الأمير محمد العبدالله ( المهّـاد ) ترتعد منه الارض قبل الرجال

[طـيـر شـلـوى]

السلام عليكم ورحمة الله وبركاته

محمد ابن عبدالله ابن رشيد ( المهاد )
يقال ان له هيبة ترعد من يقابله
ومنها مثلا دخول العوني عليه وعندما يشاهده وقع على الارض وهو يحبي حتى يصل اليه للسلام عليه
وعندما يقول قصيدة بالامير محمد ومع كل بيت يقوله العوني يرد عليه الامير محمد بقوله ( غصبٍٍ عنك ) ..

ايضا كانت تخشاه جميع القبائل الكبيرة مثل عتيبة والعجمان ولا ينقص هذه القبائل رجولة وفراسه وشجاعة وشهامه فهم اندادا ذو صلابة ومن القبائل المميزة في جزيرة العرب

موقفة مع الشيخ راكان بن حثلين
الذي هز الترك وجميع القبائل ومشهود له بالشجاعة والشهامه

كلنا يعلم ان حمود العبيد كتب قصيدة مدح بالشيخ راكان بن حثلين وكان رد الشيخ راكان قاسيا رغم ان الأمير حمود ابن عبيد ابن رشيد مدح راكان قائلا :

ياليل سلم الي جيت راكان ،،، سلم على زيزوم يام وامـيره

اليوم بالعـرب تقل جيـران ،،، ومن وين ما وجه تقفوا نشيره



وكان رد ابن حثلين الذي ادهش حمود ابن عبيد ابن رشيد واغضب محمد ابن عبدالله ابن رشيد :-
الاحسان يابن عبيد يجزى بالاحسان ،،، والشر تنطحه الوجوه الشريره


وزاد راكان وتمادى برده على حمود قائلا :
اليوم صاروا بالعرب تقل جيران ،،، ومن أين ما وجه تقفوا نشيره

وقال:
وحنا بديرتنا ولا جنب جيـران ،،، في شاية مايوازي جويره

حاميين ديرتنا بخيل وفرسان ،،، يوم ان كل له حدود وديره


ولكن بعد ذلك اشتد غضب الامير محمد ابن عبدالله ابن رشيد غضبا شديدا وقال لأبن عمه الامير حمود ابن عبيد ابن رشيد ان يتوعده بقصيدة وجهز لغزوا العجمان ..

فقال الامير حمود بأمر من الامير محمد ابن رشيد متهددا ومتوعدا :-

غديت مثل اقذار الله يبــلاك ،،، وعرضت يام للمحن والـــبلاوي

كم واحد في جرتك صار حواك ،،، من عقب ماهو من بعاد المراوي

قصيدك لي يابن حثلين خــلاك ،،، تضرب على طاش البحر ما تراوي


الي ان قال الامير حمود :-

حذرا عن اللي يوم حمر تنصاك ،،، وخلاك تمرح بالسيعي خلاوي


وتقول الكتب الموثقه انه تقبل هجاء حمود باحترام للامير محمد العبدالله وعتب على الامير حمود
عندما قال :
خطك لفى ياحمود والنذل يفداك ،،، وفهمت انا كلام النــحاوي

وتوي عرفت انك(سفيه!) بمعناك ،،، ولا تحسب انك في كلامك رهاوي


الي ان يقول :
وانا نذير يأبن الامجاد وانهاك ،،، هدية ان كان تبغى الهداوي !!


ويعف عن النيل من الامير حمود اكراما لصديقة الامير محمد ابن عبدالله ابن رشيد كما ورد بالكتب
والحقيقة ليست اكراما ولكن خوفا
قائلا:
ياما وياما يالسنافي ذخرناك ،،، في حشمة الممدوح* عطب الأهاوي

لاشك خليناك من شان ذولاك* ،،، ربع لهم ورد بيوم العزاوي


• الممدوح : الامير محمد بن عبدالله ابن رشيد
• ذولاك : المقصود به الامير محمد ابن عبدالله ابن رشيد


ورغم ذلك راى محمد ابن رشيد ان راكان يعتذر له من ناحية ويهاجم من ناحية فاعد العده وقرر ( غزو ) العجمان
ولكن كتب قصيدة اعتذار للامير محمد بن عبدالله الرشيد جعلتة يصفح عنه ويستقبله بمجلسة

عندما قال :

من باب برزان إليا باب نجران ،،، مهوب انا يالضيغمي انت اميره


( في روايه اخرى من مجنب البصره إليا باب نجران )


هنا تثبت قوة الرشيد شعريا ومكانة وخوف أيا كان مجاراتهم عندما يريدوا الغزوا


رحم الله الأمير محمد بن عبدالله آل رشيد

والأمير حمود ابن عبيد الرشيد

والشيخ راكان بن فلاح بن حثلين


تقبلوا تحياتي

[فيصل بن حجرف]

بسم الله الرحمن الرحيم
اخي العزيز قصيدة ابن رشيد اللي ارسلها لراكان كانت بعد معركة عروى بين ابن رشيد وعتيبة وقد ارسلها ابن رشيد مع ليل المتلقم وفاران يبشر فيها الشيخ راكان

يا ليل سلم لي ليا جيت راكان=سلم على زيزوم يامٍ وأميره
اليوم صاروا بالعرب تقل جيران=ومن اين ما وجّه تقفّوا نشيره
واذكر لهم بالكون طيحة غزالان=ثلاث مراتٍ بوجه المغيره(1)
يوم حضرنا فيه ليل وفوران=يومٍ على عروى تقطع غثيره
ان كان ابن هندي نوانا ببرزان=حنا على عروى قطعنا مسيره
جينا على وضح النقا عقب الآذان=ذبحت ******** الجمل بالمريره
جينا على ذروات عجلات الأقران=مستجنبين كل قبّا ظهيره
حصان الصّميد اللي يسمّى صنيتان=صيتٍ بلا جريٍ ووصوفه شهيره
ان جاك بالعرضه اليا تقل ديقان=يفزع بسيفه سلةٍ من جفيره
من كان باللقوات روغات الأذهان=ما ينقهر غاد الجدا من منيره
والسابق اللي عندكم يا بوسلطان=لها بوجهك شامةٍ مستديره(2)

وانت لم تذكر سبب القصيده في البداية


وبخصوص قولك((

وزاد راكان وتمادى برده على حمود قائلا :
اليوم صاروا بالعرب تقل جيران ،،، ومن أين ما وجه تقفوا نشيره ))

هذا البيت قاله ابن رشيد وليس راكان وهذا شي معروف وراجع القصيدة أعلاه وبسببه رد عليه راكان بهذا بالقصيدة التي منها:



سبيتنا سبٍ على غير برهان=ما تستوي هذا لزبن العشيره
وحنا بديرتنا ولا حن بجيران=في شاية اللي ما يوازي جويره
حامين ديرتنا بخيلٍ وفرسان=يوم ان كلٍ له حدودٍ وديره
من زان حنا له الزين خلان=وضرٍ اليا حرّك تزايد سعيره

وقصيدة راكان في رده على حمود الرشيد قصيدة واحده ولكن انت جزئتها بيت بيت وفصلت كل بيت على هواك
والقصيدة كاملة موجودة في المنتدى وهي:

يا راكبٍ من عندنا فوق شقران=خرزها بالخرج فوق النجيره
أوصل سلامي لأخو نوره ببزان=وعقب السلام تخبّره بالسريره
من باب برزان ليا باب نجران=ماهو انا يالضيغمي انت أميره
علمٍ لفانا فيه ليلٍ وفوران=استر قلبي يوم جانا بشيره
جا من حمودٍ شوق ميّاح الأردان=هو شوق من تزها الشقايق نظيره
عضيد أخوه بصادق الفعل ولسان=ودبّوس راس اللي دوابه مسيره
فرز الوغى لا جاء ثقيلات الأكوان=لا سل مصقول السّني من جفيره
خبّرتني يا حمود عن طير حوران=يومٍ على عروى تكسّر عويره
هلت مخاييله بردجٍ وسبهان=ما ينتميّز وردها من صديره
تذكر محمد جامعٍ نجع عتبان=ذخيرةٍ ياويّ والله ذخيره
الأمر قدره الولي عالي الشان=والا عتيبة ما عليهم قصيره
كرمان وان ركبوا الخيل فرسان=اليا اختلط عج الرمك بالمغيره
سبيتنا سبٍ على غير برهان=ما تستوي هذا لزبن العشيره
وحنا بديرتنا ولا حن بجيران=في شاية اللي ما يوازي جويره
حامين ديرتنا بخيلٍ وفرسان=يوم ان كلٍ له حدودٍ وديره
من زان حنا له الزين خلان=وضرٍ اليا حرّك تزايد سعيره
ما قل دل وزبدة الهرج نيشان=والهرج ييزي صامله عن كثيره

وكل الابيات اللتي جزئتها وعملت منها قصص من تأليفك موجودة في هذي القصيدة اعلاة

اما قصيدة حمود الرشيد:


غديت مثل اقذار الله يبــلاك =وعرضت يام للمحن والـــبلاوي

كم واحد في جرتك صار حواك =من عقب ماهو من بعاد المراوي

قصيدك لي يابن حثلين خــلاك=تضرب على طاش البحر ما تراوي

فلم تكن ردا على القصيدة اعلاة ، وانت الله يهديك خلطت الحابل بالنابل وجمعت موضوعين مختلفين لا علاقة لهما بالآخر في موضوع واحد لكي يتماشى مع قصتك الغريبة.

وانما كان مناسبة قصيدة حمود ابن رشيد عندما سمع قصيدة راكان عندما ضاع طيره وعمل قصيدة في مبارك الكبير يطلب منه طير
وهي البيتين اللتي ذكرت انها في ابن رشيد
وهي في الحقيقة من راكان للشيخ مبارك الكبير يطلب منه طير والقصيدة


ياما وياما يالسنافي ذخرناك=في حشمة الممدوح* عطب الأهاوي
لاشك خليناك من شان ذولاك*= ربع لهم ورد بيوم العزاوي

وانت قلت ان هذي البيتين من قصيدة لراكان بعثها لابن رشيد يعف عن حمود اكراما لمحمد ابن عبدالله الرشيد
وفي الحقيقة ان القصيدة هذي كانت مثل ماقلت سابقا موجهة الى مبارك الكبير(عدو ابن رشيد) يطلب منه طير والقصيدة هي

الطير يا ابن المشافيق يفداك=ابا العوض في الطير خطوا النداوي
اما اشقر(ن) يا شيخ مثلك وحلياك=قطّاع لا جاء الجول ماهوب ياوي
ولا اسمر(ن) جعل المنايا تعداك=شاهين يترك داغر الخرب هاوي
واقضب نصاب السيف وشده بيمناك=شدت انصابة ما تجيب المناوي
والله ما تعطيه يمناك يسراك =لاشفت ضربه من كبار البلاوي
من شاعر(ن) في حامض العلم باراك=والراس لك في كل حال(ن) فداوي
اسمع كلام اللي على العز ينخاك=واشهر واترك شور من كان ثاوي
وان كان تبغي العز والكل يدراك=افعل ولا تتبع ضعاف الهقاوي
وكان مبارك الكبير عدو ابن رشيد
فبعث ابن رشيد بهذه القصيدة للشيخ راكان
ويقول فيها:

قولٍ بلا فعلٍ به الناس تقفاك=والحكي ببلاش وشرب القهاوي
غديت مثل أقذار الله يبلاك=وعرضت يامٍ للمحن والبلاوي
كم واحدٍ في جرتك صار حواك=من عقب ماهو من بعاد المراوي
قصيدك اللي يا ابن حثلين خلاك=تضرب على طاش البحر ما تراوي
أذهبت يام في قصيدك بحمراك=وبعته برخيصٍ عقب ما نتب غلاوي
عقب العصابة والتعرض بالأملاك=تحلله من حمد ربك هناوي
لولا سعود جابكم يوم جلاك=تموت وانته كان دومٍ جلاوي
وقصيدتك بالطير خلت رعاياك=تحت نحور الخيل قرعٍ مهاوي
ما جاك شيٍ إلا بثر فعل يمناك=ولا بكثر الحكى هو والحداوي
وان طعت شوري حط حكيك عقباك=ولا تصيرٍ بكل حالٍ فداوي
ترى التفدوى ذمه الله لشرواك=بالهدى مذمومٍ ذبيح الكراوي
ذا قول من لاهو من الناس يذراك=لا هو هتيميٍ ولا هو حساوي
ما سال عن راس به الزوم شرواك=بالمجمعه بظلال عقب الاهاوي
وان كان تبغي النصح حنا نصحناك=ولا فراع النار به لك مكاوي
حذرا عن اللي يوم حمر تنصاك=وخلاك تمرح بالتسيعي خلاوي

وفي القصيدة ذكر ابن رشيد ان السبب هو قصيدة الشيخ راكان في الطير
ولا اعلم كيف فسرتها انت على هواك

وقصيدتك بالطير خلت رعاياك=تحت نحور الخيل قرعٍ مهاوي


وكان رد الشيخ راكان عليه بهذة القصيدة:


خطك لفا ياحمود والندْل يفداك=وفهمت انا معنى الكلام النحاوي
وتوي عرفت انك سفيه بمعناك=ولا تحسب انك في كلامك رهاوي
وان كان تبغي النصح حنا نصحناك=واخدْكلام النصح صدق شفاوي
واياك لا تفطر عيونك بيمناك=وترك كثير الهذْومه والهذاوي
وابليس لايرميك في بير الادراك=وتراك فيما قلت بالقيل غاوي
وانا نذيرك يابن الامجاد وانهاك=هديه كان تبغى الهداوي
وان طعتني ولا ترى قداك ماجاك=وربي حذف بك في كبار البلاوي
ياما وياما يالسنافي ذخرناك=في حشمه الممدوح عطب الاهاوي
لاشك خليناك من شان ذولاك=ربع لهم ورد بيوم العزاوي
ياحمود يامسكين ياما تركناك=مسكين ماتحمل ركوب ونخاوي
اخدْ كلام الصدق ماهي حكاياك=كلام من هو مقعد كل داوي
والله لونبغيك ان يطنب رغاك=وتقعد على المرحان ياحمود ثاوي
وان كان قصدك قيل حنا عطيناك=كانك لنظم القيل طرب وهاوي
ترى مشير السو جابك وخلاك=خلاك في جو وحيد خلاوي
دْكرت حمى ليت حنا حضرناك=حتى تضيع مروتك والهقاوي
ياليت حنا يوم جيتوا نطحناك=حتاه مايبقى لجمعك شلاوي
وادْكر نهار بلهيليطه جزرنك=طرحانكم مثل الخشيب متساوي

ومن قصائدة ايضا في تهديد ابن رشيد


ارفع شراع الحرب يا ابن رشيدي= جاتك موردة يام مما حداها
جَتك الجموع اللي تنوش البعيدي= يامية(ن) بالهوش تَروي قناها
شلف(ن) تَروي مقاضيب بِليدي= صوارم(ن) كان المشاعل سناها
تبغي غم(ن) لي وانا اليوم عيدي= رنّت مزامير السَّعد من سماها
ويا حزام لا جاء القدر ما يفيدي= وما دبَّر الوالي على النفس جاها
والقصيدة اطول من ذلك

هذة هي القصائد بمناسباتها ولا اعلم بكل صراحة كيف قمت بعمل هذة القصة الخرافية او ماهي الكتب اللي قلت في درك ان الكتب الموثقة تقول كذا وكذا مع انك لم تذكر ولا كتاب واحد

ولكن اكثر ماشد انتباهي هو مدحك من جهة والتهجم من جهة اخرى
فأنت تارة تمدح العجمان وراكان بن حثلين
وعقبها تقول
ويعف عن النيل من الامير حمود اكراما لصديقة الامير محمد ابن عبدالله ابن رشيد كما ورد بالكتب
والحقيقة ليست اكراما ولكن خوفا

سؤال بسيط اخي العزيز في حالة لو كان ماقلته صحيح
كيف عرفت انه عف خوفا وليس اكراما لمحمد الرشيد؟
ولماذا تحاول ان تنقص من قدر الشيخ راكان بقولك هذا الكلام؟ ولماذا لايكون عف عنه فعلا اكراما لصديقة محمد ابن عبدالله الرشيد؟
وانت اللذي تقول في اول موضوعك راكان اللذي هز الترك وجميع القبائل ومشهود له بالشجاعة والشهامه

فكيف ينقلب في ليلة وضحاها هذا الامير والفارس من هذة الصفات ويصبح جبانا يخاف ابن رشيد؟ وهو لم يخف من دولة الترك ؟

سبحان الله ولا حول ولا قوة الا بالله

[طـيـر شـلـوى]

يالغالي أنت ذكرت كل قصائد الشيخ راكان ولم تذكر إلا ثلاث أبيات للأمير حمود العبيد الرشيد وهو يهدد الشيخ راكان بن حثلين :-


قولٍ بلا فعـلٍ بـه النـاس تَـقْـفَـاك ********* والحكـي ببلاشٍ وشرب القهـاوي

غديـت مـثـل أقْـذَار الله يـبــلاك ********* وعـــرّضـت يـامٍ للمـحـن والـبـلاوي

كم واحـدٍ في جـرّتـك صار حـوّاك******* من عقـب ما هو من بـعــاد الـمراوي

قصيـدك اللي يا ابـن حثـليـن خـلاّك ****** تضـرب على طـاش البحـر ماتراوي

أذهبت يـامٍ في قـصيدٍ بحِـمْـرَاك ******** وبعتـه برخـصٍ عقـب مانتـب غلاوي

عقـب العِصَايـة والتعـرض بالأمـلاك ********* تَحَـلَـلّه مـن حـمـد ربـك هـنـاوي

لـولا سـعـودٍ جابـكـم يـوم جـلاّك *********** تـمـوت وانـتـه كـان دومٍ جـلاوي

وقصيدتـك بالطيـر خلّـت رعايــاك ********* تحت نحـور الخـيـل قـرعٍ مـهاوي

ماجـاك شيء إلا بثـر فـعـل يمناك ******** وإلا بكـثـر الحكي هو والـحداوي

وإن طعـت شوري حط حكيـك بمعناك ******* ولا تـصـيـر بـكل حــالٍ فـداوي

ترى التّـفَـدْوي ذمّـه الله لـشرواك********** بالـهـدي مـذمـومٍ ذبـيح الـكراوي

ذا قـولْ من لاهـو من النـاس يـدراك ********* لاهـو هـتـيـميٍ ولاهـو حـساوي

ماسـال عن راسٍ به الـزوم شرواك ******** بالمجمعـه بـظـلال عـطـب الأهاوي

وإن كان تبغي النصح حنّـا نصحـناك ******* وإلا فـراعِ الـنـار به لـك مـكاوي

ومك على اللي يـوم حمّـا تنـصّـاك ********* وخـلاّك تـمرح بالتّقـيعِي خـلاوي



------------------------------------

*المصدر"الأزهار النادية من أشعار البادية"-الجزء الثالث ص91-بتصرف

[طـيـر شـلـوى]

وهذه قصيدة الامير :- متعب الحمود العبيد الرشيد رداً على الشيخ راكان بن حثلين


الحرب يا راكان تـوّه جديـدي **** تركض به القرح وتـغــدي فــلاهـا

أمّا مشيت لنا على ما نـريدي ***** تاطاك درجات الرمك في حذاها

وعشيقك اللي مثل عين الفريدي **** دوك الدويش مقيّلٍ في حشاهـا



الامير / متعب الحمود العبيد الرشيد "رحمه الله" ....

[فيصل بن حجرف]

اول شي انت رديت على جزئية بسيطة من كلامي وتركت الباقي

انا ذكرت لك قصائد راكان

والقصدية اللي تقول اني ماذكرتها ارجع فوق وتلقاها
وقالها ابن رشيد حين قام الشيخ راكان بعمل قصيدة للشيخ مبارك الكبير يطلب منه طير بسبب طيرة اللي ضاع

وياليت ترد على كلامي كله
وخصوصا الجزء الأخير

اما ان تقول لي مصدر قصيدة الكتاب الفلاني
طيب انا معاك انها لابن رشيد ولكن ماهو سببها؟

ارجع للتاريخ وانت تعرف

[طـيـر شـلـوى]

انا (وأعوذ بالله من هالكمه) فرحت كثيرا لان من يحاورني صاحب الموقع وأبصراحه تمنيت أحد غيرك ،،،


ولاهنـت على هالمرور ،،


تحياتي لك أخي الكريم !!!

[فيصل بن حجرف]

السلام عليكم
اخي العزيز لافرق في هذا المنتدى بين صاحب موقع او عضو جديد
فكلنا اعضاء في هذا الصرح ونحاول الرقي به دون التجريح بأحد ودون المساس بشخص احد
واشكر لك حسن نقاشك اخي العزيز

[عـزام]

أبو عبدالله ما قصر رد عليك وعطاك زبدة الهرج وجاب القصايد كامله وبيض الله وجهه .

ومنها مثلا دخول العوني عليه وعندما يشاهده وقع على الارض وهو يحبي حتى يصل اليه للسلام عليه
وعندما يقول قصيدة بالامير محمد ومع كل بيت يقوله العوني يرد عليه الامير محمد بقوله ( غصبٍٍ عنك ) ..

اول شى ما نقول فى ابن رشيد شى ونعم فيه والله يرحمه ويرحم اموات المسلمين لكن حدث العاقل بما يعقل ترى كل حر وفوقه حر والرجال ما يضدها الا الرجال اما قولة اللى يدخل عليه يطيح داخل على سكنى مهوب على ابن رشيد.

وبعدين ترى الرجال اللى فيها خير وشيوخ صدق ما يشكون فى عمارهم يا شمرى اذا نصوهم الشعار ومدحوهم فى مكانهم عطوهم واكرموهم ما يقولون غصبن عنك.

وانا اشوف يا ابو عبدالله تحذف الموضوع هذا لان فيه تجريح لراكان وقبيلتنا وحنا ما نرضى بمثل هذه الاكاذيب والتفاهات فى منتدانا.

[ابوحمد الشامري]

مرحبا الف بالاخ العزيز طير شلوى :

عند ذكرك لحمود بن رشيد فهو ليس بشاعر هذا لانه يتكلم على لسان الفويه شاعر ابن رشيد ويوم قال القصيدةفي هجاء راكان قال له ابوه يا ولدي ترى يبي يجيك من راكان رد ما راح يسرك وانا اعرف راكان عدل مشى حمود في طريقه وارسل له قصيدة يحذر فيها الشيخ راكان ولكن الحشمة كما ذكرها في ابيات الشيخ راكان ماهيب لحمود بن عبيد بن رشيد ولكن لولد عمه محمد العبدالله اخو نوره صديق الشيخ راكان يوم قال :

وانا نذيرك يابن الامجاد وانهـاك=هديـه كـان تبغـى الـهـداوي
وان طعتني ولا ترى قداك ماجـاك=وربي حذف بك في كبار البـلاوي
يامـا ويامـا يالسنافـي ذخرنـاك=في حشمه الممدوح عطب الاهاوي
لاشك خلينـاك مـن شـان ذولاك=ربـع لهـم ورد بيـوم العـزاوي

ويوم قال حمود بن رشيد يذكر راكان بيوم حمى اللي ما حضره من العجمان الا اعداد قليله وكان في الحرب شمر ومطير يوم حمى:


حذرا عن اللي يـوم حمـى تنصـاك =وخلاك تمـرح بالنسيعـي خـلاوي

رد عليه راكان وقال متهكما من ابن رشيد ويذكره بيوم الهليطة :


دْكرت حمى ليت حنـا حضرنـاك=حتى تضيـع مروتـك والهقـاوي
ياليت حنا يـوم جيتـوا نطحنـاك=حتـاه مايبقـى لجمعـك شـلاوي
وادْكر نهـار بلهليطـه جزرنـك=طرحانكم مثل الخشيـب متسـاوي

وسوف اذكرك لك ماقاله المؤرخون يا طير شلوى :

قال ابن عقيل الظاهري :
إن ما كانت تخشاه القبائل العربية في زمن راكان هو شراسة وقوة قبائل العجمان وفي هذا الصدد قال حمود الرشيد :
إنه لا منعة للعجمان الا بالجوار والاحلاف بمعنى أنه لا يمكن ان تسلم من العجمان الا اذا جاورتهم او دخلت معهم في حلف نظرا لشجاعتهم وتنامي قوتهم
لهذا قال الشيخ راكان ردا على حمود الرشيد :

اليوم صاروا بالعرب تقل جيران= ومن وين ما وجه تقفوا نشيره
وحنا بديرتنا ولا حـن بجيـران=في شاية اللي ما يوازي جويـره
حامين ديرتنـا بخيـلٍ وفرسـان=يوم ان كـلٍ لـه حـدودٍ وديـره

ويؤكد ابن عقيل الظاهري هذا عندما قال:
هذا واقع تاريخي صحيح حتى قبل أن يولد راكان وهذه حقيقة ادركها راكان في فترات عمره ولم يمر على قبيلة العجمان اي ظرف يجعلها عاجزة عن حماية مراعيها فليس في قبائل البادية من داس حماها.
انتهى كلام ابوعبدالرحمن بن عقيل الظاهري.
وعندما احس محمد بن عبدالله بن رشيد انه ليس لطاقة شمر الا بالحلف والسلام مع العجمان خاصة بعد معركة حمى يوم هدد راكان ابن رشيد فكان عقد الصلح بين الشيخ راكان ومحمد بن عبدالله الرشيد حيث قال الشيخ راكان في هذه المناسبة قصيدة يوجهها الى محمد الرشيد:

يا عبيد يوم القمر ما بعد غاب = والليل طَرّف وادبحن النجومي
قم سو فنجال له الريق ينذاب= بعبا الشُّرب ناطحين العلومي
في دلةٍ تِبري خوا كل شرّاب= يعبا لها خمس المعاني لزومي
وأنا احمد الله واشكره حظنا طاب= من يوم زانت من عنان العزومي
جيته بلا خطٍ من الراس وكتاب=شاهدت وجهه وانجلنّا الهمومي
حرٌ سنا عينه كما وضح مشهاب= لا هَد ما يرفع جناحه يحومي
لا هد منه جملة الصيد هرّاب= واللي ينوش مخلبه ما يقومي
حدرت منه هجمةٍ علط الارقاب= شقح(ن) عليهن مثل وصف الرجومي
جينا وحركنا دواليب الاسباب= وهبّت لنا أيام السعد باليُمومي
وجينا نِقدي لابةٍ ما بها اجناب= من صُلب يام(ن) سالمين الوهومي
ياميةٍ قدهم على الحرب درّاب= سِقم الحريب اللي لراسه يُزومي
وخيل(ن) تجي الفين من غير حَسّاب= وحمر الجموع اللي بها الموت يُومي
رعده وبرقه غادي(ن) له تِلعاب= وغبّا مطرها نايفات الحزومي
بعويسجان هلت الوبل صبّاب=سيله يداوي ماضيات الحسومي
على النقا ما ذيّرت نشر الاصحاب= الاصحاب والجيران منها سلومي
زيزومها اللي لا احتمى الضد ما هاب= ياطي الثنادي للمعادي لطومي

ابو حمد الشامري

[العماني]

ابوعبدالله

ابو حمد الشامري

لاهنتوا على التعقيب والتوضيح للأخوان.وكفيتوا ووفيتوا

تقبلوا تحياتي،،

[محمد العتيبي]

اخوي الشمري الله يجزاك خير انت تمدح وتذم في نفس الوقت

ابن رشيد امير وفارس ماينكر هالشي لكن انك تحط القبايل خايفه منه ترى هذا مايجوز الله يرضى عليك

من اول محد يخاف من احد والقبايل والحكام ذبح وصلخ مع بعضها

تقول عتيبه تخاف من ابن رشيد طيب ليه ابن رشيد يقول بنفسه

( والله انها اربعين غزوه على عتيبه مره اكسرهم ومره يكسروني )

يقول التبيناوي مخاطباً أبن رشيد.. عندما رأه مجهز للمغزى

أهقولنا ياركبين العياسيب = أهقولنا وين اشقر الريش عادي
لاعاد من حايل لنجران اصاحيب = ألا عتيبه مثل حملاً ملادي

ويقول حمود الرشيد

ان كان ابن هندي نوانا ببرزان = حنى على عروى قصرنا مسيره

شلون عتيبه خايفه من ابن رشيد ورمز عتيبه الشيخ محمد بن هندي ناوي يغزي برزان قبل صباح عروى

ومقولة الشيخ محمد بن هندي المشهوره واضنك خابرها

( ان الله احياني لخليها تلزز متونها على قصر برزان ) وهو يقصد الخيل يعني المغزا

مانقول غير الله يرحمهم جميعا :)

[هبوب]

قصيدة حمود العبيد للشيخ راكان بن حثلين واللي مطلعها:

ياليل سلم الي جيت راكان ،،، سلم على زيزوم يام وامـيره

واللي رد عليها الشيخ راكان بن حثلين بالقصيده اللي منها:
من باب برزان ليا باب نجران ... ماهوب انا يالضيغمي انت اميره

هذي سالفتها لحال ومالها دخل بالقصيده اللي قالها حمود العبيد لراكان بن حثلين ردا على قصيدة الطير
قصيدة الطير اللي قالها راكان بن حثلين كان تحمل معاني سياسيه بعيده عن موضوع الطيور والقنص وهذا هو سبب ان حمود العبيد رد عليها بقصيدته اللي ذكرتو
وقصيدة الطير اللي وجهها ابن حثلين لابن صباح كان يحرض ابن صباح على انه يغزى ابن رشيد ويقوله بالقصيده اني بكون انا والعجمان معك وهذا اللي صار بمعركة الصريف

طير شلوى اتوقع انك لخبطت شوي بالقصايد واتمنى انك تتئكد شوي وتصيردقيق قبل تكتب :)
محمد بن رشيد كان صديق لراكان ابن حثلين
لكنه كان بينه وبين حمود العبيد مرادات بالقصيد وحمود العبيد كان هو الشاعر ماكان احد يكتب

اخوي العتيبي الموضوع ماجاب سيرة عتيبه ........ الموضوع كله راكان وابن رشيد وطير شلوى لخبط شوي بالقصايد يمكن عن دون قصد ...استغرب انا انك بكل موضوع عن شمر تدخل ابن هندي وتجيب مره حط السيف على راس ابن رشيد ومره يقول الخيل بتوقف على برزان
هذا مو موضوعهم هنا
خيول ابن هندي ماتعدت حدود منازل عتيبه ولا ذكر بتاريخ العرب والجاهليه ان عتيبه وطت ارض حايل لحالها او غزتهم ..

[محمد العتيبي]

هلا أخوي هبوب او اختي

معليه انا اعتذر يمكن اني توهمت اني شايف اسم ( عتيبه ) بالموضوع
والله ماادري بس شوفي انتي وتأكدي.

ايضا كانت تخشاه جميع القبائل الكبيرة مثل عتيبة والعجمان ولا ينقص هذه القبائل رجولة وفراسه وشجاعة وشهامه فهم اندادا ذو صلابة ومن القبائل المميزة في جزيرة العرب

ها وش الخبر؟؟؟؟:rolleyes:

تحيات اخوك محمد العتيبي

[النائب]

والله الموضوع ماله داعي والسالفة دايخه..والله يكثر من امثالك يالعجمان..الظاهر ان الشمري مايعرف المرازيق زين..ولايعرف عتيبة ربع ابن حميد.

[الساحق الماحق]

اقول يالهبوب انتي فيش شي الظاهر ان العيون عندش ظاربه انتي تقولين ان راكان قال لابن صباح انا بكون معك انا والعجمان وهذا اللي صار بالصريف الله يهديش الصريف وين ولراكان وين انتي تدرين متى مات راكان ومتى صارن الصريف وبعدين انا ماودي اكثر على ماقالو الربع وماقصرو بردودهم وانت يالشمري اقرا القصيد زين ولاترتبه على هواك

واخذها للمعلوميه احب القبايل للعجمان هم شمر وانت تدري؛ وشمر يقولون للعجمان (الرفاقه) وانا بعد احب شمر لكن انت تدورها من الله وماادري ليش انت كاتب الموضوع يعني تبي تقول ان راكان ذل من ابن رش والله حاله مثل ماقلت اقرا القصيد زين وانت تعرف بس اقراه ولاتقعد تحرفه على هواك

[العساس]

وانت يالشمري اقرا القصيد زين ولاترتبه على هواك

واخذها للمعلوميه احب القبايل للعجمان هم شمر وانت تدري؛ وشمر يقولون للعجمان (الرفاقه) وانا بعد احب شمر لكن انت تدورها من الله وماادري ليش انت كاتب الموضوع يعني تبي تقول ان راكان ذل من ابن رش والله حاله مثل ماقلت اقرا القصيد زين وانت تعرف بس اقراه ولاتقعد تحرفه على هواك
[line]
ياالساحق (( الرفاقه)) قبل الغدر في حمى وخيانة العهود مع العجمان شف قصيدة
الفارس الشاعر سيف بن غزيل ا لشامري رحمه الله يحرض قبيلته العجمان على ابن رشيد بعد غزوة حمى
يالضيغمي طاوعت شور المغوين....... بواقة الجيران بين الثنايا
بقت العهد فينا وحنا مغرين...... من صوب شمر ما نرد الرعايا
لا تحسب انا بعد حمى بناسين....... بسبابها راحت ليام حمايا
ناتيك سيرات مع الصبح ماشين...... بأمر الولي نجعل قصورك جثايا
تر حن على الحكام ياشيخ عاصين...... ناطا دماغ الشيخ وطي الحذايا
ياليت حن عند المضاهير ياحسين.... ناتي لزينات الخلاخل فدايا
نكسر نصاب السيف عند المتلين ......لعيون من يركض بعوج الحنايا

[الساحق الماحق]

مرحبا بالعساس

صحيح انهم غدرو في حمى والسبب وانت تدري من الدويش اللي منقطعه كبده على ذبحة العجمي ويوم قالها سيف جعل عظامه في الجنه قالها من القهر اللي شافه وانت تدري وش قاله راكان وانه بيرد الحلال من دون حرب بس سيف يوم قال قصيدته ذي درى راكان باللي في نفوس ربعه وقال قصيدته اللي فيها رد على ابن رشيد

غار صارت ياشيخ وانا ماعاد بيدي لاعـاد نقدرهـا ولا الله رفـاهـا

وعقب الوريعه تصالحو بينهم وانت تدري ان احب القبايل للعجمان هم شمر والدواسر .

[هبوب]

لو القصائد تكتب بدون تعليقات يكون افضل لان اللي نشوفه ان كل واحد يعلق على القصائد باللي تهوى نفسه وباللي بصالحه وصارت منتديات القبائل مسرح للتخانق والتكذيب

وكبار السن من كل القبائل لو يقرون هاللي ينكتب والله ينقدون على هالجيل
اذا اخطأ احد يصحح له باسلوب حلو ومؤدب وباشراف المراقبين

[هبوب]

لو القصائد تكتب بدون تعليقات يكون افضل لان اللي نشوفه ان كل واحد يعلق على القصائد باللي تهوى نفسه وباللي بصالحه وصارت منتديات القبائل مسرح للتخانق والتكذيب

وكبار السن من كل القبائل لو يقرون هاللي ينكتب والله ينقدون على هالجيل
اذا اخطأ احد يصحح له باسلوب حلو ومؤدب وباشراف المراقبين

العجمان وشمر مافيها كلام انهم كانو اكثر قبيلتين متقاربتين ومتسالمتين ...
وعسى الله يديم المحبه ..