الوافد الجديد الى هجرة القليب

[عزتي في شموخي]

السلام عليكم ورحمة الله وبركاته
صباح الورد يا جماعه الخير
انا مدرس جديد وتم تعيني في هجرة القليب
اتمنى تفيدوني كم تبعد القليب عن الجبيل وكم تبعد عن الدمام
وكيف الخدمات في الهجره مع العلم ان البعض نصحني بالسكن في الصرار
واذا ترون ذلك فكم تبعد الصرار عن الدمام وكم تبعد عن الجبيل
وكيف الاجارات بالنسبه للعزاب مع العلم اني يا جماعة الخير ناوي ادوام من الجبيل او الدمام فهل تنصحوني بذلك
والله يوفقكم ويرحم والديكم .

[الــــســنـــافــــي]

انشاءالله يفيدونك الاعضاء

[ضابط جوي]

القليب من الجبيل تقريبا 150 / 170 كم

والصرار مسافتها من القليب 15 الى 20 كيلو

الصرار احسن لك من ناحية الخدمات

والله يعينك ان كان بتروح للجبيل او الدمام يوميا

من ناحية سكن عزاب ييفيدونك الاخوان

[عزتي في شموخي]

والله وسبعة انعام كذا تحمسون الواحد يتعين في ديار العجماااان والف شكر والله بس تكفون
ابي المسافه بالضبط بين الدمام والقليب والجبيل والقليب ومن وين الدرب يا ولد لا هنت ؟؟؟؟
واذا عندك بعد معلومة هل الطريق مسفلت الى مدرسة القليب الابتدائيه ام لا ؟؟؟؟
واذا سكنت في القليب انا رجال راعي كوره هل يوجد ملعب كوره نبي ننبسط و نكتب لنا ذكريات رائعه باذن الله ؟؟؟
والا يا جماعة الخير وش رايكم اسكن بالنعيريعه مع اني اذا بدقها مشوار 90 كيلو الله لا يهينني ادوام من الجبيل
واهم شي لا تنسون اقدر اداوم يوميا من الجبيل والا تعوذ من الشيطان واسكن الصرار
لان البعض يقولي الدرب مايخلى من الحلال والغبار والضباب ؟؟؟
والله يسعد من يرد علي وكل عام وانتم بخير قبل الزحمه .

[فهيد السفراني]

السلام عليكم المسافه من الدمام للقليب 250 او 260 تقريبا وبعيد عليك اداوم كل يوم من الدمام وحسلك تسكن بصرار الخدمات قريب وعندهم ملعب كوره
والله يوفقك وحياك الله فالوادي وكل عام وانتم بخير:)

[عزتي في شموخي]

ضابط جوي انا اشهد انك ضبطت جوي والف شكر
والسفراني >>>> وعليكم السلام والله يحفظك
بس عطونا اسعار الغرف للعزوبيه ويالله وش نسوي اذا شفنا المسافه طويله والله اني بسكن في الوادي والله يبقيكم جميع وهذا حال الدنيا وش نسوي الله يعيننا ماخلينا ولا ديره الا سكناها بسبة التعليم اللي ما ادري وشلون يوزعون العالم مع العلم اني من ضواحي الطايف لكن الحمدلله على كل حال ومالنا الا يوم 8 العيد نشد الرحال وارجع واقول لمن رد علي شكرا من الاعماااق .
وقبل لا انسى اي خدمه بالغربيه انا حاضر .
والا يالله يا عالم بحالي تزيل الهم عن قلبي تزيله .
واللي عنده واسطه يفزع لي واللي يبي ينقل محلي من الدمام والا الخبر لان بيني وبينكم ودي اتزوج واسكن المدينه وارتاح من ذا الهجوله والخطوط والكوره >>>> وش عنده ياسر القحطاني هههههههههههههههه والله يعين الظاهر اني من كثر ماتنقلت ابنجن .

[ناصر العظيمان]

عزتي في شموخي
7

يا مرحبابك ومسهلا في وادي العجمان

وعسى الله يسر امورك ويوفقنا وياك



وشكراً

[جلوي بن سبعان]

عليكم السلام ورحمه اله وبركاته

اول شي تم نقل موضوعك للقسم الخاص

ثاني شي مرحبا والله ومسهلا فيك في وادي العجمان بين ربعك وهلك

بنسبه لدوام اليوم من الدمام او الجبيل للقليب هذا مستحيل تعب والطريق خطر من الحلال

المسافه مثل ما قال اخوي فهيد السفارني من 250 او 260

واذا انت من عشاق الكره الصرار يلعبون يومي بعد الساعه 9 في الملعب

بنسبه لمدرسه القليب بتلقى فيها كل ما يسرك ان شاءالله من مدير لأصغر طالب

السكن موجود في الصرار بس لازم يكون معك قروب عشان توفرون على نفسكم الإجار

وهذا اللي عندي وسلامتك :)

[سالم العظيمان]

مرحبا فيك يا عزتي في شموخي

وحياك الله عند ربعك واخوانك في وادي العجمان

والاخوان بيض الله وجيهم ماقصروا في الرد على تساؤلاتك

مدام انك منت من سكان الدمام ولا الجبيل مالها داعي تسكن هناك
وتضرب مشاوير يومية متعبه من جميع النواحي وانشد مجرب :)

على العموم الصرار مدينه صغيرة متوفر فيها جميع الاحتياجات من سكن
و مراكز تجارية و خدمات عامه و دوائر حكومية

والقليب من الصرار مسافة 20 كم تقريبا يعني 40 كيلو احسن من 500 كيلو يوميا :)

والصرار من مدينة الجبيل مسافة 110 تقريبا على طريق ( الفاضلي ) المختصر
والشخص مهما سكن منطقه غير منطقته يبيله وقت بسيط ويتأقلم فيها
واهلها اهل طيب وكرم ولاراح تلقى إلا كل مايسر خاطرك

وحياك الله مره اخرى واتمنى لك قضاء اطيب الاوقات وامتعها وانتبه من ملاعب الوادي
لاتجيك اصابات والله الله في عوال الوادي بالدرجات الزينه :p < ماني بوصيك !

[عزتي في شموخي]

والنعم "للعجـمـان " مـافـيـه مـعــروف
قـول وفعـل مــا تنـفـع نـقـاط وحــروف
مـجــدٍ تـعــلا كـنــه سـهـيـل مـشـيــوف
دليـلـنـا فـــي مـدحـهــم فــعــل راكــــان

الاخ ناصر العظيمان >>>> الله يبقيك ويسمع منا ومنك ويتقبل صالح الاعمال
الاخ جلوي بن سبعان >>> الله يبقيك ويكثر خيرك وان شالله ربك ييسر الامور مع العلم ان القروب غير معروف .....يبي له وقت ...... وانا رجال كنت ادوام حول 160 من الدمام العام قبل الماضي والحمدلله على كل حال بالاضافه الى ان مسالة الكوره على قول اخواننا المصريين >> محسوبك لاعب نادي سابق وده ينتقل لنادي رسمي وعلى هذا الاساس تم اختيار السفر من الدمام او الجبيل
الاخ سالم العجيمان الله يبقيك ويكثر خيرك وخير من رد ان اشهد انكم مافيكم حيله وفالكم الجنه
والنعم والله فيكم وسبعة انعام اما بالنسبه لملاعب الوادي فالحافظ الله سبحانه
والطلاب لابد اني ارد لكم الدين فيهم وابشر بعزك لا عدمناك ماطلبت شي .

[رايه العز]

ارحب في ديار العجمان جعلها السيل والخييييييييييير
عساك التوفيق يا عزتي شموخي

[عبدالله بن مباركـ~.~]

الله لايهينك

اخوك عبدالله بن مبارك العجمي

[هـزاع]

أرحــــــــــــــــــب .. حياك الله في وادي العجمــان .. أنا ساكن هناك .. والصرار فيها ملعب مفتوح الصبح وعقب المغرب أنا ألعب هناك .. وأنصحك في السكن في الصرار وان ماجازلك سنعتك وانا اخيك .. واذا بغيت شي علمني أو بلغني عالخاص وأدزلك رقمي

تحياتي لك .. وحياك الله