حاجــــة معـــــاق يا ناس

[حكاية شمس]

السلام عليكم ورحمة الله وبركاته

مشهد احكيه و شاهده عليه ..

من أحد المشفيات ..

برغم قله المراجعين وخلو أروقه المشفى الخاص من المراجعين ..
شاب بإعاقه ذهنيه .. يذهب له والداه لمراجعه له ..
تلتفت الاعين بإتجاهه باستغراب كأنه كائن غريب يطل عليهم ..
نجد ان الأطباء يسألون الوالدين كيف يمكن معاينته . . ومما يشكي
يعترفون بعدم المامهم بكيفيه معالجه مثل هذه الحالات الخاصه .. وبعد توفر أجهزه لديهم لمعاينتهم وبعدم وجود هيئه تمريضية تساندهم لمعاينة الأطباء إياهم
طالبين من الوالدين الذهاب الى المشفيات الحكوميه ..

التي تتعامل مع الأرقام والواسطات ولو إنت مبقشش البورتر دخلك بدون رقم على الدكتور وعاينك الطبيب كرمال عيونه..
يبدو ان الأعضاء تناسوا قانون بناء مشفى خاص لذوي الاحتياجات الخاصه ..
يخدمهم ويلبي احتياجاتهم .. ويرفع عنهم شعور الشفقه الذي يشعرون به من نظرات الاخرين لهم .. ويوفر لهم الأجهزه الطبيه الخاصه بهم
وتوفر كذلك الكادر الطبي المتخصص لمثل هذه الحالات
لا اتكلم عن الإعاقات الذهنيه فقط ولكن اتحدث عن جميع الإعاقات ..
فمركز متخصص أو مستشفى لهم يغنيهم عن المراجعات في المستشفيات الحكوميه التي تأخذ لها اسابيع في المراجعات وتغنيك عن المستشفيات الخاصه التي تهلك جيوب اسرهم .




تقبلوا تحية حكايه شمس ..

[محمد صرام]

فعلا هناك نقص كبير في هذا المجال

لكن تعويضه لن يكون بسهوله

شكراً على لفت الإنتباه لهذه المشكله

تحياتي

[قديمك]

لاهنتى ع نقل الموضوع
انشاء للة بعد العيد يفعل القانون الجديد للمعاقين
الذي تم الصويت علية فى مجلس الامة ووقع علية
الامير حفظة اللة ورعاة وتم تعين مدير الهيئة للمعاقين
برئاسة د- جاسم التمار 4 نواب مدراء و11 عضو ويكون
لهم نصيب الاسد لانهم جزء من المجتمع ونسأل اللة
العزيز القدير ان يشفى جميع مرضانا واشكرآ ع لفت
الانتباة للفئة العزيزة ع قلوبنا لانهم جزء من المجتمع الكويتى .
وشكرآ

[حكاية شمس]

حياك الله يا محمد

صحيح ان البدايه في هذه الخطوه صعبه ولكن ليست مستحيله

محمد صرام

شاكره مرورك اللي اسعدني :)

[حكاية شمس]

ولا هان غاليك

متأملين حيل بها القانون ان يساعد اخونا على المشاكل اللي يعانون منها
بس هل وضع القانون انشاء مستشفى جديد خاص لذوي الاحتياجات الخاصه..؟
اظن انهم بحاجه له كثيراً..

الله يحميهم ويحفظهم فمع اعاقاتهم نجد ان طموحاتهم كبيره وكثيره

قديمك ..

شكرا لهذه الطله :)

[شعاع]

السلام عليكم ورحمة الله وبركاته



شلونش ياحكايتي ان شاالله تكونين باتم صحه وعافيه

موضوع رائع من انسانه اروع

بالنسبه لنظرة الناس للمعاق مادري اعتقد خلاص هذاك اول الحين لا يمكن مرات تكون خارج ارادة الانسان ولكن ليست بكثره.

اما بناء مستشفى خاص لهم مادري انا ماحبذ هالفكره راح تحسسهم انهم مو مثل باقي الناس

قولي يوفرون لهم اقسام خاصه بحيث يكون فيها دكاتره على علم ودرايه بحالاتهم

تدرين مستشفياتنا فيها جميع الاجهزه المتطوره والمكلفه ولكن لاتوجد خبرات اجهزه منظر بس اسم ان احنا جبنا .

فاقولش بالعكس المعاق مانعزله عن الناس ومانعامله غير عن الانسان العادي نحاول قدر الامكان ان نحسسه انك شخص عادي لانه يكون حساس من الناحيه هذي.


واسمحيلي على هالمداخله


تحياتي لش

[حكاية شمس]

وعليكم السلام ورحمه الله وبركاته

هلا باللي طول غيابه

الحمدلله بخير بس فاقده تواجدك من غير شر

مادري يا شعاع انا ما أعمم النظره هذي على الكل
والا راح تنفقد المصداقيه بس صدقيني موجوده
ولا يمكن اني احكم علي شي غصب عنهم والا احاسب كل شخص بنظرته والا ماراح انخلص :)

يا شعاع

انتي شفتي مستشفياتنا اللي ليما الحين يرممون فيها اي قسم خاص يقدر يتحمل الاعداد الكبيره للمعاقين باختلاف اعاقاتهم
بيني وبينج احصائية بسيطه

مع انها قديمه

بس نشوف

عدد المعاقين المقيدين في المجلس 25 الف

اعاقة حركية من الكويتيين 5486 معاقا

اعاقة حسية بلغ 2792 معاقا

اعاقة ذهنية بلغ 3417 معاقا

المعاقين عقليا بلغ 1019 معاقا

اعاقات مزدوجة 5627 معاقا

يعني شوفي الاحصائيات واحكمي

يعني باختلاف الاعاقات محتاجين اجهزه طبيه غير
وكل اعاقه تحتاج قسم لحاله واطباء متخصصين فيها
غير دكاتره الطب العام
فالعنايه فيهم صدقيني مو مثل العنايه بالشخص السوي

فحزت الصجيه هم يبون احد يراعيهم ولاهمهم نظره الناس

واجهزه منظر شنبي فيها اذا ما يعالجونا فيها انتي بس دشي مستشفى العدان والا الجهرا والا الصباح عجب عجاب والجو اللي يمرض المريض بزياده

. ونا اقول بالعنايه الطبيه نحتاج انا انعامله معامله خاصه فيه

يا حي الله راعيه الطله الحلوه

شعاع

سلامي لك :)

[شعاع]

هلا بش اكثر ياحبيبتي


وماتفقدين غالي فديتش


تدرين ليش قلت ان النظره اختلفت عن اول لان الحالات زادت مو مثل اول

اول كانو قله الحين كل مالهم بازدياد ومانقول الا الحمدلله على كل حال


مستشفياتنا مصيبه لاتكلميني عنها انا وانا انسانه مافيني الا العافيه بغيت اروح فيها والسبه مستشفياتنا

لكن ربنا ستر ولله الحمد


والله ياحكايه كل شي متوفر لكن شنقول في سوء التدبير


لو بنحكي مانخلص


لكن الله المستعان

والله يحييش ويبقيش ويخليش لعين ترجيش

وش ويش وش ويش :d


ههههههههههههههههههههههههههههههههههههههههههه


سويلش وش شوي

هههههههههههههههههههههههههههههههههههههههه

سلمش ربي من حر النار

وسلمي لي على روحش <<------------شلون مادري بس تعودنا نقولها


فديتش والله



تحياتي

[حكاية شمس]

احم احم .. شفت هلابش شيشتيني على عبد المجيد

لاتقولينها لي تراني على طريف :D

احم .. احم

يعني زادت الحاجه لها المستشفيات والرعايه الطبيه الخاصه فيهم

والحمدلله على نعمه الصحة اللي هي تاج على روسنا :)

بالنسبه لي انسي انروح مستشفيات الحكومه

قط فلوسك بالشمس ونام بالظلال

لو اقولش لاحظي الشين عن اللي اشوفه هناك بس نقول ربش المستعان

ياليت خطه التنميه يكون فيها بناء مستشفيات جديده وليست ترميم للمستشفيات القديمه

يابنت الناس ركبت ستلايت الحين ما قاموا يوشوشون وركبت معاهم بس ان شاء الله بركب الأوروبي واتحجى باليــــــاء ;)


وروحي اتسلم عليج وايــــــد :p

[شعاع]

روحي تحبش غصب عني تحبش :D


بنقلب الموضوع لتغزل في بعض :p


يابنت انا انشبت لي العب العب ياولد عمي يامحبوبي لزقت في لساني :p


وقلتيها قط فلوسك بالشمس ونام بالظلال

الله يعين


وبعدين يابنت انا لو اركب قمر صناعي بحاله ماتروح الوشوشه :D

علامة الجوده مانقدر


:p

[حكاية شمس]

هههههههههههههه

فديتها راعيه الوشوشه والله


حج يـا حاج


رمضان كريم يا بنت :p

اسعدتيني بمرورك يا ئمر :)

[نصــيرة الطاحوس]

تسلم ايدج على الموضوع ولااااهنتى

المعاقيين لاسف فئه مهضوووومه حقوقها

حتى القانون الى اقر حديثا من مجلس الامه ماااااااشاف النور ولاتطبق

بيفكروووون بمستشفى الله يكووون بالعون

[حكاية شمس]

ربي يسلمك يا نصيره الطاحوس ولا هان غاليك

فئة المعاقين مو مهضوم حقها الا ما لقت احد يلتفت لهم
ولا يطالب لهم الا القله ،،

ومن بعد اقرار قانون المعاق ،،

بدت سياسه التنفيذ اللي يعرقلها الروتين ،، وخوفي يخليها حبيسه الادراج


سؤال :
ليش مايفكرون لهم بمستشفى الديره صاير عندها فائض بالميزانيه وقضت على عجزها
بدال لا نرسل للشمال والجنوب والشرق والغرب نخلي دهنا في مكبتنا

نصيره الطاحوس


اسعدتيتي بتواجدك وكلنا أمل بالطاحوس وزملائه :)

[ريــم]

صباح الخير :)
الحين المشكله مو واقفه ع المستشفى المشكله هناك اشياء تعتبر من ابسط حقوق المعاقين وعلى سبيل المثال المواقف الخاصه عند الجمعيات أو المجعات أو أي مكان عام
هالشغله أنا أعاني منها كثير و " الأستيكرز " شكبره وواضح ع السياره
عشان أخوي اللي اصغر مني معاق بدنياً ولا ذهنيا الحمدلله تمام
تخيلي بعض المرات أكون أنا معاه بنروح مجمع أو جمعيه أو حديقه أو اي مكان لما افتر بالسياره حول المواقف الخاصه بالمعاقين تلقين كل السيارات حق الناس العاديين اللي ما يعانون اعاقات .. فاضطر اني اوقف السياره وانزل العربانه واقعده فيها وبعدين اوقفه على الرصيف وأروح ادور موقف وبعدين ارجع له ..
حتى هو يخاف ويقول لا تروحين وتخليني يعني هالناس ليش ما تحس بالناس اللي من هالفئه يعني ماراح يحسون إلا لمن يكون عندهم هالحالات وبعدين يقعدون يتذمرون ويسبون ويتنرفزون .
انا اسفه ع الاطاله
بس شفت اني لي علاقه بفئة المعاقين وقلت اقول اللي بخاطري
واوضح معاناه من معاناة المعاقين

ومشكوره يا حكاية شمس
على هالموضوع الجميل اللي تشاركين فيه المعاقين
وتأكدي ان المعاقين لما يقرون موضوعج راح يستانسون مو بس موضوعج اي موضوع يتكلم عنهم وعن الاهتمام فيهم ويحسسهم انهم من شريحة المجتمع وانهم من ابناء المجتمع اللي راح يكونون يوم من الايام في خدمة البلد مستقبلا
وع فكره <<< ماراح تخلص الظاهر :p
انا خليت اخوي يقرى الموضوع واستانس حيل وقال انا لما اقرى مثل هالكلام احس اني
مثلكم .. لما قال هالكلام كسر خاطري وقلت له انت مثلنا وما ينقصك شي .
اكتفي هنا بهذا القدر وقد يكون لي عوده <<< لا البنت قاعده لج قعده :p

[حكاية شمس]

صباح النور ومساء الانوار




اظن اهني تعتبر قيمه اخلاقيه يتعلمها الفرد وتدل على اخلاقه واحترامه للاخرين وحقوق الغير

فما اظن احد يرضى ان غيره ياخذ حق منه وهذا ينطبق على الاماكن الخاصه بالمعاقين
لو كل واحد يفكر ان وراه على طول جاي معاق ويبي مكان قريب من المجمع او السوبر ماركت او المستشفى واستشعر الالم اللي يعانيه كان راح يفكر ميه مره قبل لا يخطي هالخطوه

اختي ريم لا تعتذرين الا انتي زدتي الموضوع قيمه بمشاركتك لانك من القراب لهم وناقل حي لمعاناتهم

الله يخليلك اخوك ويسعدكم يارب

واهو مثلنا وان شاء الله احسن بعد وربي ماياخذ شي الا يعطيه شي اكبر من اللي اخذه منه

وحياج الله يا ريـــــم بكل وقت وناطرتج ترا :)