه الخايسه بسرعه :)
في اليابان . . . مايرضى الشعب انك تسميه زبال . . سمه مهندس النظافه !! :)
لأنهم يحترمون كل عمل يخدم فيه الانسان البشريه . . وماينزلون من قدره !!
وفي بريطانيا . . . الشعب يخاف منه جدا . . لأن بريطانيا كانت تعاني هالأمر من زمان ان الوظيفه ينظر لها بقرف . . فـ حطوا فكرة حلوه . . ان كل موظف له صلاحيات على المواطن . . فــ صارت كل الوظايف الناس تحترمها بالغصب !! :)
ومن الوظايف . . الزبال . . في بريطانيا معاه دفتر مخالفات . . واذا فيك خير خل زبالتك ( أعزكم الله ) مو مسكره او موضوعه في مكانها المناسب . . او اي مخالفه ثانيه . .
يطلع الدفتر ويحكك مخالفه :)
لكن في بلداننا ؟ الزبال يبقى زبال . . وظيفه وضيعه ومايتوظف فيها الا وضيع !!!
مع انه في حديث ورد عن الرسول عليه الصلاة والسلام . . ان اللي ينظف المسجد مايمسه عذاب القبر !!
طبعا مع فارق الشبه بين المسجد والمكان العام . . لكن التشبيه بالمعنى العام . . النظافه . . او التنظيف !!
يله . . خلينا كده عمياني . . الناس قدام وحنا ورى . .
سعد الصميل
11-05-2011, 05:46 PM
وصلتني خبرية طازجه . . . فرحتني جدا جدا . . .
بلغني احد الشباب وقال روح قوقل . . واكتب همه !!
وسويتها . .
http://alajman.net/up/uploads/6df2af3ec7.jpg (http://alajman.net/up/)
وبعمليات بحث تجاوزت الــ 53 ألف بحث عن الهمهمات . . .
بس عداد المنتدى يقول ان الزيارات 7 آلاف . . من اصدق ؟ :)
الحمد لله الذي بعزته و جلاله تتم الصالحات . .
اعجز عن شكركم والله . . بجد تحرجوني. . مع اني مقصر معاكم كثير . . لكن احرجتوني وماعاملتوني بالمثل . .
بس لازم اشيك من كذا جهاز علشان اتأكد من الخبريه . . علشان اعطيكم همهمات اكسترا الليله :)
جاهزين ؟
سعد الصميل
12-05-2011, 01:53 AM
أمنيات على السريع . . !
لو كنا نعمل بدقة الياباني . .
وبمهارة الهندي
وبإقتصاد الروسي
وبجد البريطاني
وبسلاسة الفرنسي
وبنشاط الامريكي
وبقوة الافغاني
وبخفة الكوري
وبشجاعة الليبي
وبعزيمة الياباني << ثاني مره اجيبهم . . والمفروض اكثر بعد من مرتين :)
وبدهاء اليهودي . .
وبروح الاسلام . . . . .
كان بالفعل . . حكمنا العالم بدون أدنى شك :)
سعد الصميل
12-05-2011, 02:01 AM
هنا الكويت . .
هذا كان نداء اذاعة الكويت . . . صراحة ما ادري لحد الآن يقولون النداء هذا او لا . .
لأني اعترف بأني ما اسمع اخبار اذاعة الكويت . . بعد ماعرفت الــ bbc . .
وهي محور الحديث الحين . .
ياجماعه . . والكلام للاخوان اللي مايسمعون الراديو . . نصيحة اخ . . استمتعو بالاذاعه . .
طبعا ما اقصد المرينا وكويت اف ام . . والمسخره الزايده :)
اقصد الاذاعات الثانيه . . اللي الواحد يستفيد منها . .
المهم . . نكمل النصيحه . .
ياجماعه والله نتور عقولكم وتخليكم مع الحدث دائما . . وتثقفكم . . ومنها تقزيرة الطريق بشي تستمتع فيه وتستفيد منه !! :)
طيعوني . . ترى النصايح قبل كانت تنشرى. . الحين بلاش !!
(( النصايح قبل تنشرى والحين بلاش )) << المثل هذا دايم اسمعه . . وحتى بأفلام ابيض واسود ينقال . . وكلمت لي واحد يكلم جد ابوه لحد الحين عايش عمره مليون ونص . . وقال انا كنت اسمع جد جدي يقول المثل هذا . .
السؤال . . . منهو الشقردي هذا اللي كان يدفع فلوس علشان النصايح . .؟؟
:)
سعد الصميل
12-05-2011, 02:10 AM
مرات ومرات . . . !!
مرات تلقى نفسك متضايق بدون سبب !!! ومرات تلقى نفسك مليان حكي بس ماتدري وشهو !!!
مرات تقوم من النوم وودك تطرح القعدان من النشاط الزايد !!! ومرات تكون يوم كامل ماتقدر تشيل نفسك !!!
مرات لو واحد قالك بخ تقعد تضحك اليوم كله . . لأنك تبي تضحك !!! ومرات لو تشوف اطرف موقف في حياتك ماتوصل معك نص ابتسامه !!!
مرات تتخذ قرارات وتحس انك كنت مغفل بعد ماتتخذها !!! ومرات تتخذ قرارات وتحس انك كنت مغفل شلون ماكنت متخذها مبطي !!!
مرات ومرات . . . والحياه كلها مره وحده :)
فلا تتحسف على عدد المرات !!
سعد الصميل
12-05-2011, 02:43 AM
عاهات !
كل واحد مننا اكيد عرف في حياته ناس مربوشين . . او عاهات مثل مايقولون الحين . . هذا شي طبيعي . . لكن انا بتكلم عن شي بالتخصص !!
من خلال مسيرتي اللي كملت 7 سنوات في المنتدى . . . << والله عمر !! :)
شفت من الاعضاء ناس افلااااام . . مدري شلون مستحملين انفسهم :)
بس الحمدلله . . يعيننا الله عليهم . . ويسببون زحمة شوي ويفارقون . . . << مراح مقيط
يجيك واحد . . مزعج للاداريين 24 ساعه منقع بالشكاوي ويتناقش معاهم بكل شي !! والا يجي واحد مسوي فيها شاعر ويسب خلق الله ويهين الناس !! والا تجي بنت حاطه نك غريب عجيب ماتدري وين تبي توصل بالنك هذا !!
والا تشوف وحده فالتها على الآخر . . وتسولف سوالف نسوان خاصه . . اللي يشوفها يقول داخله منتدى نسائي !!
والا تشوف واحد شغال بالغزليات 24 ساعه ومسوي فيها روميو , يحسب انه بيحطم قلوب العذارى مثلا ؟! << مو كذا والله تراك فاهم غلط
واللي مسوي فيها تنظيم القاعده . . وقاعد لي في بيتهم << روح جاهد يامال الشحم . . لا تحط امك وابيك عذر . . كانك تبي الشي بتوصل له بدون اذن امك وابيك :)
واللي يدخل علشان يبجل جده ويخليه فارس فرسان الجزيرة حامي الديار اللي ماينذل له جار . . << اللي يسمع سوالفه عن جده يحلف ان جده وصل المرحلة الأخيره وقتل الوحش !!
واللي من يسجل يستلم له قسم معين يبي اربنا نشوفه نحطه مشرف على القسم :)
واللي . . واللي . . واللي . . . الخ :)
لكن مايمشي الوقت الا بالنوعيات هذي . . . والا بتحس انك مو في منتدى طبيعي اصلا ! :)
سعد الصميل
15-05-2011, 12:10 AM
مجرد تسجيل حضور اليوم . .
مع ان الهمهمات والله كثيره جدا . . لكن مدري قدلي كم يوم معاد لي نفس اتهمهم بزياده مثل البدايه !!
يمكن احتاج ارتاح ؟ يمكن احتاج تصفية ذهن ؟ يمكن احتاج تشجيع مثل اول مابديت ؟ :)
مدري لكن ثقوا ان الهمهمات ان وقفت وقت , ترجع اقوى من قبل ;)
الى ان القاكم في همهمات جديده . .
دمتم في حفظ الله ورعايته .
سعد الصميل
17-05-2011, 03:06 AM
اللي ماله شوير ولا كبير . . ماهوب بخير !!
سمعت الكلمه هذي اليوم من احد الاعزاء . . ووقفت عندها كثير . . اعجبتني !!
فعلا اللي ماله احد يشاوره في اموره . . وماعنده كبير يعلمه بحكم الخبره . . راح يعاني في حياته :)
مرات فيه امور ودك تسويها . . لكن تفكر مليون مره وماتدري وشلون تسويها والا متى . . .
لكن لو عندك احد تاخذ شوره وتثق فيه . . بيدلك وبيقعنك . . ولو عندك بعد كبير تحترم نظرته للحياه . . بيفيدك . .
وفي النهايه بتطلع في افضل النتايج . . !!
والا ؟
سعد الصميل
17-05-2011, 03:11 AM
كثير من الناس الله طارح فيهم البركه والخير . . يعني اللي يسمونهم الشيبان . . المبروكين . .
لا جاء طاريه . . قالو فلان مبروك . . او مبارك الله فيه . .
اليوم حضرت عرس واحد من الربع . . والحمدلله انه من الناس المبروكين . .
طبعا قبل العرس ماكنت احسبه ضمن الناس المبروكين :p
بس يوم حضرت عرسه . . واجهت ناس لي سنين عنهم . . وشفت ناس فرحت بشوفهم . .
وخذيت علومهم وسلمنا عليهم وتطمنا عليهم . . وكله بفضل الله ثم العرس المبروك :)
الله يجعلنا من الناس المبروكين . . ونتبارك على خلق الله ان شاء الله . .
ويجعلكم انتو بعد :)
علشان ماتقولون ناسيكم . .
سعد الصميل
17-05-2011, 03:22 AM
مرات يجي في بالك تخيلات . . وهذا شي طبيعي جدا . . لكن فيه تخيلات غير طبيعيه :)
وهذي تجيني مرات . . صحيح انها غريبه . . لكن استمتع فيها :)
خلوني اجيب لكم احد المواقف . .
قبل فتره انا وواحد من الربع طالعين . . ووقف عند بقاله . . خذا حاجته وعطاه فلوس . . ورجع لنا الباقي من الخرده . . وبينها . . 100 فلس . . وانا فيني شي غريب ثاني بعد . . كل ما امسك الخرده على طول اقلبها اشوف انتاجها اي سنه . .
يوم شفناها . . مكتوب عليها 1968 . . يعني لها 43 سنه . . وهي تدووج من ايد الى ايد . .
عاد هنا بديت اسبح في الخيال بروحي طبعا . . تخيلت كم عدد الاشخاص اللي مسكوها ؟ ووين المشاوير اللي قطعتها ذالمية ؟ حنا خذيناها من بقاله بالسالميه . . اكيد بنصرفها عند بقاله بالعاشره !! :)
وهلم جرا . . يرجعها لواحد ثاني وذاك يشتري بالجهراء . . وخلك مستمر 43 سنه !!
بعدها رجعت للسوالف مع صاحبي وسولفنا عن المية . . قلت له اللي بخاطري وزدت عليها . . قلت له . . ياخي 43 سنه ماضاعت !! قال الفلوووس ياخيك كلن حريص عليها لو انها مية فلس :)
قلت . . سبحان الله . . هي نفسها المية ذي بحديدها وشكلها . . اول مانزلت كانت تجيب بطاط وعصير وككاو وحلاو ويزود عليها :)
الحين ماتجيب شي ابد . . ولو تمدها للبزر نقد عليك !!
المهم . . من الفراغه صار حديثنا كله عن المية . . وحتى اننا قلنا اكيد خلال الـ 43 سنة انها سافرت برا الكويت . . لكن مالها مصد لازم ترجع لديرتها . .
43 سنه . . ناس ولدوا بعدها وماتو قبلها . . وهي موجوده . . والله عمر !
تخيل نفسك مكان المية . . شوف وين بتوصل ! :)
حديث كان مافيه فوايد . . لكن كان ممتع في خياله الواسع :)
سعد الصميل
17-05-2011, 03:28 AM
فيني عيب كبير في الهمهمات او بالركن الهادي . . اعترف فيه واقر بذلك !
احد اكبر عيوبي في الركن . . اني ما امر على اركان الاخوان كثير . . ومقل بحقهم علي . .
والله ما ادري حتى وش اتعذر فيه . . لكن اطلبهم شخص شخص . . يعذروني لأني مقصر بحقهم . .
واتمنى مايعتبروني اناني . . اشوفهم يردون علي دايم وماوقفوا ابد . . وانا ما امر عليهم الا بالسنه مره . . اخواني . . اعزائي . . انتو اهل الطيب و والله لكم حق . . لكن اعذروني نفداكم . . والله انكم تستاهلون اللي يمر عليكم بإستمرار . . لأنكم جميعكم مميزين واقسامكم مميزه . .
بتعذروني والا جبت لكم جاهيه ؟ :)
سعد الصميل
17-05-2011, 03:40 AM
واحد من الشباب قد قالي مره . . انا الفت لي مقوله بتصير ان شاء الله بالمستقبل مثل !! قلت حلوو . . هات !
قال : الفرق بين المتعلم والمثقف . . ألف كتاب !!
طبعا اعجبني المغزى اللي قصده جدا جدا . . لكن ماني خبير في اللغة والنحو والبلاغه علشان اقيم المعنى للكلمات . . !
لكن نرجع للمغزى . . فعلا كلامه عجبني بجد :)
ممكن انك تشوف واحد معاه اعلى الشهادات . . لكن عقله فارغ في الامور الثانيه غير اللي درسها . . وتشوف واحد ماعنده شهاده لكنه ملم في كل شي وثقافته عاليه جدا . .
انا اعرف شخص شهادته رابع ابتدائي . . او بالأكيد أقل من رابع متوسط . . لكن بالمقابل ؟ ؟ شخص مجنون بالثقافه والادب بشكل كبير . . سمعت ان مكتبته بالبيت ضخمه بالنسبة لمكتبه شخصيه . . تقريبا غرفة كامله مخصصه بدروج للكتب . . وفيها اتوقع اكثر من 500 او ألف كتاب حتى !!
ويطارد الثقافه وين ماكانت . . كل سنه يروح لمصر علشان معرض الكتاب عندهم مميز اكثر . . وفيه كمية كبيرة ومتنوعه . . ويحرص على انه يحلق الثقافه وين ماحلت !! :)
بالمقابل . . فيه اشخاص شهاداتهم عليا وقبل اسمه حرف الـ د. . . واهم شي النقطه :)
لكن فارغ ومايفرق بين القاف والغين . . ولا يعرف متى يستخدم التاء المربوطه والتاء العادية المفتوحه !! :)
طبعا هذي لها همهمه ثانيه . . مدعين العلم :)
سعد الصميل
17-05-2011, 04:46 AM
تخيل نفسك فنان في شي معين . . وقمت بوسط السوق وسويته قدام الناس . . لاحظ الناس اللي بيمرون عليك . . طبعا أنا متأكد انهم ماراح يسوون دائره عليك ويشوفون وش قاعد تسوي ويشجعونك نفس الاوربيين او الامريكان . . وثانيا كل من مر بيقول استغفر الله وش يسوي المهبول !! ويقول الحمدلله على نعمة العقل ويمشي !! بتشوف ناس تطالعك من بعيييد وناقدين عليك !!
طيب طيب . . خلونا نغير المشهد !!
تخيل انك اوروبي او امريكي . . سويت ابحاث وتجارب ونجحت في اشياء وخدمت العلم بشكل طيب . . او اخترعت او سويت شي يخدم الناس . . او عمل ابحاث خدمت البشرية . . وش المقابل لك ؟ ملايين صح ؟ :)
طيب يله الحين تخيلها بالعكس ؟ او نخليها الواقع المرير ! :)
انك عربي وفي بلدك وابدعت ؟ مافيه مقابل طبعا !! واذا فيه بيكون تشجيع معنوي سخيف بالكلام بس و مبلغ زهيد يفشل !! هذا اذا فيه مبلغ طبعا :)
والاوربي اذا ابدع في بلده . . يلقى كل الاهتمام والدوافع اللي تخليه يبدع !!
تدرون ؟ ؟ ؟
بناء على الموقفين الاوليه اللي قلتها . .
بإختصااار . . .
في أوربا الناس مستعده لترى حتى سخافاتك . . . وفي بلداننا الناس غير مستعده لترى حتى إبداعك !!
وإلا ؟ :)
سعد الصميل
22-05-2011, 11:00 PM
تخيل . . لو انك تداوم بالسنه يوم . . وراتبك عالي جدا . .
وانك ماعمرك جاك مرض . . ولا وجع في حياتك كلها !
طيب . . تخيل بعد انك عندك من المال مالا يعد . .
وعندك من الجاه . . ماتحسد عليه . .
كافي ؟
لا بعد بعد :)
تخيل انك كل ماتطلب شي يوصل لك بدون ماتتعب فيه ! وتخيل انك ماعمرك مرت عليك ضيقه ابد !
تخيل ان علاقتك بخلق الله كلهم ممتازه , وما عمرك صار لك موقف خايس مع اي شخص في حياتك !!
تخيل انك ماتحتاج تركض ورى الشي علشان تاخذه . . تخيل ان كل شي يجيك وانت قاعد !
من الآخر ؟ تخيل انك احسن واحد :)
تتوقع انك راح تكون مبسووط في حياتك ؟
الجواب طبعا لا ! والاكيد انك راح تكون شخص فاااارغ . . ماحكتك الدنيا علشان تتعلم من اخطاؤك . .
ماجربت الشقى علشان تفرح بالفرج !! حياتك كلها فرج في فرج . . ماراح تحس بطعمه لأنك مافقدته !!
بإختصار ؟ الدنيا حلاتها كذا . . تتعب علشان ترتاح !
تشقى علشان تتلذ بطعم الفرج , تمرض علشان تفرح بالعافيه , تقحط علشان تفرح بالفلوس . . .
ان ماكانت كذا حياتك . . صدقني . . انت شخص تعيس للغايه . .
روح صير مدمن مخدرات احسن لك :)
سعد الصميل
22-05-2011, 11:09 PM
الذكي والغبي . . وجهان . . لعملتين مختلفه !! :p
دايم الشخص الذكي . . يغار من الذكي اللي نفسه . . لكن الغبي دايم يكون معجب بالذكي !
والغبي دايم يكون صديق الغبي . . لكن الذكي دايم يكسر خاطره الغبي !
الغبي اذا سوا نفسه ذكي ينكشف بسرعة , لكن الذكي لو سوى نفسه غبي ماتكشفه لو تموت !
الذكي مو دايم يكون موفق , والغبي مو دايم منحوس . . ياما شفت اذكياء وضعهم مزري . . واغبياء الدنيا ضاحكه لهم وماشيه معهم حلاوه !
الحصيله طيب .. ؟؟
قدر الذكي والغبي . . مكتوب . . وكثير يكون الذكي مكتوب عليه الشقاء بعقله قبل دنياه . . والغبي مكتوب عليه راحة البال في حياته !!
ذكي غبي
غبي ذكي . .
احد فهم شي ؟
مو لازم , يكفي اني فاهم وش اقول !! :)
سعد الصميل
26-05-2011, 05:21 AM
من اليوم وانا اتصفح الهمهمات . . واكتشفت التالي :-
1- اكتشفت اني مميز بالكتابه الساخره واعجبت في نفسي , وتميزت بالكتابات الاجتماعيه مع اني كنت ناوي في البداية ان الهمهمات تكون اكثرها سياسيه ! ( هل هذا مايسمونه بداية السقوط او الغرور ؟ ) :)
2- اكتشفت ان الهمهمات تحولت الى مدرسة , فـ الاسلوب وطريقة السرد انتقلت منها العدوى الى اماكن غير الهمهمات ! ( اقدر اقول اني تحولت من شخص مرح وساعي لكسب اكبر شريحة من المتابعين وخوش ولد الى شخص جاحد لمتابعينه وثقيل دم ؟ )
3- اكتشفت برضو ان فيه ناس ولو كانو قليلين بس انهم متابعيني جدا جدا جدا جدا , لكن ما ادري وش السبب ! مع اني اشوف فيه اركان ارقى وافضل من ركني ! ( نقدر نقول اني تواضعت مثلا ورجعت لوضعي الطبيعي علشان اكسبكم ؟ ) :)
4- اكتشفت ان فيه همهمات معينه ماني مصدق اني كاتبها , حسيت اني وقتها كنت ارسطو او سقراط او شي من الخبلان القديمين اللي لحد الآن الناس قاعدين يبجلون فيهم ويحبونهم ! ( وبعدين معاك يالطيب ؟ والله شفت نفسك صحيح ترى ! )
5- اكتشفت ان فيه ناس الهمهمات تمشي على كبودهم بدون ما ادري وش السبب , مع اني احاول دايم اني اكون خفيف ظل وطله وما احب اغلط بأحد ابدا ! ( والله ندري انك خوش ولد هات اللي بعدها )
6- اكتشفت اني صريح جدا وفيه همهمات زعلت ناس , والهمهمه هذي بالذات اثبات لذلك , فـ اللي يدور بخاطري اقوله ولو كان على حسابي مرات !
طيب . . هذي بداية اليوم . .
بسم الله ونبدأ نتهمهم لعيون الحلوين . .
سعد الصميل
26-05-2011, 05:36 AM
مرات تكون في الطريق السريع ويجيك واحد يمشي بشويش , بس تدعس يدعس . . ودك تقوله استانست ؟ سبقتني ؟ ياحظك :)
ومرات تكون في الطريق ويجي وافد يتمشى قدامك ويمشي 20 . . ودك تقوله افتح يابن الكلب ! << للأسف الكلمه قليلة الادب هذي اقولها دايم :(
لدرجة ان حمود ولدي يوم كان يسمع مني زماان كان دايم يردد وراي ( ابوت ابو تب ) << الترجمه : العن ابوك لابو كلب !! بس عقبها غسل ايده مني ونقد علي وكبر عقله ومعاد يرددها . .
فيه ناس تشوفه يدخل بين السيارات ويسوي بتوين وحركات وماشي مليون . . وانت تدري انه ماوراه شي بس هذي سواقته . . والمشكله سرعته جنونيه وتلقاه كذا مره بغى يعدمك او يعدم سياره ثانيه فيها بزران وعائله . . ودك تقوله الله يريح الناس منك . . بالطريقه اللي يكتبها الله عاد شوف هو و قدرة المكتوب وشهو :)
مشاهدات الطريق .. واااااجد
بس خلوني اتفرغ على يوم واقعد احصيها وحده وحده واجيب فيها همهمه كبيــــــره :)
سعد الصميل
26-05-2011, 05:41 AM
فيه نوع من الاصدقاء , او ربع الفلس كما يحلو لي تسميتهم :)
يكون معاك ميه ميه . .
تقوله . . نطلع مجمع ؟ يقول مشينا . .
تقول نطلع سينما ؟ يقول مشينا . .
تقول نروح مطعم ؟ يقول يله مشينا . .
تقول نروح لدوانيه ؟ يقول يله مشينا . .
بس من تقوله نروح اخلص لي شغل والا معامله والا اي شي مايشوف منه فايده لنفسه . .
يقول لا والله مالي خلق !!
ودك تقول لنفسك مرات . . انا وش ابي فيه ؟ مادامه شخص ماخذ السالفه معاي بس بالتقزيره . . ولا جات على اي شي غيرها حتى لو كان خفيف مايبي الا فرقاك ! :)
سعد الصميل
26-05-2011, 05:50 AM
اشياء واجد نحسد عليها البزران . . اهمها البراءه وقلة الهموم وعدم المسؤليه . . وغيرها
لكن فيه ميزه عندهم عجيبه . . متى ماطقت براسه وضاق . . بكى :)
المشكله ان المعادله هنا صعبه . . البزر يبكي على اي شي حتى لو كان تافه , وانت لو تجيك مشكلة وضيقه كبيره ماتقدر تبكي . . ليه ؟ مدري !
ياخي ودك الواحد لا ضاق دن الهاشميه , وغسل كبده . . ترى فيه دراسات تقول ان البكاء مفيد للصحه !
طيب لحد يفهم اني قاعد اكتب وانا مليان ضيقه . . لا . . الحمدلله الوضع اوكي ومحد ضربني ولا بكاني بس طرت علي . .
ماعلينا . . السؤال المهم وخلاصة الموضوع هذا . .
الدموع . . . ليه طعمها يكون مالح ؟
<< اطلع برااا
سعد الصميل
28-05-2011, 01:47 AM
صباح الخيرات للجميع , مبطين ماتهمهمنا عليكم . .
بسم الله وعلى بركة الله . .
اختلف الناس في تحديد طريقة دخول الذكاء الى عقل الانسان , فيهم اللي يقول انها تجي للشخص بالفطره , وفيهم اللي يقول انها مكتسبه !
انا من النوع الأول , اقول ان الذكاء يجي بالفطره , يعني تشوف الشخص من يوم انه بزر وهو فطين وسريع بديهه . .
ماعلينا . . ندخل بصلب الموضوع . .
فيه ناس من الغير اذكياء , طبعا ما اقصد الاغبياء , حاشى لله :)
لكن فيه ناس عقولهم تقدر تقول انها متوسطه ماهيب ذكيه لكن ماهم اغبياء . .
لكن تشوف فيه نوع منهم يحاول يتظاهر بالذكاء , او خلوني اسهل المعلومه اللي اقصدها . .
يحاول ويبذل اكبر جهد عنده علشان يظهر بمظهر الذكي قدام الناس . . يعني يحاول يعرف مثلا عن كل شي , يحاول يكون او يتظاهر بالذهن والفطنه ! يحاول يحسسك انه ذكي , لكن المسكين مايدري انك تحس انه غبي ! :)
بس تصدقون عاد ؟ النوعيه هذي احترمها , قاعد يحاول يوصل لشي ماجاه بالفطره . . يحاول ويحلم انه يكون ذكي , مو نفس بعض الاذكياء .. تلقاه ذكي بالفطره بس حيوان عزكم الله :)
مايبي يشغل مخه , مايبي حتى يظهر ذكاءه . .
ذولا . . مع مرور الوقت . . يتلف عقله . . ويصير غبي مع الوقت !!! :)
سعد الصميل
28-05-2011, 01:56 AM
بما اننا اليوم الجمعه خلوني اصير واعظ , على الاقل ابي اكسب حسنات من وراكم . .
مهوب كله حش في خلق الله :)
بما اننا تكلمنا عن الذكاء والغباء , الشيطان ذكي . . جدا !! :)
يعني الهيس مايقولك صير كافر وفلها على طول !!
يقولك في البدايه ياعمي انت لك خلق تصلي الحين في الحر ؟ تقدر توضى بالماء الحار ؟
ياعمي خلها صل الظهر مع العصر . .
لا جاك وقت العصر قال لك ياولد اصبر شوي بس وصل , بس خلص اللي بيدك . .
بعدها ماتدري الا المغرب دخل عليك !!
يجيك المغرب . . يقولك ياولد الحين وراك ظهر وعصر ومغرب !! الحين اصلا شكلك راح تتفشل لو تصليها قدام الناس كلها . . بيقولون وش ذالخبل اللي يجمع صلاة يوم كامل . . لا وصلت البيت اجمعها مع العشاء !!!!
توصل البيت يقولك , ياولد والله انك كودت الصلاه ورى بعض . . . خلها اليوم والله يغفر لك ان شاء الله ومن بكره ابدأ صل بإنتظام . .
ويبدأ بكره . . ويخلق لك اعذار ثانيه . . لين مع مرور الوقت . . .
تلقى نفسك صرت كافر مع مرتبة القرف :)
يبه تبون اسهل عليكم السالفه ؟؟
الله قال (( ولا تتبعوا خطوات الشيطان ))
يعني الشيطان يجيك بخطوات مو مره وحده يقول صير كافر ! :)
يله شويات ونجيكم بهمهمات جديده . .
سعد الصميل
29-05-2011, 01:19 AM
الشيبان دايم الله معطيهم الحكمه والعلم والالمام في اكثر امور الحياة . .
ودايم اذا نشدتهم عن شي تكون مقتنع بوجود الجواب عندهم خاصة في السوالف او العلوم القديمه لكن للأسف الامور الجديده تلقاهم جاهلينها . .
ماعلينا . . .
فيه الحين الشيبان المعاصرين اللي يعرف الامور القديمه والجديده. . والنوع ذا من الشيبان فايدته لك اكبر من النوع الاول . .
لكن برضو بيكون جاهل بعض الامور . . . يعني الزبده انك منت لاقي شايب يجمع العلوم كلها للأسف . .
ما راح تلقى شايب يعرف تاريخ وسياسه ورياضه واقتصاد وعلوم . . . الخ
بس انا احمد الله اني اعرف لي عوود يعرف اجابه لكل اسألتي ويجاوبها بدون مايخطي . .
اعتبر وجوده في حياتي نعمه من نعم الله علي . . .
انه . . . العم / google عسى الله يمد في عمره . .
مع انه بزر بالعمر . . لكن كبير بالفعل . .
كبير ياقوقل . . والله انك اغنيتنا من نشدة خلق الله :)
vBulletin® v3.8.0, Copyright ©2000-2026, TranZ by Almuhajir